“Ata‘ki! Mi ta un Dios di Milager”
Milagernan, signonan, i maravianan na abundansia entre e siguidónan di JesuCristu awendia, den boso bida i den dimi.
Mi kerido rumannan, esta un prvilegio pa para dilanti boso awe. Huntu ku esnan ku a papia den e konferensia aki, mi ta testifiká na boso ku JesuCristo ta bibu. E ta dirigí Su Iglesia ; E ta papia ku Su profeta Presidente Russell M. Nelson, i E ta stima tur Tata Selestial Su yunan.
Riba e Pasku di Resurekshon aki nos ta konmemorá e Resurekshon di JesuCristo, nos Salbador i Redentor,1 e Dios Poderoso, e Prinsipe di Pas.3 Su Ekspiashon, kulminando ku Su Resurekshon despues di tres dia den un graf fiá, ta para komo e milager di mas grandi den historia humano. “Pasó ata‘ki,” El a pronunsiá, “mi ta Dios; i mi ta un Dios di milager.”3
“Milager a stòp pasó Cristu a subi na Shelu, i a sinta na man drechi di Dios?”4 e profeta Mormon a puntra den e Buki di Mormon. Su kontesta, “No; tampoko angelnan a stòp di ministrá na e yunan di hende.”5
Despues di e krusifikshon, un angel di Señor a aparesé na Maria i ku algun otro hende muhé, a bai na e graf pa ungi e kurpa di Jesus. E angel a bisa:
“Di kon boso ta buska esun bibu entre esnan morto?”6
“E no ta aki nan: pasó El a resusitá.”7
E profeta di e Bùki di Mormon Abinadí a proklamá tokante e milager ei:
“Si Cristu no a resusitá for di morto, … lo no por tabatin resurekshon.
“Pero tin un resurekshon, p‘esei e graf no tin viktoria, i e piká di morto ta wòrdu konsumí den Cristu.”8
E echonan milagroso di JesuCristu a laga e promé disipulonan esklamá: “Ta ken esaki ta anto, ku E ta asta ordená e bientunan i e awa, i nan ta obedes‘É”9
Segun e promé Apòstelnan tabata sigui JesuCristu i skuch‘é siña e evangelio, nan tabata testigu di hopi milager. Nan a mira ku “e siegunan risibí nan bista, i esnan mankaron kana, e leprosonan [wòrdu] limpiá, e surdu tende, e morto wòrdu lantá, i e pobernan haña e evangelio prediká na nan.”10
Milagernan, signonan, i maravianan na abundansia entre e siguidónan di JesuCristu awendia, den boso bida i den dimi. Milagernan ta echonan divino, manifestashonnan, i ekspreshonnan di Dios Su poder sin limite i un afirmashon ku E ta “e mesun ayera, awe, i pa semper.”11 JesuCristu, ku a krea e lamannan, por kalma nan, E ku a duna bista na e siegu por lanta nos bista na shelu, E ku ta limpia e leproso por kura nos enfermedatnan; E ku a sana e hòmber impotente ta yama nos pa lanta ku “Bin, siguimi.”12
Hopi di boso tabata testigu di milagernan, mas ku boso ta realisá. Nan por ta parse chikitu kompará ku Jesus lantando e morto(nan). Pero no ta e magnitut ta determiná e milager, solamente ku e ta bin di Dios. Algun ta sugerí ku milagernan ta simplemente koinsidensia òf puru sueltu. Pero e profeta Nefi a kondená esnan ku lo “rebahá e poder i milagernan di Dios, i ta prediká di nan propio sabiduria i nan propio enseñansanan, pa nan por saka benefisio.”13
Milagernan ta sosodé dor di e poder divino di Esun ku ta “poderoso pa salba.”14 Milagernan ta ekstenshonnan di Dios Su plan eterno; milagernan ta un liña di bida di shelu pa tera.
E otoño ku a pasa Hermana Rasband i ami tabata na kaminda pa Goshen, Utah, pa un evenemento mundial Kara a Kara ku a wòrdu transmití pa mas ku 600.000 hende den 16 diferente idioma.15 E programa tabata enfoá riba e susesonan di e Restourashon di e Evangelio di JesuCristu ku preguntanan presentá pa adultos solteros di rònt mundu. Hermana Rasband i ami personalmente a revisá e preguntanan; nan a duna nos e oportunidat pa testifiká di José Smith komo profeta di Dios, e poder di revelashon den nos bidanan, e Restourashon kontinuo di e evangelio di JesuCristu, i e bèrdatnan i mandamentunan ku nos ta balorá. Hopi skuchando awe tabata parti di e evenemento milagroso ei.
