![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Faf%2F24%2Faf24361cb929d36e10f83eaf102479085dce7412%2Faf24361cb929d36e10f83eaf102479085dce7412.jpeg/full/!250,/0/default)
Kinamwe, Kopwe Asoso
Ewe Chon Amanaun A aitikich ifa usun sipwe kuna kinamwe me mesonoson pwan nupwen ekkewe asepwan ra pechekun ngenikich me ekkewe watte no ra achocho ne efeingawa ach apinukunuk.
Atun noeum kewe semerit mi kukkun, am famini aua nom fitu ran kan ngeni eu noom mi ning. Eu neonawas ekkoch ekkewe semerit ra ufeni life jacket me mwen ra mwetenong non ewe konik seni ewe oror. Noum we kukkununon nengin a witiwit, me nengeni me a katonoch pwin me mongean kewe. Ren unusen pechekunen netipan, a pinei potun ren poun me mwetenong. Iei mwitir a pwa sefan me ren nginin nuokus non mongungun a puchor, “Anisiei! Anisiei!”
Iwe, esap tongeni mano; ufan we life jacket a fori popun, me neminewe a pias. Am mi tongeni mecheresin kamoch i me uweieta ngeni ewe oror sefan. Nge seni an ekiek, aninnis a namwot ngeni i. Meni pokiten ewe konik a pat ika ese mwo fori ei me mwen. Nge ese nefinifin, pwe a tota won ewe oror sefan, me aua ngeni eu towel me mwareiti ren an pwaracho.
Ese nefinifin ika kich chinnap are kukkun, chommong me neich sia fen, non fansoun osukosuk, puchor ren nuokus kapas usun “Anisiei!” “Tumunuei!” ika “Kese mochen, penueni ai iotek!”
Ei sokkun mettoch a fis ren noun Jises kewe chon kaeo me non atun An afanafan won fonufan. Non Mark sia anneani pwe Jises a “poputa ne afanafan unukun ewe Noom Galilee: ewe pwiin aramas ra mwich fengen ren ra fakkun chommong.”1 Ewe mwichen aramas a kan watteno pwe Jises a “tota won efoch wa”2 me a afanafan seni nenian won. Unusen ewe ran A aiti ekkewe aramas ren kapas monomon me ra mwomwot nepii.
“Iwe … [Nekunionun] ewe ran,” A apasa ngeni noun kewe chon kaeo, “Sipwe ne feinno epek ewe noom. Iwe ra feinno seni ewe pwiin aramas,”3 ra feinno seni nepii me sai ngeni ewe epekin ewe Noomen Galilee. Kutta nenian mwurinin ewe wa, Jises a konetiw me mwitir annuteno. Iwe mwitir chok “ew asepwan mi pochokun a enito, iwe ekkewe no ra ninong neefon ewe wa iwe [arapakan chok] epwe ne urenno”4 ren sat.
Chommong me nein noun Jises kewe chon kaeo ir chon atau me ra sinei ifa usun repwe wani efoch wa non ew asepwan. Ir Noun kewe a apinukunuk non—iwe ennet, Noun kewe achengecheng—chon kaeo. Ra no seni ar kewe angang, pwisin ar mochen, me ar kewe famini ne tapweno mwirin Jises. Ar nuku non I a pwa me ren ar nom won ewe wa. Me iwe iei war we a nom nukunapen ew watten asepwan me arapakan epwene kokkotiw.
Sise sinei ifa taman ar nipenau konik seni ewe wa non ewe asepwan, nge ra fongunata Jises fiti ekkis ningin nuokus non mengungur, me ra apasa:
“Sense, pwata kose tumunu kich nge sipwe ne mano?”5
“Samon, tumunu kich: sipwene mano.”6
Ra kokkori i “Sense,” me iwe ennet usun I. Iwe I pwan “Jises Kraist, ewe Noun Kot, ewe Semen nang me fonufan, ewe Chon Fori mettoch meinisin seni nepoputan.”7
Seni nenian won ewe wa, Jises a pwaata me apasa ngeni ewe asepwan me apasa ngeni ekkewe no, “Kinamwe, oupwe asese. Ewe asepwan a [kouno], iwe a fakkun nuano.”8 Iwe pwan ewe Ennetin Sense, Jises a aiti Noun kewe chon kaeo me ren ru kapas eis mi mecheres fiti tong. A eis.
