Deskubrí e Divinidat Paden
Pa Rosemary M. Wixom
Presidente General di Primaria
Nos ta bini na e mundu aki pa nutri i deskubrí e simianan di naturalesa divino ku ta den nos.
Rumannan, nos stima bosonan! Mi ta duna testimonio ku bida ta un regalo. Dios tin un plan pa kada unu di nos i nos meta a kuminsá hopi tempu promé k nos a bini riba e mundu aki
Lastu tempu, mi a bin rekonosé e milager di un nasementu komo parti di e Plan di Dios. Nos tur a desaroyá físikamente den barika di nos mama, dependiendo hopi luna largu riba su kurpa pa sostené esun di nos. Finalmente, no opstante, e proseso di nasementu – dramátiko pa mama i yu- a separá nos.
Ora un yu drenta e mundu aki, kambio den temperatura, lus i tambe e liberamentu di preshon for riba pechu di e yu, ta pone ku e ta tuma su promé rosea. Di ripiente e pulmon chikitunan ei ta yena ku airu pa promé biaha, su órganonan ta kuminsá traha i e baby por hala rosea. E momento ku e kabuya di lombrishi a wòrdu kòrtá e liña di bida entre mama i yu ta wòrdu interumpí pa semper i e yu su bida riba mundu ta kuminsá.
Job a bisa,: “E Spiritu di Dios a traha mi, i ta e rosea di Dios todopoderoso a duna mi bida.”1
Nos ta bini riba e mundu aki “lagando gloria for di shelu.”2 E Famia : Un Proklamashon pa e Mundu ta siña ku.” Kada unu di nos ta un yu spiritual stima dor di Mayornan Selestial i nos kada unu tin un karakter i destinashon divino.”3 Generosamente nos Tata Selestial ta kompartí un parti di su divinidat ku nos. E karakter divino ku ta den nos ta bini komo un regalo di Dios kompañá ku un amor ku solamente por wòrdu sinti dor di un mayor pa su yu.
Nos a bini riba e mundu aki pa alimentá e simianan di e karakter divino ku ta den nos.
Nos Sa Dikon
Elaine Cannon, un presidente general anterior di Mujeres Jovenes a bisa lo siguiente,: “Tin dos dia importante den bida di un muhé: E dia ku e a nase i e dia ku e deskubrí dikon.”4
Nos sa dikon. Nos a bini aki na mundu pa yuda konstruí Su reino i pa prepará pa e Segundo Binida di Su Yu, JesuCristu. Ku kada rosea ku nos hala, nos ta lucha pa siguiÉ. E karakter divino ku nos tur ta poseé ta wòrdu rafiná i ekstendé dor di e esfuerso ku nos ta hasi pa yega mas serka di nos Tata i Su Yu.
Nos karakter divino no tin nada di haber ku nos realisashonnan personal, nos status, e kantidat di máratònnan ku nos por kore, ku nos popularidat òf konfiansa propio. Nos karakter divino ta bini di Dios. E a wòrdu establesé den un eksistensia ku ta presedé nos nasementu i lo kontinuá te den eternidat.
Nos Ta Stimá
Nos ta identifiká ku nos karakter divino ora nos sinti i duna e amor di nos Tata ku ta na shelu. Nos tin e albedrio pa skohe pa alimentá i yuda krese e amor aki. Pedro a bisa; “promesanan presioso” a wòrdu duna na nos, ku nos “tin mag di ta partisipantenan di e karakter divino.”5 Segun nos bin komprondé ken nos ta,--yunan muhé di Dios---nos ta kuminsá sinti e impakto di e promesanan presioso ei.
Mirando dor di un bentana, no solamente un spil, ta laga nos mira nos mes komo di Dje. Esei ta nifiká ku naturalmente nos ta bai den orashon serka Dje, nos ta ansioso pa lesa Su palabranan anto pa hasi Su boluntat. Dor di esaki ta bira posibel pa nos tuma nos afirmashon direktamente for di Dje, anto no via di e mundu rondó di nos òf for di esnan riba Facebook òf Instagram.
Si a kaso bo kuestioná e chispa di divinidat den bo, kai na rudia den orashon i puntra bo Tata Selestial, “Di bèrdat mi ta Bo yu muhé anto di bèrdat mi ta wòrdu stima dor di Bo?” Elder M. Russell Ballard a bisa, “un di e mensahenan mas presioso ku e Spiritu Santu por relatá na bo ta, kon Señor ta sinti over di bo.”6
Nos ta di Dje. Pedro a bisa, “E Spiritu Santu mes ta duna testimonio na nos spiritu, ku nos ta yunan di Dios.”7 Hopi biaha, e promé himno ku nos ta siña den Primaria ta “Soy un hijo de Dios.”8 Awor ta e momento pa nos tuma e frase stimá aki: “Mi ta un yu di Dios” i pone e palabranan aki su tras: “Anto Kiko?” Nos por asta puntra preguntanan manera por ehèmpel: Kiko mi lo hasi pa biba mi bida konforme un yu di Dios? Kon mi por desaroyá e karakter divino ku ta den mi?
