Sossotuni, Apungano, me Aningochuno
Ewe feioch mi napanap epwe feitto nupwen sia apungano pwisin ach nukunuk ngeni ach kewe pwon mi pin me non ach kewe sossot pwe napanapach epwe siwin.
Pwi me fefinei kewe achengicheng, ua kinisou ne foos ngenikemi ikenai. Ai mochen pwe upwe tongeni awora kapasen aninis atun manau a kan weires me osukosuk. Ngeni ekkoch me neimi, na atun epwe iei. Ika esap iei, ei sokun fansoun epwap feitto.
Esap eu ekiek ne aweiresi. A chok ennet—nge a och—pokiten an Kot popunen Forutan ei fonufan. Ena popun pwe I epwe ngeni noun kewe ewe fansoun pwe repwe apunga pwe ra tongeni me ra mochen ne fini met mi pung nupwen a weires. Ren ar fori ei, ar napanap epwe siwin me repwe winiti usun chok I. Ii a sinei pwe epwe namwot esapw wor tipemwaramwar non ach nuku non I.
Chommong met ua sinei pokiten ai famini. Atun ua wanu ieri, inei we mi mirit a tingorei pwii me ngang ne fiti i ne otot non am atake nesukurun imwem we. Iwe,usun nge ew angang mi mecheres, nge aua nom non New Jersey. A pungupung ran fan chommong. Ewe pun a chou me pochokun. Ekkewe ira mi sonap ra kan marita mwen ekkewe iran foun mwongo.
Ua chechemeni pwe ua song nupwen ekkewe ira mi sonap repwe kup me non pei, me waran kewe ra chiwen nom non ewe puun. Ekkis fansoun chok me inei me pwii ra kan angang mwei non nenier. Ina amo ua kan achocho, ua chok mangeno senir.
“Ei a kan weires!” Ua puchor.
Iwe esapw tonger, inei we a emenimen me apasa, “Iwe, Hal, pungen, a weires. Ina napanapen. Manau a eu tes.”
Non na atun ua sinei pwe an kapas kewe mi ennet me repwe ennet non fansoun mwach.
Ewe popunen an inei we amenemenin tong a weweoch ngeniei fitu ier mwirin atun ua anneani usun Semach won Nang me Noun we At mi Achengicheng foos usun Ar popunen fori ewe fonufan me awora ngeni semerit won pekin ngun ewe fansoun manauen futuk:
Kot a apasa Repwe sotunikich, pwe Repwe kuna ika sipwe fori mettoch meinisin minne ewe Ra annuku ngenikich;
Kot a apasa ion epwe apwonueta ewe aewin napanaper repwe angei ekkoch nap seni met ra akaewin angei, me ekkewe rese apwonueta ewe aewin napanaper resap angei ningoch non ena muun ren ekkewe ir repwe apwonueta ewe aewin napanaper, me ir repwe apwonueta ewe aruan napanaper repwe angei ningoch won mokurer feinfeino.1
En me ngang kich sia fen etiwa ena sotun pwe sipwe apunga pwe sipwe fini ne apwonueta ekkewe annukun Kot atun sisap chiwen nom ren Semach won Nang.
Ina mwo ewe tingor mi uren tong seni Semach won Nang, Lucifer a michi eu me unugaten kinikinin semerit won pekin ngun ne tapweno mwirin i me amam an ewe Sam kokkotun ach feffeita me pwapwa ese muuch. Fan iten an Satan u ngeni, i a atureno fiti noun kewe chon tapweno mwirin. Iei a achocho me fori an chomong repwe kun seni Kot non ei manauan futuk.
Kich ekkewe sia etiwa ewe kokkot sia fori pokiten ach nuku non Jises Kraist, minne a tipeu ngeni epwe winiti ach Chon Amanau me Chon Angaseno. Kich sipwe fen nuku pwe ese nefinifin ekkewe apwapwangen inis are ekkewe angangen ewe tefin epwe torikich, ewe angangen och epwe nap seni meinisin.