“Pwata oua nuokus?”9
“Ese mo wor ami nuku?”10
Mi wor an aramasen fonufan napanap, iwe ika sossot, pwe nupwen sia tori och osukosuk, weires, ika riaffou sipwe sio, “Sensen, pwata kese tumunuei nge upwene mano? Tumunuei.” Iwe tori Joseph Smith pwan minne a sio seni eu imwen fotek mi ngaw, “O Kot, ia ka nom ia? Me ifan ewe imwen mangaku a tukumi om neni opono?”11
Ennet, pwe ewe Chon Amanaun ewe fonufan a weweiti ukukun ach tufich non manauch, pwe A aitikich ifa usun sipwe kuna kinamwe me mesonoson pwan nupwen ekkewe asepwan ra pechekun ngenikich me ekkewe watte no ra achocho ne efeingawa ach apinukunuk.
Ngeni ekkewe a wor ar nukunuk, nuku usun emon semerit, ika pwan eu kukkun chok kinikinin nuku12 Jises a etiwa, me apasa, “Feitto rei.”13 “Nuku non itei.”14 Sipwe kaeo usun I me ausening ngeni kapasan.15 A annuku ren tong, “Aier me [kopwe] papatais non itei,”16 Oupwe tong fengen; usun chok ngang uwa tongei kemi”17 me “Chechemeniei fansoun meinisin.”18 Jises a apechekuna ren awewe; “Ua fen apasa ngeni kemi ei pun epwe wor kinamwe remi ren ami chiechi ngeni ei. Fonufan epwe eriaffou kemi. Nge oupwe chok epinukunuk! Ua fen okkufatiw fonufan.”19
Uwa tongeni aneanei pwe noun Jises kewe chon kaeo non ewe wa mi osukosuk ren asepwan, pokiten a namwot, ra katon ekkewe no mi watte nota won war me ra fokkun achocho ne nipeni ewe sat seni war. Uwa tongeni ekieki usun ar amwokuta ekkewe mangakun wa me ra chiwen achocho ne waniochu war we ekkis. Ir mi ekieki chok pwe resap mano non na atun, me ar sio fan iten aninis mi ennet me atepwanepwan.
Chommong me neich sise fen sokofesin me non ach ran ikenai. Mettoch mi keran fiis won unusen fonufan me non ach kewe muu, sopw, me famini kewe a kan aweiresi kich ren osukosuk sise kuna me mwen. Non fansoun osukosuk sia tongeni mefi pwe ach nuku a tikiri nesopun ukukun ach nikitu me wewei. Nuokus usun ekkewe no a tongeni osukosuka kich, pwe sipwe nemenano ochun Kot, iwe ach tufichin kuna epwe kanneto chok me fatangaweno. Nge pwe non ekkei fansoun weires non ach sai pwe ach nuku ese chok tongeni sossot nge pwan apechekun.
