Di kon e Iglesia

Pa Elder D. Todd Christofferson

Di e Quorum di e Diesdos Apòstelnan

Ta bal la pena para ketu pa konsiderá di kon JesuCristu ta skohe pa usa un iglesia, Su Iglesia, pa hiba dilanti e obra di DjE i di Su Tata.

Durante mi bida, konferenshanan general di Iglesia tabata eventonan spiritualmente stimulante, i Iglesia mes tabata e lugá pa bini i konosé Señor. Mi a realisá ku tin esnan ku ta konsiderá nan mes religioso òf spiritual i tòg ta rechasá partisipashon den un iglesia òf hasta e nesesidat di un institushon. Práktika religioso pa nan ta puru personal. Sinembargo, Iglesia ta e kreashon di DjE den kua nos spiritualidat ta sentrá---JesuCristu. Bale la pena para ketu pa konsiderá di kon E ta skohe pa usa un iglesia, Su Iglesia, E Iglesia di JesuCristu di e Santunan di e Delaster Dianan, pa kumpli ku e obra di DjE i Su Tata pa “trese inmortalidat i bida eterno di hende.”¹

E evangelio di JesuCristu a wòrdu prediká kuminsando ku Adam, i e ordenansanan esensial di salbashon, manera boutismo, tabata wòrdu atministrá dor di òrdu di saserdosio bas riba famia.² Segun sosiedatnan a krese [bira] mas kompleho ku e simpel ekstenshon di famia, Dios a yama otro profetanan, mensaheronan, i maestronan tambe. Den tempu di Moises, nos ta lesa di un struktura formal, inkluyendo èldernan, saserdotenan, i huesnan. Den historia di e Buki di Mormon, Alma a establesé un iglesia ku saserdotenan i maestronan.

Despues, den e meridiano di tempu, Jesus a organisá Su obra di tal manera ku e evangelio por a wòrdu establesé simultáneamente den múltiple nashonnan i bou di diferente pueblo. E organisashon aki, e Iglesia di JesuCristu, tabata fundá riba “apòstelnan i profetanan, JesuCristu mes siendo e piedra angular prinsipal.”³ E tabata inkluí mas ofisialnan, manera setenta, èldernan,obispunan, saserdotenan, i diákononan. Igualmente Jesus a establesé e Iglesia den Hemisferio Oksidental despues di Su Resurekshon.

Despues di e Apostasia i desintegrashon di e Iglesia ku El a organisá miéntras e tabata na mundu, Señor a reorganisá e Iglesia di JesuCristu un biaha mas pa medio di e Profeta Jose Smith. E propósito antiguo a permanesé: esei ta, pa prediká e bon nobo di e evangelio di JesuCristu i atministrá e ordenansanan di salbashon---ku otro palabra, pa trese e hendenan na Cristu.⁴ I awor, pa medio di e organisashon di e Iglesia restourá, e promesa di redenshon ta poné na alkanse di hasta spiritunan di e mortonan ku den temporada di nan bida mortal tabata poko òf nada di e Salbador su grasia.

Kon Su Iglesia ta logra Señor Su propósitonan? Ta importante pa rekonosé ku Dios su propósito prinsipal ta nos progreso. Su deseo ta pa nos sigui “di grasia pa grasia, te ora [nos risibí] un plenitut”⁵ di tur lokual E por duna. Esei ta pidi mas di ta simplemente amabel òf sinti spiritual. E ta pidi fe den JesuCristu, arepentimentu, boutismo di awa i e Spiritu, i perseverá den fe te na fin.⁶ No por logra tur esaki den isolashon, asina ku e gran motibu ku Señor tin un iglesia ta pa krea un komunidat di Santunan ku lo sostené otro den e kaminda “stret i smal kua ta hiba na bida eterno.”⁷

“I [Cristu] a konstituí algun, apòstel; i algun profeta; algun evangelista; saserdotenan i algun maestro;

“... Pa e obra di e ministerio, pa edifikashon di e kurpa di Cristu:

“Te ora nos tur alkansá union den fe, i di e konosementu di e Yu di Dios, te na un hòmber perfekto, te na midí di e estatura di e plenitut di Cristu.”⁸

JesuCristu ta “e outor i esun ku ta kompletá nos fe.”⁹ Uni nos mes na e kurpa di Cristu--- e Iglesia---ta un parti importante di tuma Su nòmber riba nos.¹⁰ Ta wòrdu bisá ku e Iglesia antiguo “tabata reuní huntu frekuentemente, pa yuna, i hasi orashon, i pa papia un ku otro tokante e bienestar di nan alma”¹¹ i pa skucha e palabra di Señor.”¹² Asina ta den Iglesia awendia. Uní den fe, nos ta siña i edifiká otro i ta hasi esfuerso pa biba e normanan mas haltu di disipulado, e midi di e estatura di e plenitut di Cristu.” Nos ta hasi esfuerso pa yuda otro yega na konosementu di e Yu di Dios,”¹³ te e dia ora “lo no tin nesesidat di instruí un konsiudadano, ... bisando, Siña konosé Señor: pasobra nan tur lo sa ken mi ta for di esun di mas chikí te mas grandi, Señor ta bisa.”¹⁴

