![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F11%2F0e%2F110eb8a4c7788055c32c1e790c87835075d5bfbf%2F110eb8a4c7788055c32c1e790c87835075d5bfbf.jpeg/full/!250,/0/default)
Mut ngeni Nikitu epwe Angang Unusoch, me Anneanir Meinisin pwe Pwapwa!
Nupwen sia tipepos, ach nuku epwe napeno. Nupwen ach nuku a napeno, iwe pwan ach pwapwa.
Ruu ier a no, pwi we kukununon, Chad a sopono. An ewe a no senikem a nikiti netipeta non netipen punuwan ewe, Stephanie; nour kewe ruemon kukkun semirit, Braden me Bella; pwan tori meinisin chon ewe famini. Am ouwa kuna chip me non kewe kapas an Elter Neil L. Andersen non ewe mwichenapen mwichefen non ewe wik me mwen an Chad epwe mano: “Non ewe sosotun fonufan, nikitu ne feinno mwom, me ewe manamanen echikara an ewe Chon Amanau epwe wato saram, mirit, kinamwe me anean” (“Wounded,” Liahona, Nov. 2018, 85).
Mi wor ach nuku non Jises Kraist; aua sinei pwe aupwe pwan chu sefan ngeni Chad, nge ren am aause chiwen kuna inisin mi ametek! Chommong a pout senir atongeer. A weires ach sipwe nikitu me witi ewe fansoun sipwe chusefan ngenir.
Ewe ier mwirin an ewe ma, ussun aua mefi kirochen ew kuchu a ochuno kem. Am ouwa kutta nenien asoso ren am anneani noum kewe pukefen, aua anapenon ennetin iotek, me feinno non tempel iteitan. Ekkewe teten seni ei kon a nemenono am memef non ewe fansoun: “Saramen ewe ran a sarameno, fonufan a nenneno, ekkewe kirochun kuchun nepwin ra sano” (“The Day Dawn Is Breaking,” Hymns, no. 52).
Am we famini a opochokuna ekiekin pwe 2020 epwe ew murinon ier! Amua kaeo noum ewe Feitto, Tapweto Mwirinesen non ewe Testament mi Fo puken James non November 2019 nupwen ew itenap a pusin pwa ngenikem. James sopun 1, okisin 2 a apasa, “Ami pwi kana, oupwe sinei pwe ouwa feioch nupwen sokkun sossot meinisin a torikemis” (Joseph Smith Translation, James 1:2 [non James 1:2, footnote a]). Non am mochen aupwe suki ew minefon ier, ew minefon fansoun engon ier, fiti pwapwa am oua ekieki pwe non 2020 am oupwe anneanir meinisin pwe pwapwa. A fokkun pochokun am mefi ussun ei non ewe Kirisimas aua niffang ngeni pwium me fefinem sipiringu mi mak mese watte, “Anneanir Meinisin pwe Pwapwa.” Ewe ier 2020 epwe fokkun ew ierin pwapwa me meseik.
Iwe, ikeir kich—2020 a fen wato ewe semwen COVID-19 ngeni unusen fonufan, osukosuken aramas, watten osukosukun fonufan, me osukosuken kokotun pekin moni. Meni Samach Kot non Nang epwe mut ngeni kich fansoun ach sipwe ekiekochui me eteneki ach weweiti nikitu me ach ekieki ach sipwe fini pwapwa.
Ewe puken James a wata ew minefon wewen ngeni kich. James, sopun 1, wokisin 3 me 4 soposopono:
Ami sinei ei, pwe sossotun ami nuku a anganga nikitu.
Mut ngeni nikitu epwe angang unusoch, pwe oupwe unusoch o manauemi esap osupwag ren och mettoch.
Non ach achocho ach sipwe kuna pwapwa nukanapen sosotuch, sia nemenono pwe an wor ach nikitu ina ewe ki an epwe okufatiw ekkewe sokkun sossot pwe epwe ngenikich murinno.
King Benjamin a aitikich pwe sipwe poutano ewe inisin aramas me winiti “emon souneng seni ewe achasefanin Kraist ewe Samon, me [winiti] ussun emon semirit, fangoch, mosonoson, tipetekison, songomang, uren tong, tipemecheres ne fang ngeni mettoch meinisin” (Mosaia 3:19
Sopun onuen (6)Preach My Gospel a afanafana fofor murinon Kraist sia tongeni opuru: “Nikitu ina ewe koukun ach sipwe achocho ne nikitu ngeni mangeno, u fengen, ika riaffou nge sise song, ningeringer ika ourek. Iei ewe tufich ach sipwe fori netipen Kot me etiwa an fansoun. Nupwen ka nikitu, ka amangano om kopwe nom fan echimw me ka tongeni mesengeni osukosuk non kinamwe me anean” (Preach My Gospel: A Guide to Missionary Service, rev. ed. [2019], 126).
