Laga e Zonido Kla di Trompèt Resoná

Pa Elder Gregory A. Schwitzer

Di e Setentanan

E mundu tin mester di disípulonan di Cristu ku por komuniká e mensahe di e evangelio ku klaridat i for di e kurason.

E verano ku a kaba di pasa mi kasá i ami tabatin dos di nos nietunan yòn pa keda serka nos, miéntras nan mayornan a partisipá den un aktividat di biahe di pionero den nan staka. Nos yu muhé tabata ke ta sigur ku e muchanan lo praktiká e piano miéntras nan ta leu for di kas. E tabata sa ku algun dia huntu ku nan abuelonan lo hasi fásil pa na lubidá di praktiká. Un mèrdia mi a disidí pa sinta ku Andrew, esun di 13 aña, i skuch’é toka.

E mucha hòmber aki ta yen di energia i ta gusta pa ta pafó. E por a pasa su tempu fásilmente ku yagmentu i piskamentu. Miéntras ku e tabata práktika e piano, mi por a sinti ku el a preferá di ta piskando den un riu serka. Mi a skucha ora sin gana e tabata toka kada tono di un kantika familiar. Kada nota ku el a toka tabatin mes un énfasis i ritmo, hasiendo difísil pa identifiká e melodia klaramente. Mi a sinta banda di dje riba e banki i a splika e importansia pa apliká djis un poko mas preshon riba e teklanan di melodia i un poko ménos riba e notanan ku tabata kompañá e melodia. Nos a papia ku e piano ta mas ku un milager mekániko. E por ta un ekstenshon di su mes stèm i sentimentunan i bira un instrumènt maravioso di komunikashon. Meskos ku un persona ta papia i ta move suavemente for di un palabra na otro, asina e melodia mester flui segun e ta move di un nota pa otro.

Nos a hari huntu segun el a purba kada biaha di nobo. E sonrisa den su kara a bira mas grandi ora e melodia konosí a kuminsá surgi for di lokual promé tabata un sèt di sonido brutu. E mensahe a bira kla: “Mi ta un yu di Dios i el a mandami aki.”¹ Mi a puntra Andrew si e por a sinti e diferensia den e mensahe. El a respondé,”Si, Tawela, mi por sintié!”

E Apòstel Pablo a siña nos tokante kompará komunikashon ku instrumento musikal ora el a skibi na e Korintionan:

“Ta meskos ku kaso di instrumèntnan ku riba nan mes no tin bida manera flùit i arpa, si no tin diferensia den nan tononan, kon hende por tende kua melodia ta toka riba nan?

“Si durante guera e tròmpet no duna señal kla, ta ken lo prepará su mes pa bataya?”²

Si tin un tempu ku e mundu mester di disípulonan di Cristu ku por komuniká e mensahe di e evangelio ku klaridat i for di kurason, ta awor aki. Nos tin mester di e zonido kla di e tròmpet.

Cristu tabata sin duda nos mihó ehèmpel. Semper el a demostrá e kurashi pa defendé lo kual tabata korekto. Su palabranan ta bira eko den e siglonan, ora e invitá nos pa kòrda stima Dios i nos próhimo, pa warda tur e mandamentunan di Dios i biba komo lusnan pa e mundu. E no tabatin miedu di papia kontra di e podernan mundano òf di gobernantenan di su époka, inkluso ora nan a tabata diferente, Su mishon duná na Dje pa Su Tata Selestial. Su palabranan no a wòrdu diseñá pa konfundí, pero pa move e kurason di hende. E tabata sa e boluntat di su Tata, bon kla den lokual el a bisa i hasi.

Mi tin un ehèmpel di Pedro tambe, ku a konfrontá e hòmbernan di mundu ku kurashi klaridat riba e dia di Pentekòste. Riba e dia aki e pueblo tabata reuní for di diferente pais kritikando e promé Santunan pasobra nan a tende nan papia den lenga i a pensa ku nan tabata fuma. Pedro, ku e Spiritu lantá den su alma, a lanta para pa defendé e Iglesia i su miembronan. El a testifiká ku e palabranan aki: “Hudiunan i boso tur ku ta biba na Yerusalèm, t’esaki mi ke bisa boso, skucha bon.”³

Despues el sita for di e skrituranan konteniendo e profesianan di Cristu i a duna su testimonio firme: “P’esei henter pueblo di Israel mester tin sigur, ku mesun Hesus ku boso a krusifiká, Dios a hasi tantu Señor i Cristu.⁴

Hopi a skucha su palabranan, i a sinti e Spiritu, i 3,000 alma a uni na e Iglesia antiguo. Esaki ta evidensia poderoso ku un hòmber òf muhé, ku ta dispuesto pa testifiká or e mundu ta parse di ta bayendo den direkshon kontrario, por hasi un diferensia.

