Dios entre Nos
Dios ta entre nos—i ta personalmenteenbolbí den nos bida i guiando Su yunan aktivamente.
Durante tempu, Señor a papia ku nos pa medio di su sierbonan, e profetanan.1 Awe mainta nos tabatin e privilegio di skucha e profeta di Dios papia na tur e mundu. Nos stima bo, Presidente Nelson, i mi ta enkurashá tur hende tur kaminda pa studia i pone atenshon na bo palabranan.
Promé ku mi a yega mi di diesdos aña, nos famia a wòrdu obligá di huí for di nos kas dos biaha i kuminsá di nobo meimei di kaos, miedu i inseguridat kousá pa guera i divishon polítiko. Tabata un tempu di hopi miedu pa mi, pero lo e mester tabata espantoso pa mi mayornan stimá.
Mi mama i mi tata a kompartí poko tokante e karga aki ku nos [nan] kuanter yunan. Nan a soportá e tenshon i sufrimento e mihó ku nan tabata por. E miedu mester tabata oprimí, konsumiendo nan oranan i disminuí nan speransa.
E temporada aki di desolashon depues di e di dos Guera Mundial a laga su marka riba e mundo. El a laga su marka riba mi.
E tempu ei, den e soledat di mi oranan mas solitario, hopi biaha mi a puntra mi mes, “A keda algun speransa den mundo?”
Angelnan entre Nos
Miéntras mi tabata reflekshonando riba e pregunta aki, mi a pensa riba e misioneronan merikano yòn ku a sirbi entre nos durante e añanan aki. Nan a laga nan seguridat di nan kas mitar mundo leu i a biaha pa Alemania—pais di nan resiente enemigunan—pa ofresé speransa dibino na nos pueblo. Nan no a bini pa kulpa, duna seremoniá òf bergonsá. Boluntariamente nan a duna nan bida yòn sin pensa riba ganashi di mundo, sperando solamente pa yuda otro haña goso i pas ku nan a eksperensiá.
Pa mi, e hòmbernan i muhénan yòn aki aki tabata perfekto. Mi tin sigur nan tabatin defekto, pero no pa mi. Ami semper lo pensa riba nan komo sernan mas grandi ku bida—angelnan di lus i gloria, ministrantenan di kompashon,bondat i bèrdat.
Miéntras e mundo tabata hogando den sinismo, amargura, odio i miedu, e ehèmpel i enseñansanan di e hóbennan aki a yena mi ku speransa. E mensahe di e evangelio ku nan a ofresé a traspasá poltika, historia, renkor, kehonan i agèndanan personal. El a duna kontestanan dibino na preguntanan importante ku nos tabatin durante e temporada ei.
E mensahe tabata ku Dios ta bibu, i ta pre0kupá pa nos, hasta den e tempu aki di intrankilidat, konfushon i káos. Ku realmente El a paresé den nos tempu pa restaurá bèrdat i lus—Su evangelio i Su Iglesia. Ku E ta papia ku profetanan atrobe; ku Dios ta entre nos—i ta personalmente enbolbí den nos bida i guia Su yunan aktivamente.
E ta sorprendente kiko nos por siña ora nos wak mas di aserka e plan di salbashon i eksaltashon di nos Tata Selestial, e plan di felisidat, pa Su yunan. Ora nos ta sinti nos mes insignifikante, poné un banda i lubidá, nos ta siña ku nos por ta sigur ku Dios no a lubidá nos—en realidat ku e ta ofresé na tur Su yunan algu inimaginabel; pa bira —“heredero di Dios, i ko-heredero ku Cristu.”2
Kiko esaki ta nifiká?
Ku nos lo biba pa semper,risibí e plenitut di goso,3 i tin e potensial pa “heredá trononan, reinonan, gobernashonnan, i poder.”4
Ta asina humilde pa sa ku e futuro magnífiko i elevá akí ta posibel—no pasó di loke nos ta pero pa loke Dios ta.
Sabiendo esaki, kon nos por murmurá óf keda amargá? Kon nos por keda ku nos wowonan mirando abou ora e Rei di reinan ta invitá nos pa tuma un buelo pa un futuro inimaginabel di felisidat dibino?5
Salbashon entre Nos
Dor di Dios Su amor perfekto pa nos i e sakrifisio eterno di JesuCristu, nos pikánan—tantu esnan grandií komo esnan chikí—por wòrdu kitá i no ta kòrda nan mas.6 Nos por para dilanti Dje puro, digno i santifiká.
