E Goso di Biba un bida sentrá den Cristu
Pa Elder Richard J. Maynes
Di e presidensia di Setenta
Nos bida mester ta sentrá ku eksaktitut den Cristu si nos ke haña goso berdadero i pas den e bida aki.
E mundu kaminda nos ta biba aden ta pone preshon grandi riba hende rònt mundu pa baha i tin biaha asta bandoná nan normanan di biba un bida hustu. No opstante, apesar di maldat i tentashonnan ku ta rondoná nos tur dia, nos por eksperiensha goso berdadero ora nos biba un bida ku ta sentrá riba Cristu.
Sentralisá nos bida riba Cristu i Su evangelio lo trese stabilidat i felisidat den nos bida, manera e siguiente ehèmpel ta mustra.
Elder Taiichi Aoba di e Setenta, ku ta biba den un pueblo montañoso chikitu na Shikoku, Hapon a wòrdu puntrá pa duna un klas, lès na un konferensha pa hóbennan. “Para den lugánan sagrado” a wòrdu skohé komo tema di e konferensha. Despues di konsiderá e tema i ki pa instruí, Elder Aoba a disidí pa usa su vokashon komo un medio edukashonal. Su trabou ta hasi obra di klei.
Elder Aoba ta konta ku su klas di hóbennan a bin pone atenshon ora nan a mira kon e tabata por kasi manera un akto di magia transformá e forma di e klei den su mannan den tayonan, kònchi i beker. Despues di su demostrashon, el a puntra nan si algun di nan lo ke purba hasié. Nan tur a hisa nan man.
Elder Aoba a skohe diferente di e hóbennan pa bin dilanti i purba nan interes nobo. Nan a kere, despues di mir’é, ku e kos aki lo ta bai ta masha fásil. No opstante, niun di nan no tabatin éksito den nan intento pa traha un simpel kònchi. Nan a sklama: “Mi no por hasi e kos aki!”, “Dikon e kos aki ta asina duru?”. “E ta hopi difísil.” E komentarionan aki tabata tuma lugá na mes un momentu ku e klei tabata bula tur rònt den e kamber.
E a puntra e hóbennan dikon nan tabatin asina tantu difikultat pa nan traha e obranan di klei. Nan a respondé ku diferente kontestanan: “Mi no tin niun eksperensha,” “Nunka mi no a wòrdu siñá,” òf “Mi no tin talento pa e kos aki.” A base di e resultado, tur loke nan a bisa tabata bèrdat; no opstante e motibu mas importante di kon nan a faya tabata paso e klei no tabata sentrá riba e wil. E hóbennan a pensa ku nan a pone e klei meimei, pero mirando for di un prospekto profeshonal, e klei no tabata poné eksaktamente meimei. El a bisa nan, “Laga nos purba hasi e kos aki un biaha mas.”
E biaha aki, Elder Aoba mes a pone e klei eksaktamente meimei di e wil anto despues kuminsá drai e wil, trahando un buraku meimei di e klei. Diferente di e hóbennan a purba atrobe. E biaha aki nan tur a kuminsá bati man bisando: “Wow, e no ta sakudiendo,” “Mi por hasi e kos aki,” òf “Mi a logra!” Naturalmente e formanan no tabata perfekto, pero e resultado tabata totalmente diferente for di e inisio. E motibu di nan éksito tabata paso e klei tabata perfektamente meimei riba e wil.
E mundu den kua nos ta biba por wòrdu kompará ku e rim di un artesano i e velosidat di e wil ei ta oumentá. Manera e klei riba e rim di e artesano, nos tambe mester ta sentrá. Nos interior, e sentro di nos bida, mester ta JesuCristu i Su evangelio. Biba un bida sentrá riba Cristu ker men ku nos ta siña di Cristu i Su evangelio i despues sigui Su ehèmpel i tene Su mandamentunan ku presishon.
E profeta antiguo Isaías a establesé, “Sinembargo t’abo ta nos Tata Señor. Nos ta e klei, Abo Esun ku ta traha ku n’e; nos tur ta obra di bo man.” 1
Si nos bida ta sentrá riba JesuCristu, E por forma nos eksitosamente den ken nos mester ta, pa nos por bai bek den Su i Tata Selestial su presensia den reino Selestial. E goso ku nos ta eksperensiá den e bida aki lo ta direktamente konektá ku e proporshon di kon bon nos bida ta sentrá riba e enseñansanan, ehèmpel i e sakrifisio ekspiatorio di JesuCristu.