Murinon an Nikitu angang epwe pwan fateoch me non manauen emon noun Kraist kewe chon kuno me nom, Simon ewe re Canaan. Ekkewe Zealots ir ew mwichen chon Jew ra pochokun ne u ngeni annukun Rome. Mokutukutun ekkewe Zealot a efisata fitikoko ngeni ekkewe chon Rome, chiener kewe chon Jews, me ekkewe Saducees ra maun sona ren ar pisek me sopweno ekkoch mokutukut an epwe anisi ar popun (nengeni Encyclopedia Britannica, “Zealot,” britannica.com). Simon ewe chon Canaan i emon Zealot (nengeni Luke 6:15). Ekieki Simon a sotuni ne achacha ngeni ewe Chon Amanau an epwe moneta ren pisekin moun, emweni ew kumien sounfiu, ika fori osukosuk non Jerusalem. Jises a afanafana:
“Ra feioch ir ekkewe mi tipetekison, pun repwe muuni ewe fonufan. …
“Ra feioch ir ekkewe mi uren umoumoch, pun repwe angei umoumoch. …
“Mi feioch ir ekkewe chon fori kinamwe; pun repwe iteni noun Kot” (Matthew 5:5, 7, 9).
Simion epwe etiwa me pesei an mirit fiti pochokunan me pochokune memef, nge ekkewe pukefen ra finata pwe seni ewe foforun ekesiwin me minen apiru an ewe Chon Amanau, met a anonga a siwin. An ewe winiti noun Kraist chon kuno a nom nukanapen an ekiek ren pochokunen manauan.
Nupwen sia fori me aponueta ach kewe pwon ngeni Kot, ewe Chon Amanau a tongeni anisikich ne “upusefan; ewer, uputiw me ren Kot, repwe siwin seni [ar] mochenin fonufan me turutiw ngeni ew nikinikin aramas wenehcar, ra ngaseno me ren Kot, winiti noun onuon me fopun” (Mosaia 27:25).
Me nein mwichen tinikenin aramas, mwichen namanam, mwichen achocho non pekin politiks non ach kei ran, mut ngeni chon kunon Jises Kraist repwe nouch wachimuken chon anewenewa me afata chiechiach. “Pun netipemi epwe chok nonnom ikewe pisekimi mi auchea a nonnom ie” (Matthew 6:21). Sisap pwan nemenono, pwan mo mwirin ekkewe chon kuno mi nukuchar ra “fori netipen Kot,” ra “[awora]auchean nikitu” (Hebrew 10:36).
Nupwen chok asosotun ach nuku a anganga nikitu non kich, nupwen sia anganga nikitu, ach nuku a napano. Nupwen ach nuku a napeno, iwe pwan ach pwapwa.
Non ewe March a no, neum ewe oruemonun nengin, Emma, a ussun chommong misineri non ewe Mwichefen, a no non ew neni mi imuno fan pungun annuk. Chommong misineri ra no non imwer. Chommong misineri ra ewitiwit ngeni ian repwene pwan no fori kokor ian. Chommong rese angei ar efeiochun non tempel mwen repwe no ngeni ar nenien angang. Kinisou ngenikemi, kewe elter misineri me sister misineri Am aua tongeikemi.
Emma me an ewe companion non ewe Netherlands ra fokkun angang weires non ekkana fitu wik—angang weires fiti kechiw non chommong nikinikin. Fiti mochomochen tufichin an aramas chuchu fengen me koukun ar repwe tou nukun imw, an Emma anongonong won Kot a napeno. Am oua fiti i ne iotek won line me eisini ika ifa ussun am ouwa tongeni anisi. A tingor pwe am oupwe chuchuri chiechian kewe a kan afanafan ngenir won line.
