Kawakina te Bitaki
Rinanon Iesu Kristo, ti anganaki te korakora ni karaoa te bitaki ae teimatoa. Ngkai ti nanorinano nako Ina, E na karikirakea riki ara konabwai ni bitaki.
Tariu, I rangi ni kimwareirei n raoni ngkami.
Iangoa temanna ae nakon te mwakete ni kabobwai. Ngkana e kabwaka ae raka riki nakon boon te bwai, te tia bobwai e na anganna ana nikira.
Te Uea Beniamina e reireiniia ana aomata i Amerika n taai akekei n te kakabwaia ae korakora are ti karekea mairoun te Tia Kamaiu, Iesu Kristo. E karaoa karawa, te aonaaba, ao bwaai ni kabane aika tamaroa ake ti kukurei iai.1 Rinanona Ana Tangira n te Mwakuri ni Kamaiu, E katauraoa te kawai ibukira bwa tina kaitiakaki man te bure ao te mate.2 Ngkana ti kaota ara kakaitau nako Ina man taningamarau ni maiuakina Ana tua, E na waekoa ni kakabwaiaira, ni katikuira n tainako n taarau Irouna.
E anganiira ae rang, mwaiti riki nakon mwaitin boona are ti kona ni kaokia nako Ina. Ngaia are, tera ae ti kona n Anganna, teuare e kabooa te bwai ae bobuaka riki ibukin ara bure? Ti kona n anganna te bitaki. Ti kona n anganna ara bitaki. E kona n riki bwa te bitaki n te iango, te bitaki n te anua, ke te bitaki n te kawai are ti na kaea. Ni kaokan kabwakaan boora n tatabemaniira ae akea kabotauana, te Uea e butiira ibukin te bitaki n nano. Te bitaki are E bubutiira bon tiaki ibukin kabwaiana, ma ibukira. Ngaia are, tiaki n aron te tia bobwai n te mwakete are e na ana ana ninkira are ti anga, ana nanoanga te Tia Kamaiu e bubutira bwa tina kawakina te Nikira.
Imwiin ongoraean ana taeka are e taekini te Uea Beniamina, ana aomata a takarua, ni kaotia bwa nanoia e a tia ni bitaki ni kangai. “ibukin Tamnein te Uea ae Moan te Mwaaka, are e a tia ni karika te bitaki ae moan te korakora iroura, ke i nanora, … akea te nano ni kan karaoa ae buakaka, ma n teimatoa ni karaoa ae raoiroi.”3 Koroboki aika a tabu e aki taekinna bwa a waekoa ni kororaoi, ma, iai nanoia ni kan bitaki e kairiia nakon karaoana. Bitakin nanoia e nanonaki ni katukan te aro n mwaane ke n aine ao ni kataia ni karekea te Tamnei n riki n ai aron riki Iesu Kristo.
Beretitenti Henry B. Eyring e reirei: “Te bitaki ni koaua, e kaineti ma kakaeana inanon te onimaki, ma te mwakuri korakora ao te maraki teutana. Imwiina e a nakon te Uea are kona n anga … te kakai iaon te kaitiakaki ao te bitaki.”4 Raonakin ara mwakuri ma ana kona te Tia Kamaiu ni bitiira, tina riki bwa aomata aika boou.
Ngke I uarereke, I noorai n nakonako iaon te kawai ae waerake, ni kaineti nakon au kouru n te maiu ae akea tokina. Ni katoa tai are I karaoia ke n taekina te bwai ae bure, I namakinna bwa I tikera rikaaki iaon te kawai, n te aro are N na manga moan waaki mai moana riki. Kanga ai aron are ko toka iaon teuana te tikuea n aia bwai n takakaro ataei n te bwarawa ao te kaintamwarake are e ko tikera rikaaki mai eta iaon te kairababa n oki ni manga moana te takakaro! E bon rangi ni kabwaranano! Ma ngkai Ia moanna n ota n ana reirei Kristo5 ao arora ni karaoia inanon maiura ni katoabong, I a kunea te kantaninga.
Iesu Kristo e a tia n anganiira te baeten n reitinako ibukin te bitaki. E kaoira bwa tina kammwakura ara onimaki Irouna, are e kaungai nanora nakon te rairannano—“are te onimaki ao te rairannano are e karekea bitaki n nano.”6 Ngkai ti rairannano ao n rairi nanora nakoIna, ti karekea te nano ae korakora ni karaoi ao ni maiuakin berita aika a tabu. Ti teimatoa ni ua te toki man reitinako ni karaoi reirei aikai rinanon maiura ao ni kaoia te Uea bwa e na bitiira. Teimatoa ni ua te toki nanona bitaki ni karokoa te toki. Ngkai I a ataia bwa I aki manga waaki mai moana ni katoa te tai are I kabwaka iai, ma ni katoa tai are I kataia, I reitinako iaon karaoan te bitaki.