Ora nos komo miembronan tuma e desishon pa para firme i ku poder ta testigu pa Dios su doktrina i Su Iglesia, algu ta kambia den nos. Nos ta tuma Su imágen riba nos. Nos ta yega mas serka di Su Spiritu. E di su banda lo bai dilanti nos i lo ta na “[nos] man drechi i na [nos] man robes, i [Su] Spiritu lo ta den [nos] kurason, i [Su] angelnan rondó di [nos], pa karga [nos].”⁵

Disípulonan berdadero di Cristu no ta wak pa buska esküs pa e doktrina, ora e no ta pas ku e konseptonan aktual di mundu. Pablo tabata un otro disípulo balente ku deklará ku brio ku e no tabata bergonsá pa e evangelio di Cristu: pasó ta e poder di Dios pa salbashon pa tur ku ta kere.”⁶ Berdadero disípulonan ta representá Señor ora e no ta kumbiniente pa hasi asina. Berdadero disípulonan ta deseá pa inspirá e kurason di hende, no pa imponé nan.

Hopi biaha no ta kumbiniente òf konfortabel pa para pa Cristu. Mi tin sigur ku esei tabata e kaso ku Pablo ora el a wòrdu yamá dilanti di Rei Agrippa i a puntra na pa hustifiká su mes i konta su historia. Pablo, sin duda, a proklamá su kreensia ku tantu poder ku e rei intimidante aki a atmití ku “kasi” el a wòrdu persuadí pa bira un Kristian.

E kontesta di Pablo tabata muestra di su deseo pa e hendenan por a komprondé bon lokual e ker a bisa. El a bisa na rei Agrippa ku tabata su deseo pa tur ku skuch’é, lo no bira “kasi” Kristian, pero mihó tur huntu bira “totalmente” disípulonan di Cristu.⁷ Esnan ku papia ku klaridat lo por logra esaki.

Den e bastante añanan ku mi a studia e historia di Lehi su soño den e Buki di Mormon⁸, semper mi a pensa riba e edifisio grandi i espasioso komo un lugá kaminda solamente esnan di mas rebelde tabata biba. E edifisio tabata yená ku hende, hasiendo mofa i mustrando dede riba esnan fiel ku tabata tene na e bara di heru, representando e palabra di Dios, i ku tabata riba kaminda pa e palu di bida, representando di e amor di Dios. Algun no por a no por a soportá e preshon di e hendenan ku a hasi mofa di nan i a kita bai. Otronan a disidí pa djòin esnan den e edifisio. Nan no tabatin e kurashi pa papia ku brio kontra di e kritiká òf mensahenan di e mundu?

Ora mi ta mira e mundu aktual alehá su mes [for] di Dios, mi ta kere ku e edifisio ta kresiendo den tamaño. Hopi ta kanando den e pasionan di e edifisio grandi i espasioso sin ripará ku en realidat nan ta kambiando den parti di su kultura. Hopi biaha nan ta sukumbí pa e tentashonnan i e mensahenan. Finalmente nos ta haña ta hasi mofa òf ta uni na esnan ku ta kritiká òf hasi mofa.

Durante añanan mi a pensa ku e multitut tabata hasi mofa di e manera ku e fielnan a biba nan bida, pero e stèmnan di e edifisio di awendia a kambia nan manera. Esnan ku tabata hasi mofa hopi biaha ta purba di hoga e mensahe simpel di e evangelio dor di ataká algun aspekto di e historia di Iglesia òf ta ofresé kritiká duru di un profeta òf otro lider. Tambe nan ta atakando e kurason di nos doktrina i e leinan di Dios, duná for di Kreashon di mundu. Nos, komo disípulonan di Jesucristu i miembronan di Su Iglesia, nunka no mester laga e bara di heru lòs. Nos mester laga e trompèt zona for di nos alma.

E mensahe simpel ta ku Dios ta nos Tata Selestial amoroso i Jesucristu ta Su Yu. E evangelio ta restourá den e delaster dianan aki pa medio di profetanan bibiente i e Buki di Mormon ta e evidensia. E kaminda pa felisidat ta dor di unidat familiar básiko manera organisá originalmente i revelá pa nos Tata Selestial. Esaki ta e melodia konosí di e mensahe ku hopi por rekonosé, pasó nan a tendé for di bida premortal.

Komo Santunan di Delaster dianan, ta tempu pa nos lanta para i testifiká. Ta tempu pa e notanan di e melodia di e evangelio lanta riba e bochincha di e mundu. Mi ta añadí mi testimonio na e mensahe di e Salbador i Redentor di mundu. E ta bibu! Su evangelio ta restourá i e bendishonnan di felisidat i pas por wòrdu sigurá den e bida aki dor di biba Su mandamentunan i kana den Su kaminda. Esaki ta mi testimonio den e nòmber di Jesucristu,amèn.