Mi kurason ta desbordá di gratitut pa mi Tata Selestial. Mi a realisá ku E no a kondená Su yunan pa trompeká dor di mortalidat sin speransa pa un i futuro briante i eterno. El a laga instrukshonnan ku ta revelá e kaminda pa bai bèk serka Dje. I den e sentro di turesaki ta Su Su stimá, JesuCristu,7 i Su sakrifisio pa nos.
E Ekspiashon infinito di Señor a kambia kompletamente e manera ku nos por a mira nos transgreshonnan i imperfekshonnan. Na lugá di keda pegá den nan i sinti ku nos no por wòrdu salbá, òf sin speransa nos por siña di nan i sinti yen di speransa.9 E don purifikador di arepentimentu ta laga nos bandoná nos pikánan i surgi un kriatura nobo.9
Pa motibu di JesuCristu, nos frakasonan no mester definí nos. Nan por refiná nos.
Manera un músiko ensañando su eskalanan, nos por mira nos erornan, fayonan i pikánan komo oportunidatnan pa bira mas konsiente, mas profundo i ku mas amor honesto pa otronan i refinamento dor di arepentimentu.
Si nos arepentí, erornan no ta deskualifiká nos. Nan ta parti di nos progreso.
Nos tur ta beibi kompará ku e sernan glorioso i grandioso ku nos ta diseña pa bira. Niun ser mortal aku ta avansá di gatia pa kana pa kore sin frekuentemente trompeká, gòlpinan i markanan. Asina nos ta siña.
Si nos keda praktiká honestamente, semper esforsando pa warda e Dios Su mandamentunan, i komprometé nos esfuersonan pa arepentí, perserverá i apliká loke nos a siña, liña pa liña, nos lo rekohé lus den nos alma.10 I aunke nos lo no por komprondé kompletamente tur nos potensial awor aki, “nos sa ku, ora [nos Señor] lo aparesé” nos lo mira Su kara den nos, “i nos lo mira E manera E ta.”11
Ki promesa maravioso!
Si, e mundu ta intrankil. I si, nos tin debilidatnan. Pero nos no mester baha nos kabesnan abou den desesperashon, pasombra [pasó] nos por konfia Dios. Nos pos konfia Su Yu JesuCristu i nos por aseptá e don di Spiritu Santo pa guia nos riba e kaminda pa un bida yen di goso i alegria divino di felisidat.12
Jesus entre Nos
Hopi biaha mi ta puntra mi mes, Kiko Jesus lo a siña i hasi si e tabata entre nos awe?
Despues di e Resurekshon, JesuCristu a kumpli ku Su promesa di bishitá Su “otro karnénan.”13
E Buki di Mormon: Un otro Tèstament di JesuCristo a papia di tal aparishon na e pueblo na e kontinente Amerikano. Nos tin e presioso registro komo testigu supstansial di e trabou di Salbador.
E hendenan di e Buki di Mormon tabata biba na e otro parti di mundu—nan historia, kultura i klima polítiko tabata hopi diferente di e pueblo ku Jesus a siña durante Su ministrashon mortal. I tòg El a siña nan hopi di e mesun kosnan ku El a siña na e Tera Santu.
Dikon lo El a hasi esei?
Nos Salbador semper ta siña nos bèrdatnan eterno. Nan ta aplikabel pa hende di tur edat i den tur sirkunstansia.
Su mensahe tabata i ta un mensahe di speransa i [di] pertenesé—e testimonio ku Dios nos Tata Selestial nunka no a bandoná Su yunan.
E Dios ei ta entre nos!
Dosshen aña pasá, e Salbador a bolbe bini na mundu. Huntu ku Dios e Tata, El a paresé na e Josá Smith di 14 aña i introdusí e restourashon di e evangelio i e Iglesia di JesuCristu. For di e dia ei, shelunan a habri i mensahenan selestial a desendé for di gloria inmortal. Lus i kososementu a drama for di trono selestial.
Señor JesuCristu a papia un biaha mas ku mundu.
Kiko El a bisa?
Pa nos bendishon, hopi di Su palabranan ta registrá den Doktrina i Kombenionan—disponibel na tur riba e mundu ku ta deseá di lesa i studia nan. E palabranan aki tin hopi balor pa nos awendia!
