![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F29%2Ff4%2F29f4787863c3656a673b5c24a09a8d9757982a11%2F29f4787863c3656a673b5c24a09a8d9757982a11.jpeg/full/!250,/0/default)
Ewe Manamanen Ngaseno ren ewe Achasefan
Nupwen sia feito ren Jises Kraist ren ach anganga ach nuku non I, aier, me fori me aponueta ekkewe pwon, ach nipwakingaw non manauach—ese nifinifin met a efisata—a tongeni chikar sefan.
Seni nepoputan ei ier, a fen fis chommong mettoch sise fen pwan ekieki pwe epwe fis. Manon aramas me tufich fan iten ei watten osukosuken unusen fonufan a watte efeiengawan ngeni unusen neni me pekin mwoni.
Chechin fonu, karen fonu, me kewe puun fonu non sokopaten kinikinin ei fonufan, me pwan ekkoch osukosuken fan nang me won fonu mi wewe ngeni watten osukosuk, a ngeni aramas me ra mefi nipwakingaw, tipemwaramwar me netipeta iwe ra ekieki pwe manauer esap chiwen ussun me nom.
Mut ngeniei upwe aporousa ngeni kemi ew porousen won winikapei ussun netipeta.
Nupwen neum kewe semirit mi chok kukkun, ra ekieki pwe ra mochen repwe angei nesenin piano. Punuwei we, Rudy, me ngang am ouwa mochen awora ngeni neum kewe semirit ei tufich, nge ese wor neum piano. Sise tongeni naf ngeni ach sipwe moni ew minefon piano, iwe Rudy a poputa ne kutta ew mi pin nounou.
Ena ier ren Kirisimas, a amairukem meinisin ren ew piano, iwe non ekkewe ier mwirin, neum kewe ra kaeo ar repwe etik piano.
Nupwen neum kewe at ra marita me no seni ewe imw, ewe minenomun piano a chok toputopuno iwe am ouwa amomono. Ekkoch ier ra no, am ouwa isoni ekkis mwoni. Ew ran Rudy a apasa, “Uwa ekieki a iei fansoun sipwene moni ew minefon piano.”
Ua eis, “Pwata sipwe angei ew minefon piano, nge sise sinei etikin?”
A apasa, “O sia tongeni angei ew piano mi pusin tik! Ren om nounou ew iPad, ka tongeni programini ewe piano an epwe etiki napeseni 4,000 kon, pachenong kon seni Tabernacle Choir, meinisin konun kinter, me pwan ekkoch.”
Ua tongeni era pwe Rudy emon chon amomo pisek mi angangoch.
Am aua moni ew murinon minafon piano, iwe mwirin ekkoch ran, ruemon mwan watte me pochokun ra wato ren imwem ewe.
Ua aiti ngenir ian ua mochen epwe nom ian me uwa marisir.
Mi chok aro kukkun nge amen chou me a nonno och ngeni ewe asam, ra angei pechen kewe me wata nesopun asen ewe taraku ra wawato.
Imwem ewe a uta ikewe mi aro pan ie, me mwen ena ran, a wor sno, a aro tenino me ochochonu mettoch. Ami mi tongeni kuna ian ei epwe feinno ian?
Nupwen ra omokutata ewe piano won ewe ekis panata, a mit, me uwa rong ew watten ngingin mettoch a turutiw. Ewe piano a turutiw seni poun ewe taraku me a turuwatetiw won ewe pun me a wor ew watten rasan non am ewe sipa.
Ua apasa, “Uoneee. Ouse feiengaw?”
Kinisou pun kewe mwan me ruemon rese feiengaw.
Meser kewe ra punono nupwen ra nenefengen, mwirin ra nengeniei me apasa, “Omusano am tipis. Am aupwene uwesefanieno ren ewe sitowa me ureni neum ewe meinap epwe koruk.”
Mwitir chok ewe meinapen ewe sitowa a fos ngeni Rudy ne ota ngeni ar repwe wato pwan ew minefon piano. Rudy mi kirekiroch me sine an epwe omusano ekkoch me a ureni ewe meinapen ewe sitowa pwe ese pwan wor osukosukan ika ra chok forsefani ewe piano mi ta iwe ra eniwinsefani, nge ewe mei napen ewe sitowa a chok fichono pwe repwe angei ew minefo.
Rudy a ponueni, me apasa, “Ese kon pwan i watte osukosukan. Ou chok forsefani pwan eniwinato.”
Ewe meinapen ewe sitowa a apasa, “Ewe iran a ta, iwe ika ewe iran a ta, iwe ese tongeni chiwen ussun ngingin me akkom. Oupwe angei ew minefon piano.”
Pwi me mongeei, esap kich ussun chok ei piano, ekis chok tan, satin, me osukosukan, sa mefi pwe sise tongeni ussuch me akkom. Iwe nge, nupwen sia feitto ngeni Jises Kraist ren anganga nuku in I, aier, me fori me aponueta kewe pwon, nipwakingawen non manauach—ese nifinifin met a efisata—a tongeni chikar sefan. Ei fofor, minne a tingor an ewe Chon Amanau manamanen echikara non manauach, esap chok eniwinsefani kich ngeni nonomuch me akkom nge epwe fori kich ach sipwe murinno seni akkom. Ua sinei pwe seni ewe Achasefan an ewe Chon Amanau, kich meinisin sia tongeni for sefan, sipwe unusochuno, me ngiochuno, ussun chok ew minefon piano.
