Boso Siguiente Paso

Pa Elder Randall K. Bennett

Di e Setenta

Boso Tata Selestial i Su Yu, JesuCristu, ta invitá boso pa dal boso siguiente paso na Dje. No warda. Hasié awor.

Mi kurason a senk durante e reunion resien ku Santunan di Último dia maravioso. Un pregunta a wòrdu hasí, “Ken tin e deseo di biba serka Tata Selestial atrobe? Tur man a bai laira. E siguiente pregunta tabata: “Ken tin konfiansa ku e lo logra? Tristu i sorprendemente kasi tur man a baha.

Ora nos ta pèrsibí e buraku entre ken nos ta awor aki i ken nos ta deseá di bira, hopi di nos ta wòrdu tentá pa skohe pa pèrdè nos fe i speransa.¹

Pasobra “nada impuro no por biba serka Dios,”² pa nos por biba bèk serka Dje, nos mester limpia nos mes di piká³ i wòrdu santifiká.⁴ Si nos tabatin ku hasi esaki nos so, ningun di nos lo no por a logra. Pero nos no ta nos so. Hecho ta ku nunka nos no ta nos so.

Nos tin e yudansa di shelu pa motibu di Jesucristu i Su Ekspiashon.⁵ E Salbador a bisa, “Si boso tin fe den mi boso lo tin e poder pa hasi tur loke ta kumbiniente den mi.”⁶ Ora fe wòrdu ehersé, fe ta krese.

Laga nos konsiderá huntu tres prinsipio ku lo yuda nos den nos trayekto bèk serka nos Tata den shelu.

Bira manera un Mucha

Nos ñetu di mas yòn ta ilustrá e promé prinsipio aki. Despues ku e la siña gatia i para, e tabata kla pa purba kana. Durante su promé intento, e la kai, yora, i pone un mirada ku ta bisa, “Lo mi no purba nunka nunka mas!Lo mi bai simplemente sigui gatia.”

Ora el a trompeká i kai, su mayornan amoroso no a sinti ku e tabata sin speransa of ku e lo no kana nunka. Al kontrario nan a saka nan mannan miéntras tantu a yam’é, i ku bista riba nan, el a purba atrobe di move bai den nan brasanan amoroso.

Mayornan amoroso semper ta kla pa habri nan brasanan pa duna bon bini na hasta nos pasonan mas chikitu den e direkshon korekto. Nan sa ku nos deseo di purba kada biaha atrobe lo guia nos na progreso i éksito.

E Salbador a siña ku pa heredá e reino di Dios, nos mester bira manera un mucha chikitu.⁷ Asina ku, spiritualmente bisá, e promé prinsipio ta ku nos mester hasi loke nos a hasi tempu nos tabata mucha.⁸

Ku humildat manera un mucha i disposishon pa enfoká riba nos Tata den Shelu i nos Salbador, nos ta dal pasonan den Nan direkshon sin nunka entregá speransa, maske ku nos kai. Nos Tata Selestial amoroso ta regosihá ku tur paso fiel, i si nos kai, E ta regosihá den kada esfuerso pa lanta bèk i purba atrobe.

Aktua u Fe

Un di dos prinsipio ta wòrdu ilustrá dor di dos Santu fiel, kada un ku hopi deseo di enkontrá un kompañero eterno. Ámbos bou di orashon a tuma pasonan yená ku fe.

Yuri, un Santu di Último dia Rusiano, a hasi sakrifisio i a spar pa hasi un biahe largu pa tèmpel. Den trein el a ripará un dama bunita ku un kara briante i e la sinti ku e mester a kompartí e evangelio ku n’e. Sin sa kiko mas pa hasi,el a kuminsá lesa for di e Buki di Mormon, sperando ku e dama lo ripara.

Yuri no a realisá ku e dama, Mariya, tabata un Santu di Último dia. Sin sa ku Yuri tambe tabata un miembro, i siguiendo un susuro pa kompartí e evangelio ku n’e. Mariya a kuminsá lesa den su Buki di Mormon tambe, sperando ku e lo ripará.

Awèl, ora nan dos a hisa kara simultáneamente, Yuri i Mariya tabata asombrá di wak e Buki di Mormon den otro su man --- i si, despues di enamorá, nan a wòrdu seyá den tèmpel. Awe, Yuri i Mariya Kutepov di Voronezh, Rusia, komo kompañeronan eterno, ta kontribuí di manera signifikativo na e kresementu di e Iglesia na Rusia.

E énfasis aki no ta solamente riba e pareha aki su deseo di aktua den fe. E ta tambe tokante un di dos prinsipio---Señor ta mas ku igualá nos disposishon di aktua den fe. Nos deseo pa dal un paso no ta wòrdu solamente igualá---e ta surpasá-–pa Señor su bendishonnan primintí.

