Ata ki Bo Mama

Pa Elder Jeffrey R. Holland

Di e Quorum di e Diesdos Apòstelnan

Ningun amor den mortalidat ta yega mas serka na e amor puru di Cristu ku e amor desinteresá ku un mama ku deboshon tin pa su yu.

Pèrmití mi pa uni ku boso den duna bon biní na Elder Ronald A. Rasband, Elder Gary E. Stevenson, i Elder Dale G. Renlund i nan esposanan na e asosiashon di mas agradabel ku nan por imaginá.

Profetisando di e Ekspiashon di e Salbador, Isaias a skibi, “El a karga nos enfermedatnan, i a soportá nos dolónan.”¹ Un vishon mahestuoso di delaster dia a enfatisá ku Jesus a bini den e mundu pa karga e pikánan di mundu.² Skritura tantu antiguo i moderno ta testifiká ku El a salba nan, i a karga nan, i a soportá nan tur e dianan di antigwedat.”³ Un himno faborito ta supliká huntu ku nos pa “skucha e stèm di e Salbador!”⁴

Soportá, sufri, karga, salba. Esakinan ta palabranan Mesiániko poderoso di promesa. Nan ta transmití yudansa i speransa, di movementu sigur for di unda nos tabata pa unda nos mester ta----pero [ku nos] no por yega sin yudansa. E palabranan aki tambe ta impliká karga, lucha, kansansio---palabranan mas apropiá den deskripshon di e mishon di E ku, den un kosto sin deskripshon, ta lanta nos ora nos a kai, karga nos hiba dilanti ora forsa a kaba, hiba nos sigur na kas ora seguridat ta parse leu for di nos alkanse. “Mi Tata a manda Mi, “El a bisa, “pa Mi wòrdu halsá riba krus; ... pa manera Ami a wòrdu lantá ... meskos asina hende lo wòrdu lantá ... dilanti ... Mi.”⁵

Pero boso komprondé den e palabranan aki un otro aspekto di esfuerso humano den kua nos tambe ta usa palabranan manera soportá i, sufri,karga i halsa,labor di parto i duna lus? Meskos ku Jesus a bisa na Huan durante e akto mes di Ekspiashon, asina E ta bisa nos tur, “Ata ki bo mama!”⁶

Awe mi ta deklará for di e pulpito aki loke a wòrdu bisá aki promé: ku ningun amor den mortalidat ta yega mas serka na e amor puru di Cristu ku e amor desinteresá ku un mama ku deboshon tin pa su yu. Ora Isaias, papiando di e Mesias, ke a deskribí Yehova su amor, el a usa e imágen di deboshon di un mama. “Un mama por lubidá su yu na pechu?” el a puntra. El a impliká ku e idea aki ta apsurdo, ounke no mes apsurdo pa pensa ku Cristu lo lubidá nos un biaha.⁷

E tipo di amor fuerte aki “tin pasenshi, i ta amabel, ... no ta buska su mes interes, ... pero ... ta soportá tur kos, kere tur kos, spera tur kos, wanta tur kos.”⁸ Esun ku ta duna mas kurashi ku tur kos, tal fieldat “nunka no ta faya.⁹ Pasobra montañanan lo bai i e serunan por wòrdu kitá, “Yehova ta bisa, “pero mi bondat lo no laga bo.”¹⁰ Asina nos mamanan tambe ta bisa.

Boso sa, no ta solamente ku nan ta karga nos, pero nan ta sigui karga ku nos. No ta solamente e kargamentu den barika pero e kargamentu di bida largu ku ta hasi maternidat un prestashon inmenso. Klaro, ku tin eksepshonnan doloroso, pero mayoria mama sa pa intuishon, i instinto ku esaki ta un e sorto di konfiansa sagrado di mas noble. E peso di e realisashon aki spesialmente riba skouder di mamanan hóben, por ta hopi deskurashante.