Den Iglesia nos no ta siña solamente doktrina dibino; nos ta eksperensiá su aplikashon tambe. Manera e kurpa di Cristu, e miembronan di Iglesia ta ministrá otro den e realidat di bida diario. Nos tur ta imperfekto; nos por ofendé i por wòrdu ofendé. Hopi biaha nos ta tèst otro ku nos komportashon personal úniko. Den e kurpa di Cristu, nos mester bai mas leu ku konseptonan i palabranan eksaltá i tin eksperensianan real segun nos ta siña pa “biba huntu den amor.”¹⁵

E religion aki no ta prekupá ku su mes so; mas bien nos tur ta yamá pa sirbi. Nos ta e wowonan, mannan, pianan, i otro partinan di e kurpa di Cristu, i hasta”e miembronan ... ku ta ta parse di ta mas debil, ta nesesario.”¹⁶ Nos tin mester di e yamamentunan aki, i nos mester sirbi.

Un di e hòmbernan den mi bario a lanta no solamente sin sosten di su mayornan pero tambe ku mayornan ta kontra su partisipashon na aktividatnan den Iglesia. El a hasi e opservashon aki den un reunion sakramental: “Mi tata no por komprondé di kon un hende ta bai iglesia ora nan por bai ski, pero ami realmente ta gusta bai iglesia. Den Iglesia, nos tur ta riba e mesun biahe, i mi a inspirá den e biahe di pa hóbennan fuerte, muchanan puru, i loke mi ta mira i siña di adultonan. Mi ta fortalesé pa e asosiashon i eksitá ku e goso di biba e evangelio.”

E barionan i ramanan di Iglesia ta ofresé un reunimentu semanal di sosiegu i renobashon, un tempu i lugá pa laga e mundu patras----e dia di Reposo. Ta un dia pa “deleitá boso mes den Señor,”¹⁷ pa eksperensiá e sanashon spiritual ku ta bini ku e sakramentu, i pa risibí e promesa di Su Spiritu pa ta huntu ku nos.¹⁸

Un dje bendishonnan di mas grandi di ta parti di e kurpa di Cristu, maske ku e no ta mustra manera un bendishon na e momentu, ta pa wòrdu koregí di piká i fout. Nos ta inkliná pa diskulpá i rashonalisá nos fayonan, i tin biaha simplemente nos no sa unda nos por mehorá òf kon pa hasié. Sin esnan ku por kastigá nos “lihé skèrpi, ora inspirá pa e Spiritu Santu,”¹⁹ nos por tin falta di kurashi pa kambia i ta mas perfekto den sigui e Maestro. Arepentimentu ta individual, pero hermandat riba e kaminda tin biaha doloroso ta den Iglesia.²⁰

Den e diskushon aki di e Iglesia komo kurpa di Cristu, nos mester tin dos kos semper na mente. Unu, nos no ta lucha pa kombershon na e Iglesia pero na Cristu i Su evangelio, un kombershon ku ta wòrdu fasilitá dor di e Iglesia.²¹ E Buki di Mormon ta ekspresá mihó ora e ta bisa ku e pueblo “a konbertí na Señor, i tabata uní den e Iglesia di Cristu. ”²² Dos, nos mester kòrda ku den kuminsamentu, e Iglesia tabata e famia, i hasta awe komo institushonnan separá, e famia i Iglesia ta sirbi i ta fortalesé otro. Ningun no ta supstituí otro i sigur e Iglesia, inkluso den su mihó momentu, no por supstituí e mayornan. E punto di enseñansa di evangelio i ordenansanan di saserdosio atministrá pa Iglesia ta ku famianan por kualifiká pa bida eterno.

Tin un di dos gran motibu ku e Salbador ta traha dor di un iglesia, Su Iglesia, i esei ta pa logra kosnan nesesario ku no por wòrdu kumplí pa individuonan òf grupo chikitu. Un ehèmpel bon kla ta atendé ku pobresa. Ta bèrdat ku komo individuonan i famianan nos ta sòru pa e nesesidat físiko di otronan, “kompartiendo ku otro temporal òf spiritualmente segun nan nesesidatnan i deseonan.”²³ Pero huntu den Iglesia, e abilidat pa kuida di e pobernan i esnan den nesesidat ta multipliká pa satisfasé e nesesidat mas amplio, i speransa pa outosufisiensia ta bira un realidat pa masha hopi.²⁴ Ademas, e Iglesia, su Sosiedatnan di Sokoro, i su quorumnan saserdosio tin e kapasidat pa duna alivio na hopi hende den hopi lugá afektá pa desasternan natural, guera, i persekushon.