Semach won Nang me Jises Kraist ra sinei me tongei en. Ra mochen pwe kepwe niwin ngeni Ir me winiti usur. Om angangoch a Ar angangoch pwan. Ka fen mefi ena tong mi apungano me ren ewe Ngun mi Pin nupwen ka anneani or rongorong ekkei kapasen Semach won Nang pwe iei, iwe An angang me An ning ne efisita ewe soposoponon manau me manau ese muuch ngeni aramas meinisin.2
Kot a tongeni amecheresi manauch. A amwongini manna ngeni ekkewe semeritin Israel non are fein fetan ngeni ewe fonu pwon. Ewe Samon non An manau won fonufan a echikarata ekkewe mi semwen, amanaua ekkewe mi mano, me ekinamwe ewe sat. Mwirin An Manausefan, A suki ewe nenien fotek ngeni ekkewe mi fotekeno.3
Nge ewe Soufos Joseph Smith, emon soufos mi napanap me nein Noun kewe soufos, a riaffou non fotek me a kaeo ewe nesson kich meinsin sia tongeni kaeo seni me mi namwot non fansoun sossotun ach nuku: ika kopwe turunong me non ewe pwang, are me non poun chon nini, me ika pwe epwene apunganon mano; ika pwe a turunong non ewe annonnon; ika chommong mi u ngeni i; ika asepwan watte a tori; ika nang a winiti kiroch, me mettoch meinisin a u ngonuk; me pwan, ika enn a suki awan ngonuk, kepwe sinei, nei at, pwe ekkei mettoch meinisin kepwe kaeo seni, me ra fis fan iten ochun pwisin en.4
Meni kopwe ekieki pwata emon Kot mi tong me unusen manaman epwe fori pwe ach kewe manauan futuk epwe fokkun weires. Iwe a iei usun pun A sinei pwe mi namwot sipwe mamarita non nimenimoch me pochokun won pekin ngun pwe sipwap tongeni nom ren I ren ach kewe famini fenfeinno. Pwe ei epwe tufich, Semach won Nang a ngenikich emon Chon Amanau me ewe pochokun ne pwisin fini me ren nuku ne anneasochisi An kewe annuk me aier pwe sipwe feito ren I.
Nukunapen An ewe Sam kokkotun pwapwa pwe sipwe winiti usun Noun we At mi Achengecheng, Jises Kraist ekis me ekis. Non mettoch meinisin, an ewe Chon Amanau nenien appiru ina ach aninis mi napanap. A pwan namwot ngeni I pwe epwe apungano pwisin An pochokun. A engino fan iten meinisin noun Semach won Nang, A kama niwinin tipisich kewe meninsin. A mefi ewe riaffoun meinisin ekkewe ra fen feitto me ekkewe repwene feitto me manau.
Nupwen ka ekieki ne eis ifa watten metek ka tongeni engino ngeni, chechemeni I. A riaffou ren met en ka pwisin riaffoun ren pwe I epwe tongeni sinei ifa usun epwe anisuketa. Mi tufich pwe Esap awesino ewe weires, nge I epwe ngonuk pochokun, kinamwe me apinukunuk. I a sinei ewe aan. A unemi ewe kaap mi kipwin. A engino ngeni riaffoun meinisin.
Ka apochokun me ekinamwe me ren emon Chon Amanau mi tong, ion a sinei ifa usun epwe anisuk ese nefinifin met sokun sossot ka tori. Alma a aiti:
“Iwe i epwe feino, epwe engino ngeni metek me riaffou me sokopaten sossot meinisin; iwe ei epwe fis pwe ewe kapas epwe tongeni pwonueta minne ra fen apasa pwe i epwe wata won inisin ekkewe metek me semwenin noun kewe aramas.
“Iwe i epwe wata won inisin mano, pwe i epwe tongeni epichano ekkewe senin mano minne ra foti noun kewe aramas; iwe i epwe wata won inisin ar apwangapwang, pwe nenukan epwe tongeni ureno ren umoumoch, anongonong won ewe pekin aion, pwe i epwe tongeni sinei anongonong won ewe pekin aion ifa usun an epwe anisi noun kewe aramas anongonong won ar apwangapwang.”5
Eu napanap minne Epwe anisuk ren pwe epwe tingorek fansoun meinsin ne chechemeni I me feito ren I. A fen tingorei kich:
“Oupwe feito rei, ami meinisin mi pekus ren choun osemi o ngang upwe asoso kemi.
“Oupwe angei osei o oupwe mwarei o oupwe kaeo seni ei, pun ngang mi mosonoson o tipetekison, iwe oupwe kuna ami ngaseno.”6
Ewe aan ne feitto ngeni I pwe sipwe kametip won An kewe kapas, anganga nuku ngeni aier, pwisin fini ne papatais me apungano me ren An chon angang mi mwumwuta, me mwirin sopweno ne apwonueta om kewe pwon mi pin ren Kot. A tinatitiw ewe Ngun mi Fen pwe epwe chienom, chon kinamwe, me chon emwen.
Ren om manau nimenimoch ngeni ewe niffangen ewe Ngun mi Fel, ewe Samon a tongeni emwenuk ngeni ina mwo ika en mi tongeni kuna ewe aan. Me rei, fan chommong A pwa ngeniei eu ika ru mettoch minne upwe fori ne sopweno. Fan fitu chok A pwa ngeniei mettoch repwap fiis non fansoun mwach, nge seni ekkei fansoun fitukukkun chok tongeni fini mettochun manaun iteitan ran.
Ewe Samon a awewe:
Sise tongeni kuna ren mesach kewe, non ei fansoun iei, ewe kokkotun ach Kot ren ekkewe mettoch minne repwe feitto non ekkis eno, me ewe ning minne epwe tapweno mwirin chommong weires.