Inisialmente e transmishon mester a originá den e Arboleda Sagrado den e estado di New York, kaminda manera José Smith a testifiká: “Mi a mira dos Personahe, kende Nan brio i gloria a desafiá tur deskripshon, parando riba mi den laira. Un di nan a papia ku mi, yamando mi na mi nòmber, mustrando na e otro—Esaki ta Mi Yu Stimá. Skucha E!“16 Esei, rumannan, tabata un milager.
E pandemia mundial a fòrsa nos pa realoká e transmishon pa Goshen, Utah, kaminda E Iglesia di JesuCristu di e Santunan di e Delaster Dianan a traha un kopia, pa por filmá, di un sekshon di antiguo Yerusalèm. Hermana Rasband i ami tabata den un par di kilometer di Goshen e djadumingu anochi ei ora nos a mira un huma diki ku tabata bin for di direkshon di di nos destinashon. Kandela grandi den hinter e area, i nos a preokupá ku e transmishon por tabata na peliger. I asina mes, binti pa seis, ora di nos tempu di transmishon, koriente a bai den e edifisio. No tin koriente! No tin transmishon. Tabatin un generator ku algun a pensa ku por tabata posibel pa yuda, pero no tabatin siguransa ku e lo por sostené e ekiponan sofestiká ku ei.
Nos tur den e programa, inkluyendo e naradónan, musikónan, i teknikónan, asta 20 adulto soltero di nos propio famia ampliá, tabata kompletamente enfoká den loke tin ku tuma lugá. Mi a hala un banda for di nan lagrimanan i konfushon i a roga na Señor pa un milager. “Tata Selestial,” mi a resa, “poko biaha mi a puntra pa un milager, pero mi ta puntrando pa un awor aki. E reunion aki mester sigui pa tur nos adultonan soltero rònt mundu. Nos mester pa koriente bin bèk si e ta Bo boluntat.”
Shete minut despues di seis, mes lihé ku e koriente a bai, el a bin bèk. Tur kos a kuminsá traha, di e músika i mikrofon pa e videonan i tur e ekiponan di transmishon. Nos tabata kla pa traha. Nos a eksperensiá un milager.
Manera Hermana Rasband i ami tabata den outo regresando kas mas despues di anochi, Presidente i Hermana Nelson a manda nos e siguiente a mensahe: Ron, nos ke pa boso sa ku manera nos a tende ku e koriente a bai, nos a resa pa un milager,”
Den skritura di e Delaster Dianan tin skirbí: Pasó Ami, e Señor, a ekstendé mi man pa ehersé e podernan di shelu; boso no por mira esaki awor aki, tòg un poko tempu mas i boso lo mir‘é, i sa ku Ami ta, i Ami lo bin i reina ku mi hendenan.”17
Esei ta présis loke a pasa Señor a ekstendé Su man i e koriente a bin.
Milagernan a sosodé dor di e poder di fe, manera Presidente Nelson a siña nos [di un forma] asina poderoso den e delaster seshon. E profeta Moroni a ekshortá e hendenan, “Si no tin fe entre e yunan di hòmber Dios no por hasi milager entre e nan, p‘esei, E no ta mustra Su mes te despues di nan fe.”
El a kontinuá:
“Ata‘ki, tabata e fe di Alma i Amulek ju a kousá e prison pa kai na tera.
“Ata‘ki , tabata e fe di Nefi i Lehi ku a trese e kambio den e Lamanitanan, ku nan a boutisá ku kandela i ku e Spiritu Santu.
“Ata‘ki, tabata e fe di Ammon i su rumannan ku a trese milagernan asina grandi entre e Lamanitanan.”
“I nunka den ningun tempu milager a wòrdu hasí si no te despues di nan fe, p‘esei promé nan mester kere den e Yu di Dios.”18
Mi por agregá na e sekuensia di skrituranan aki, “abata e fe di aktornan aduto soltero, profeshonalnan di transmishon, lidernan di Iglesia i miembronan, un Apòstel, i un profeta di Dios ku a buska e milager asina grandi ku e koriente a wòrdu restourá pa un esena di pelikula na Goshen, Utah.”
