Ua Nuku non ekkewe Chon Nang
Ewe Samon a senei ekkewe osukosuk oua kuna. A sineikemi, A tongeikemi, me ua pwon, Epwe tinato chon nang ar repwe anisikemi.
Pwi me fefinei, ngang ua nuku non chon nang, me ua mochen aporausa met a fis ngeniei ren ir. Ren ai fori ei, ua anean me iotek pwe sipwe esina auchean ekkewe chon nang non manauach.
Ikei an Elter Jeffrey R. Holland kewe kapas seni mwichenap me nomw: “Nupwen sia kapas usun ekewe ra angangech non peun Kot, ra achema ngenkich pwe esapw chon nang meinisin ra feito seni ewe epek ren ewe veil. Ekkoch ir kich mi fefetan me kakapas ngenir—ikei, iei, iteiten ran. Ekkoch ir mi nom non neniach kewe. … Ennet, a usun ita nang a karap nupwen sia kuna an Kot tong a pwari ren kirokirochun me achochon aramas mi aramasoch me unusoch a usun ita ir chon nang” (“The Ministry of Angels,” Liahona, Nov. 2008, 30).
Ua mochen kapas usun ekkewe chon nang ra nom won ei pekin ewe eppet. Ekkewe chon nang ra fetan rech iteiten ran non manauach mi achema ngeni kich usun an Kot tong fan itach.
Ekkewe aemonun chon nang upwe kapas usun akkomwan ir ekkewe ruemon fefin misineri ra aitiei ewe kapas allim nupwen ngang emon anuon: Sister Vilma Molina me Sister Ivonete Rivitti. Ngang me fefinei kukun aua na fiti eu urumot an Mwichefen ikewe ia aua churi ekkei ruemon chon nang. Use tepereni ifa ukukun ewe urumot ese pwan tam an Mwichefen epwe siwini manauei.
Semei inei me pwi kewe rese mochen kaeo usun ewe Mwichefen non ena fansoun. Rese pwan mochen mut ngeni ekkewe misineri ar repwe nom non imwem, iwe ua kaeo seni ekkewe misineri non ewe imwen fan. Ewe kukkun rum non ewe imwen fan a winiti ai pwisin “neni mi pin.”
Ew maram mwirin ekkei chon nang ra aitiei usun ewe kapas allim, ua papatais. Non ena atun ua 16 ieri. Nge sonapan, ese wor sasingin ena fansoun mi pin, nge mi wor sasingin ngang me fefineiwe nupwen aua fiti ewe urumot an Mwichefen. Upwe afatata ion a nom non ei sasing. Ngang ewe mi tam won ewe peniemwan.
Usun oua tongeni weweiti, a weires ai upwe sou fiti fan nupwen ngang emon anuon a keran siwini manauan me an famini rese pwan fiti ei.
Nupwen ua achocho ai upwe siwini manauei, fiti ew mwich mi fo, me chiechie mi fo, ua mefi pwe ese wor neniei. Fan ekkoch ua mefi akanamon me netipengau. Ua sinei pwe ewe Mwichefen mi ennet, nge use mefi pwe mi wor neniei me non. Nupwen use menemenoch me use sinei met upwe fori ua achocho ai upwe nonnom non ai namanam minafo, ua kutta pochokun ai upwe fiti ew mwichenapen serafo ren unungat ran, ua ekieki pwe upwe kutta chienei minafo. Iei fansoun ua churi emon chon nang, itan Mônica Brandão.
A minafoto ngeni ewe neni, a feito seni pwan eu kinikinin Brazil. Ua mwitir kuna i me, ua feioch, pwe a etiwaei pwe chienan. Ua ekieki pwe a chok nengeni netipei esap napanapei me nukun.
Pokiten a chiechi ngeniei, ua pwan chiechi ngeni chienan kewe, ra pwan winiti chienei me aua fiti chommong mwichen serafo fengen. Ekkei mwichen urumot a fokun aucheanap ren ai fiti ei manau minafo.
Chienei kewe ra wesewesen anisiei, nge pokiten chon imwei kewe rese aitiei are tipeew ngeni ai kaeo usun ewe kapas allim a sopweno ne osukosuka ai ekesiwin. Ai fiti mokutokuten ewe kapas allim ren ewe Mwichefen a unusen auchea ren ai ekesiwin. Iwe ruemon pwan chon nang ra feito seni ewe Samon ar repwe aninis.
Emon me neir inai Leda Vettori, nei sensen-semeneri nesosor. Ren an kewe klas mi uren tong me mirit, a ngeniei ewe “kapas mi öch an Kot” (Moronai 6:4), minne mi namwot ngeniei iteiten ran. A anisiei ai upwe angei pochokun non pekin ngun ai upwe nikitu.
Pwan emon chon nang a tinato an epwe anisiei ewe presetenin Mwichen Anuon, Marco Antônio Fusco. I a wisen chienei ne feino fori angangen sensen imw. Ina mwo use mwirit me mi sokono napanapei, a awisa ngeniei ai upwe afanafan non am mwichen prist me pwan am churi aramas ren am fori angangen sensen imw. A otufichiei ai upwe angang me kaeo me usap chok emon chon katon ewe kapas allim. A nuku non ngang, nap seni ai pwisin nuku wei.
Kinisou ngeni meinisin ekkei chon nang, me pwan chommong ekkewe ua kuna non ekkei ierin nekukuni mi auchea, ua angei pochokun ai upwe nikitu won ewe anen pwon mi pin nupwen ua angei ai kapasen pwarata usun ewe ennet.
Me oua sinei met, ewe fopun emon chon nang, Mônica? Mwirin am me ruemon auwa fori angangen misineri, am auwa pupunu.