Iwe pwe mwirin chommong weires ekkewe feioch repwe feitto.7
Ewe feioch mi napanap epwe feitto nupwen sia apungano pwisin ach nukunuk ngeni ach kewe pwon mi pin me non ach kewe sossot pwe napanapach epwe siwin. Me ren ach fini ne apwonueta ach kewe pwon mi pin, ewe manamanen Jises Kraist me ekkewe feiochun An we Achasefan a tongeni angang non kich. Netipach ra tongeni apwetete pwe sipwe tongeni tong, omusano, me etiwa ekkoch pwe repwe feitto ren ewe Chon Amanau. Ach nukunuk non ewe Samon epwe watteno. Ach kewe nonninen repwe ekisano.
Iei, ina mwo ekkei watten feioch mi pwon me non weires, kich sisapw kutta weires. Non ei manawen futuk, epwe wor fansoun kich sipwe pwarano netipach, ach sipwe pasini kewe sosot mi aweires ach sipwe winiti usun ewe Chon Amanaw me Samach non Nang.
Me pwan, mi namwot sipwe kuna weiresin pwan ekkoch me achocho ne aninis. Ena epwe ennetin weires nupwen sia pwan nom non am pwisin riaffou. Nge sipwe kuna pwe nupwen sia anisi pwan emon ren ar chou, ika mwo ekis chok, pwe nesukuruch repwe apochokun me sipwe essina saram me non ewe rochopwak.
Non ei, ewe Samon I ach Nenien Appiru. Won ewe irapenges me non Golgotha, mwirin a fen riaffou ren metek epwe fen mano ika I esap ewe Ennetin Noun Kot, A nengeni ekkewe ra ninnino I me A apasa ngeni Seman we, “Kopwe omusereno! Rese sinei met ra fori.”8 Nupwen an riaffou fan iten meinisin ekkewe repwe manau, seni ewe irapenges A nengeni John me Inan we mi netipechou me a iamwir ngenii neminewe non an riaffou:
“Jises a kuna inan we me ewe chon kaeo a tongei ra ukkuta ikewe ie, iwe a apasa ngeni inan we, Ina i noum na!
“Iwe, Jises a pwan apasa ngeni ewe chon kaeo, Ina i inom na! Seni chok ena fansoun ewe chon kaeo a angei neminnewe pwe epwe ne nonnom ren.”9
Me ren An foffor won na ran mi pin, A pwisin fini ne fangeta Manaun faniten kich meinisin, a ngeni kich aninis non ei manau nge manau ese much non ewe manau epwap feitto.
Ua fen kuna aramas ra feffeita me ren ar pwari ar nukuchar non riaffou mi watte. Me non ewe Mwichefen ikenai mi chommong ekkewe awewen appiru. Aramas ra kan futupukutiw seni ar riaffou watte. Me ren ar engino mi nuku me achocho, ra winiti ekis me ekis usun chok ewe Chon Amanau me Semach won Nang.
Ua kaeo pwan eu mettoch seni inei we. Atun a emon kukkun nengin, a uri ewe semwenin diphtheria me arapakan epwe mano. Ekkis fansoun mwirin a kan semwen sefan. Seman we a mano mwen a chinnap, iwe inei me mongeien kewe ra aninis ne tumunu ewe famini.
Unusen manauan, a mefi efeiengawen osukosuken ewe semwen. Non ekkewe 10 ier nesoponun manauan, a namwot epwe reirei fan fite. Nge me non meinisin, a pwari an nukuchar ngeni ewe Samon, fen pwan nupwen ese tongeni uta. Ewe echo sasing won etipen rumwan ewe sasingin ewe Chon Ananaw. Saingon an kapas ngeniei won an ewe petin mano ikei: “Hal, ngingin pwe kopwene angei ewe semwenin patapat. Kopwe tununuechu inisum.”
Ren soman ewe, ewe saigon chon afanafan Elter Spencer W. Kimball. Mwirin a fos usun an weires me nukuchar, a apasa: “Ekkoch me neimi oupwe ekieki pwata Mildred a riaffou watte fan chommong. Upwe erenuk pwata. A fis pun ewe Samon a mochen aningochu pwan ekkis.”
Ua apasa ai kinisou ren ekkewe nukuchar chon ewe Mwichefenin Jises Kraist minne ra uwei ar kewe chou ren nuku me ion kewe ra anisi ekkoch ren ar chou atun ewe Samon a achocho ne aningochu ir pwan ekkis. Ua pwan apasa ai tong me mwareiti fan iten ekkewe chon tumunu me emwen won unusen ewe fonufan minne ra angang ngeni ekkoch atun ir me ar kewe famini ra pwan aningochu.
Ua pwarata pwe kich noun Semach won Nang, minne a tongeikich. Ua mefi an Preseten Russell M. Nelson tong fan itach meinisin. I ewe noun ewe Samon soufos won ewe fonufan ikenai. Ua pwarata ei non ewe it mi pin an ewe Samon Jises Kraist, amen.