Kiko Mi ta Falta Ainda?

Pa Elder Larry R. Lawrence

Di e Setentanan

Si nos ta humilde i dispuesto pa siña, e Spiritu Santu lo impulsá nos pa mehorá i guia nos pa kas, pero nos tin ku puntra Señor pa e instrukshonnan riba kaminda.

Tempu mi tabata un hóben adulto, mi a kuminsá investigá Iglesia. Promé mi tabata atraé na e evangelio pa e ehèmpelnan di mi amigunan Santu di Delaster dianan, pero eventualmente mi tabata atraé pa e doktrina úniko. Ora mi a siña ku hòmbernan i muhénan fiel por sigui progresá i finalmente bira manera nos mayornan selestial , mi tabata frankamente asombrá. I gusta e konsepto; e tabata zona bèrdat pa mi.

Pronto despues di mi boutismo, mi tabata studiando e Predikashi riba e Seru, i mi a rekonosé ku Jesus a siña e mes un bèrdat aki tokante progreso eterno den e Beibel. El a bisa, “Sea boso perfekto, manera boso Tata den shelu ta perfekto.”¹

Mi tin mas di 40 aña di ta miembro, i kada biaha ku mi lesa e versíkulo aki di skritura, mi ta kòrdá di e propósito di ta aki na mundu. Nos a bini pa siña i mehorá te ora gradualmente nos wòrdu santifiká òf ta perfekto den Cristu.

E biahe di disípulo no ta unu fásil. El a wòrdu yamá un “kurso di mehoramentu konstante.”² Miéntras nos ta biaha riba e kaminda règt i smal, e Spiritu ta desafiá nos kontinuamente pa bira mihó i pa sigui dilanti. E Spiritu Santu ta un kompañero di biahe ideal. Si nos ta humilde i dispuesto a siña, E lo tene nos na nos man i guia nos pa kas.

Sinembargo, nos mester puntra Señor pa instrukshon durante e trayekto. Nos tin ku hasi algun pregunta difísil, manera “kiko mi tin ku kambia?” “Kon mi por mehorá?” “Kua debilidat mester wòrdu fortalesé?”

Laga nos konsiderá e relato den Tèstamènt Nobo di e hóben yòn i riku. E tabata un hóben hustu ku tabata warda e Dies Mandamentunan kaba, pero e ke a bira mihó. Su meta tabata bida eterno.

Ora el a topa e Salbador, el a puntra, “Kiko mi falta ainda?”³

Inmediatamente Jesus a kontestá, dunando un konseho ku tabata intenshoná spesialmente pa hóben. “Jesus a bisa na dje, Si bo ke ta perfekto, bai bende bo propiedatnan, i duna e pobernan i... bini i sigui mi.”⁴

E hóben tabata asombrá; nunka e no a konsiderá un sakrifisio asina. E tabata sufisientemente humilde pa puntra Señor pero no sufisiente fiel pa sigui e konseho dibino ku el a haña. Nos mester ta dispuesto pa aktua ora nos haña un kontesta.

Presidente Harold B. Lee a siña: “Kada un di nos, si nos lo por alkansá perfekshon, na sierto momentu tin ku puntra nos mes: ‘Kiko mi falta ainda?’”⁵

Mi konosé un mama fiel ku a humiá su mes i a puntra Señor, “Kiko ta stroba mi di progresá?” Den su kaso, e kontesta di e Spiritu a bini inmediatamente: “Stòp di keha.” E kontesta aki a sorpres’é; nunka el a pensa di su mes di ta un hende ku ta keha. Sinembargo, e mensahe di e Spiritu Santu tabata masha kla. Den e dianan ku a sigui, el a bira konsiente di su kustumber di keha. Gradesido pa e inspirashon pa progresá, el a disidí di konta su bendishonnan enbes di su desafionan. Den algun dia, el a sinti e aprobashon kaluroso di e Spiritu.

Un yònkuman humilde, ku no por a logra haña e mucha muhé korekto a akudí Señor pa yudansa: “Kiko ta stroba mi di ta e hòmber korekto?” el a puntra. E kontesta a bini na su mente i kurason: “Drecha bo lenguahe.” Na e momentu ei, el a realisá ku diferente ekspreshon ofensivo a bira parti di su vokabulario, i el a komprometé pa kambia.

Un hermana soltero ku brio a hasi e pregunta: “Kiko mi mester kambia?” i e Spiritu a susurá na dje, “No interumpí hende ora nan ta papiando.” E Spiritu Santu enbèrdat ta duna konseho ku ta pas. E ta un kompañero kompletamente honesto i lo bisa nos kosnan ku niun otro hende no sa òf tin e kurashi pa bisa.

Un misionero ku a regresá a haña su mes di strès ku un skema hopi pisá. E tabata purba di haña tempu pa trabou,estudio, famia, i un yamamentu den Iglesia. El a puntra Señor pa konseho: “Kon mi por sinti mi na pas ku lokual mi tin ku hasi?” E kontesta no tabata lokual ku el a spera; el a risibí e impreshon ku e mester warda e dia di reposo ku mas koutela i tené Santifiká. El a disidí pa dediká e djadumingu na servisio na Señor----pa pone su kursonan di skol un banda riba e dia ei i enbes [di esaki] studia e evangelio. E ahuste chikitu aki a trese e pas i balansa ku e tabata buskando.

