![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F95%2F8d%2F958d9034d2fdfbcd75530996153a005c81c1ff13%2F958d9034d2fdfbcd75530996153a005c81c1ff13.jpeg/full/!250,/0/default)
Manaman Fochofoch
Nuku chok me ewe kapasen Kot ewe a amasowa anononun ngunuch a naf an epwe epochokunakich—me mwut ngenikich ach sipwe angei An manaman.
Ai nenengeni ekkewe osukun seni atongeach soufos, Preseten Russell M. Nelson, uwa kuna ew kapas a aea fan chomong non an afanafan. Ei kapas iei manaman.
Non ewe aewin mwichenap mwirin an angei wisan wisen apostel, Preseten Nelson a kapas usun manaman.1 A sopweno ne aitikich usun manaman non ekewe ier. Seni fansoun ach sia finata Preseten Nelson pwe nouch soufos, a fen aitikich usun ewe nongonongun manaman—akaewin, an Kot manaman—me ifa usun ach sipwe tufich ngeni. A aitikich usun ach sipwe tongeni arap ngeni manamanen Kot nupwen sia iamwiri ekoch,2 usun ach aier epwe uweato ewe manaman an Jises Kraist me an Achasefan non manawach,3 me usun pristut—ewe manaman me mumuta an Kot—a efeiechu meinisin kewe ra fori me omochu ar pwon ngeni.4 Preseten Nelson a pwarata pwe an Kot manaman epwe nomw ren ekewe ra epinipin non ewe tempel me ra omwochu ar pwon mi pin.5
A unusen mwokuttukut netipwei ren ewe tungor Preseten Nelson a ngenikich non ewe April 2020 mwichenap unus. A aitikich ach sipwe “kaeo me iotek pwe sipwe sinei usun ewe manaman me mirit minne oua fen feioch ren—are oupwe fen feioch ren.”6
Ponuwan ei tungor, uwa kaeo me iotek me sinei ekkoch mettoch mi auchea usun ewe manaman me mirit ewe uwa fen feioch ren—ika upwe feioch ren.
Ach sipwe weweiti met sipwe fori ach sipwe angei ewe manamanen Kot non manawach ese mecheres, nge uwa kuna pwe mi tufich ren ach kaeo non ach ekkiek me iotek pwe ewe Ngun mi Fel epwe asarama kich.7 Elter Richard G. Scott a ngeni kich ew wewe mi fatafatoch usun met ewe manamanen Kot: ina ewe “manamanen fori chomong mettoch nap seni met kich mei tongeni fori won winikapach.”8
Amasowa netipach me pwan ngunuch ren ewe kapasen Kot me ewe nongonongen nuku non Jises Kraist mi auchea ach sipwe kan ngeni ewe manamanen Kot an epwe anisikich non kei fansoun osukosuk. Ika sisapw anomwu ewe kapasen Kot me nuku non Jises Kraist non anononun netipach, ach pwarata me nuku epwe tur, me epwe pout seni kich ewe manaman Kot a mochen ngeni kich. Nuku kisikis esap naf. Nuku chok me ewe kapasen Kot ewe a amasowa anononun ngunuch a naf an epwe apochokunakich—me mwut ngenikich ach sipwe angei An manaman.
Ren sister Johnson me ngang auwa amarata noum kewe semirit, auwa apochokuner ar repwe kaeo pekin niketik. Nge auwa mwut ngeni noum kewe semirit ar repwe kaeo pekin niketik ika chok repwe fori wiser me kaeo nour kewe pekin niketik iteiten ran. Ew Ranin Amon, noum ewe nengin Jalynn a mwasangasang an epwe no kukunow ren chienan kewe, nge ese mwo kaeo ewe piano. A sinei pwe a fen tipeew ngeni epwe kaeo non 30 minich, a fen pwan amonata kunokun pwokiten ese mwochen epwe kaeo ew minich tameno seni met mi koukuno.
Nupwen a fetano nukun ewe maikroweif sitof an a fetan ngeni ewe piano, a kouno me tiki ekkoch kiian. Nge ese fen fori noun ewe kunok, nge a pwopwutani ewe maikroweif an epwe kuk non 30 minich me a tiki. Mwirin 20 minich an kaeo, a fetan sefan ngeni ewe kichen an epwe cheki fite minich nusun me a kuna ewe maikroweif a kar.
Iwe a sa ngeni nukunupen ewe im ian ewe uwa angang ia, a pwuchor pwe ewe imw a kar. Uwa mwitir ne sanong non imwem ewe, me ewer, uwa kuna ewe maikroweif a nget.
Non ai achocho ngeni ai upwe tumunu imwem ewe seni ewe kar, uwa angetiw nukunupen ewe maikroweif, utau ewe senin, me uwa aea ewe senin fifi ne ekii ewe maikroweif mi kar seni won ewe neni. Aneanei pwe upwe wisen ewe chon angasano faniten ewe ran me pwan tumunun imwem ewe, uwa nuetti fetanei ewe maikroweif mi kar fiti senin we ai upwe atowawa seni inisi, uwa tori nukunewe, me pwan nuetieu me oturau ewe maikcroweif non ewe sipa. Ikenaie auwa tongeni kunuweno ewe ngetin kar ngeni ewe os.
Met a ngaweno? Mi auchea ngeni ewe maikroweif an epwe kukku mettoch an epwe ofi pochokunan, me nupwen ese wor mettoch non an epwe ofi pochokunan, ewe oven a pwusin ofi pochokunan, a pwichikareta, me a tongeni kar, pwisin tano non ngetan me mochan.9 Am ewe unusen maikroweif a ngeteta me karono pwokiten ese wor mettoch non.