Milagernan por bin komo kontesta riba orashon. No semper nan ta loke nos a pidi òf loke nos ta spera, pero ora nos konfia den Señor, E lo ta einan, i E lo tin rason. E lo pas e milager na e ora ku nos mester di dje.
Señor a hasi milager pa rekòrda nos di Su poder. E ta stima nos, Su alkanse for di shelu pa nos eksperensha mortal, i Su deseo pa siña di loke ta mas importante. “Esun ku tin fe den Mi pa wòrdu saná,” El a bisa e Santunan den 1831, i e promesa ta sigui awe, “i no ta apuntá pa muri, lo wòrdu saná,”19 Tin leinan dekretá den shelu, i semper nos ta suheto na esakinan.
Tin baha nos ta spera riba un milager pa sana un ser kerí, pa bòltu un akto inhustu, òf pa suavisá e kurason di un alma amargá òf desilshoná. Mirando e kosnan dor di wowonan mortal, nos ke pa Señor intervení, pa drecha loke a kibra. Dor di fe, e milagernan lo bin, maske no nesesariamente segun nos tempu òf ku e resolushon ku nos ta deseá. Esaki ta nifiká ku nos ta ménos fiel òf ku nos no ta meresé Su intervenshon? No. Nos ta [wòrdu] stimá pa nos Señor. Ela duna Su bida pa nos, i Su Ekspiashon ta sigui aliviá nos di e karganan i piká ora nos arepentí i hala mas serka di Dje.
Señor a kòrda nos, “Boso kaminda no ta esun di Mi.”20 E a ofresesé, “Bini serka mi, tur ku ta kansá i kargá, i ami lo duna boso sosiegu.”21—sosiegu di preookupashon, desapunto, miedu, desobediensha, prekupashonpa sernan stimá, pa soñonan pèrdí öf kibrá. Pas entre konfushon òf tristesa ta un milager. Kòrda Señor Su palabranan: “Mi no a papia pas den bo mente konserniente e asunto? Ki testimonio mas grandi bo por tin ku esun di Dios?”22 E milager ta ku JesuCristu, e Gran Yehova, e Yu di Esun Altísimo, ta respondiendo ku pas.
Meskos ku El a aparesé na Maria den e hardin, yamand‘é na su nòmber, E ta yama nos pa ehersé nos fe. Maria tabata buska pa sirbi E i kuida E. Su Resurekshon no tabata loke el a spera, pero e tabata di akuerdo ku e gran plan di Felisidat.
“Baha for di e krus,”23 e multitut di no kreyente a grit‘É riba Kalvario. E por a hasi un milager asinei. Pero E tabata sa e fin for di prinsipio, i El a intentá na ta fiel na Su Tata Su plan. E ehèmpel no mester bai pèrdi na nos.
Pa nos den tempu di prueba El a bisa,“Ata‘ki e heridanan ku a drenta den mi banda, i tambe e markanan di e klabunan den mi man i pia; ta fiel, warda mi mandamentunan, i lo bo heredá e reino di shelu.”24 Esei, mi rumannan, ta e milager primintí na nos tur.
Riba e Pasku di Resurekshon aki, miéntras ku nos ta selebrá e milager di nos Señor Su Resurekshon, komo un Apòstel di JesuCristu, mi ta lroga humildemente ku boso por sinti e poder di e Redentor den boso bida, ku boso apelá na nos Tata Selestial lo wòrdu kontestá ku e amor i kompromiso ku JesuCristu a demostrá dor di Su ministerio. Mi ta roga pa boso por para firme i fiel den tur loke ta bin. I mi ta bendishoná boso ku e milagernan lo asistí boso manera nos a eksperiensiá den Goshen—si ta Señor Su boluntat. Wak den e bendishonnan di shelu den boso bida mientras bo ta “buska e Jesus di kua e profetanan i apòstelnan a skirbi, ku e grasia di Dios e Tata, i tambe Señor JesuCristu, i e Spiritu Santu, ku ta duna testimonio di nan, por ta den bo pa semper.”25 Den e nòmber di JesuCristu, amèn.