Sin e kapasidatnan di Su Iglesia na su lugá, e Salbador su meta pa hiba e evangelio na henter mundu lo no por a wòrdu realisá.²⁵ Lo no tabatin yabinan apostóliko, e struktura, medionan finansiero, i e deboshon i sakrifisio di mas di míles di misioneronan nesesario pa hasi e trabou posibel. Kòrda, “e Evangelio di e Reino [mester] wòrdu prediká den henter mundu, komo testigu na tur nashonnan, i despues e fin lo yega.”²⁶

Iglesia por konstruí i laga nan funshoná, tèmpel, kasnan di Señor, unda ordenansanan i kombenionan vital por wòrdu atministrá. Jose Smith a deklará ku Dios su ophetivo den reunimentu di Su pueblo den tur era ta “pa edifiká na Señor un kas unda E [por] revelá na Su pueblo e ordenansanan di Su kas i e glorianan di Su reino, i siña e pueblo e kaminda di salbashon; pasobra tin sierto ordenansanan i prinsipionan ku, ora nan wòrdu siñá i práktika, mester wòrdu hasí den un lugá òf kas trahá pa tal propósito.”²⁷

Ku un hende ta pensa ku tur kaminda ta hiba na shelu òf ku no tin rekisitonan nesesario pa salbashon, e lo no mira e nesesidat pa proklamá e evangelio òf pa ordenansanan i kombenionan den redenshon di bibu òf morto. Pero nos no ta papia di inmortalidat so pero tambe di bida eterno, i pa esei e kaminda di kombenionan di evangelio ta esensial. I e Salbador mester di un iglesia pa hasi nan disponibel pa tur e yunan di Dios—tantu pa esnan bibu i e mortonan.

E último motibu ku lo mi menshoná pa Señor establesé Su Iglesia ta esun mas uniko---despues di tur kos

Ora E Iglesia di JesuCristu di e Santunan di e Delaster Dianan tabata wòrdu establesé na 1830 Señor a bisa e Profeta Joseph Smith, “Elevá bo kurason i gosa, pasó na abo e reino òf mihó bisá e yabinan di Iglesia a wòrdu duná.”²⁸ Ku outoridat di e yabinan aki, e ofisialnan di saserdosio di Iglesia a preservá e puresa di e Salbador Su doktrina i e integridat di Su ordenansanan ku ta salba.²⁹ Nan ta yuda prepará esnan ku ta deseá pa risibí nan, husga e kualifikashon i dignidat di esnan ku apliká, i despues ehekutá e ordenansanan.

Ku e yabinan di e reino, e sirbidónan di Señor por identifiká tantu bèrdat i falsedat i un biaha mas estado di outoridat, “Esaki ta loke Señor ta bisa.” Lamentablemente, algun ta tuma Iglesia na malu pasobra nan ke definí nan mes bèrdat, pero en realidat ta un bendishon surpasando pa risibí un “konosementu di kosnan manera nan ta [realmente], i manera nan tabata, i manera nan lo bira”³⁰ asina leu ku Señor ke revel’é. E Iglesia ta salbaguardiá i ta publiká e revelashonnan di Dios, e kañon di e Skrituranan.

Ora Daniel a interpretá e soño di Rei Nebukadnèsar di Babilonia, laga esaki sa “kiko lo pasa den e delaster dianan,”³¹ el a deklará ku “e Dios di shelu [lo] establesé un reino, ku lo nunka lo wòrdu destruí; i e reino lo no bai bou di dominio di ningun nashon, pero lo kibra na wèrki tur [otro] reinonan, kaba ku nan, i e reino lo keda pa semper.”³² E Iglesia ta e reino profetisá di e delaster dianan, no kreá pa hende pero kreá pa e Dios di shelu i lora bai meskos ku un piedra ku a “kòrtá for di den seru sin ku man di hende a mishi ku n’e” pa yena e tera.³³

Su destino ta pa establesé Sion den preparashon pa e regreso i gobernamentu di JesuCristu. Promé ku dia ei, lo no ta un reino den kualke sentido polítiko---manera e Salbador a bisa, “Mi reino no ta di e mundu aki.”³⁴ Al kontrario e ta e depositario di Su outoridat na tera, e atministrador di Su santu kombenionan, e wardadó di Su tèmpelnan, e protektor i proklamador di Su bèrdat, e lugá di reunimentu pa Israel plamá, i “un defensa, i ... un refugio for di tormenta, for di rabia ora ku e lo wòrdu bashá sin meskla riba henter e tera.”³⁵

Mi ta terminá ku e súplika i orashon di e Profeta:

“Roga na Señor, pa Su reino por ekstendé na mundu, ku su habitantenan p’esei por risibié, i ta prepará pa e dianan ku lo bini, den kua e Yu di Hòmber lo bini for di shelu, bistí ku e brio di su gloria, pa topa ku e reino di Dios ku ta establesé na mundu.

“P’esei ku e reino di Dios por bai dilanti, ku e reino di shelu por bini, pa Dios por wòrdu glorifiká na shelu i na tera, ku Su enemigunan por wòrdu someté, pasó ta na Abo e honor, poder i gloria, pa semper.³⁶

Den e nòmber di JesuCristu, amèn.