Nan No Por Prevalesé, Nos No Por Faya
Si nos edifiká nos fundeshi riba JesuCristu, nos no por kai!
Nos profeta stimá, President Russell M. Nelson, a bisa den nos delaster konferensia general: “Durante e temporada peligroso aki ku e apòstel Pablo a profetisá, satanas ya no ta ni purba di skonde su atake na e plan di Dios. Maldat enkurashá ta na abundansia. P‘esei, e úniko manera pa sobrebibí spiritualmente ta pa determiná pa laga Dios prevalesé den nos bida, pa siña skucha Su stèm, i usa nos energia pa yuda rekogé Israel.”1
Ora nos konsiderá e invitashon di Profeta pa siña skucha e stèm di Dios, nos kurasonnan ta determiná òf e ta bira duru? Laga nos kòrda e konseho duná denSantiagp 6:6: “Sí, awe, si bo ke skucha Su bos, no hasi boso kurasonnan kurasonnan duru, pues pakiko boso ke muri?” Laga nos ta determiná pa laga Dios prevalesé den nos bida.
Kon nos por laga Dios prevalesé den nos bida i no e atversario? Den Doctrina y Convenios 6:34 nos ta lesa, “No tene miedu, rebaño chikitu; hasi bon; laga tera i fièrnu kombiná kontra boso, pasó si boso ta edifiká riba mi baranka, nan no por prevalesé.” Ta un promesa signifikante. Ounke tera i fièrnu kombiná kontra di nos, nan no por prevalesé si nos skohe pa laga Dios prevalesé dor di edifiká nos bida riba Su baranka.
Papiando ku Su disípulonan, JesuCristu a siña di un hòmber sabio i un hòmber bobo, registrá den Mateo kapítulo 7 di e Téstamènt Nobo. Hopi di boso a skucha e kantika di primaria “E hòmber sabio i e hòmber bobo.”2 Si bo a tuma tempu pa kompará e kuater versonan den e kantika, bo ta mira ku versonan un ku dos ta masha similar ku e versonan tres i kuater. Tantu e hòmber sabio komo esun bobo tabata trahando un kas. Nan tabata ke proveé pa nan famia un hogar sigur i konfortabel. Nan tabata desea di biba felismente huntu pa semper komo famia, meskos ku ami ku abo. E situashon rondó di nan tabata meskos- “Áwaseru tabata bini abou i inundashon tabata subi.” Nos ta kant‘é seis biaha ora nos kanta e kantinka ei. E úniko diferensia ta ku e hòmber sabio a traha su kas riba e baranka i e kas a keda para, miéntras e hòmber bobo a traha su kas riba santu i e kas a laba bai. P‘esei, nos fundeshi ta hopi importante, i esaki tin un efekto desisivo riba e resultado di último i eternamente.
Mi ta spera i resa ku nos tur haña i keda riba e fundeshi sigur ora nos establesé nos bida futuro. Ta kòrda nos den Helaman 5:12: “I awo, mi yunan, kòrdá, kòrdá ku ta riba e baranka di nos Redentor, kende ta Cristu, e Yu di Dios, ku boso mester edifiká boso fundeshi; pa ora e diabel manda su bientunan poderoso dilanti—su flechanan den e warwarúnan—i ora tur su hagel i tormenta furioso bati riba nos, esaki lo no haña poder riba nos pa hala nos abou den e abismo di miseria i angustia sin fin, pa motibu di e baranka riba kua boso ta edifiká, kua ta un fundeshi sigur—un fundeshi riba kua si hende edifiká nan lo no faya.”
Esei ta e promesa di Dios. Si nos edifiká nos fundeshi riba JesuCristu, nos no por kai! Si nos perserverá fielmente te na final, Dios lo yuda nos establesé nos bida riba su baranka, i e portanan di fièrnu lo no prevalesé kontra nos. (Doctrina y Convenios 10:69). Porta nos no por kambia tur kos ku ta biniendo, pero nos por skohe kon prepará pa loke ta bini.
Algun di nos por pensa, “E Evangelio ta bon, awèl nos mester pone den nos bida, kisas un biaha pa siman.” Djis bai iglesia un biaha pa siman no ta sifisiente pa edifiká riba e baranka. Henter nos bida mester wordu yená ku e evangelio di JesuCristu. E evangelio no ta parti di nos bida, pero realmente ta nos bida ta parti di e evangelio di JesuCristu. Pens’e. Esei no ta bèrdat? Nos bida mortal ta solamente parti di henter e plan di salbashon i eksaltashon.
Dios ta nos Tata Selestial. E stima nos tur. E konosé nos potensial hopi mas mihó ku nos mes konosé nos mes. E sa no solamente e detayenan di nos bida. Dios sa e detayenan di e detayenan di e detayenan di nos bida.
Por fabor sigui nos profeta bibu Presidente Nelson su konseho. Manera ta registrá den Doctrina y Convenios 21:5-6:
“Pasó su palabranan dku boso risibí, ta manera si nan tabata di Señor Su boka mes, den tur pasenshi i fe.
“Paso si boso lo hasi e kosnan aki e portanan di fièrnu lo no prevalesé kontra boso; si i Señor Dios lo kita e podernan di skuridat for di bo dilanti, i laga shelunan sakudí pa boso bon i gloria na Su nòmber.”
Pa e rason ei, nan no por prevalesé i nos no por kai.
Mi ta testifiká na boso Ku Cristu lo bini bèk pa di dos biaha manera El a bin promé biaha, pero e biaha aki lo e ta ku gran gloria i mahestuoso. Mi ta spera i resa ku lo mi ta kla pa risib‘É, sea aki banda di e velo òf na e otro banda. Ora nos ta selebrá e temporada maravioso di Pasku aki, mi ta spera, dor di e ekspiashon di JesuCristu i e poder di Su resurekshon(wak Moroni 7:41, lo mi por bai ariba i reuní ku mi kreador i bis‘É “danki” Den e nòmber di JesuCristu, amèn.