Bira na DjE i Kontestanan Lo Bini

Pa Elder James B. Martino

Di e Setenta

Sea obediente, kòrda e tempunan ora bo a sinti e Spiritu den pasado, i puntra den fe. Boso kontesta lo bini.

Tempu mi tabata un hòmber hóben mi mayornan a djòin E Iglesia di JesuCristu di e Santunan di e Delaster Dianan. Nos tabata sa ku e misioneronan tabata siñando nan, pero mi mayornan a tuma e lèsnan misional nan so.

Despues di e anunsio di sorpresa aki, mi rumannan hòmber i ami a kuminsá skucha na e misioneronan tambe, i kada un di nan a risibí e mensahe di e Restourashon ku alegria. Aunke mi tabata kurioso, mi no tabata ke kambia mi bida. Sinembargo mi a akseptá e reto pa resa tokante si e Buki di Mormon tabata e palabra di Dios, pero mi no a risibí un kontesta.

Boso por puntra dikon Tata Selestial no a kontestá e orashon ei; ami siguramente a puntra mi mes. Mi a siña desde ku e promesa hasí pa Moroni ta eksakto. Dios ta kontestá nos orashonnan tokante bèrdatnan di e evangelio, pero E ta kontestá nan ora nos tin “un kurason sinsero” i “intenshon real.”¹ E no ta kontestá djis pa respondé na nos kuriosidat.

Podisé tin algu den boso bida ku boso tin un pregunta riba dje. Podisé tin un problema boso no sa sigur kon pa resolvé. Awe mi ke kompartí algun pensamentunan ku por yuda boso haña e kontestanan òf yudansa boso ta buskando. E progreso ta kuminsá ku ta kombertí na e evangelio di JesuCristu.

Risibiendo Revelashon ta Dependé riba e Kondishon i Intenshon di Nos Kurasonnan

Mi a pensa tokante e historianan di algun individuonan den e skrituranan. Tuma, por ehèmpel, Laman i Lemuel. Manera Nefi, nan a “nasé di mayornan hustu” i a wòrdu siñá “den tur e siñansanan di [nan] tata.”² Tòg nan a murmurá pasobra nan tata tabata un hòmber visionario. Desde nan punto di bista, su desishonnan a desafiá lógika, pasobra nan no tabata konosé e kosnan di Dios, i p’esei nan no tabata kere.³

E ta interesante pa nota ku nan skohensianan a permití nan akseso pa eksperensianan ku potensialmente ta fomentá fe. Nan a laga nan kas i nan rikesa. Nan a sufri dor di kana dualu den e mondi. Finalmente nan a yuda traha un boto, i nan a bai di akuerdo pa biaha na un pais deskonosí.

Nefi a pasa dor di e mes eksperensianan aki. Pero e akshonnan aki a fomentá nan fe? Nefi su fe a wòrdu fortalesé, pero Laman i Lemuel a bira mas síniko i rabiá. E rumannan hòmber aki asta a mira i skucha un angel, pero na final, nan a sigui duda.⁴

Bida mortal no ta fásil pa niun di nos. Nos a wòrdu poné aki riba tera pa pasa den pruebanan. Nos reakshon riba eksperensianan di bida hopi biaha lo influensiá nos testimonionan. Konsiderá algun di e reakshonnan di Laman i Lemuel: Nan a murmurá ora nan tata a puntra nan pa hasi kosnan duru.⁵ Nan a trata di atkirí e planchanan di bròns, pero ora éksito no a yega, nan a entregá. Nan aktitut tabata “Nos a purba; kiko mas nos por hasi?”⁶

Tabatin asta un temporada ora nan tabata yen di duele pa hasi malu i a pidi pordon.⁷ Nan a resa i a wòrdu pordoná. Pero e skritura ta konta ku despues nan a bolbe di keha i nan a nenga di resa. Nan a bini na Nefi i a bisa ku nan no por a “komprondé e palabranan ku [nan] tata [a] papia.”⁸ Nefi a puntra nan si nan a “puntra Señor.”⁹ Nota nan kontesta: “Nos no a hasi esei; pasó Señor no ta laga nos sa e kosnan ei.”¹⁰

Obediensia Kontinuá ta Permití Nos pa Risibí Kontestanan

Nefi su kontesta na su rumannan hòmber ta e yabi pa nos pa risibí kontestanan kontinuo riba orashon:

“Kon por ta ku boso no ta warda e mandamentunan di Señor? Kon por ta ku boso lo muri, pa via di e duresa di boso kurasonnan?

“Boso no ta kòrda e kosnan ku Señor a bisa?—Si boso no lo hasi boso kurasonnan duru, i puntra mi ku fe, keriendo ku boso lo risibí, diligentemente wardando mi mandamentunan, siguramente e kosnan aki [lo] wòrdu revelá na boso.”¹¹

Mi konosé algun misioneronan regresá ku tabatin eksperensianan spiritual inegabel, pero e falta di sierto kustumbernan spiritual ta parse di a kousa nan pa lubidá e tempu ora Dios a papia na nan. Na e misioneronan ei i na tur di nos, si boso “a sinti pa kanta e kansion di amor redentor, ami lo puntra, boso por sinti esei awor aki?”¹² Si boso no ta sintié awor aki, boso por sintié atrobe, pero konsiderá e konseho di Nefi. Sea obediente, kòrda e tempunan ora bo a sinti e Spiritu den pasado, i puntra den fe. Boso kontesta lo bini, i boso lo sinti e amor i pas di e Salbador. Por ta e no ta bini mes lihé òf den e forma ku boso ta deseá, pero e kontesta lo bini. No entregá! Nunka entregá!

