Mi ta Para Tur Asombrá
Pa Elder Ronald A. Rasband
Di e Quorum di e Diesdos Apòstelnan
Mi testimonio di JesuCristu a wòrdu fomentá for di hopi eksperensianan speshal den kua mi a yega di konosé Su amor grandi pa kada un di nos.
Mi rumannan stimá rònt mundu, mi ta hopi gradisidu na e Promé Presidensia pa invitá mi pa kompartí mi humilde testimonio e Djadumingu aki. E palabranan di un himno Santu di e Delaster Dianan favorito ta deskribí mi sentimentunan aktual:
Asombro me da el amor que me da Jesús.
Confuso estoy por Su gracia y por Su luz, …
Me cuesta entender que quisiera Jesús bajar
del trono divino para mi alma rescatar;
que Él extendiera perdón a tal pecador
y me redimiera y diera Su gran amor. …
Cuán asombroso es lo que dio por mí.1
Un par di dia pasá mi tabatin e gran privilegio pa topa ku e Promé Presidensia i risibí e yamamentu aki for di nos profeta stimá, Presidente Thomas S. Monson. Mi ke testifiká boso tur di e forsa i amor Presidente Monson tabata tin ora el a bisa mi, “E yamamentu aki ta bini for di Señor JesuCristu.”
Mi ta abrumá i sakudí ku henter mi kurpa pa konsiderá e importansia i nifikashon di e palabranan ei asina tierno papiá pa un profeta amoroso. Presidente Monson, Presidente Eyring, Presidente Uchtdorf, mi ta stimá boso i lo sirbí Señor i boso ku henter mi kurason, poder, mente, i forsa.
Oh, kuantu mi a stimá Presidente Boyd K. Packer i Eldernan L. Tom Perry i Richard G. Scott. Mi ta sinti nan falta hopi. Mi ta bendishoná di a wòrdu prepará i siñá na e pianan di e Rumannan stimá aki. Ni den e parti mas chikitu mi ta kapas pa kana den nan sapatu, tòg mi ta honrá pa para firme riba nan skoudernan i sigui den e ministerio di Señor.
Ora mi ta pensa riba esnan ku a yuda hasi mi ken mi ta, mi ta pensa promé riba mi dushi i generoso kompañera eterno, Melanie. Durante e añanan, el a yuda formá mi manera klei di alfarero na un disipel di pòlesh di JesuCristu. Su amor i sosten, i esun di nos 5 yunan, nan kasánan, i nos 24 nieto, ta sostené mi. Na mi stimá famia, mi ta stimá boso.
Manera Nefi di ántes, mi a nasé di mayornan hustu den e evangelio i nan di mayornan hustu [i sigui te] seis generashonnan atras. Mi promé antepasadonan ku a djòin e Iglesia tabata di Inglatera i Dinamarka. E pioneronan tempran aki a duna nan tur pa e evangelio di JesuCristu i laga un herensia pa nan posteridat pa sigui. Mi ta gradisidu pa un famia Santu di e Delaster Dianan di multi generashon. i mi sa esaki ta un digno meta pa nos tur lucha p’e.
Hopi otronan a kontribuí na e preparashon di mi bida pa e yamamentu aki. Nan ta inkluí mi amigunan di infansia i famia, lidernan foi kuminsamentu, maestronan, i mentornan di henter mi bida. Mi mester inkluí esnan for di mi mishon tempran na e estadonan di ost i nos mishoneronan stimá di e New York New York North Mishon. Pa e hopi hende ku a influensiá i formá mi bida, mi ta hopi gradisidu.
Mi a apresiá sirbí ku mi Rumannan di e Setenta. Pa 15 aña mi tabata den un di e Quorumnan mas magnífiko i hermandat mas amoroso di Iglesia. Danki, mi kerido rumannan ku a sirbí huntu ku mi. Awor mi ta wak padilanti pa ta parti di un Quorum nobo. Presidente Russell M. Nelson, mi amor ta grandi pa bo i kada miembro di e Quorum di e Diesdos Apòstelnan.
Hermana Rasband i ami a wòrdu bendishoná pa [por] bishitá miembronan durante hopi asignashonnan den kongregashonnan i mishonnan rònt mundu. Nos ta stima e Santunan di e Delaster Dianan tur kaminda! Boso fe a oumentá nos fe; boso testimonionan a agregá na nos testimonionan.
Awor, si mi por laga un mensahe chikitu ku boso awe, e lo ta esaki: Señor a bisa, “Stimá otro; manera ami a stimá boso.”2 Mi tin konfiansa ku no tin niun skohensia, piká, òf eror ku boso òf kualke persona por hasi ku lo kambia Su amor pa boso òf pa nan. Esei no ta nifiká ku E ta despensá òf ignorá kondukta pekaminoso—mi ta sigur ku E no ta hasi esei—pero e ta nifiká ku nos mester ekstendé man na nos próhimo den amor pa invitá, persuadí, sirbí, i reskatá. JesuCristu a wak pasá hende nan étnisidat, rango, i sirkunstansianan pa por a siña nan e profundo bèrdat aki.
Mi a wòrdu puntrá hopi biaha ki ora mi a risibí mi testimonio.
Mi no por kòrda [ku mi] no tabata kere den Tata Selestial i JesuCristu. Mi a stimá Nan desde ku mi a siña di Nan na e rudianan di mi angel mama, lesando kuentanan di skritura i evangelio. E kreensha tempran ei a krese awor den un konosementu i un testigu di un amoroso Tata Selestial, ku ta skuchá i kontestá nos orashonnan. Mi testimonio di JesuCristu a wòrdu fomentá for di hopi eksperensianan speshal kaminda mi a yega di konosé Su amor grandi pa kada un di nos.
Mi ta gradisidu pa e Ekspiashon di nos Salbador i ta deseá manera Alma pa grit’é ku un tròmpèt di Dios.3 Mi sa ku Jose Smith ta Dios su profeta di e Restourashon i ku e Buki di Mormon ta e palabra di Dios. I mi sa ku Presidente Thomas S. Monson ta Dios Su berdadero sirbidó i profeta na mundu awe.
Segun nos ta sigui nos profeta, mi ta resa ku nos por tin karidat den nos kurasonnan pa otronan i ku nos lo bira un testigu bibu i di bèrdat “pará tur asombrá na e amor Jesus ta ofresé [nos].” Oh, ku e por ta “maravioso, maravioso pa [boso i pa] ami.” Den e nòmber di JesuCristu, amèn.