Iai aia Botoniango Kairake n Ataeinnaine are e taekinna, “I kakaitau n te bwaintangira n te rairannano ao n ukoukoria ni katamaroa ni katoa bong.”7 I tataro bwa tina kakaitau n te bwaintangira ae tamaroa aei ao bwa tina karaoia ma nanora ni ukoukora te bitaki. N tabetai te bitaki are ti kainnanoia a irekereke ma buure aika a kakaiaki. Ma n angiin te tai, ti kataia ni katamaroai anuara ni kaboraoira ma anuan Iesu Kristo. Ara rinerine ni katoa bong e na kona ni buokiira ke ni karaka riki rikirakera. Uarereke ma e teimatoa, bitaki ake a kainnanoaki a na buokiira ni kanakoraoira. E na tai bwara nanom. Te bitaki e tangira mwakuriana inanon maium. I kakaitau bwa inanon ara ikakorakora nakon te bitaki, te Uea e taotaonannano i bukira.
Rinanon Iesu Kristo, ti anganaki te korakora ni karaoa te bitaki ae teimatoa. Ngkai ti nanorinano nako Ina, E na karikirakea riki ara konabwai ni bitaki.
N raonaki ma mwaakan te bitaki n ana Mwakuri ni Kamaiu te Tia Kamaiu, te Tamnei ae Raoiroi e na boutokaira ao ni kairiira ngkai ti anga ara mwakuri korakora. E kona naba ni buokiira n ataia bwa tera te bitaki ae ti kainanoia ni karaoia. Ti kona naba ni karekea te ibuobuoki ao te kaunganano rinanon kakabwaia n te nakoanibonga, tataro, aki mamatam, ao kakawaran te tembora.
N aron naba, onimakinaia kain ara utu, mataniwi, ao raraora e kona naba n ibuobuoki inanon ara kekeiaki ni bitaki. Ngke waniua au ririki, mwaneu ae ikawai, Lee, ao ngai ti kona ni kabanea ara tai ma raraora n takakaro ni mwaangan arokaia kain rarikira. Ti tatangiria n ikotaki n raonia ma raraora iaan nuun te aroka anne. N te bong teuana, Lee e bwaka man te aroka ao e mwaoto baina. Ma mwaoton baina e a kangaanga irouna bwa e na tamwarakea te aroka i bon irouna. Ma te maiu n te aroka arei e aki tiku n arona ngkai akea ngaia ikekei. Ngaia are tabeman mairoura ti kamatoa mai akuna ngkai tabeman a katikia ni baina are e raoiroi, ao n akean te mwakuri korakora, Lee e oki nako mwaangan te aroka. Baina e bon mwaoto naba, ma e a manga raoniira ni kukurei n ara iraorao ngke e mao baina.
I iangoa te taneiai n takakaro n te aroka n tabetai bwa aekakin ara waaki ni kakukurei n ana euangkerio Iesu Kristo. I aan nuun mwaangan te euangkerio, ti kukurei ni kakabaia aika a mwaiti are e irekereke ma ara berita aika a tabu. Tabeman a bae n tia ni bwaka man kamanoakiia n aia berita ao a kainnanoa te ibuobuoki n oki n tamwarake inanon te kamanoaki ni mwangan te euangkerio. E kona ni kangaanga bwa a na oki i bon irouia. Ti kona ni karaurau ni katikaki teutana ikai ao n tabekaki teutana ikekei ni buokiia ni kamaoaki ngkai a kukurei n ara iraorao?
Ngkana ko rootaki n te ikoaki man te bwaka, taiaoka kariaia tabeman bwa a na buokiko n oki nakon am berita ao kakabwaia ake anga. Te Tia Kamaiu e kona ni kamarurungko ao ni bitiko ngkai ko katobibiaki irouia naake a tangiriko.
N tabetai I kaitibo ma raraou ake I tuai man nonoriia inanon ririki aika a bati. N tabetai a taku, “Ko bon tuai ni bitaki naba teutana!” Ni katoa tai are I ongo anne, I mama teutana, ibukina bwa I kantaningaia I a tia ni bitaki n ririki aika nako. I kantaningaia bwa I a tia ni bitaki man ngkoananoa! I kantaningaia bwa I a akoi riki, karako au momotikitaeka, ao nananoanga riki. I kantaningaia bwa I a waekoa riki ni kaeka nakon kainnanoia tabeman, ao I a taotaonnano riki.
I tatangiria n tamwarakea te maunga ae kaan ma mweengau. N tabetai, e rinnako te atibu ae uarereke n au kau ngkai i nakonako n te kawai. N tokina, I tei ao n ioioi au kau bwa e na nako. Ma I mimi bwa manra ngai ni kariaia bwa N na tamwarake inanon te maraki imwain ae I kanakoa te atibu ae uarereke.
Ngkai ti mwananga ni kawain te berita ae tabu, n tabetai e rin te atibu inanon ara kau man anua aika kabwaka, buure, ke anua aika bubuaka. Waekoara ni ioioi ni kanakoa man maiura, e na raka riki te kimwareirei ao kakukurein te mwananga n te maiu ae mamate are e na riki.
Kateimatoan te bitaki e tangira mwakuriana. I aki kona n iangoia bwa N na tei iaon kawaiu n tii kaoka te atibu are I kanakoa man au kau ae kamwengabuaka ao ni kammaraki. N na bon aki tangiria ni karaoa anne n te taina nakon te bwebwe ae tamaroa are e rineia bwa e na okira nnena ni buu.
I kakoaua bwa ibukin Iesu Kristo, ti kona ni bitaki. Ti kona ni bita anuara, karakai ara iango, ao ni katamaroai arora ni kona n riki n ai Arona. Ao n ikotaki ma Ana ibuobuoki, ti kona kawakina te bitaki. N aran Iesu Kristo, amen.