Presidente Dieter F. Uchtdorf a bisa, “Dios a manda boso aki pa prepará pa un futuro mas grandi ku kualkier kos ku boso por imaginá.”9 E futuro ei, riba un dia, ta bira realidat si bo hasi mas ku solamente eksistí; e ta bini ora bo biba bo bida na un manera ku ta hasi posibel pa bo kumpli ku e porshon di bo kreashon. Ta esaki ta invitá Señor den bo bida i bo ta kuminsá laga su boluntat bira di bo.
Nos por siña paso nos tin un karakter divino
E karakter divino aki ta pone ku nos tin e deseo pa buska pa sa tokante bèrdatnan eterno.
Un muhé hóben, Amy, a siña mi e lès aki resientemente ora e a skibi lo siguiente: Awendia ta hopi difísil pa ta un hóben. E kaminda ta birando mas i mas smal. Satanas ta purba hopi duru pa laga nos desviá. E opshonnan ta sea bon òf malu; no tin intermedio mas.
E ta kontinuá: “Tin biaha ta hopi difísil pa haña bon amigunan. Asta ora bo pensa ku bo tin amigunan ku nunka lo bai lagabo, esei tambe por kambia pa un rason o otro. Ta p’esei mi ta asina kontentu ku mi tin famia, mi Tata Selestial, JesuCristu i e Spiritu Santu, ku por ta mi kompañero ki ora ku kosnan entre ami ku mi amigunan bai malu.”
Amy ta sigui konta, “un anochi mi tabata sinti mi mes preokupá anto mi a bisa mi ruman muhé ku mi no tabata sa ki pa hasi.”
Un tiki mas lat riba e mes un anochi ei su ruman muhé a mand’é un mensahe sitando Elder Jeffrey R. Holland ora e a bisa: “No entregá. …No laga los. Keda pone un pia dilanti otro. Keda purba. Tin yudansa i felisidat den futuro. …Tur kos lo bin bon na final. Konfia den Dios i kere den e kosnan bon ku ta bini na horizonte.”10
Amy ta splika: “Mi ta kòrda ku mi a lesa e mensahe ei i mi a bai den orashon, pidiendo ku si en realidat E tei p’ami, ku lo mi por sinti Su amor.
E ta bisa: “asina mi a puntra i tambe kere ku E tabata einan, mi a sinti un sentimentu mas asombroso, un felisidat, un sintimentu kaloroso. No tin palabra pa deskribí e sintimentu aki. Mi tabata sa ku E ta eksistí anto ku E ta stima mi.”
Paso bo ta Su yu, E sa ken bo por bira. E sa ki ta bo miedunan i ki ta bo soñonan. E tin plaser den bo potensha. E ta warda bo bin den orashon serka Dje. Paso bo ta Su yu, no solamente bo mester di Dje, pero E tambe mester di bo. E hendenan sinta rondó di bo awor aki den en konferensha aki mester di bo. Mundu mester di bo i bo karakter divino ta pone ku bo por ta Su disipel konfiá pa sirbi tur Su yunan. E momentu ku nos kuminsá mira e divinidat den nos mes, nos por mira esaki tambe den otronan.
Nos ta sirbi pa motibu di nos karakter divino
Karakter divino ta pone ku nos tin e deseo di sirbi otronan.
Lastu aki, Sharon Eubank, dirèktùr di Servisio Humanitario i e Sentro di Karidat di Santu di Último Dianan, a konta di un eksperensia ku a wòrdu kompartí dor di Elder Glenn L. Pace. Tabata tin un sekura i skarsedat di kuminda mundial na Etiopia meimei di añanan diesnuebe ochenta. Pa duna sosiegu, un stashon di suministro di alimento konteniendo awa i alimento a wòrdu kreá pa esnan ku por a yega na nan. Un hòmber di edat ku tabata muriendo di hamber tabata kana un distansia basta largu pa por a yega na e stashon di suministro di kuminda. E tabata pasando un pueblo ora e a tende yoramentu di un baby. E a buska te ora ku e a haña e yu sinta riba suela banda di su mama ku tabata morto. E a kue e baby i a sigui kana 40 km pa e por a yega e stashon di suministro di alimento. Ora e a yega, su promé palabranan no tabata “Mi tin hamber” òf “Yudami”. Su promé palabranan tabata “Kiko por wòrdu hasi pa e baby aki?”11
E karakter divino den nos ta inflamá nos deseo pa yuda otronan i ta pone nos aktua. Tata Selestial i JesuCristu por yuda nos haña e forsa pa hasi esaki. Señor por ta puntrando nos, “Kiko por wòrdu hasí pa e yu muhé aki, e yu hòmber aki, e tata aki òf e amigu aki?”
Ta dor di e susuronan di Spiritu Santu, e karakter divino di un dudoso, despues di bringa pa haña airu, ta sinti e pas pa e hala rosea atrobe.
Ora e profeta papia, su palabranan ta resoná serka nos karakter divino anto esei ta duna nos forsa pa sigui su konsehonan.
Partisipando di e Santa Sena tur siman ta duna speransa den divinidat den nos i nos ta kòrda riba nos Salbador, JesuCristu.
Mi ta prometé ku ora bo buska pa diskubrí e profundidat di e karakter divino ku ta den bo, lo bo kuminsá sigui ekspandé e regalo presioso aki. Lag’é guiabo pa bira Su yu muhé, kanando den e hanchi pa yega bek serka Dje–kaminda nos lo wòrdu “restourá na e Dios ei ku a duna [nos] rosea.”12 Den nòmber di JesuCristu, amèn.