“Si Boso ta Stima Mi, Warda Mi Mandamentunan”

Pa Carole M. Stephens

Promé Konsehero de Presidensia General di Sosiedat di Sokoro

Dios Su mandamentunan ta un manifestashon di Su amor pa nos, i obedensia na Su mandamentunan ta un ekspreshon di nos amor p’E.

Dia nos yu muhé mayó, Jen, a trese su di tres yu muhé kas for di hòspital, mi a bai su kas pa yud’é. Despues di a buska su yu muhé mas grandi for di skol, nos a disidí ku loke Jen tabatin mester tabata sosiegu. Asina ku e mihó yudansa ku mi por a duna tabata pa bai mi kas ku su yu Chloe pa su mama i e beibi por tin algun tempu di kietut.

Mi a pone Chloe den su stul di outo, bisti mi mes faha di seguridat, i kore for di nan kurá. Sinembargo, promé ku nos a yega fin dje kaya, Chloe a los su faha i tabata pará, ta wak over di mi skouder, i papiando ku mi! Mi a pone e outo na kantu di kaminda, sali, i a pone den su stul atrobe ku e faha di seguridat.

Nos a kore atrobe pero a yega djis un distansia kòrtiku ora e tabata for di su stul atrobe. Mi a ripití mes un pasonan, pero kada biaha promé ku mi por a ni drenta outo bèk i mara mi mes faha, Chloe tabata pará atrobe!

Mi a haña mi mes ta sintando den un outo, pará kantu di kaminda, ku un lucha di poder ku un mucha di tres aña. I e tabata ganando!

Mi a usa tur idea ku mi por a pensa ariba pa konvensé ku keda mará den su stul tabata un bon idea. E no tabata konvensí! Finalmente mi a disidí di purba ku e aserkamentu di si/anto.

Mi a bisa, Chloe, si bo keda mará den bo stul, anto manera nos yega kas di Wela, nos por hunga ku klei.”

Niun kontesta.

“Chloe, si bo keda mará den bo stul,anto nos por traha pan ora nos yega kas di Wela.

Niun kontesta.

Mi a purba atrobe. “Chloe, si bo keda mará den bo stul, anto nos por stòp na marshe pa un kos dushi!”

Despues di purba tres biaha, mi a realisá ku esaki lo no funshoná. E tabata desidido, i ningun kantidat di si/anto tabata sufisiente pa kombensé pa e keda mará den su stul.

Nos no por a keda henter dia sintá kantu di kaminda, pero mi ke tabata obediente na lei, i no tabata safe pa kore ku Chloe pará. Mi a hasi un orashon den silensio i a tende e Spiritu susurá, “Siñ’é.”

Mi a bira pa wak e i a hala mi faha for di mi kurpa p’asina e por mir’é. Mi a bisa, “Chloe, mi tin mi faha mará pasobra e lo protehá mi. Pero abo no tin bo faha mará, i lo bo no ta safe. I lo mi bira tristu si bo haña daño.”

El a wak mi; kasi mi por a mira e wilnan den su mente chikitu drai segun mi a warda ku ansioso pa e respondé. Por fin, su wowonan blou grandi a bria, i el a bisa, “Wela, bo ke pa mi mara mi faha pasobra bo ta stima mi!”

E Spiritu a yena e outo ora mi a ekspresá mi amor pa e mucha chikitu presioso aki. Mi no ke a pèrdè e sentimentu aki, pero mi tabata sa ku mi tabatin un oportunidat, asina ku mi a sali i a sigur’é den su stul. Despues mi a puntra, “Chloe, bo por keda sinta den bo stul por fabor?” I el a keda sinta mará den su stul henter kaminda for di marshe te na mi kas, unda nos a traha pan i a hunga ku klei pasobra Chloe no a lubidá!

Miéntras ku mi tabata kore riba e kaminda e dia ei, un skritura a yena mi mente: “Si boso ta stima Mi, warda Mi mandamentunan.”¹ Nos tin reglanan pa siña, guia, i protehé nos yunan. Di kon? Pa motibu di e gran amor ku nos tin pa nan. Pero ta te ora Chloe a komprondé ku mi deseo pa e keda mará den su stul tabata pasobra mi ta stim’é, e no tabata dispuesto pa someté na loke e tabata konsiderá komo un restrikshon. El a sinti ku e faha tabata limitá su libertat.

Meskos ku Chloe, nos por skohe pa mira e mandamentunan komo limitashon. Tin biaha nos por sinti ku Dios su leinan ta limitá nos libertat personal, kita nos albedrio for di nos, i limitá nos kresementu. Pero segun nos ta buska pa mas komprendementu, pèrmití nos Tata pa siña nos, nos lo kuminsá mira ku Su leinan ta un manifestashon di Su amor pa nos i obedensia na Su leinan ta un ekspreshon di nos amor p’E.

Si boso haña bo mes pará figurativamente kantu di kaminda, mi por sugerí algun prinsipionan ku, si wòrdu siguí, lo yuda boso yega bèk safe riba “e kaminda di fe i obedensia”?²

Promé, konfia Dios. Konfia den Su plan eterno pa bo. Kada un di nos ta “un yu spiritual stimá di mayornan selestial.” Nan amor pa nos ta aparente den e mandamentunan. Mandamentunan ta instrukshonnan vital pa siña, guia, i protehé nos segun nos ta “haña eksperensia terenal.”³

Den e “reino premortal” nos a usa nos albedrio pa aseptá Dios su plan,⁴ i nos a siña ku obedensia na Dios su leinan eterno tabata vital pa nos éksito den Su plan. Skrituranan ta siña, “Tin un lei, irevokabel dekretá den shelu promé ku fundeshinan di e mundu aki, riba kua tur bendishonnan ta basá.⁵ Si nos obedesé e lei, nos lo risibí e bendishonnan.