Un mama hóben maravioso resientemente a skibi mi: “Kon un ser humano por stima un yu asina profundo ku bo ta dispuesto pa entregá gran parti di bo libertat p’e? Kon amor mortal por ta asina fuerte ku boluntariamente bo ta someté bo mes na responsabilidat, vulnerabilidat, ansiedat, i doló di kurason i ta djis sigui bini bèk pa mas di mes un kos? Ki tipo di amor mortal por pone bo sinti, for di ora bo tin un yu, ku bo bida nunka, lo ta di bo atrobe? Amor maternal mester ta dibino. No tin otro splikashon p’e. Lokual mamanan ta hasi ta un elemento esensial di Cristu su obra. Sabiendo esaki lo mester ta sufisiente pa laga nos sa e impakto ku tal amor tin biaha lo ta entre insoportabel i tin biaha ekstraordinario, kada biaha di nobo, te ora kada yu na mundu ta sigur i a haña salbashon nos por[anto] bisa huntu ku Jesus, ‘[Tata] mi a finalisá e trabou ku bo a duna mi pa hasi.’¹¹ ”

Ku e elegansia di e karta ei ainda resonando den nos mente, pèrmití mi kompartí tres eksperensia ku ta reflehá e influensia mahestuoso di mamanan ku mi a presensia den mi ministerio djis algun siman pasá:

Mi promé relato ta unu masha kuidadoso, ku ta kòrda nos ku no tur afekshon maternal tin un final felis manera den buki kuenta. E rekordatorio aki ta bini for di mi kombersashon ku un amigu stimá pa mas di 50 aña ku tabata muriendo leu for di e Iglesia aki di kua e tabata sa den su kurason ku e ta bèrdadero. Ni maske kuantu mi a purba di konsol’é, mi no por a logra di trese pas p’e. Finalmente el a sinserá su mes ku mi. “Jeff”, el a bisa “maske kon doloroso e lo bai ta pa mi pa para den presensia di Dios, mi no por soportá e pensamentu di para dilanti di mi mama. E evangelio i su yunan tabata nifiká tur kos p’e. Mi sa ku mi a kibra su kurason, i esei ta kibrando di mi.”

Awor, mi ta apsolutamente sigur ku despues ku el a fayesé, su mama a risibí mi amigu ku brasa habri i ku amor; esei ta lokual mayornan ta hasi. Pero e porshon di atvertensia di e historia aki ta ku yunan por kibra kurason di nan mama. Aki, tambe, nos ta mira un otro komparashon ku esun dibino. Mi no tin ku rekòrdá nos ku Jesus a muri di un kurason kibrá, un kurason kansá i gastá ku a karga e pikánan di e mundu. Asina ku den kualke momentu di tentashon, laga nos por [kòrda riba] “ata ki [nos] mama” meskos ku nos Salbador i spar nan tur dos e doló ora nos kometé piká.

Di dos, mi ta papia di un hòmber hóben ku a drenta kampo mishonal digno pero pa su mes skohensia a regresá kas tempran pa motibu di atrakshon pa emesun sekso i algun trouma ku el a eksperensiá relashoná ku esei. Ainda e tabata digno, pero su fe tabata den nivel di krísis, su karga emoshonal a bira kada biaha mas pisá, i su doló spiritual tabata mas i mas profundo. Tin biaha su emoshonnan tabata varia di doló, konfushon, rabia, i desolashon.

Su presidente di mishon, su presidente di staka, su obispu a tuma oranan inkontabel pa buska i yora, i bendishon’é segun nan tabata tene na dje, pero hopi di su herida tabata asina personal ku e tabata tene por lo ménos parti di dje for di nan alkanse. E tata amoroso den e historia aki a duna henter su alma den yudamentu di su yu, pero su sirkunstansia okupá di trabou tabata nifiká ku hopi biaha e anochinan largu i skur di e alma tabata enfrentá solamente pa e yu i su mama. Dia i anochi, promé pa simannan, despues pa lunanan ku a bira añanan, nan a buska kuramentu i salú huntu. Entre periodonan di amargura (mayoria di dje pero tin biaha dje mama) i miedu sin fin (mayoria dje mama, tin biaha di dje) el a karga---ata e palabra bunita di karga ku atrobe---el duna na su yu su testimonio di e poder Dios, di Iglesia pero spesialmente di Su amor pa e yu aki. Den mes un rosea el a testifiká di su propio amor infleksibel, sin kompromiso i eterno p’e tambe. Pa trese e dos pilarnan apsolutamente esensial aki di su eksistensia huntu---e evangelio di Jesucristu i su famia---el a drama su alma den orashon sin fin. El a ayuná i a yora, el a yora i ayuná, i despues el a skucha, i skucha segun e yu aki kada biaha tabata bisé di su kurason ku tabata kibrando. Pues el a kargué---atrobe—solamente ku e biaha aki no tabata pa nuebe luna. E biaha aki el a pensa ku yud’é pasa den su pruebanan spiritual severo lo dura pa semper.

