Enkontrá e desafionan den mundu di awendia.

Pa Elder Robert D. Hales

Di e Quorum di e Diesdos Apòstelnan

E eskohonan ku boso hasi–mishon, edukashon, matrimonio, karera, i sirbi den Iglesia---lo forma boso destino eterno.

Hopi kos a wòrdu skibi i bisá tokante di e generashon di adultonan soltero di awendia. Investigashon ta mustra ku hopi ta resistí kontra di religion organisá. Hopi di nan ta den debe i sin trabou. Un kantidat grandi ta gusta e idea di matrimonio, pero hopi tin miedo pa tuma e stap ei. Un number kresiente no ke haña yu. Sin e evangelio i guia inspirá, hopi ta kanando den kamindanan straño i ta pèrdiendo nan rumbo.

Afortunadamente, adultonan soltero miembro di Iglesia ta kana atras den e tendensianan alarmante aki, parsialmente pasó nos ta bendishoná ku e plan di evangelio. E plan eterno ei ta inkluí tene duru na e bara di heru—garando na e palabra di Dios i di Su profetanan. Nos tin ku reforsá nos gara riba e bara ku ta hiba nos bèk serka Dje. Awor aki ta e “dia pa skohe” ¹ pa nos tur.

Tempu mi tabata mucha, mi tabata bai tuma un desishon no bon pensá, mi tata tin biaha tabata bisa, “Robert, pone bo mes stret, i aktua korekto!” Boso tambe lo mester a eksperenshá esaki. Den e spiritu di su dicho simpel, lo mi ke papia spesifikamentu ku e hóbennan–e hóbennan nobel---i adultonan soltero nobel, pasó “mi alma ta tuma plaser den simplesa ... pa [nos] por siña.”²

Boso ta bibando dor di un periodo kritiko den bosnan bida. E desishonnan ku boso tuma---mishon, edukashon, matrimonio, karera i servisio den iglesia--- lo forma boso destino eterno. Esaki ta nifiká ku boso semper mester wak padilanti---mirando pa e futuro.

Komo un piloto den forsa aéreo, mi a siña e prinsipio aki: nunka no bula intenshonalmente den un mal tempu. (Lo mi no konta bosnan kon mi a haña sa esaki.) Na lugá, bula rònt di dje, tuma un otro ruta òf warda e mal tempu klarifiká promé ku aterisahe.

Rumannan adulto soltero stimá, mi ke yuda boso “aktua korekto” den e tormentonan ku ta akumulando den e lastu dianan. Boso ta e pilotonan. Boso ta responsabel pa pensa riba e konsekuenshanan di kada un di e desishon ku boso ta hasi. Puntra boso mes: “Si mi tuma e desishon aki, kiko ta e kos di mas malu ku lo por pasa?” Boso desishonnan hustu lo kita boso di bai for di kurso.

Pensa riba dje: Si boso skohe pa no tuma un bebida alkohóliko, boso lo no bira un alkoholista ! Si boso skohe pa no drenta den debe, boso lo evitá e posibilidat di bai bankrut!

Un di e propósitonan di skritura ta pa mustra nos kon hendenan hustu ta reakshoná riba tentashon i maldat. Simpel bisá, nan ta evit’é! Jozef a kore bai for di e kasá di Potifar.³ Lehi a kue su famia i a sali for di Yerusalèm.⁴ Maria i Hosé a hui bai na Egipto pa skapa e plan malbado di Herodes.⁵ Den tur instansia, Tata Selestial a alertá e kreyentenan. Meskos, E lo yuda nos sa si nos tin ku lucha, hui òf sigui bai dilanti den nos sirkunstanshanan. E lo papia ku nos via di orashon, i ora nos hasi orashon, nos lo tin e Spiritu Santu, ku lo guia nos. Nos tin skrituranan, e siñansanan di profetanan bibiente, bendishonnan patriarkal, e konseho di mayornan ku ta inspirá, lidernan di Saserdosio i esnan Ousiliar pero mas importante ainda, e stèm ketu i suave di e Spiritu Santu.

Señor semper lo tene Su promesa: “Lo mi sigui guia bo.” ⁶ E úniko pregunta ta si nos lo laga nos mes wòrdu guiá? Nos lo tende Su stèm i e stèm di Su sirbientenan?

