Digno di Nos Bendishonnan Primintí

Pa Linda S. Reeves

Di Dos Konsehero den e Presidensia General di Sosiedat di Sokoro

Un vishon di nos Tata Su bendishonnan inkreibel primintí mester ta e enfoke sentral dilanti nos bista tur dia.

Boso no ta sinti amor pa e hermana den e video? Nos sa ku hopi di boso ku no a haña e oportunidat pa haña yu di boso mes a pasa boso bida stimando, kuidando, siñando, i bendishonando muchanan. I, esta, un amor nos Tata Selestial i nos tin pa boso pa esaki!

Nos tur, inkluyendo boso rumannan mas yòn di Primaria i Mujeres Jóvenes, no a haña e oportunidat pa tene un beibi resien nasé den nos brasanan i ku el a wak den nos wowonan? Nos a sinti e sentimentu sagrado i santu rondoná e spiritu selestial aki, ku resientemente a wòrdu mandá pa nos Tata na Shelu na su kurpa chikitu puru i nobo? Poko biaha mi a eksperensiá sentimentunan asina dushi, tierno, i spiritual.

Nos kurpa ta regalonan sagrado di nos Tata Selestial. Nan ta tèmpelnan personal. Ora nos tene nan limpi i puru, nos por ta digno pa yuda nos Tata Selestial krea kurpa pa Su yunan spiritual stimá.

Den Presidente Boyd K. Packer su delaster diskurso di konferensia general, ku boso por kòrda “manera un kuki i un sunchi,” el a testifiká ku “e mandamentu pa multipliká i yena e tera ...ta esensial... i ta e fuente di felisidat humano. Pa medio di ehersé e poder aki [pa krea] rektamente, nos por yega mas serka di nos Tata den Shelu i eksperensiá un plenitut di goso, hasta dibinidat. E poder di prokreashon no ta un parti insidental di e plan; e ta e plan.”

El a sigui:

“Amor berdadero ta rekirí warda te despues di kasamentu pa kompartí e afekshon ei ku ta libra e podernan sagrado ...[dor di] evitá situashonnan na unda deseonan físiko por tuma kontròl. …

““… Nos felisidat den bida mortal, nos goso i eksaltashon ta dependé riba kon nos ta respondé na e deseonan físiko persistente aki.”¹

Mi rumannan stimá, tantu yòn i no asina yòn, mi a sinti un gran ansiedat miéntras mi tabata prepará e diskurso aki. Manera Alma e yu a ekspresá ku su deseo di mas grandi tabata pa nos por yama na e santu nòmber di Señor, i mira i hasi orashon kontinuamente, pa nos no wòrdu tentá mas ku nos por soportá, p’asina nos por wòrdu elevá den e delaster dia.²

Despues Mormon tambe a testifiká ku den tempu di Alma, Korihor e anti Cristu, “a prediká … , i a desviá kurason di ....hopi muhé.”³

Rumannan, Satanas a lanta un influensia “meskos ku Korihor” den nos tempu ku gran éksito. Kiko ta algun di su hèrmèntnan? Novelanan romántiko seduktivo, telenovela, muhénan kasá i namoradonan bieu konektando riba media sosial, i pornografia. Nos mester tin masha kuidou, rumannan stimá! Nos no por hunga ku Satanas su flechanan ardiente sin wòrdu kimá. Mi no sa di nada ku lo kualifiká nos mas pa e kompania konstante di e Spiritu Santu ku e birtut.

Hopi den e mundu aktual ta buskando gratifikashon instantáneo i konosementu instantáneo riba Internet. Al kontrario, nos lo wòrdu bendishoná grandemente si nos ehersé fe i pasenshi i bai na nos Tata Selestial, e fuente di tur bèrdat. Hopi kontesta i siguransa por bini pa medio di buska i studia e skrituranan tur dia i ku orashon i supliká sinsero, pero no tin tal promesanan riba Internet. E profeta Jakob a testifiká ku e Spiritu ta papia bèrdat i no ta gaña. E ta papia di kosnan manera nan ta i lo bira realmente.⁴

Ora nos ta enbolbí den miramentu, lesamentu, òf eksperensiando kualkier kos ku ta mas abou ku Tata Selestial su normanan, e ta debilitá nos, rumannan stimá. Sea nos ta hóben òf bieu, si loke nos ta wak, lesa,skucha, òf skohe pa hasi no ta kuadra ku Señor su normanan den Para la Fortaleza de la Juventud pagué, tir’é afó, kibr’é, dal porta sera.