Ua nuku pwe esap ren aksiten chienem kewe mi och, wisem non ewe Mwichefen, me am kaeo ewe kapas mi och an Kot mi nom non kokkotun anisikem pwe aupwe pupunu. Preseten Gordon B. Hinckley a aitikich:“Ese mecheres ach sipwe siwini manauach ren ach fiti ei Mwichefen. Wewen sipwe kouno ne fori mettochun nom. Wewen sipwe nikitano ekkoch chienach kewe. Naman epwe wewen sipwe siwini ekkoch mettoch sia nuku non. Naman mi namwot sipwe siwini mettoch sia sou fori are mon. Fan chommong epwe wewen pwe mi or memefin anaemon me pwan nuokusun ren mettoch sise sinei. Mi namwot epwe wor aninis me apochokun non ei fansoun mi weires non manauan emon mi keran fiti ewe Mwichefen” (“There Must Be Messengers,” Ensign, Oct. 1987, 5).
Mwirin a pwan aitikich, “Mi wor unungat mettoch mi namwot ngeni emon me emon ir: chiener, wiser, me ar kaeo ewe kapas mi och an Kot‘” (“Converts and Young Men,” Ensign, May 1997, 47).
Pwata ngang ua aporausa ekkei mettoch ngenikemi?
Akaewin, pwe upwe kapas ngeni ekkewe minne met a fis ngeniir iei a usun met a fen fis ngeniei. Naman ami mi keran fiti ewe Mwichefen, are oua pwan niwinsefan ngeni ewe Mwichefen mwirin ekkis fansoun, are oua mefi pwe ese wor neniemi. Kose mochen kosap fangeno ami achocho ne fiti ei famini mi watte. Iei ewe ennetin Mwichefenin Jises Kraist!
Ren ami pwapwa me ami fefeita, oupwe feioch ren ami sopweno ne achocho. Oupwe feioch ren ami siwini manauemi me met oua sou fori. Ewe Samon a senei ekkewe osukosuk oua kuna. A sineikemi, A tongeikemi, me ua pwon, Epwe tinato chon nang ar repwe anisikemi.
Ewe Chon Amanau a pwisin apasa pwe Epwe feino mwen mesach. Ngang upwe nom won peni mwanich me penifefin, me Nguni epwe nom non [netipemi], me nei kewe chon nang repwe nom nukumi, ne apochokunakemita (Doctrine and Covenants 84:88).
Ewe oruan popun ua aporausa ekkei mettoch pwe upwe kapas ngeni chon ewe Mwichefen meinisin—ngenikich meinisin. Sipwe chechemeni pwe ese mecheres ren ekkewe mi keran fiti ewe Mwichefen, chienach kewe mi niwin, me ekkewe mi sokono manauer ar repwe mwitir kuta nenier. Ewe Samon a sinei ekkewe osukosuk ra kuna, me A kutta chon nang mi mochen aninis. Fansoun meinisin ewe Samon a kutta aramas mi mochen winiti chon nang non manauen ekkoch.
Pwi me fefinei, ami mi mochen oupwe emon chon angang non poun ewe Samon? En mi mochen kopwe emon ekkei chon nang? Pwe oupwe emon chon pwarata, seni Kot, won ei pekin ewe epet, fan iten emon A aureki ren? Ami mi auchea ngeni I. Ami mi auchea ngeniir.
Ennet, nouch kewe misineri mi tongeni anisikich fansoun meinisin. Ir mi nom ikena fansoun meinisin, ra akkoman ne mochen fori ei angangen chon nang. Nge ir chok rese naf.
Ika oupwe neneoch fetan oupwe kuna pwe mi wor chommong ra mwochen aninis seni emon chon nang. Naman ekkei aramas resap uffof uf mi pwech, skato, are uffen Raninfel. Naman ra mommot anamon, non nepwokukun ewe imwen fan ika nenien sukun, fan ekkoch ra mefi pwe ese wor emon mi tongeni kuner. Naman stainin mokurer mi sokono are mi sokono ar kapas, nge ra nom me ra achocho.
Naman ekkoch repwe ekieki: “met upwe sopweno me niwinto? Upwe sopweno ne achocho?” Naman ekkoch repwe ekieki ika epwe wor fansoun nupwen repwe mefi pwe aramas ra etiwer me tongeir. Chon nang mi mwochen, non ei fansoun; chon nang ekewe ra mwochen peutano met ra sani ar repwe epechekunereta; “[aramas kewe ra] unusech me nimenimech chon nang in chok ew pworous uwa ekieki [uwa tongeni awewei ngeni]” (Jeffrey R. Holland, “The Ministry of Angels,” 30).30).
Pwi me fefinei, ua nuku non ekkewe chon nang! Kich meinisin mi nom ikei ikenai, ew mwichen chon nang mi kefinita ren ekkei ran soponon, pwe sipwe iamwir ngeni ekkoch pwe kich poun ewe Chon For mi tong. Ua pwon pwe ika sia mochen fangeno ach aninis, ewe Samon epwe ngenikich tufich pwe sipwe chon nangin iamwir. A sinei ion e mochen aninis seni chon nang, me Epwe emwenikich ngeniir. Ewe Samon a wato ekkewe mi mochen aninis seni chon nang iteiten ran ngenikich.
Ua unusen kinisou ren ekkewe chommong chon nang ewe Samon a uweato non anen manauei. Ir mi fokun auchea. Ua pwan kinisou ren An kapas allim minne a anisikich ach sipwe siwin me a otufichikich ach sipwe fefeita.
Iei ewe kapas allimen tong, ewe kapas allimen iamwir. Ua pwarata ekkei mettoch non iten Jises Kraist, amen.