![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F3b%2Ff7%2F3bf7a2677ee89a0fdc835e9412797e5885e77627%2F3bf7a2677ee89a0fdc835e9412797e5885e77627.jpeg/full/!250,/0/default)
Epinukunuku ewe Samon
Nuku wewen pwe epinukunuku Kot non fansoun och me ngaw, ina mwo ika epwe pachenong ekkoch riaffou tori ach sipwe kuna An pwarano an manaman fan itach.
Pwi me fefinei achengicheng, kich meinisin sia atapwana—ese wor emon pwe fen ngang—ren sipwe ausening afanafanen nesoponon seni nouch soufos mi achengicheng, Preseten Russell M. Nelson. Ei mwichenap a fen amwarar, nge a iei oruwen fansoun ewe semwenin COVID-19 a ekkesiwini ach orenien chufengen. Sia ennetin chipwang ren ei semwen mi paras, sia mochen chok utau mokurach. Nikinikin pwe, ekkoch me nein Pwi kewe ra fen fori. Opwe sinei pwe aua iotek fansoun meinisin fan iten ekkewe mi fen riaffou ren ei semwen, napengeni ekkewe mi fen mano atonger kewe. Kich meinisin sia tipeni pwe a fen fansoun nangatam, nap seni met sia mochen.
Epwe ifa taman ach sipwe ewitiwiti ngaseno seni riaffou a fis ngeni kich? Nge met ifa taman ach sipwe engino ngeni ach sossot nupwen sia witi me witi, ngo aninis usun a mang ne wareto? Pwata mangeno atun choun weires a kon usun nap seni ach sipwe tongeni mwarei?
Nupwen ach eis ekkei kapaseis, sipwe mwan, ika atufichi ne, rongorong an emon kechiw a tonomeinin seni ew nenien kanapus mi rochopwak me posening non ew fansoun patapat mi nom non puken mak non ena neni.
“O Kot, ifa en?” sia rongorong seni anonnonun Liberty Jail. “Me ifan ewe imwen eppet ewe a pwonano om nenien opw? Ifa tamen fansoun omw kesap awora aninis?”1 Ifa taman, O Samon, ifa taman?
Iwe, esap kich ekkewe aewin ika amuchunon sipwe eis ekkei kapaseis nupwen netipengaw a torikich ika ew metek non netipach a chok fis me fis. Iei use kapasen usun semwenin unusen fonufan ika kanapus nge ren en, om famini, me chon orum kewe io ir mi kuna ekkei osukosuk. Ua kapas usun ewe siongawen chommong ra mochen repwe pupunu nge rese ika ekkewe ra fen pupunu ngo aneanei nefinerewe epwe ekis kan ngeni Kot. Ua kapas usun ir ekkewe a torir semwen mi watte—meni ew ese tongeni chikar—ika ekkewe ra weri ew semwenin ter non unusen manauer ese wor safeian. Ua kapas usun soposoponon weiresin netip me osukosuken non mokur ewe a achou netipen chommong ir mi riaffou rer, me won netipen ekkewe ir mi tonger me fitir ne riaffou. Ua kapas usun ekkewe mi woungaw, ekkewe ewe Chon Amanau a urenikich sisap monnukireno, me ua kapas usum om witiwitin noum semirit epwe niwinsefan, ese pwan nifinifin ier, ewe a finata ew aan mi sokkono seni ewe ka iotek pwe i epwe fiti.
Soposoponon, ngang mi fat pwe pwan mwo ei chammongun tettenin mettoch ren met sipwe pwisin ewitiwiti esap ew mettoch epwe satuni ne atawei osukosuken watten aurekin moni, muun, me mwicheich mi ungenikich meinisin. Samach won Nang a wesen mochen pwe sipwe porous usun ekkei osukosuken neni mi aweires pwan ach pwisin osukosuk, nge epwe wor fansoun non manauach nupwen mwo ach achocho non pekin ngun me ennetin, sio non iotek esap awora ach winnei ewe sia mochen, ika epwe ren usun watten osukosuken fonufan ika ach kewe pwisin. Iwe nupwen sia angang me witi fengeni ponuwen ekkoch ach iotek, ua ngenikemi ai pwonen emon chon kuno pwe Kot a fen rong me a fen ponuweni, inamo meni esap non ewe fansoun sa mochen ika fen non ewe napanap sia mochen. Nge ir mi ponu fansoun meinisin non ewe fansoun me non ewe napanap emon Kot me sam ika in mi uren umoumoch epwe ponuwenir. Pwi me fefinei achengicheng, ouse mochen weweiti pwe I ewe ese tongeni aiesum are annut2 a ekieki pwapwan me unusen fefeitan Noun kewe a atekiatai seni mettoch meinisin ena emon mi ning epwe fori. I mi tong nimenimoch, uren ning, me Sam Umoumoch ina Itan.
“Are, ika epwe ina,” eni kopwe fen apasa, “pwata chok An tong me umoumoch ese tongeni eimufeseni ach Setipar me mut ngeni kich sipwe pwereu seni ach osukosuk won fonu mi pwasapwas? Ita ururun epwe tinato machangen ei 21-fansoun repwe changeto seni ekis ar repwe enieno ach osukosuken 21-fansoun nifichifichimas?
