Pobersitunan
Den kada bario i rama nos mester di tur hende—esnan ku kisas ta fuerte i esnan ku kisas ta luchando. Tur ta nesesariol.
Komo mucha, mi ta kòrda ora ku mi tabata kore den outo ku mi tata i tabata wak individuonan kantu di kaminda ku a haña nan mes den sirkunstanshanan difísil òf ku tabata tin mester di yudansa. Mi tata semper a hasi e komentario Pobrecito,” loke ta nifiká “pobersitu.”
Na algun okashon, Mi a wak atento ora mi tata tabata yuda hopi di e diferente hendenan aki, speshalmente ora ku nos tabata biaha pa bai Mèxico pa wak mi abuelonan. Por lo general e ta haña un hende ku tin nesesidat i despues bai den priva i proveé e yudansa ku nan tabata tin mester. Despues mi a deskubrí ku e tabata yudando nan inskribí na skol, kumpra algu di kuminda òf sòru di un manera òf otro pa nan bienestar. E tabata ministrá na un “pobersitu” kende a krusa den su kaminda. Den realidat, segun ku mi ta krese durante di añanan mi no por kòrda un momentu ku nos no tabatin un hende ta biba huntu ku nos ku tabatin mester di un kaminda pa keda segun nan tabata bira outo sufisiente. Dor di wak e eksperensianan aki a krea den mi un spiritu di kompashon pa ku mi próhimo [hòmber i muhé] i esnan den nesesidat.
Den Prediká Mi Evangelio ta wòrdu sita: “Bo ta rondoná di hende. Bo ta pasa nan riba kaminda, bishita nan na nan kas, i biaha entre nan. Nan tur ta yunan di Dios, bo rumannan. … Hopi di e hendenan aki ta buskando propósito den bida. Nan ta preokupá pa nan futuro i nan famianan” ( Prediká Mi Evangelio: Un guia pa Servisio di Mishon [2018], 1).
Dor di añanan, sirbiendo den Iglesia, mi a trata na buska esnan ku tabata tin mester di yudansa den nan bida, tantu temporal komo spiritual. Ku regularidat mi tabata skucha e bos di mi tata bisando, Pobrecito,”,” pobersitu.
Den beibel nos ta haña un ehèmpel bunita di sòru pa un pobersitu:
“Awor Pedro i Juan a subi huntu bai den e tèmpel na e orario di hasi orashon, ku tabata e ora nobeno.
“I un sierto hòmber, mankaron for di den matris di su mama, ku nan tabata pone diariamente na e porta di tèmpel ku ta wòrdu yamá Bunitesa, pa pidi limosna di esnan ku ta drenta den e tèmpel;
“Kende ora a mira Pedro i Juan tabata na punto di drenta tèmpel pa pidi un limosna.
“I Pedro, ku su bista fihá riba dje ku Juan, a bisa, Wak nos.
“I el a pone atenshon na nan, sperando di risibí algu di nan.
“E ora ei Pedro a bisa, ‘Plata i oro mi no tin; pero loke mi tin mi ta duna bo: Den e nòmber di JesuCristu di Nazaret lanta para i kana.
“I el a tene na su man drechi, i hisa e: i inmediatamente su pia i wesunan di ènkel a haña forsa ” (Echonan 3:1–7; énfasis añadí).
Lesando e relato aki, mi a keda intriga pa e uso di e palabra fihando. E palabra fihando ta nifiká dirigí wowonan i pensamentunan, òf wak intenso na algu (wak “fasten,” Dictionary.com). Ora ku Pedro a mira e hòmber aki, el a mir’é na un manera diferente for di otronan. El a mira mas aleu di su inkapasidat pa kana i su debilidatnan i e por a diserní ku su fé tabata adekuá pa wòrdu saná i drenta den e tèmpel pa risibí e bendishonnan ku e tabata buskando.
Mi a nota ku el a kue na su man drechi i a his’é. Miéntras el a yuda e hòmber di e manera aki, Señor milagrosamente a san’é, i “su wesunan di pia i ènkel a haña forsa” (Echonan 3:7). Su amor pa e hòmber aki i e deseo pa yud’é a kousa un oumento di kapasidat i abilidat den e hòmber ku tabata debil.