Hasta ku tur e fayonan, oposishon, i siñamentu ku ta kompañá nos eksistensia mortal, Dios nunka no ta pèrdè bista for di nos potensial eterno, hasta ora nos ta hasi esei. Nos por konfi’é “pasobra Dios ke Su yunan bèk.”⁶ I El a duna un manera dor di e Ekspiashon di Su Yu, Jesucristu. E Ekspiashon “ta e propósito prinsipal di e plan di salbashon.”⁷

Di dos, konfia Jesus. E mihó ekspreshon di obedensia i amor ta e Ekspiashon di Jesucristu. Sometiendo Su mes na boluntat di e Tata, El a duna Su bida pa nos. El a bisa, “Si boso warda mi mandamentunan, boso lo permanesé den mi amor; meskos ku ami a warda mi Tata su mandamentunan, i permanesé den su amor.”⁸

Jesus a siña tambe:

“Stima Señor boso Dios ku henter boso kurason, i ku henter boso alma, i ku henter boso mente.

“Esaki ta e promé i gran mandamentu.

I e di dos ta meskos ku n’e, Boso lo stima boso próhimo manera boso mes.”⁹

Kada djadumingu nos tin e oportunidat pa skrudiñá i rekòrdá nos Salbador su amor puru ora nos ta partisipá di e emblemanan di Su Ekspiashon infinito. Durante e santa sena, mi ta mira ora mannan i brasanan ta ekstendé pa pasa e pan i e awa. E momentu ku ami ta ekstendé mi man i ta partisipá, mi ta primintí ku mi ta dispuesto pa tuma Su nòmber riba mi, kòrd’é semper, warda Su mandamentunan. I E ta primintí “ku [nos] por tin su Spiritu semper huntu ku [nos].”¹⁰

Di tres, konfia e susuro di e Spiritu Boso ta kòrda durante mi eksperensiá ku Chloe ku e Spiritu a susurá un skritura na mi? E ta Juan 14:15 : “Si boso ta stima Mi, warda Mi mandamentunan.” I e versíkulonan importante aki ta sigui:

“Lo mi roga e Tata, i e lo manda un otro Konsolador pa boso, ku lo keda pa semper huntu ku boso;

“E ta e spiritu di bèrdat; ku e mundu no por risibí, pasobra nan no ta mir’é, ni konosé: pero boso konosé; pasobra e ta keda serka boso, i lo ta den boso.”¹¹

Kada un, digno i konfirmá miembro di E Iglesia di Jesucristu di e Santunan di e Delaster Dianan tin e derechi pa tin e kompania di e Spiritu Santu. Yuna, orashon, estudio di skrituranan, i obedensia ta oumentá grandemente nos abilidat pa tende i sinti e susuronan di e Spiritu.

Ora boso mente ta yená ku duda i konfushon, e Tata i e Yu lo manda e Spiritu Santu pa avisá i guia boso sigur dor di e peligernan di e biahe mortal aki. E lo yuda boso kòrda, konsolá boso, i yena boso “ku speransa i amor perfekto.”¹²

Di kuater, konfia e konseho di profetanan bibu. Nos Tata a duna un manera pa nos pa skucha Su palabra i sa Su lei pa medio di Su profetanan. Señor a deklará, Mi palabra lo wòrdu kumplí, sea pa mi mes bos òf pa e bos di mi sirbidónan, ta meskos.”¹³

Resientemente, profetanan bibu a konsehá nos pa “kòrda e dia di reposo, pa mantené santu,”¹⁴ i biba e lei di ayuno. Obedensia na e konseho profétiko aki ta duna un manera pa nos ta obediente na Dios su mandamentunan pa stima E i nos próhimo segun nos ta oumentá nos fe den Jesucristu i ekstendé nos man di amor i kuido pa otronan.¹⁵

Tin seguridat den sigui e palabra di Señor pa medio di Su profetanan. Dios a yama Presidente Thomas S. Monson, e konseheronan den e Promé Presidensia, i e miembronan di e Quorum di e Diesdos Apòstelnan komo profetanan, videntenan, i reveladornan. Den e mundu aki di oumento di miedu, distraishon, atversidat, i rabia, nos por mira na nan pa sa kon disípulonan di Jesucristu---yená ku karidat----ta mira, zona,i reakshoná na kuestionnan ku por kousa kontenshon. Nan ta testifiká di Jesucristu i ta respondé ku karidat, e amor puru di Jesucristu, ken su testigu nan ta.

Despues di mi eksperensia ku Chloe, mi a buska e skrituranan pa versonan ku ta menshoná mandamentunan i amor. Mi a haña hopi. Kada un di e versíkulonan aki ta kòrda nos ku Su mandamentunan ta e manifestashon di Su amor pa nos, i obedensia na Su mandamentunan ta un ekspreshon di nos amor pa E.

Mi ta testifiká ku segun nos konfia Dios, nos Tata Eterno; konfia Su Yu, JesuCristu, i ehersé fe den Su Ekspiashon; konfia e susuronan di e Spiritu; i konfia e konseho di profetanan bibu, nos lo haña nos kaminda for di kantu di kaminda i sigui sigur---no djis perseverá pero haña goso den nos biahe pa kas. Den e nòmber di Jesucristu, amèn.