Usunchok, ekkewe mi wor ar nuku me ewe kapasen Kot non anononun netiper repwe tongeni kamwoch me okkufu ewe nikkapich mi ngetenget minne ewe chon ungeni epwe tinato an epwe atakicheno.10 Nge ika ese, ach nuku, apinukunuk, me nukuchar esapw nangatam, me usun ewe maikroweif ese masow, sipwe tongeni winiti mi feiengaw.
Uwa sinei pwe ai anomwu ewe kapasen Kot non anononun netipei, ochu ngeni nuku non ewe Samon Jises Kraist me an Achesafan, a mwut ngeniei ai upwe arapngeni ewe manamanen Kot me akkufu ewe chon ungeni me mettoch a oturu ngeniei. Ach sia weri osukosuk, sipwe tongeni anonga an ewe Samon pwon minne Paul a aitikich: “Pwokiten Kot ese ngenikich ewe ngunun nuokus; nge ewe manaman, me tong, me ekiekich.”11
Sia sinei pwe an ewe emon semirit ewe chon Amanaw “a marita, me pochokun non ngun, uren tipachem: me ewe umomochun Kot a nomw ren.”12 Sia sinei pwe an an mamarita, “Jises a a mammarita non inisin pwan non an tipachem, a napeno chenin me ren Kot o pwan ren aramas.”13 Me sia sinei pwe nupwen An we angang a pwopwuta, ekewe ra rong ngeni “ra ingeiti an kewe annuk: pwe an kapas mi manaman.”14
Ren an monneta, ewe chon Amanau a marita non manaman me a tongeni fiu ngeni an Setan kewe sosot.15 Nupwen sa tapweno mwirin an ewe chon Amanau nenien appiru me monneta seni ach kaeo ewe kapasen Kot me awateno ach nuku, sia pwan angei manamanen Kot ach sipwe fiu ngeni ekewe sosot.
Nupwen ei fansoun ese mwumwuta ach sipwe chu fengen minne a aweiresi ach sipwe feino ngeni kewe tempel, uwa fen finata pwe upwe sopweno me kaeo me awateno ai sinei usun ewe manamanen Kot ewe a feito ngenikich nupwen sia fori me anomwu ach kewe pwonen non tempel. Usun pwonen epinipinin ewe Kirtland Tempel, sia tou seni ewe tempel fiti manamanen Kot.16 Eseor atun inet epwe expaer ren ewe manamanen Kot a nom won ekkewe ir mi fori me aneasochisi ekkewe pwonepin non tempel, me ese pwan or kaukun seni atufichin ena manaman fansoun ei watten semwen. An manaman a no seni kich non manawach ika chok sise aneasochisi ach kewe ponepiin me sise manaweni ussun met mi ngenikich ren ach soposopono ne nipwakoch ach angei an ewe manaman.
Nupwen pwunuwei achengicheng me ngang aiwa angangen wisem ren meinapen misin non Thailand, Laos, me Myanmar, auwa kuna akaewin ewe manamanen Kot ewe a feito ngeni kewe ra fori me aneasochisi ar pwon mi pin non tempel. Ekewe aninisin tempel a anisi ekewe aramas mi pin non kei unungat neni ar repwe fiti ewe tempel mwirin ar fori met ra tongeni non manawer me monota. Uwa chemeni usun ai churi ew mwichen 20 Souneng seni Laos non ewe airport non Bangkok, Thailand, ai upwe anisir me uweireno ngeni pwan ew airport non Bangkok ar repwe fiti war sepenin ngeni Hong Kong. Ekei memper ra fokkun mwasangasang ren ar repwe keran sai ngeni imwen ewe Samon.
Nupwen auwa churi ekei Souneng fansoun ra niwin, watenon ar sinei ewe kapas anim me manaman a feito seni ar angei ar pwonen tempel me ar tonong non ar pwon fiti Kot a pwano. Ekei Souneng a fat pwe ra feito seni ewe tempel “a nomw rer [an] manaman.”17 Ei manaman ar repwe fori nap seni met ra tongeni fori fan iter a ngenir pochokun ar repwe engino ngeni kewe osukosuk chon Mwichefen non kei neni ra kuna “watten me amwararen nonomwur, non enet,”18 non ar sopweno me awateno mwuun ewe Samon non Laos.
Non ewe fansoun sise tongeni feino ngeni ewe tempel, met sia anomwu ach nongonong won ach kewe pwon sia fori non ewe tempel ach sipwe fori ew faten, aan esapw ekesiwin non manawach? Ekkei pwon, ika sia anomwu, epwe afatakich me emwenikich ren mwach kan me ngenikich ew fatten pochokun ren unusochun ne angei meinisin minne ewe Samon a pwon non ach nukunuk.
Uwa tungor omw kopwe kutta ewe manaman Kot a mwochen ngonuk. Uwa pwarata pwe nupwen sia kutta ei manaman, sipwe feioch fiti watten ach weweiti ewe tong seni Samach non Nang fan itach.
Uwa pwarata pwe pwokiten Samach non Nang a tongei en me ngang, a tinato Noun we Anamon Jises Kraist, pwe epwe nouch chon Amanau me Chon Angasono. Uwa pwarata usun Jises Kraist, I a wor an unusen manaman,19 me uwa fori ei non iten Jises Kraist, amen.