Am ewe famini a poputa ne nom won line, emon me emon fiti an chiechien Emma kewe non ewe Netherlands. Am ouwa tingor repwe fitikem iteiten wik, non am ewe famini ne kaeo Feito, Tapweto Mwiri. Floor, Laura, Renske, Freek, Banjamin, Stal, me Muhammad meinisin ir ra winiti chiechiem. Ekkoch me nein chiechiem kewe seni ewe Netherlands ra tonong “non asamen ewe tit mi aukukun” (3 Nifai 14:13). Ekkoch a pwar ngenir “aukukunun ewe aan, me chokisikisin ewe tit, ikewe repwe tonong me ia” (2 Nifai 31:9). Ir pwich me fefinach non Kraist. Ew me ew wik aua “anneanir meinisin pwe pwapwa” nupwen aua angang fengen non am fefeita won ewe anen pwon.
Amua mut ngeni nikitu epwe angang unusoch (James 1:4) non am tufichingawen chufengen non foufoun aramas ussun kewe faminien ewe wart ren ew popun. Nge aua anneani pwe pwapwan am kewe famini nuku a napeno ren minefon technology me Feitto, Tapweno Mwiri me ewe manamanen ewe Puken Mormon.
Preseten Russell M. Nelson a pwon, “Ami sopweno ne achocho non ei angang—pwan tori ekkewe fansoun ouse mefi ouwa forioch—epwe ekesiwini manauom, me omw famini, me ewe fonufan” (“Soposopono non Nuku,” Liahona, May 2020, 114).
Ikewe sia fori ekkewe pwon mi pin ngeni Kot—ewe tempel—mi kesip fan ekkis fansoun. Ikewe sia aponueta ekkewe pwon ngeni Kot—ewe imw—mi suk! A wor ew ach tufich non imwach ach sipwe kaeo me ekieki ewe ningochun ekkewe pwonen non tempel ese wor tapin. Ika mo sise tonong non ena neni mi pin, “netipach kewe … repwe unusen pwapwa non auchean ekkewe feioch ekkewe repwe kawor ngenikich” (Doctrine and Covenants 110:9).
Chommong ra tou seni ar angang, ekkoch a pout senir ar kewe tufich. Sia pwapwa, nge, unuken Preseten Nelson, ewe a apasa: “Echikefen seni chon ach ewe Mwichefen ra chok pusin finata a napeno, pwan ussun ar pusin finata ne awora aninis ngeni nouch ewe monien aninisin mi osupwang. … Chufengen sipwe ngas seni ei fansoun mi weires. Ewe Samon epwe efeiochukemi ika ouwa sopweno ne efeiochu ekkoch” (Russell M. Nelson’s Facebook page, post from Aug. 16, 2020, facebook.com/russell.m.nelson).
“Oupwe epinukunuk” ewe annuk seni ewe Samon, (Matthew 14:27).
Fan ekkoch sia atapwan nupwen sia ekieki pwe sia “fori mettoch meinisin mi pung” nge sise akkangei ekkewe feioch sia mochen. Enoch a fiti Kot ren 365 ier mwen I me noun kewe aramas ra etta nang. Unupuku one me nimu ierin ar achocho ngeni ar repwe fori mettoch meinisin mi pung, iwe mwirin a fis! (Nengeni Doctrine and Covenants 107:49.)
Manon pwi ewe Chad a chok fis ekkoch maram mwirin am oua kepichino seni wisem chon nemeni ewe Utah Ogden Misin. A fokkun eingeing pwe nupwen am oua nom non eorun California, meinisin ekkewe 417 misin ita am oupwe kefinita ngeni non ewe ier 2015, nge am oua kefinita ngeni enefenin Utah. Ewe imwen misin a chok 30 minich ngeni imwen Chad ewe ach sipwe sa won taraku. An Chat ewe kanser a fat porousan mwirin am ewe angei am ewe kokkon angangen misin. Pwan mo non ewe fansoun aweires, am oua sinei pwe Samach Kot non Nang a ekiekikem me anisikem pwe am oupwe kuna pwapwa.
Ua pwarata ewe amanauen, efeiochun, enimenimochun, tekisosonun, me pwapwan manamanen ewe Chon Amanau Jises Kraist. Ua pwarata pwe nupwen sia iotek ngeni Samach non Nang non iten Jises Kraist, I epwe ponueni kich. Ua pwarata pwe nupwen sia rong, ausening, me tumunoch ngeni mongungun ewe Samon me Noun ewe Soufos mi manau, Presetent Russell M. Nelson, sia tongeni “mut ngeni niitu epwe fori an angang mi unusoch” me ”ettenir meinisin non pwapwa.” Non iten Jises Kraist, amen.