Perseverá Riba Bo Kaminda
Pa Elder Koichi Aoyagi
Miembro Emérito di e Setenta
Pone Dios promé, apesar di e pruebanan ku boso ta enfrentá. Stima Dios. Tin fe den Cristu, i konfia bo mes den Dje den tur kos.
Riba 11 di mart 2011, mi tabata pará riba un plataforma den stashon di trein na Tokyo Shinagawa pa bishitá e Mishon Japan Kobe. Aproksimadamente 2:46 p.m. tabatin un teremoto ku magnitut di 9.0. Mi no por a para pa motibu di e sakudimentu intenso, i mi a tene levemente na e sosten dje trapi. Lusnan di plafòntnan den serkania a kuminsá kai riba flur. Henter Tokyo tabata den pániko.
Afortunadamente, mi no tabata heridá, i kuater ora despues, mi tabata aliviá di sa ku henter mi famia tabata na salvo.
Na televishon tabatin un ola di video spantoso. Un tsunami masivo a surgi den e área di mishon di Sendai----bariendo tur kos den su kaminda: outo, kasnan, fábrikanan,i vèltnan. Mi tabata babuká pa e imágennan trágiko, i mi a yora. I mi a hasi orashon ferviente ku nos Tata Selestial Su protekshon i asistensia lo ta riba tur e hendenan ku ta biba den e region aki ku ta asina stimá.
Mas lat, a wòrdu konfirmá ku tur e mishoneronan i miembronan di Iglesia tabata na salvo. Sinembargo, hopi miembro tabata afektá, a pèrdè nan famia, kas, i poseshonnan di kas. Kasi 20,000 hende a muri, komunidatnan a wòrdu destruí, i hopi hende tabata fòrsá pa bandoná nan kas komo resultado di e aksidente na un planta nuklear.
Desasternan manera esaki ta kousa ruina den hopi parti di mundu awendia, kousando hopi pèrdida di bida. Nos ta avisá ku desasternan, guera, i inkontabel difikultat lo pasa den mundu.
Ora pruebanan manera esakinan bini diripiente riba nos, nos lo por puntra, “Di kon e kosnan aki ta pasa ku mi?” òf “Di kon mi tin ku sufri?”
Durante un periodo largu despues ku mi a kombertí na e evangelio, mi no tabatin un kontesta kla pa e pregunta “Di kon mi a haña prueba?” Mi a komprondé e parti di e plan di salbashon ku ta bisa; nos lo wòrdu probá. Sinembargo, en realidat, ora a yega na e pregunta aki, mi no tabatin un konvikshon ku tabata sufisiente poderoso pa kontest’é adekuadamente. Pero a yega un tempu den mi bida ora ku ami tambe a eksperensiá un prueba grandi.
Tempu mi tabatin 30 aña, mi tabata bishitando e mishon Nagoya komo parti di mi trabou. Despues di e reunion, e presidente di mishon amablemente a regla pa e èldernan kore hiba mi aeropuerto. Sinembargo, segun nos a yega e intersekshon na parti abou di un seru largu, un trùk tabata koriendo hopi duru nos tras. El a dal den e parti patras di nos outo i a push’é pa mas ku 20 meter dilanti. E parti mas spantoso di tur esaki tabata ku no tabatin un shofùr. E parti patras di nos outo tabata primí te mitar di su tamaño original. Afortunadamente, tur dos e èldernan i ami a sobreviví.
No opstante, e siguiente dia, mi a kuminsá sinti doló na mi garganta i skoudernan i a haña un tremendo doló di kabes. For di e dia ei mi no por a drumi, i mi tabata fòrsá pa biba kada dia ku tantu doló físiko i mental. Mi a pidi Dios den orashon pa por fabor kura mi doló, pero e síntomanan aki a keda pa kasi 10 dia.
Na e momentu ei, sentimentunan di duda tambe a kuminsá drenta mi mente, i mi a puntra, “Di kon mi mester sufri tantu doló asina?” No opstante, maske e tipo di sanashon ku mi a buska no a wòrdu duná, mi tabata esforsá pa ta fiel den warda e mandamentunan. Mi a sigui hasi orashon pa mi por ta kapas di solushoná e preguntanan ku mi tabatin tokante di mi pruebanan.
A yega un tempu ku mi a haña mi mes ta batayá ku algun asuntunan personal, i mi tabata agitá pasobra mi no tabata sa kon pa atendé ku e prueba nobo aki. Mi tabata hasiendo orashon pa un kontesta. Pero mi no a risibí un kontesta mesora. Asina ku mi a bai papia ku un lider di Iglesia di konfiansa.