Rumannan, mi a krese den un famia ku hopi generashonnan di santunan di último dia, asina ta ku e bendishonnan i e goso di tin e evangelio di JesuCristu komo base di e kultura di nos famia tabata parti di nos bida diario. Ta te ora ku mi a bai sirbi un mishon komo hóben, mi a realisá pa mi mes e impakto inkreiblemente positivo ku e plenitut di e evangelio di JesuCristu tin riba esnan ku promé ku esaki nunka no a eksperenshá e bendishonnan aki den nan bida. E verso aki den Mateo ta reflehá e proseso ku hendenan ku a wòrdu kombertí na e evangelio di JesuCristu ta eksperensiá: “Reino di shelu ta asin’aki. Tabatin un tesoro skondí den un tereno. Un hende a deskubrié, koba un buraku, der’é i di alegria el a bende tur kos ku e tabatin i a kumpra e tereno ei.” 2
Pèrmití mi kompartí un ehèmpel ku boso for di buki di Mormon ku ta ilustrá kiko un hende ku a kombertí, tabata dispuesto na paga pa e por a risibí e goso asosiá ku haña e tesoro di kua Jesus ta papia di dje den e parábola tokante e tesoro skondí den un tereno.
Boso ta kòrda den e buki di Alma, kapítulo 20, Ammon i Lamoni tabata biaha pa bai e siudat di Middoni ku e propósito pa haña i liberá e ruman hòmber di Ammon, Aaron for di prison. Durante nan biahe, nan a enkontrá e tata di Lamoni, ku na e momentu ei tabata e rei Lamanita ku tabata reina riba henter e pais.
E rei tabata hopi deskonsertá ku su yu hòmber Lamoni tabata biaha ku Ammon, un mishonero Nefita, ku e tabata konsiderá un enemigu. Na su opinion su yu lo mester a atendé e fiesta grandi ku e a patrosiná pa su yunan hòmber i su hendenan. E rei Lamanita tabata asina deskonsertá ku el a manda su yu hòmber Lamoni pa mata Ammon ku su spada. Ora ku Lamoni a ninga, e rei a kue su mes spada pa mata su mes yu paso el a desobedesé su mandato; no opstante, Ammon a intervení pa salba bida di Lamoni. Na final el a vense e rei i e por a mat’é.
Esaki ta loke e rei a bisa Ammon ora el a haña su mes den e situashon di bida i morto aki: “Si lo bo spar mi bida, lo mi duna bo kualke kos ku bo pidi, asta mitar di mi reino.” 3
Asina ta ku e rei tabata dispuesto na paga e preis di mitar di su reino pa salba su mes bida. E rei lo mester tabata asombrá ora ku Ammon solamente a pidi pa e rei laga su ruman hòmber Aaron i su kompañeronan den prison sali i tambe ku su yu Lamoni por a mantené su reino.
Mas despues, debí na e enkuentro aki, Ammon su ruman hòmber Aaron a wòrdu saká for di e prison di Middoni. Despues ku el a sali el a wòrdu inspirá pa biaha bai kaminda e rei Lamanita tabata reina riba su pais. Aaron a wòrdu introdusí na e rei i tabatin e privilegio di siñ’é e prinsipionan di e evangelio di JesuCristu, inkluso e gran Plan di Redenshon. E siñansanan di Aaron a inspirá e rei profundamente.
Nos por haña e rei su kontesta riba Aaron su siñansanan den versíkulo 15 di Alma, kapítulo 22 : “I a sosodé ku despues ku Aaron a splik’é e kosnan aki, e rei a bisa: Kiko mi tin ku hasi pa mi por tin e bida eterno di kual bo ta papia di dje? Si, kiko mi tin ku hasi pa mi tin por nase di Dios, pa e spiritu malu aki wòrdu ranká for di den mi pechu, i mi por risibí Su Spiritu, ku mi por wòrdu yená ku goso, ku mi lo no wòrdu deskartá na e lastu dia? Mira, el a bisa, lo mi duna tur loke mi ta poseé, si, lo mi bandoná mi reino, pa mi por risibí e goso grandi aki.”