Miéntras mi tabata sirbiendo komo Setenta di Área, Mi a reservá tur djamars pa hasi bishita ministrante ku e presidente di estaka den mi área di responsabilidat. Mi a invitá nan pa traha sitanan ku esnan ku tabata den nesesidat di un ordenansa di e evangelio di JesuCristu òf esnan ku na e momentu ei no tabata wardando e kombenionan ku nan a hasi. Dor ku nos tabata ministra konsistente i intenshonalmente, Señor a magnifiká nos esfuersonan i nos por a haña individuonan i famianan ku tabata den nesesidat. Esakinan tabata e “pobersitunan” ku tabata biba den e diferente estakanan kaminda nos tabata sirbi.
Na un okashon, mi a kompaña presidente Bill Whitworth, e presidente di e estaka Sandy Utah Canyon View, pa hasi bishita ministrante. E tabata hasi orashon pa sa ken nos mester a bishita, tratando na haña e mesun eksperensha ku Nefi, kende “a wòrdu guia pa e spiritu, sin sa di antemano e kosnan ku [e] mester a hasi” (1 Nefi 4:6). El a demostrá ku miéntras nos ta ministra, nos mester wòrdu guia pa revelashon na esnan ku mas nesesidat, na lugá di simplemente sigui un lista òf bishita individuonan na un manera metódiko. Nos mester wòrdu guiá pa e poder di inspirashon.
Mi ta rekordá di a bai na kas di un pareha yòn, Jeff i Heather, i nan yu hòmber chikitu, Kai. Jeff a lanta komo un miembro aktivo di e Iglesia. E tabata un atleta ku hopi talento i tabata tin un karera prometedor. El a kuminsá alehá for di Iglesia den su adolesensia. Despues el a haña un aksidente di outo, kual a kambia e rumbo di su bida. Ora ku nos a drenta nan kas i a sera konosí, Jeff a puntra dikon nos a bin wak su famia. Nos a respondé ku tabata tin alrededor di 3000 miembro ku tabata biba den e área ku ta kai bou di e límitenan di estaka. Despues mi a puntr’é, “di tur e kasnan ku nos por a bishita awe nochi, bisa nos dikon Señor a manda nos aki.”
Ku esaki, Jeff a bira emoshonal i a kuminsá kompartí ku nos algun di su preokupashonnan i algun problemanan ku nan tabata lidia kuné komo famia. Nos a kuminsá kompartí vários prinsipionan di e Evangelio di JesuCristu. Nos a invitá nan pa hasi algun kos spesífiko ku por parse desafiante den kuminsamente pero ku tempu lo trese gran felisidat i goso. Despues presidente Whitworth a duna Jeff un bendishon di saserdosio pa yud’é surpasá su reto nan. Jeff i Heather a akordá pa hasi loke nos a invitá nan pa hasi.
Mas o ménos un aña despues, tabata mi privilegio pa mira Jeff batisá su kasa, Heather, un miembro di e Iglesia di JesuCristu di e Santunan di e Delaster Dianan. Awor aki nan ta preparando nan mes pa drenta e tèmpel pa wòrdu sea komo famia pa tempu i tur eternidat. Nos bishita a kambia e rumbo di nan bida tantu temporal komo spiritual.
Señot a deklará:
“P’esei, sea fiel; okupá e puesto ku mi a apuntá na boso; ousiliá e debil, alsa e mannan ku ta kologá abou, i fortalesé e rudianan debil” (Doktrina i Kombenionan 81:5).
“ I hasiendo esakinan lo bo hasi asina bon na bo próhimo, i lo promové e gloria di e ku ta bo Señor” (Doktrina i Kombenionan 81:4).
Rumannan, e Apòstel Pablo a siña un elemento klave den nos ministerio. El a siña ku nos ta “e kurpa di Kristu, i miembronan en partikular” (1 Korintionan 12:27) i ku kada miembro di e kurpa ta nesesario pa por sigurá ku e kurpa kompletu ta wòrdu edifiká. Despues el a siña un bèrdat poderoso ku a drenta profundo den mi kurason ora ku mi a les’é. El a bisa, “Mas parti di e kurpa, ku ta parse di ta debil, ta nesesario: i e parti nan ku nos ta pensa ku ta ménos honorabel, riba esakinan nos ta otorgá nan mas abundante hono ” (1 Korintionan 12:22–23; Énfasis añadí).