Preseten Russell M. Nelson a aiti ngeni kich: “Nupwen riaffoun sosot a torikich, ina fansoun sipwene anononuono ach nuku non Kot, ne angang weires, me anisi ekkoch. Iwe I epwe ekinamweieno ach kewe osukosuken netip. I epwe watiw woch pusin ach chip me kinamwe. Ekana wachimuken niffang resap tano, sap mo nge ren mano.” 1
Jises a apasa:
“Oupwe feito rei, ami meinisin mi pekus ren choun osemi o ngang upwe asoso kemi.
“Oupwe angei osei o oupwe mwarei o oupwe kaeo seni ei, pun ngang mi mosonoson o tipetekison, iwe oupwe kuna ami ngaseno.
“Pun osei we upwe ngeni kemi mi mecheres o upwe ngeni kemi osemi mi pwas” (Matthew 11:28–30).
Ach sipwe echikara weiresikis ren ach feitto ren I, a murinno an epwe wor ach nuku non Jises Kraist. “Awora ach nuku non Jises Kraist wewen ennetin anonga won I—nukunuk non An manaman ese much … me tong. Mi pachenong epinukunuk non An kewe afanafan. Wewen epinukunuk pwe ika mo sise weweiti mettoch meinisin, I a weweiti. Pun I a fen sinei ach metek meinisin, riaffou, me ach apwangapwang, I a sinei ifa ussun an epwe anisi kich ne oukicheta seni ach osukosuk iteiten ran.” 2
Nupwen sipwe feitto ren I, “sia tongeni masoweni pwapwa, kinamwe, me ourur. Meinisin na [weires me sossot] ussun manau a tongeni taweno ren ewe Achasefan an Jises Kraist.” 3 I a fen auroura kich, “Kutaei non ekiek meinisin; kosap tipemwaramwar kosap nuokus” (Doctrine and Covenants 6:36).
Non ewe Puken Mormon ekis ngeni chok nupwen Alma me noun kewe aramas repwene pachacheno ren kewe achou ra wata wor, ekkewe aramas ra tingor repwe epichireno. Ewe Samon ese angei senir oser kewe mi chou; nge iwe A pwon ngenir:
“Iwe upwe pwan ekisano ekkewe achou minne ra wata won afaremi, pwe ousap tongeni mefir me won nukunupemi, pwan mwo nupwen oua nom non fotek; iwe ei upwe fori pwe oupwe uta pwe oupwe chon pwarata ngeniei mwirin, me oupwe tongeni ennetin sinei pwe ngang, ewe Samon Kot, ua churi nei aramas non ar riaffou.
“Iwe iei non ewe fansoun pwe ekkewe achou minne ra nom won Alma me pwin kewe ra paneno; ewer, ewe Samon a apochokunareno pwe repwe tongeni engino ngeni achour kewe ren mecheres, iwe ra fangeta fiti pwapwa me fiti tipepos ngeni mochenin ewe Samon meinisin” (Mosaia 24:14–15).
Elter Tad R. Callister a aiti kich, usun ewe tufich an ewe Chon Amanau an epwe angasano me apanono chou.
“Ew me nein ekkewe feiochun ewe Achasefan pwe sia tongeni angei an ewe Chon Amanau manamanen aninis. Isaiah a foos fan chommong ussun an ewe Samon foforun echikar me tufichin ekinamwei. A pwarata pwe ewe Chon Amanau ‘a tumunur fansoun monumon o a epeti ewe asepwan senir o a achunor seni pwichikaren ewe akkar’ (Isaiah 25:4). Ren ekkewe mi noninen, Isaiah a afata pwe a nom ren ewe Chon Amanau ewe manaman an epwe ‘chachari ekkewe mi noninen meinisin’ (Isaiah 61:2), me ‘tonano chonun mesen ekkewe aramas meinisin’ (Isaiah 25:8; pwan nengeni Pwarata 7:17); ‘apochokuna sefani ngunun ekkewe mi tekisoson’ (Isaiah 57:15); me upwe ‘chachari netipen ekkewe mi netipeta’ (Isaiah 61:1; pwan nengeni Luke 4:18; Konupin 147:3). A fokkun mowatte an ewe manamanen awora aninis ena ‘a tongeni ekesiwini ningoch ngeni fanang, ewe oinen pwapwa ngeni netipechou ufoufen mwareiti ngeni ewe ngunun chourek’ (Isaiah 61:3).
“O, met anean a assita non ekkewe pwon! … Ngunun we a echikara; a emwirinouono; a oururu; a ngaseranong minefon manau non ekkewe tipemwaramwaren netip. A wor ren ewe manamanen ekesiwini mettoch meinisin mi ningengaw me efeiengaw me namotongaw non manau ngeni och mettoch mi tekia me amwarar. A wor ren ewe manaman an epwe ekesiwini ekkewe fanangen aramas ngeni ekkewe ningoch feinfeino.” 4
Ua pwarata pwe Jises Kraist i ach Chon Amanau mi tong, Chon Angasano, ewe Minapen chon Echikara, me chiechiach mi nikitu Ika sia kun ngeni I, I epwe echikara kich me fori ach sipwe unusoch sefan. Uwa pwarata pwe iei an ei Mwichefen me I a amonata an epwe niwinsefanito ngeni ei fonufan an epwe pwano fiti manaman me ning. Non iten Jises Kraist, amen.