Mi ta duna testimonio ku si boso t’ei pa Señor, E lo t’ei pa boso⁷ Si boso stim’é i warda su mandamentunan, boso lo tin Su Spiritu Santu pa ta huntu ku boso i guia boso. “Pone boso konfiansa den e Spiritu ku ta guia boso pa hasi bon. ... Dor di esaki boso lo sa, tur kos.... ku ta pertenesé na kosnan hustu.” ⁸

Ku e prinsipionan ei komo un fundashon, mi por duna boso algun konseho práktiko?

Hopi di boso generashon ta wòrdu konfrontá ku debenan aplastante. Den tempu ku ami tabata un adulto soltero, mi presidente di Staka tabata un bankero ku tabata invertí riba Wall Street. El a siña mi, “Boso ta riku si boso por biba kontentu ku boso entrada.” Kon boso ta hasi esaki? Paga boso diesmo i spar! Ora boso gana mas sèn, spar mas. No kompetí ku otro hendenan ku tin ko’i hunga karu. No kumpra kos ku boso no por permití boso mes.

Hopi adultonan soltero den mundu ta bai den debe pa nan por haña un edukashon, solamente pa bin komprondé ku e gastunan di skol ta mas grandi ku nan por paga bèk. Buska bekanan i supsidionan. Si ta posibel, optené un trabou part-time pa yuda paga boso propio estudio. Esaki ta eksigí algun sakrifisio pero e ta yuda bo logra.

Un edukashon ta prepará boso pa mas bon oportunidatnan di empleo. E ta pone boso den un posishon mas bon pa sirbi i bendishoná esnan rondó di boso. E lo buta boso riba un kaminda di siñansa pa henter boso bida. E lo duna boso forsa pa bringa kontra di ignoransia i kibokashon. Manera José Smith a instruí: “ Sabiduria ta kore ku skuridat, insiguridat i duda; pasó esnan aki no por eksistí kaminda tin konosementu. ... Den sabiduria tin poder.”⁹ “Pa ta eduká ta bon si boso skucha e konsehonan di Dios.”¹⁰ Un edukashon lo yuda boso prepará boso mes pa loke ta bini den futuro, inkluso matrimonio.

Atrobe, mi por papia abiertamente? E kaminda pa yega na un matrimonio ta pasa dor di e tereno di dating! Dor di dating bo tin e oportunidat di kòmbersashonnan largu. Ora bo date, bo ta haña sa tur kos ku bo ke sa tokante di otro. Siña konosé otro su famia si ta posibel. Bo metanan ta kompatibel ku otro? Bo ta kompartí e mes un sintimentunan tokante e mandamentunan, e Salbador, e saserdosio, tèmpel, kria yu, yamamentunan den Iglesia i sirbi otro hendenan? Bo a eksperensha otro bou di stress, kon e ta reakshoná riba logronan i frakasonan, risistí rabiamentu, i kon e ta trata ku kontratempunan? E persona ku bo ta date, e ta trapa otronan bou di su pia, òf e ta yuda nan krese? Su aktitut, lenguahe, i kondukta ta loke lo bo ke biba kuné tur dia?

Bisando esei, niun di nos no ta kasa ku perfekshon; nos ta kasa ku potensial. E matrimonio korekto no solamente ta bai over di loke ami ke; e tambe ta bai over di kiko e—ku lo ta bai bira mi pareha-- ke pa mi ta i kiko e mester pa mi ta.

Papiando frankamente, por fabor no date durante di henter bo tempu di 20 aña solamente pa tin un “bon tempu,” asina ku boso ta retrasá kasamentu na fabor di otro interesnan i aktividatnan. Dikon? Pasó dating i kasamentu no ta destinashonnan final. Nan ta e porta pa yega na unda finalmente boso ke bai. “P’esei un hòmber lo laga su tata i su mama pa uni ku su kasá.”¹¹

Boso responsabilidat awor aki ta pa ta digno di e persona ku boso ke kasa ku n’e. Si boso ke kasa ku un persona saludabel, atraktivo, honesto, felis, trahadó duru, un persona spiritual,boso mester ta e tipo di persona ei. Si boso ta e tipo di persona ei i boso no ta kasá ainda, tene pasenshi.Warda riba e tempu di Señor. Mi ta duna testimonio ku Señor sa ki ta boso deseonan i E ta stima boso pa boso dedikashon fiel na Dje. E tin un plan pa boso, sea ku ta den e bida aki òf den esun siguiente. Skucha Su Spiritu. “No buska pa duna Señor konseho, pero buska pa tuma konseho fo’i Su man.” ¹² Den e bida aki òf esun siguiente, Su promesanan lo wòrdu kumplí. “Si boso ta prepará, boso lo no teme.”¹³