P’esei, den kada bario i rama nos mester di tur hende—esnan ku kisas por ta fuerte i esnan ku ta luchando. Tur ta nesesario i pa e edifikashon vital di e “kurpa kompletu di Cristu.” Hopi bes mi ta puntra mi mes ken nos ta falta den nos diferente kongregashonnan ku lo fortalesé nos i kompletá nos.
Elder D. Todd Christofferson a siña: “IDen Iglesia nos no ta siña solamente doktrina dibino; nos ta eksperensiá su aplikashon tambe. Manera e kurpa di Cristu, e miembronan di Iglesia ta ministrá otro den e realidat di bida diario. Kada unu di nos tur ta imperfekte; Den e kurpa di Cristu, nos mester bai mas leu ku konseptonan i palabranan eksaltá i tin eksperensianan real ‘práktiko’ pern nos ta siña pa ‘biba huntu den amor’ [Doctrina y Convenios 42:45]” (“Why the Church,” Liahona, Nov. 2015, 108–9).
Na 1849, Bringham Young tabata tin un soño den kual el a mira e Profeta José Smith manehando un grupo di karné i kabritu grandi. Algun di e animal nan aki tabata grandi i bunita; otronan tabata chikí i sushi. Brigham Young ta kòrda di a wak e profeta Jose Smith den su wowo i a bisé, “Jose, bo tin e trupa di mas malditu … ku mi a yega di mira den mi bida; kiko bo ta bai hasi ku nan?” E Profeta, ku tabata mustra di no ta preokupá ku e trupa inmanehabel aki, a reakshoná simpel, “Nan tur ta bon na nan lugá.”
Ora ku presidente Bringham Young a spièrta, el a komprondé ku miéntras Iglesia lo rekohé un variedat di “karné i kabritu,” tabata su responsabilidat pa trese tur paden i permití kada un di nan realisá nan potensial máksimo dor di okupá nan lugá den Iglesia. (Adapá di Ronald W. Walker, “Brigham Young: Student of the Prophet; Ensign, Feb. 1998, 56–57.)
Rumannan, e orígen di mi diskurso a kuminsá ora ku mi a pensa profundo riba un hende ku aktualmente no ta partisipando den e Iglesia di JesuCristu. Pa un momentu lo mi tin gana di papia ku kada unu di nan. Elder Neal A. Maxwell a siña ku “tipo di individuonan aki hopi bes ta keda serka di—pero no ta partisipá kompletamente den— e Iglesia. Nan lo no bin den e kapia, pero tampoko lo sali for di e veranda. Esakinan ta esnan ku tin mester i ta di nesesidat pa e Iglesia, pero ku, por parti, ‘ta biba sin Dios den e mundu’’ [Mosia 27:31]” (“Why Not Now?,” Ensign, Nov. 1974, 12).
Ami lo uni mi mes na e invitashon di nos estimado Presidente Russell M. Nelson ora ku el a papia pa promé bes ku e miembronan di Iglesia. El a bisa: “Awor, na kada miembro di Iglesia mi ta bisa, Keda riba e kaminda di kombenio. Bo kompromiso pa sigui e Salbador dor di hasi konvenionan ku nE i despues warda e konvenionan aki lo habri e portanan di kada bendishon spiritual i privilegio disponibel pa hòmber, muhé, i muchanan tur kaminda.”
Despues el a súplika: “Awor, Si bo a sali for di e kaminda, pèrmití Mi invitá bo ku tur e speransa den mi kurason pa por fabor regresá bèk. Kiko ku por ta bo preokupashonnan, kiko ku ta bo retonan, tin un lugá pa bo aki den, e Iglesia di Señor. Abo i generashonnan ku no a nase ainda lo wòrdu bendishoná pa boso akshonnan awor pa regresá na e kaminda di konvenio” (“As We Go Forward Together,” or Liahona, Apr. 2018, 7; emphasis added).
Mi ta duna testimonio di DjE,asta JesuCristu, e Pastor Maestro i Salbador di nos tur. Mi ta invitá kada unu pa buska e “pobrecitos,” e “pobersitunan” entre nos ku ta den nesesidat. Esaki ta mi speransa i orashon den e nòmber di JesuCristu, amèn.