I nos no mester ta sorprendí di haña ku e Salbador ta bolbe siña e mensahe sentral di Su evangelio : “Bo mester stima Señor bo Dios ku tur bo kurason, mente i forsa; i den nòmber di JesuCristu lo bo sirbié.”14 E ta inspirá nos pa buska Dios15 i biba segun e enseñansanan ku El a revelá na Su sirbientenan, e profetanan.15
El a siña nos di stima un na otro17 i ser “yená ku karidat pa tur hende.”18
E ta invitá nos pa ta Su mannan, pa bai i hasi bon.19 “Laga nos no stima ku palabra, ni ku lenga; pero ku hecho i bèrdat.”20
El a desafiá nos pa duna oido na su gran mandamentu, pa stima, pa kompartí, pa invitá tur na Su evangelio i Su Iglesia21
El a duna nos e mandamentu pa traha tèmpelnan santu i pa drenta i sirbi aya.22
El a siña nos pa bira Su disípulonan—ku nos kurason no mester lucha pa poder personal, rikesa, aprobashon, òf posishon. El ta siña nos pa “pone un banda e kosnan di e mundu aki, i buska e kosnan mihó.”23
E ta urgi nos pa buska goso, iluminashon, pas, bèrdat, felisidat,24 i e promesa di inmortalidat i bida eterno.25
Laga nos ban dal un stap mas dilanti. Imafiná bo ku Jesus a bin na bo bario, na bo rama, òf na bo kas awe. Kon esei lo ta?
E lo mira direkt den bo kurason. Aparensianan eksterior lo pèrdè nan importansia. E lo konose bo manera bo ta. E lo konose deseonan di bo kurason.
Esun mansu i humilde E lo elevá.
Esun enfermo E lo kura.
Esun dudoso lo E duna un infuse ku fe i kurashi pa kere.
E lo siña nos pa habri nos kurason pa Dios i yuda otronan.
E lo rekonosé i honrá honestidat, humildat, integridat, fieldat, kompashon i karidat.
Un mirada den Su wowonan i nos nunka lo ta meskos. Nos lo kambia pa semper. Transformá pa e realisashon profundo ku, realmente Dios ta entre nos.
Kiko Nos Lo Hasi?26.
Mi ta wak bèk ku kariño riba e hòmber yòn ku mi tabata durante mi añanan di kresementu. Si mi por a bai bèk den tempu, lo mi a konsolé i bis‘é pa keda riba e kaminda rekto i sigui buska. I lo mi lo a puntré pa invitá JesuCristu den su bida, pasó Dios ta entre nos!
Na bo, mi rumannan stimá, mi erido amigunan, i tur ku ta buskando pa konstestanan, bèrdat, i felisidat, lo mi ofresé e mesun konseho: Sigui buska ku fe i pasenshi.27
Puntra i lo bo haña. Bati, i e lo wòrdu habrí pa bo.”28 Konfia Señor.29
Den nos bida diario ta nos tarea primordial i oportunidat bendishoná pa haña Dios.
Si nos pone orguyo un banda i aserká Su trono ku un kurason kibrá i un spiritu kontrito,30 E lo yega mas serka nos.31
Ora nos ta buska pa sigui JesuCristu i kana e kaminda di disipulado, liña pa liña, e dia lo yega ku nos lo eksperensiá e regalo inimaginabel di risibí e plenitut di goso.
Mi amigunan stimá, bo Tata Selestial ta stima bo ku un amor perfekto. El a prueba Su amor den tur manera, pero riba tur kos El a duna Su úniko Yu biológiko komo sakrifisio i un regalo na Su yunan pa hasi e regreso na nos mayornan selestial un realidat.
Mi ta testifiká ku nos Tata Selestial ta bibu, ku JesuCristu ta dirigí Su Iglesia, ku Presidente Russell M. Nelson ta Su profeta.
Mi ta ekstendé mi amor i mi bendishon na boso den e alegre temporada di pasku aki . Habri boso kurason pa nos Salbador i Tedentor, sin importá boso sirkunstansianan, pruebanan, sufrimentunan, òf erornan; boso por sa ku E ta bibu, ku E stima boso, i esei pa motibu di DjE, nunka boso lo no ta boso so.
Dios ta entre nos.
Di esaki mi ta testifiká i duna mi testimonio den e nòmber sagrado di JesuCristu, amèn.