Mensahe di Bon Bini
Bon bini na konferensia general i na e privilegio pa skucha e bos di Señor.
Mi kerido rumannan, i amigunan rònt mundu, mi ta yama boso bon bini na e konferensiá general aki. Nos ta reuní komo un gran famia mundial ku ta deseá pa adorá nos Señor i Salbador, JesuCristu. Danki pa uni ku nos.
E delaster aña aki tabata unu pa e bukinan di rekuerdo. No tin duda ku nos kada un a siña kosnan ku nos no tabata sa anteriormente. Algun di e lèsnan ku mi tabata sa promé ku [nan] a wòrdu graba den mi kurason na un manera nobo i instruktivo.
Por ehèmpel, mi sa ku siguransa ku Señor ta dirigí e asuntunan di Su Iglesia. El a bisa, “Lo mi mustra [bo] ku Mi ta disponibel pa hasi Mi propio obra.”1
Hopi biaha, mi konseheronan i ami a wak ku wowonan yen di lágrima i emoshon miéntras E tabata intersedé den sirkunstanshanan ekstremadamente desafiante despues ku nos a hasi nos mayor esfuerso i no por a hasi mas. Nos tur ta keda asombrá.
Tambe mi ta komprondé mas mihó awor kiko E tabata kiermen ora El a bisa, “Mira, Lo mi pura mi obra den su tempu.”2 Kada bes di nobo mi a regosihá ora ku El a dirigí i ehekutá e aseleramentu di Su obra—asta durante un pandemia mundial.
Mi kerido rumannan, e forsa di e Iglesia ta sinta den e esfuersonan i kresementu kontinuo di e testimonio di su miembronan. Testimonionan ta wòrdu mas mihó kultivá na kas. Durante e aña ku a pasa, hopidi boso a oumentá dramátikamente e estudio di e evangelio den boso kasnan. Mi ta gradisí boso, i boso yunan lo gradisí boso.
E proyekto gigantesko pa renobá e Tèmpel di Salt Lake ta sigui. For di mi ofisina mi tin un asiento den promé rei pa wak e trabou ku ta tuma lugá na e plasa di tèmpel.
Miéntras mi tabata opservá e trahadónan koba raisnan di palu nan bieu, trabou di plombero, maramentu di heru i un fòntein ku tabata lèk, mi a pensa riba e nesesidat di kada un nos pa eliminá, ku e yudansa di nos Salbador, e susesonan di pasado den nos bida.
E evangelio di JesuCristuta e evangelio di arepentimentu.3 Dor di e Salbador Su Ekspiashon, Su evangelio ta proveé un invitashon pa sigui kambia, krese i yega na bira mas puru. E ta e evangelio di speransa, di sanashon, i di progreso. Kermen, e evangelio ta un mensahe di alegria. Nos spiritunan ta alegrá ku kada un progreso chikitu ku nos hasi.
Un parti di e rekohementu di Israel, i un parti hopi importante, ta e mandato pa nos komo hende ta digno i disponibel pa yuda prepará e mundu pa e Segundo Binida di Señor.
Miéntras nos ta skucha e mensahenan ku a wòrdu prepará kuidadosamente dor di nos lidernan bou di direkshon di e Spiritu Santu, mi ta invitá boso pa hasi orashon i identifiká e susesonan di pasado ku bo mester eliminá for di bo bida pa asina bo por bira mas digno.
Mi ta stima boso mi kerido rumannan, i ta testifiká ku nos Tata Selestial i Su Yu Stima konose i ta stima boso individualmente. Nan ta kla para pa yuda bo den kada stap ku bo dal pa dilanti. Bon bini na konferensia general i na e privilegio pa skucha e bos di Señor. Den e nòmber di JesuCristu, amèn.