Si boso no tin medionan finansiero, no preokupá boso mes. No muchu tempu pasa un tremendo miembro di Iglesia a konta mi lo siguiente: “Mi no a kria mi yunan ku sèn; mi a kriá nan ku fe.” Esaki ta un bèrdat grandi. Kuminsá ehersé boso fe den tur área di boso bida. Si boso no hasi esei, boso lo bin sufri di algu ku lo mi yama “re- kaida di fe.” E mes un forsa ku boso mester pa ehekutá boso fe lo disminuí. Asina ta ku ehersé boso fe tur dia, i boso lo “krese mas i mas fuerte.... i tambe mas i mas sólido den boso fe den Cristu.”¹⁴

Pa boso por ta kla pa kasa, tin sigur ku boso ta digno pa partisipá di e Santa Sena i tene un rekomendashon di tèmpel. Bai tèmpel regularmente. Sirbi den Iglesia. Huntu ku e servisio di yamamentunan den Iglesia, sigui e ehèmpel di nos Salbador, ku simplemente “a bai hasiendo bon obra”¹⁵

Awor, boso por tin preguntanan serio over e opshonnan ku tin den futuro. Den mi añanan komo adulto soltero, mi a buska konseho di mi mayornan i di sierto konseheronan fiel i konfiabel. Un di nan tabata un lider di saserdosio; un otro tabata un dosente ku tabata kere den mi. Tur dos a bisa mi, “si bo ke mi konseho, prepará bo mes pa tum’é.” Mi tabata komprondé kiko nan tabata ke men. Ku orashon selekshoná konseheronan ku tin boso bienestar spiritual na pechu. Tene kuidou di tuma konseho di hendenan di boso edat. Si boso ke mas di loke boso tin awor aki, ekstendé boso man pariba, no pa enfrente! ¹⁶

Kòrda, niun hende no por ekstendé nan man ariba pa bo bienestar. Solamente boso fe i orashonnan por hasi pa boso elevá boso mes i tin un kambio di kurason poderoso.Solamente boso resolushon pa ta obediente por kambia boso bida. 16 Dor di e sakrifisio ekspiatorio di e Salbador pa boso, e poder ta den boso.¹⁷ Boso tin boso albedrio, boso tin testimonionan fuerte si boso ta obediente i sigui e Spiritu ku ta guia boso.

Resientemente, un hóben ku ta traha pelíkula a bisa ku e ta sinti ku e ta parti di un “generashon di yunan pèrdí”--- un generashon “buskando speransa, goso i kompletashon, pero buskando den yen lugánan robes i na kamindanan robes.¹⁸

Den e Salbador su parábola di e yu pèrdí, e yu hòmber tabatin hopi bendishonnan wardando p’e, pero promé ku e por a eksigí e derecho riba nan, e tabatin ku analisá su bida, su eskohonan i su sirkunstanshanan. E milager ku a sigui a kontinuashon ta wòrdu deskribí den skrituranan ku un frase simpel: “El a bin bei.¹⁹ Pèrmití mi kurashá boso pa bin bei? Den Iglesia, ora desishonnan importante tin ku wòrdu tuma, hopi biaha nos ta tene reunionnan di konseho. Reunionnan familiar ta sirbi pa mesun propósito. Kisas boso ke kondusí loke mi ta yama un “reunion personal.” Despues ku boso hasi orashon, pasa sierto tempu boso so. Pensa riba loke ta den futuro. Puntra boso mes: “Ki áreanan den mi bida lo mi ke fortifiká asina ku mi por fortifiká otro hendenan? Unda lo mi ke ta un aña for di awe? Dos aña for di awe? Ki skohensianan mi tin ku hasi pa mi yega einan?” Kòrda ku ta boso ta e piloto, ta boso ta na maneho. Mi ta duna testimonio ku sigun ku boso ta bin bei, boso Tata Selestial ta bini serka boso. Dor di e man di konsolashon di Su Spiritu Santu, E lo guia boso dilanti.

Mi ta duna mi testimonio ku Dios ta bibu. Mi ta duna mi testimonio speshal ku e Salbador stima boso. “ Nos lo no bai dilanti den [Su gran kousa] ? Bai dilanti no bai patras.”²⁰ Ora boso siguié, E lo fortifiká i mantené boso. E lo tresé boso ariba na boso kas di mas haltu. Den nòmber di JesuCristu, amèn.