Ponuwen ei sokkun kapaseis pwe “Ewer, Kot mi tongeni mwitir awora manaman, nge ekisino ika inetechok sipwe kaeo pwe ekkewe kunokun me fansoun ach sai won fonufan ir An me An chok an epwe emweni.” I a aota ena pwinin maramen emon me emon kich. Ren emon me emon aramas mi semwen a mwitir chikar nupwen a witiwit an epwe tonong non ewe Konikin Bethesda,3 pwan emon a nom 40 ier non ewe fonupon a witiwit an epwe tonong non ewe fonuen pwon.4 Ren emon me emon Nifai me Liai mi eppet me ren ew ekkei mi rokopwanino pokiten ar nuku,5 mi wor emon Apinatai a kareno ren ew nenien ekkei pokiten an nuku.6 Me sia chechemeni pwe ewe chok Elijah a mwitir koratiw ekkei seni nang an epwe pwarata ne ungeni ekkewe prist non Baal7 inai ewe chok Elijah a engino ngeni ew fansoun nupwen ese wor pungun ran ren ekkoch ier me ewe, ren och fansoun, a mwongo och kukun mettoch a tongeni uwou me ne poun emon raven.8 Ren ai auku, ena esap mwo nge och mettoch sipwe aita ngeni “anen semirit.”
Ewe popun? Ewe popun pwe nuku wewen epinukunuku Kot non fansoun och me ngaw, ina mwo ika epwe pachenong ekkoch riaffou tori ach sipwe kuna Poun an pwarano an manaman fan itach.9 Ena mi tongeni weires non ach ei fonufan ikenai nupwen chommong ra nuku pwe ewe mettoch mi murino non manau pwe sipwe su seni riaffou meinisin, pwe esap wor emon epwe riaffouiti och mettoch.10 Nge ena nukunuk esap tongeni emweni kich ngeni “ukukun tekian an Christ we manau mi unusoch.”11
Fiti omusomus ngeni Elter Neal A. Maxwell ren ai pwaracho ne siwini me anapano och mettoch i a fen apasa akkom, ua pwan fiti ne apasa pwe “manauen emon … ese tongeni repwe ruu non uren-nuku me eseor-weires.” Esap mecheresin tufich “ach sipwe chok manau non sise sinei met,” me apasa nupwen sia unumi pwan ew kapen nemonaid, “Samon, ngeniei manauoch mi murino, nge tumunoch kosap ngeniei netipeta, ika riaffou, ika metek, ika koput. Kose mochen kosap mut ngeni emon epwe oputaei ika amam ngang, me akkaewin, kosap tongeni mut ngeniei upwe mefi peutmwanino me Reom ika ekkewe ua tonger. Ennetin, Samon, kopwe tumunoch ne eppetiseniei ai upwe weri ekkewe mettoch meinisin minne a fori En mi pin. Iwe nupwen, an ekkoch eriafou me fitikoko a wesino, kose mochen mut ngeniei upwe nonnom Reom, ikewe ua tongeni sikasini usun nonnon ach pochokun me napanapach nupwen ua pias won ai kuchun kinamwen ai foforun namanam.”12
Pwi me fefinei achengicheng, Namanam mi awora mecheres, nge fan chommong ese kinamwe. Ewe aanen ngeni mei pin me pwapwa ikei me mwirinnon mi ew aan mi tam me fan ekkoch weires. Epwe tam fansoun me achochon ne fetanei. Nge, ennetin, niwinin ach fori mi fokkun watte. Ei pung mi keit non fatafatoch me pesepes me non sopwun 32 non Alma non ewe Puken Mormon. Mi wor emon prist mi nap a asukuna pwe ika ewe kapasen Kot a fot non netipach nupwen mi chok efou foun ira, me ika sia tumunochu ne atutu, nimeti, tumunu, me pesei, epwe uwani foun ira non fansoun mwach a uwa “minne mi fokkun auchea, … ngarangar nap seni mettoch mi ngarangar meinisin,” ach mongonong epwe efisi ach sisap chiwen kaka me sisap chiwen echik.13
Chommong nesen sia kaeo me non ekkei sopwun mi amwarar, nge auchean ngeni meinisin ina ewe nongonong pwe ewe foun ira epwe tumun me sipwe witi an epwe marino, sia “[esuku] mwach memesa non nukunuk ngeni uwan we.”14 Ach kinikin uwa, Alma a apasa, epwe feito “non an fansoun.”15 Esap pwata a osopwano an kapasen ourour ren an enniwini fan unungat ew kokkon ren achocho me tipepos ne tumunu ewe kapasen Kot non netipach, “witiwitin ren an apasa, fiti “engino … an ewe ira epwe uwani foun ira ngenikemi.”16
COVID me cancer, tipemwaramwar me mairu, osukosuken moni me sossotun famini. Inet ekkei chou repwe wesino? Ponuwan pwe “non an fansoun.”17 Me ika epwe ew fansoun mwoch are ew mi tam esap kich chon finata, nge ren ewe chenin Kot, ekkewe feioch repwe fis ngeni ekkewe mi nikitu ngeni ewe kapas allimen Jises Kraist. Ena feioch a fen fis non ew atake mi wesen monomon me won ew chukuchukuta mi pwapwano non Jerusalem me nom.
Nupwen sipwene rongorong nouch soufos achengicheng epwe osopwano ei mwichenap, amwo sipwe chechemeni, usun Russell Nelson a fen pwomeni unusen manauan, pwe ekkewe ir mi “epinukunuku ewe Samol pwe epwe anisir repwe pochokun sefan [me] epwe ne feifeita non poun mi akkas ussun chok ekkewe iken; repwe ne ssa, nge resap mo mefi pekus; … repwe ne fetan, nge resap mefi apangapang.”18 Ua iotek pwe “inet me inet”—mwitir are mang—ekkena feioch repwe fis ngeni ami meinisin mi kutta ngaseno seni ami riaffou me ngaseno seni ami netipeta. Ua pwarata usun an Kot tong me usun ewe Niwinsefaniton An kapas allim mi ning, minne a, ren ew aan ika pwan effoch, ewe ponuwen ren meinisin mettoch kich mi weri non ei manau. Non itan ewe a angasakicheno ewe Samon Jises Kraist, amen.