Asombrosamente, kontrario di duna un mitar di su reino pa salba su bida, e rei Lamanita awor aki tabata dispuesto pa duna henter su reino pa e por risibí e goso ku ta bini ora ku nos komprendé, aseptá i biba e evangelio di JesuCristu.
Mi kasá, Nancy, tambe ta un konverso di Iglesia. El a menshoná hopi biaha den e añanan ku a pasa, e goso ku el a sinti den su bida for di e momentu ku el a haña, aseptá i biba e evangelio di JesuCristu. Loke ta sigui ta un reflekshon di Hermana Maynes su eksperensha:
“Komo un hóben na kuminsamentu di binti aña, mi tabata na un punto den mi bida kaminda mi tabata sa ku mi tabatin ku kambia algu pa mi por ta un persona mas felis. Mi tabata sinti manera mi tabata drif riba laman sin niun propósito òf direkshon berdadero, anto mi no tabata sa tampoko unda pa bai busk’é. Semper mi tabata sa ku Tata Selestial tabata eksistí i algun biaha durante di mi bida asta mi tabata hasi orashon, sintiendo ku E tabata skucha.
“Na momentu ku mi a kuminsá mi búskeda, mi a atendé diferente iglesianan pero semper mi tabata kai bek den mesun sintimentunan i diskurashamentu. Mi ta sinti mi hopi bendishoná paso mi orashon pa risibí direkshon i propósito den bida na final a wòrdu kontesta i e plenitut di e evangelio di JesuCristu a wòrdu trese den mi bida. Pa promé biaha, mi tabata sinti manera mi tabatin un propósito, i e plan di felisidat a trese un goso berdadero den mi bida.”
Un otro eksperensha di den buki di Mormon klaramente ta ilustrá kon si nos biba un bida sentrá riba Cristu e por yena nos ku gran felisidat asta ora nos ta rondoná ku difikultatnan inkreibel.
Despues ku e profeta Lehi i su famia a sali for di Yerusalèm na 600 a.c.,nan a kana mas o ménos 8 aña den mondi te ora ku finalmente na a yega na e tera ku nan a yama Plenitut (Bountiful), ku tabata serka di kosta. Nefi ta deskribí nan bida di tribulashon den mondi na e manera aki: “Nos a sufri diferente aflikshonnan i difikultatnan,.... asta dje tantu ei ku nos no por ni skibi nan tur.” 4
Bibando na Bountiful, Nefi a wòrdu enkargá pa Señor ku e responsabilidat pa konstruí un barku ku lo por hiba nan na otro banda di laman na e tera di promesa. Despues ku nan a yega e tera primintí, aflikshonnan grandi a sigui surgi entre e hendenan ku a sentrá nan bida rònt di Cristu i esnan ku no tabata kere den Cristu, ku a sigui e ehèmpelnan di Laman i Lemuel. Finalmente, e riesgo di violensha entre e dos gruponan aki a bira asina grandi ku Nefi i esnan ku tabata sigui e siñansanan di Señor a separá nan mes i a hui bai den mondi pa nan seguridat. Na e momento aki, mas o ménos 30 aña despues ku Lehi i su famia a sali for di Yerusalèm, Nefi a skibi un relato bon dokumentá i un tiki sorprendente, spesialmente despues ku el a registrá den e skrituranan di e hopi aflikshonnan i tribulashonnan ku largu tempu nan a topa?. Esaki ta su palabranan: “I a sosodé ku nos [a biba] segun e manera di felisidat.” 5 Aunke nan tabatin difikultat, nan tabata por biba segun e manera di felisidat paso nan tabata sentrá den Cristu i Su evangelio.
Rumannan, manera e klei riba e wil di e artesano, nos bida mester ta sentrá ku eksaktitut den Cristu si nos ke haña goso berdadero i pas den e bida aki. E ehèmpelnan di e rei Lamanita; mi kasá, Nancy; i e Nefitanan tur ta sostené e prinsipio berdadero aki.
Mi ta duna boso mi testimonio awe ku nos tambe por haña e pas ei, e felisidat ei, e goso berdadero si nos skohe pa biba un bida sentrá den Cristu, den nòmber di JesuCristu, amèn.