Laga nos kompará Laman i Lemuel ku e yunan hòmber di Mosiah. Tur dos gruponan di hòmber a wòrdu lantá den famianan hustu, tòg tur dos a dual. Tur dos a wòrdu yamá pa arepentí pa un angel, pero kiko tabata diferente tokante e eksperensia di e yunan hòmber di Mosiah?

Pruebanan Lo Fomentá Nos Fe

Nan éksito komo misionero ta inolvidabel. Milnan a wòrdu kombertí na e kamindanan di Señor. Sinembargo, nos ta lubidá hopi biaha ku manera nan a kuminsá nan mishonnan, nan “kurasonnan tabata deprimí, i [nan] tabata serka di bolbe, [pero] Señor a konsolá [nan].” Nan a wòrdu konsehá pa Señor pa “wanta ku pasenshi [nan] aflikshonnan.”¹³

E Studio di e Skrituranan ta Bisa Nos Dios Su Boluntat

Dikon e pruebanan di e yunan hòmber di Mosiah aki a fortalesé nan fe i kompromiso en bes di kousanan pa murmurá òf duda? E yabi ta ku “nan a bira fuerte den e konosementu di e bèrdat; pasobra nan tabata hòmbernan di un bon komprendementu i nan a buska e skrituranan diligentemente, ku nan por sa e palabra di Dios.”¹⁴ Nos tur lo enfrentá pruebanan i tin preguntanan, pero kòrda ku nos mester ta “kontinuamente wantando duru na e bara di heru.”¹⁵ “E palabranan di Cristu lo bisa [nos] tur loke [nos] tin ku hasi.”¹⁶ Nos mester hasi studio di skritura un parti di kada dia di nos bidanan, pasobra esei lo habri e porta di revelashon.

Orashon, Kombiná ku Ayuno, ta Invitá Revelashon

Pa e yunan hòmber di Mosiah, “esei no ta tur kos; nan a duna nan mes pa hasi hopi orashon, i ayuno; p’esei nan tabatin e spiritu di profesia, i e spiritu di revelashon.”¹⁷ Orashon i ayuno lo permití nos pa ta inkliná pa inspirashon spiritual. Komunikashon ku Tata Selestial miéntras nengando kuminda i bebida ku propósito ta permití nos pa “lòs e kadena di maldat i deshasí di e karga pisá.”¹⁸ Orashon, kombiná ku ayuno, lo proveé pa asina ora nos “ta yama, … Señor lo kontestá; … [i ora nos] ta yora, … e lo bisa, Aki mi ta.”¹⁹

Bira na DjE

E kustumbernan religioso personal aki—obediensia, studio di skritura, orashon, i ayuno—a fortalesé e yunan hòmber di Mosiah. E falta di e mes kustumbernan religioso personal aki tabata e rason mayor dikon Laman i Lemuel a wòrdu laga vulnerabel na e tentashon pa murmurá i duda.

Si boso a wòrdu tentá pa murmurá, si boso tabatin duda ku a hiba na inkredulidat, si pruebanan ta parse mas ku boso por wanta, bira na djE. Si bo ta unu ku a bira afó òf a rashonalisá bo kondukta, bira na djE. Bo por kòrda ora El a “papia pas na bo mente … ? Ki testimonio mas grandi bo por tin ku esun di Dios?”²⁰ Puntra bo mes, “Mi ta mes serka di biba manera Cristu awor ku mi tabata promé? “Por fabor, bira na djE.

Laga mi bolbe na mi storia personal. Finalmente mi a kuminsá ta sinsero. Mi ta kòrda ora e misioneronan ku tabata siñando mi a puntra mi si mi tabata kla pa boutisá. Mi a kontestá ku ainda mi tabatin preguntanan. E misionero sabí aki a bisami ku e por kontesta mi pero ku mi mester a kontesta su pregunta promé. El a puntra mi si e Buki di Mormon ta bèrdat i si Joseph Smith tabata un profeta. Mi a bis’é ku mi no tabata sa, pero ku mi tabata ke sa.

Mi pregunta a hiba na fe mas grandi. Pa mi, e kontesta a bini no manera un evento pero manera un proseso. Mi a notá ku miéntras ku mi “[a eksperimentá] riba [e] palabranan” i a kuminsá pa “ehersé un pida chikí di fe,” e Buki di Mormon a bira “delisioso pa mi” i el a “sende mi komprendementu” i a bèrdaderamente “hasi mi alma grandi.” Na final mi tabatin e eksperensia ku e skrituranan ta deskribí komo un hinchamentu den mi pechu.²¹ E tabata na e punto ei ku mi a deseá pa ta boutisá i pa kometé mi bida na JesuCristu.

Mi sa realmente ku e Buki di Mormon ta e palabra di Dios. Mi sa ku Joseph Smith tabata un profeta. Ah, ainda mi tin kosnan ku mi no ta komprondé, pero mi testimonio di bèrdat ta atraé mi mas serka di e Salbador i ta fomentá mi fe.

Rumannan, kòrda Nefi i e yunan hòmber di Mosiah, ku tabatin eksperensianan spiritual i anto a aktuá den fe asina ku kontestanan a bini i nan fieldat a krese. Kontrastá esaki ku Laman i Lemuel, ku a duda i murmurá. Asta aunke nan tin biaha a aktuá den maneranan di balor, obra sin fe ta morto. Nos mester tin fe ku obra pa risibí kontestanan.

Mi ta spera miéntras ku boso a skucha awe mainta ku e Spiritu a impreshoná riba boso mente i kurasonnan algu ku boso por hasi pa tin boso preguntanan kontestá òf pa haña un solushon inspirá pa e problema ku boso ta enfrentá. Mi ta duna mi testigu solemne ku Jesus ta e Cristu. Bira na djE i boso orashonnan lo wòrdu kontestá Den e nòmber di JesuCristu, amèn.