Hopi aña pasá, mi a lesa den un revista di Iglesia e historia di un mucha muhé ku tabata bibando leu di kas i tabata bai universidat. El a kai atras den lèsnan, su bida sosial no tabata lokual ku el a spera, i en general e tabata infelis. Por fin, un dia, el a kai na rudia i a puntra Señor, “Kiko mi por hasi pa drecha mi bida?” E Spiritu Santu a susurá, “Lanta ariba i limpia bo kamber.” E inspirashon aki a bini kompletamente komo un sorpresa, pero e tabata djis e kuminsamentu ku e tabatin mester. Despues di tuma tempu pa organisá i pone kosnan na òrdu, el a sinti e Spiritu yena su kamber i elevá su kurason.

E Spiritu Santu no ta bisa nos pa kambia tur kos den un biaha. Si E lo a hasié, nos lo a bira deskurashá i entregá. E Spiritu ta traha ku nos den nos mes tempu, un paso kada bes, òf manera Señor a siña, “Liña riba liña, presepto riba presepto, ... i bendishoná ta esnan ku hasi kaso di mi preseptonan, ... pasobra na esnan ku risibí lo mi duna mas.”⁶ Por ehèmpel, si e Spiritu Santu a inspirá bo pa bisa danki mas tantu biaha, i bo ta reakshoná mesora na e inspirashon ei, e ora ei E lo por sinti ku ta tempu pa bo hasi algu mas desafiante----manera siña pa bisa, “Despensa mi; esei tabata mi falta.”

Un tempu perfekto pa puntra Señor, “Kiko mi falta ainda?” ta ora nos ta partisipá di e santa sena. E Apòstel Pablo a siña ku esaki ta e tempu pa kada un di nos eksaminá nos mes.⁷ Den e ambiente reverente aki, ora nos pensamentunan ta dirigí na shelu, Señor por bisa nos kariñosamente kiko nos mester traha riba dje despues.

Meskos ku boso, mi tambe a risibí hopi mensahe di e Spiritu durante e añanan mustrando mi kon mi por mehorá. Pèrmití mi kompartí algun ehèmpel personal di mensahenan ku mi a tuma na serio. E inspirashonnan aki a inkluí:

No lanta bo bòs.
Organisá bo mes; krea un lista diario di kosnan pa hasi.
Sòru mihó pa bo kurpa dor di kome mas fruta i bèrdura.
Oumentá bo asistensia na tèmpel.
Tuma tempu pa meditá promé bo hasi orashon.
Puntra bo esposa pa su konseho.
I tene pasenshi ora di kore outo; no pasa e límite di velosidat. (Ainda mi ta trahando riba esun delaster aki.)

E sakrifisio ekspiatorio ta lokual ta hasi perfekshon òf santifikashon posibel. Nunka nos lo por hasié nos mes, pero Dios Su grasia ta sufisiente pa yuda nos. Manera Elder David A . Bednar a yega di bisa:”Mayoria di nos ta komprondé bon ku e Ekspiashon ta pa pekadornan. Sinembargo, mi no ta asina sigur, ku nos sa i ta komprondé ku e Ekspiashon ta pa santunan tambe---pa hòmbernan i muhénan bon ku ta obediente, digno, i konsiente i ku ta luchando pa bira mihó.”⁸

Lo mi ke a sugerí pa kada un di boso pronto partisipá den un ehersisio spiritual, kisas awe nochi mes miéntras boso ta hasi orashon. Puntra Señor humildemente e siguiente pregunta: “Kiko ta stroba mi di mehorá?” Ku otro palabra: “Kiko mi falta ainda?” despues warda ketu pa un kontesta. Si boso ta sinsero, e kontesta lo bira kla pronto. Lo ta un revelashon intenshoná pa boso so.

Podisé e Spiritu lo bisa boso ku boso tin ku pordoná un persona. Òf boso por risibí un mensahe pa ta mas selektivo den e pelíkulanan ku boso ta wak i e músika ku boso ta skucha. E Spiritu por inspirá boso pa ta mas honesto den boso transakshonnan di negoshi òf mas generoso den boso ofrendanan di ayuno. E posibilidatnan ta sin fin.

E Spiritu por mustra nos[kua ta] nos debilidatnan, pero tambe e ta kapas pa mustra nos [kua ta] nos fortalesa. Tin biaha nos tin ku puntra kiko nos ta hasiendo bon p’asina Señor por elevá i kurashá nos. Ora nos ta lesa nos bendishon patriarkal, nos ta wòrdu rekòrdá ku nos Tata Selestial konosé nos potensial dibino. E ta regosihá tur biaha ku nos dal un paso dilanti. Pa E, nos direkshon ta muchu mas importante ku nos rapides.

Sea persistente, rumannan, i nunka no bira deskurashá. Nos lo tin ku bai mas leu ku graf promé ku realmente nos alkansá perfekshon, pero aki den mortalidat nos por pone e fundeshi. “Ta nos deber pa awe ta mihó ku nos tabata ayera, i mihó mañan ku nos ta awe.”⁹

Si kresementu spiritual no ta un prioridat den nos bida, si nos no ta riba un ruta di mehoramentu konstante, nos lo pèrdè e eksperensianan importante ku Dios ke duna nos.

Hopi aña pasá mi a lesa e palabranan di Presidente Spencer W. Kimball, ku tabatin un impakto duradero riba mi. El a bisa: “Mi a siña ku kaminda tin un kurason kontinuamente den orashon, un gran deseo pa rektitut, bandonamentu di piká, i obedensia na e mandamentunan di Dios, e Señor ta drama mas i mas lus te ora finalmente tin poder pa bora e velo selestial. ... Un persona ku tal rektitut tin e promesa impagabel ku riba un dia e lo mira Señor su kara i sa ku e ta Señor.”¹⁰

Ta mi orashon ku e eksperensia final aki un dia lo por bira di nos, ora nos permití e Spiritu Santu pa guia nos pa kas. Den e nòmber di Jesucristu, amèn.