Nos niun no ta perfekto, pero ora nos a hasi piká, Presidente Packer a kòrda nos:

Ku e promesa ta ku e persona ku arepentí di su pikánan ta wòrdu pordoná i Señor ta bisa ku E no ta kòrda nan mas’(D&C 58:42). …

“… E Ekspiashon, ku por reskatá kada un di nos, no ta karga sikatris. Esei ke men ku maske kiko nos a hasi òf unda nos tabata òf kon algu a pasa, si nos arepentí di bèrdat, ...ora El a primintí ku lo ekspiá, i ora El a ekspiá, esei a wòrdu reglá. Tin asina hopi di nos ku ta kana rònt ...ku sentimentunan di kulpa, sin sa eksaktamente kon pa skapa. Boso ta skapa dor di aseptá e Ekspiashon di Cristu, i tur kos ku tabata doloroso por kambia den beyesa, amor i eternidat.⁵

Ademas di arepentimentu kua yudansa òf kua hèrmèntnan a wòrdu duná na nos pa keda limpi i birtuoso? Nos Primaria i hobensitanan tur konosé i a kanta e kantika “Scripture Power”⁶ Nos por ekspandé na “Poder di Orashon” “Poder di Tèmpel”, “ Poder di Kombenionan, Poder di Dia di Reposo,” Poder di Profeta, “ i “Poder di Birtut”?

Tambe tin bendishonnan grandi i promesanan di protekshon asosiá ku bistimentu apropiá di nos garment di tèmpel. Mi yega na sinti ku simbólikamente mi ta bistiendo bistínan real duná na mi pa mi Tata Selestial. Mi ta testifiká ku ora nos trata na bisti e garmentnan apropiadamente, nos Tata ta rekonosé komo un señal di nos amor i deboshon na Dje. Ta un señal di e kombenionan ku nos a hasi ku n’e, El a primintí, ku ora nos hasi lokual El a bisa E ta obligá, pero ora nos no hasi esei nos no tin ningun promesa. ”⁷

Resientemente mi a papia ku un amiga bieu ku a pasa dor di dos divorsio pa kousa di e adikshon i infidelidat di su esposonan. E i su tres yunan a sufri masha hopi. El a deklará, “Mi a purba asina duru pa biba rektamente. Di kon mi tabatin tantu prueba asina? Kiko mi a hasi robes? Kiko Tata Selestial ke pa mi hasi? Mi a hasi orashon i lesa mi skrituranan, yuda mi yunan, bai tèmpel frekuentemente.’’

Miéntras mi tabata skucha e hermana aki, mi a sinti gana di grita,“Bo ta hasiendo bon! Bo ta hasiendo tur kos ku Tata Selestial ke i ta spera ku lo bo hasi!

Ta komprendibel, ku hopi a ekspresá ku nos Tata su bendishonnan primintí ta demasiado leu, partikularmente ora nos bida ta yená ku retonan. Pero Amulek a siña ku “E bida aki ta e tempu...pa prepará pa bai serka Dios.”⁸ no pa risibí tur nos bendishonnan. Presidente Packer a splika ku ‘‘‘I nan a biba felis pa semper’ nunka no ta skibi den e di dos akto. E frase ei ta pertenesé den e di tres akto ora e misterionan ta solushoná i tur kos ta korekto.”⁹ Sinembargo, un vishon di e bendishonnan inkreibel i primintí di nos Tata mester ta e enfoke sentral dilanti nos bista tur dia---meskos di ta konsiente “di e grandesa di su miserikòrdia tierno”¹⁰ ku nos ta eksperensiá tur dia.

Rumannan, mi no sa di kon nos tin e hopi pruebanan ku nos tin, pero ta mi sentimentu personal, ku e rekompensa ta asina grandi, asina eterno i duradero, asina yen di goso i fuera di nos komprendementu ku riba e dia di rekompensa, nos por sinti pa bisa nos Tata miserikordioso,generoso, stimá, “Esei tabata tur lokual tabata nesesario!” Mi ta kere ku si diariamente nos por kòrda i rekonosé e profundidat di e amor ku nos Tata Selestial i nos Salbador tin pa nos, nos lo ta dispuesto pa hasi kiko ku Nan pidi pa ta bèk den Nan presensia atrobe. Kiko lo importá, rumannan stimá, lokual nos a sufri aki si, al final, e pruebanan ei ta e mesun kosnan ku lo kualifiká nos pa bida eterno i eksaltashon den e reino di Dios ku nos Tata i Salbador?

Mi ta testifiká ku nos kurpanan ta regalonan sagrado di nos Tata Selestial i ku ora nos tene nos bida puru i limpi pa medio di e sakrifisio ekspiatorio di nos Salbador i mantené e vishon di e rekompensanan primintí di nos Tata tur dia nos dilanti, un dia nos lo risibí “tur lokual [nos] Tata tin.”¹¹ Den e nòmber sagrado di Jesucristu, amèn.