Pero ku e grasia di Dios, su mes determinashon, i e yudansa na gran kantidat di lidernan di Iglesia, amigunan, miembronan di famia, i profeshonalnan, e mama aki ku a súplika hopi a mira su yu bini kas na e tera di promesa. Ku tristesa nos ta rekonosé ku tal bendishon no ta òf por lo ménos ainda no a yega, na tur mayornan ku tin angustia pa vários sirkunstansia di nan yunan, pero tabatin speransa. I, mi tin ku bisa, e yu aki su orientashon seksual no a kambia milagrosamente---niun hende no a asumí ku e lo sosedé. Pero poko poko, su kurason a kambia.

El a kuminsá bai Iglesia atrobe. El a skohe pa partisipá di e santa sena dispuesto i dignamente. El a haña un rekomendashon di tèmpel atrobe i a aseptá un yamamentu pa sirbi komo un maestro di seminario di mainta tempran, unda e tabatin éksito maravioso. I awor, despues di sinku aña riba su mes petishon, i ku asistensia di Iglesia, el a drenta kampo mishonal pa kompletá su servisio na Señor. Mi a yora pa e kurashi, integridat, i determinashon di e hóben aki i su famia pa solushoná su asuntunan i pa yud’é mantené su fe. E sa ku e debe hopi na hopi hende, pero e sa ku e debe mas na dos figura mesiániko den su bida, dos ku a kargué, soport’é, traha ku n’e i a libr’é ---su Salbador, e Señor Jesucristu, i su mama desidido, redentor, i apsolutamente santu.

Finalmente, esaki for di e rededikashon di e Tèmpel di Mexico City Mexico apénas tres siman pasá. Ta aya huntu ku Presidente Henry B. Eyring ku nos a mira nos amiga stimá Lisa Tuttle Pieper para den e servisio emoshonal di e dedikashon. Pero e tabata para ku algun difikultat pasobra ku un brasa e tabata tene su yu muhé stimá Dora, ku grandemente a wòrdu desafiá, miéntras ku den e otro brasa e tabata purba manipulá Dora su man drechi disfunshonal, asina ku e yu muhé eternamente presioso di Dios aki pero limitá, por a waya un lensu blanku i ku kehamentu komprendibel pa e so i e angelnan di shelu a grita, “Hosanna, hosanna, hosanna na Dios i e Lamchi.”¹²

Na tur nos mamanan tur kaminda, den pasado, presente, òf futuro, mi ta duna homenahe. “Danki. Danki pa duna lus, pa forma almanan, karakternan, i pa demostrá e amor puru di Cristu. Na Mama Eva, Sara, Rebeka, i Raquel, na Maria di Nazaret, i na Mama den Shelu, mi ta bisa “Danki pa boso ròl krusial den kumplimentu di e propósitonan di eternidat. Na tur mama den tur sirkunstansia, inkluso esnan ku ta lucha---i tur lo ta---mi ta bisa, “Ta trankil. Kere den Dios i den boso mes. Boso ta hasiendo mihó ku boso mes ta kere. Defakto, boso ta salbadornan riba e Seru Sion,¹³ i meskos ku e Maestro ku boso ta sigui boso amor no ta kaba nunka. ’¹⁴ ” Mi no por duna elogio mas grandi na ningun otro persona. Den e nòmber di Jesucristu, amèn.