Miéntras nos tabata papia, ku amor den su stèm, el a bisa, “Hermano Aoyagi, no ta bo propósito riba e mundu aki pa eksperensiá prueba? No ta pa aseptá tur e pruebanan di e bida aki pa loke nan ta i despues lag’é sosegá riba Señor? Bo no ta kere ku e problema aki lo wòrdu solushoná ora nos resusitá?”
Ora mi a tende e palabranan aki, mi a sinti e Spiritu di Señor masha fuerte. Mi a skucha e doktrina aki inkontabel biaha, pero e wowonan di mi komprendementu nunka no a habri na e ekstremo ku nan tabata e biaha aki. Mi a komprondé ku esaki tabata e kontesta ku mi tabata buskando for di Señor den mi orashonnan. Mi por a komprondé mas kla nos Tata Selestial su plan di salbashon i komprondé prinsipio importante aki di nobo.
Den Abraham, Señor Dios a deklará “I nos lo prueba nan pa wak si nan lo hasi tur kos ku E lo manda nan.”1
E prinsipio ku Dios ku a krea e shelunan i tera konosé e gran plan di e mundu aki, ku e tin dominio riba tur kos den shelu i tera, i kumpli ku e plan di salbashon, el a duna nos diferente eksperensia----inkluyendo algun pruebanan miéntras---nos ta na e mundu aki.
I e Señor a bisa Jose Smith ku:
“Sa, mi yu, ku tur e kosnan aki lo duna bo eksperensia i [esaki] lo ta pa bo mes bon. …
“P’esei Perseverá tiba bo kaminda ... pasó Dios lo ta ku bo pa semper.”2
E pruebanan di e mundu aki—inkluso malesa i morto—ta un parti di e plan di salbashon i ta eksperensianan ineksplikabel. Ta nesesario pa nos “wanta riba [nos] kaminda” i aseptá nos pruebanan ku fe.
Sinembargo, e propósito di nos bidanan no ta solamente pa soportá pruebanan. Tata Selestial a manda Su Yu Stimá, Jesucristu, komo nos Salbador i Redentor, p’asina nos por superá e pruebanan ku nos ta enfrentá na mundu; ke men. E ta laga ku nos debilidatnan ta bira fuerte,3 El a Ekspiá pa nos pikánan i nos imperfekshonnan, i el a hasi posibel pa nos optené inmortalidat i bida eterno.
Presidente Henry B. Eyring, a deklará: “E tèst ku Un Dios amoroso a pone nos dilanti no ta pa mira ku nos ta soportá difikultat. Ta pa mira ku nos por soport’é bon. Nos ta pasa e tèst dor di mustra ku nos ta rekòrd’É i Su mandamentunan.”4
“Perseverá riba boso kaminda” ta e eskoho importante durante tempu di prueba. Bira boso kurason na Dios, spesialmente ora boso ta enfrentá pruebanan. Obedesé e mandamentunan di Dios humildemente. Demonstrá fe pa rekonsiliá boso deseonan ku e boluntat di Dios.
Awor laga nos konsiderá e dalmentu di outo na Nagoya. Mi por a muri den e aksidente ei. Apesar di tur kos, pa medio di Señor su grasia,mi a biba milagrosamente. I mi sa ku mi sufrimentu nan tabata pa mi siña i progreso.5 Tata Selestial a siña mi pa kontrolá mi falta di pasenshi, desaroyá empatia, i pa konsolá esnan ku ta sufriendo. Ora mi a realisá esaki, mi kurason tabata yená ku sentimentunan di gratitut pa mi Tata Selestial pa pruebanan.
Pone Dios [na promé [lugá], apesar di e pruebanan ku boso ta enfrentá. Stima Dios. Tin fe den Cristu i konfia boso mes na Dje den tur kos. Moroni ta hasi e siguiente promesa na tal hende: “I si boso ninga boso mes tur inikidat i stima Dios ku henter boso alma, mente i forsa, e ora ei su grasia ta sufisiente pa boso, ku pa medio di su grasia boso por ta perfekto den Cristu.”6
Mi ta testifiká sinseramente ku Dios e Tata i Su Yu Stimá, Jesucristu, ta biba i ku Dios su promesanan na esnan ku “wanta riba [nan] kaminda” i stim’É lo wòrdu kumplí asta mei mei di pruebanan, den nòmber sagrado di Jesucristu, amèn.