Ina mwo winikapach, sia tongeni achocho ren popun ne apechekuna me awatteno ach nuku non Jises Kraist. A apechekun nupwen sia chechemeni pwa kich noun Kot me A tongeikich. Ach nuku a mamarita ren ach sotuni ekkewe kapasen Kot ren apinukunuk me mirit, sia achocho ren unusen tufichich ne tapweno mwirin ekkewe mettoch Kraist a aiti. Ach nuku a watteno ren ach fini sipwe nuku nge sisap tipemwaramwar, sipwe omusano nge sisap apungu, sipwe aier me sisap u ngeni. Ach nuku a unusocheno ren ach nikitu ne anongonong won ekkewe nimenimochun foffor me umoumouch me chenin ewe Messiah mi Fel.20
“Nge inamo pwe nuku esap eu sinei mi unusoch,” Elter Neal A. Maxwell a apasa, “a awora eu anonnonun nukunuk non Kot, minne an sinei mi unusoch!”21 Pwan non fansoun osukosuk, nuku non ewe Samon Jises Kraist a pechekun me aforsefan. A ansisikich pwe sipwe tongeni kunaochu met mi auchea. A emwenikich pwe sipwe sopeweno ne fetaneno won ewe aanen pwon mi pin. Nuku a pworacho ngeni epinukungaw me atufichikich ne nengeni fansoun mwach ren nikitu me pechekun. A peseikich pwe sipwe tingor ren aninis me asoso non ach kewe iotek ngeni ewe Sam non iten Noun we At. Me nupwen ach kewe tingor rese penu, ach nukuchar non Jises Kraist a ngeni kich nikitu, tipetekison, me tufichin apasata ren mesonoson “Omw mochen epwe pwonuta.”22
Preseten Russell M. Nelson a aiti:
“Sisap mut ngeni ach kewe nuokus pwe repwe asueno ach nuku. Sia tongeni fiu ngeni ekkana nuokus ren nuku.
“Poputa ren noum kewe semerit. … Muut ngenir pwe repwe kuna om nuku, pwan tori fansoun weires a toruk. Awenewena om nuku won Semach won Nang mi tong me Noun we mi Achengecheng, ewe Samon Jises Kraist. … Ait ngeni emon me emon at me nengin mi kan auchea pwe ir emon noun Kot, fori non An napanap, ren eu popun me tufich mi pin. Emon me emon ir ra uputiw ngeni mettoch mi weires ne pworacho me nuku ne apechekuna”23
Ekis eno we chok uwa ausening ngeni ruemon semerit ruanu ierir ra pwarata ar nuku non Jises Kraist nupwen ra penueni ewe kapas ei “Ifa usun Jises Kraist a aninisuk?” Ewe aewin semerit a apasa, “Uwa sinei pwe Jises a tongei ei pun A mano fan itei. A pwan tongei aramas watte.” Ewe aruwen semerit a apasa, “A anisiei nupwen uwa netipengaw ika ekkis song. A pwan anisiei nupwen uwa kokotiw.”
Jises a apasata, “Iei minne, ion chok epwe aier me feito rei usun emon kukkun semirit, i upwe etiwa, pun ena sokkun i seni ewe muun Kot.”24
“Pun Kot a fakkun tongei chon fonufan, ina minne a fangeno Noun we anamon, pun iteitan aramas mi nuku i resap mano, nge repwe kuna manau ese much.”25
Ekkis eno we chok Preseten Nelson a pwon “pwe nuokus mi kisino me awattenon nuku epwe tapweto” ren ach “poputa sefan ennetin ne rongorong, ausening ngeni, me anneasochisi ekkewe kapasen ewe Chon Amanau.”26
Pwi me Mongeiei, nonnomuch mi weires iei esap ach saingon, nenien nonnom. Kich chon Ewe Mwichefenin Jises Kraist ren Aramas mi Pin non Fansoun Soponon, sia fen angei woch iten Jises Kraist me ren pwon mi pin. Mi wor ach nuku non An manamanen amanau me apinukunuk non An kewe pwon mi amwarar me auchea. A wor ach popun pwapwa, pwe ach Samon me Chon Amanau a ennetin sinei usun ach kewe osukosuk, mochen, me riaffou. Usun Jises me ren Noun kewe chon kaeo me nom, A nom non wach we! Uwa pwarata pwe A fen fangeno Manauan pwe en me ngang sisap mano. Iwe pwe sipwe nukunuk non I, anneasochisi An kewe annuk, me ren nuku rongorong ngeni An apasa, “Kinamwe, kepwe asoso.”27 Non iten Jises Kraist mi monomon me pin, amen.