Tata Selestial i nos Salbador ta deseá pa bendishoná nos. Al fin a kabo, Nan ta pidi solamente un désimo parti di loke nan a bendishoná nos kuné i e ora ei primintí nos ku e bentananan di shelu lo habri!⁹

Semper ku nos ta dispuesto pa aktua ku fe den Jesucristu i dal un otro paso, espesialmente un paso inkómodo rekeriendo kambio òf arepentimentu, nos ta wòrdu bendishoná ku fortalesa.¹⁰

Mi ta testifiká ku Señor lo guia nos pa---i dor di---nos siguiente pasonan. E lo hasi mas ku igualá nos esfuersonan ku Su poder si nos ta dispuesto di sigui purba, arepentí, i sigui dilanti ku fe den nos Tata Selestial i Su Yu,Jesucristu.

Donnan spiritual ta promesanan no solamente na esnan ku stima Dios i warda tur su mandamentunan pero tambe, afortunadamente, na esnan di nos ku ta [buska ]pa hasi asina.”¹¹ Fortalesa ta wòrdu duna nan tur esnan ku ta sigui buska i purba.

Dos señal semanal esensial ku ta marka nos biahe na nos Tata den Shelu ta e kombenio perpetuo di e ordenansa di santa sena i nos wardamentu di e dia di reposo. Presidente Russell M. Nelson a siña durante lastu konferensia general ku e Sabat ta e regalo di Señor pa nos. Nos deboshon semanal pa warda e dia di reposo ta nos señal na Señor ku nos ta stim’é.¹²

Kada dia di reposo nos ta testifiká ku nos ta dispuesto pa tuma riba [Su nòmber nos mes], i pa semper kòrd’é, i warda su mandamentunan. ”¹³ A kambio pa nos kurason arepentí i nos kompromiso, Señor ta renobá e remishon di nos piká primintí i ta pèrmití nos pa “tin su Spiritu semper huntu ku nos.”¹⁴ E Spiritu Santu su influensha ta mehorá, fortalesé, siña i guia nos.

Si nos den rekòrd’é kada dia di reposo, nos ta bira nos kurason na e Salbador pa medio di e dos señalnan importante aki, nos esfuerso ta wòrdu mas ku igualá pa Señor dor di Su bendishonnan prometé. Nos ta risibí e promesa, ku si nos warda e dia di reposo, e plenitut di mundu lo ta di nos.¹⁵

E kaminda di regreso na nos Tata den Shelu ta hiba nos na e kas di Señor, kaminda nos ta bendishoná pa risibí e ordenansanan di salbashon pa nos mes i pa nos sernan kerí ku a bai kaba. Presidente Boyd K. Packer a siña nos ku e ordenansanan i kombenionan ta bira nos kredensialnan pa entrada den [Dios su] presensia.¹⁶ Ta mi orashon ku nos por ta semper digno di i usa nos rekomendashon di tèmpel pa sirbi regularmente.

Vensé e Hòmber Natural

Un di tres prinsipio ta esaki: nos mester oponé e tendensianan di e hòmber natural pa posponé of entregá.¹⁷

Segun ku nos ta progresá riba e kaminda di kombenio, nos lo kometé erornan, algun di nan vários biaha. Algun di nos lo lucha ku komportashonnan of adikshonnan ku nos ta sinti ku no tin forsa pa surpasá. Pero fe den Tata Selestial i den JesuCristu ta un prinsipio di akshon i poder.¹⁸ Si nos ta dispuesto pa aktua, nos lo wòrdu bendishoná ku e fortalesa pa arepentí i fortalesa pa kambia.

Nos ta faya solamente si nos faya na tuma un paso ku fe. Nos lo no i no por faya si nos ta gara fielmente na e Salbador---E ku nunka a faya i lo no faya nos nunka!

Bendishonnan Primintí

Mi ta primintí ku kada paso fiel lo wòrdu kompañá ku yudansa for di shelu. Guia ta bini ora nos ta hasi orashon na nos Tata Selestial i nos ta konfia riba nos Salbador i ta siguié,i skucha na e Spiritu Santu. Fortalesa lo bini pa medio di e sakrifisio ekspiatorio di JesuCristu.¹⁹ Sanashon i pordon ta bin pa medio di e grasia di Dios.²⁰ Sabiduria i pasenshi ta bini dor di konfia den e tempu di Señor pa nos. Protekshon ta bini dor di sigui Dios su profeta bibu, Presidente Thomas S. Monson.

Boso a wòrdu kreá “pa boso por tin goso,”²¹ goso ku boso lo sinti ora boso regresá dignamente serka boso Tata Selestial i boso Salbador i drenta den Nan brasa tierno.

Mi ta testifiká di e berdatnan apsoluto aki. Boso Tata Selestial amoroso i Su Yu, JesuCristu, ta bibu. Nan konosé boso. Nan ta stima boso. Ku amor nan ta invitá boso pa dal e siguiente paso. No warda. Hasié awor. Den e nòmber sagrado di Jesucristu, amèn.