Korda Bo Kaminda Bèk pa Kas
Nos tin e ehèmpèl perfekto di JesuCristu pa sigui, i e biahe pa nos hogar eterno lo ta posibèl solamente dor di Su enseñansanan, Su bida, i Su sakrifisio ekspiatorio.
Na 1946, e hóben investigadó Arthur Hasler tabata kanando banda di un roi di seru, serka di e kas di su infansia ora e tabata tin un eksperiensia kual a hib‘é na un deskubrimentu importante tokante kon e piskánan ta haña e kaminda bèk pa nan roi di nasementu.
Subiendo e seru, pero pafó di e bista di su kaida di awa faborita di su infansia, Hasler diripiente a wòrdu hibá bèk na un rekuerdo lubidá. El a bisa, “Ora un bientu fresku, ku e aroma di mòs i kayena, a bai rondó di e pilá ku baranka, e detayenan di e kaida di awa aki i su lokalidat na e kara di e seru repentinamente a bula den mi mente.”1
E holónan aki a rebibá su rekuerdonan di infansia i a kòrd‘é riba su hogar.
Si e holónan por a desenkadená e rekuerdonan eipa e, el a rasoná ku kisas e holónan por ta asina evokativo pa e salmounan ku, despues di añanan di ta den oseáno habrí, nan ta regresá na e roi esakto di nan nasementu pa pone webu.
Basando su mes riba e eksperensia aki, Hasler, huntu ku otro investigadornan, a demostrá ku e salmou ta kòrda e mesun aromanan ku lo yuda nan pa vegá miles di mia pa haña e kaminda pa bai kas bèk for di laman.
E relato aki a laga mi pensa ku un di e kosnan mas importante ku nos por hasi den e bida aki ta rekonosé i kòrda e kaminda pa bai bèk na nos Tata Selestial i perseverá fiel i ku goso durante e biahe.
Mi a pensa kuatèr rekordatorionan ku, ora nan wòrdu usá i apliká di un manera konstante den nos bida, por rebibá e sintimentunan di nos hogar selestial.
Promé, Nos Por Kòrda Ku Nos Ta Yunan di Dios.
Nos tin un herensia dibino. Sabiendo ku nos ta yunan di Dios i ku E kier pa nos regresá den Su presensia ta un di e promé pasonan den e biahe pa bai bèk na nos hogar selestial.
Kòrda bo mes e herensia aki. Tuma un tempu ku regularidat pa fortalesé bo sistema immune spiritual rekordando e bendishonnan ku bo a risibí di Señor. Konfía riba e guianan ku El a duna bo, na lugá di dirigí bo mes únikamente na e mundu pa midi bo balor personal i haña bo kaminda.
Resientemente mi a bishitá un ser kerí despues ku e tabata den hospital. El a konta mi ku emoshon ku miéntras ku e tabata drumí riba kama di e hospital, tur lokual ku e tabata deseá ta pa un hende kanta p‘e e kantika “Soy Un Hijo de Dios.” E pensamentu ei só, el a bisa, a dun‘é e pas ku e tabata tin mester den e ora di aflikshon ei.
Sabiendo ken bo ta ta kambia kiko bo ta pensa i kiko bo ta hasi.
Komprondiendo ken bo ta realmente ta prepará bo mihó pa rekonosé i kòrda bo kaminda pa bai bèk na bo hogar selestial i anhelá pa ta einan.
Di dos, Nos Por Kòrda e Fundeshi Ku Ta Protehá Nos
Fortalesa ta bin na nos ora nos permanesé huntu, leal i fiel na nos Tata Selestial i JesuCristu, asta ora otronan di un manera angustioso ta ignorá e mandamentunan i prinsipionan di salbashon.2
Den e Buki di Mormon, Helaman a siña su yunan hòmbèr pa kòrda ku nan mester edifiká nan fundeshi riba JesuCristu p‘asina nan lo tin e forsa pa soportá e tentashonnan di e atversario. E poderoso bientunan i tormentanan di Satanas ta bati nos, pero nan lo no tin poder pa lastra nos si nos ta pone nos konfiansa den e lugá mas sigur—den nos Redentor.3
Mi sa pa eksperiensia personal ku si nos skohé pa skucha Su stèm i siguiÉ, nos lo risibí Su yudansa. Nos lo risibí un perspektiva mas grandi di nos sirkunstansianan i un komprenshon mas profundo di e propósito di bida. Nos lo sinti e impulsonan spiritual ku lo guia nos na nos hogar selestial.
Di tres, Nos Por Kòrda pa Hasi Orashon
Nos ta biba den un tempu ku un simpel mishi so òf mandato di stèm, nos por kuminsá buska kontesta tokante kasi kualkier tema den e inmensidat di datonan almasená i organisá den un ret enorme i kompliká di kòmpiuternan.
Di otro banda, nos tin e simplesa di e invitashon pa kuminsá buska kontestanan fòr di shelu. “Resa semper, ilo Mi drama mi Spiritu riba boso.” Despues Señor ta primití, “I grandi lo ta bo bendishon; si, asta mas grandi ku si lo bo haña tesoronan di Tera.•4
Dios ta kompletamente konsiente di kada un di nos i dispuesto pa skucha nos orashonnan. Ora nos kòrda pa hasi orashon, nos ta haña Su amor ku ta sostené, i mas nos hasi orashon nan nos Tata Selestial den e nòmbèr di Cristu, mas nos lo trese e Salbador den nos bida i mas mihó nos lo rekonosé e kaminda ku El a marka pa nos hogar selestial.
Di kuatèr, Nos Por Kòrda pa Sirbí Otronan.
Ora nos ta lucha pa sigui JesuCristu sirbiendo i mustrando kariño pa otronan, nos ta hasi di e mundu un mihó lugá.
Nos akshonnan por bendishoná signifikátivamente e bida di esnan rondò di nos i tambe nos propio bida. Servisio amoroso ta agregá nifikashon na e bida di tur dos esun ku ta duna i esun ku ta risibí.
No sobre estimá e potensial ku bo tin pa influí otronan pa bon, tantu pa e servisio di bo akshonnan komo tambe pa e servisio di bo ehèmpèl.
E servisio amoroso na otronan ta guia nos na e kaminda di nos hogar selestial—e kaminda pa bira manera nos Salbador.
Na 1975, komo resultado di un guera sivíl, Arnaldo i Eugenia Teles Grilo i nan yunan mester a laga nan hogar atras i tur lokual ku nan a konstruí durante dékadanan di trabou duru. Ora nan a bai nèk nan pais natal di Portugal, e rumannan Teles Grilo a enfrentá e desafio di kuminsá di nobo. Pero añanan mas lat, despues di uni na E Iglesia di JesuCristu di e Santunan di e Delaster Dianan, nan a bisa, “Nos a pèrdè tur lokual ku nos tabata tin, pero tabata algu bon pasó esaki a obligá nos na konsiderá e importansia di e bendishonnan eterno”. 5
Nan a pèrdè nan hogar na tera, pero nan a haña e kaminda pa bai bèk na nan hogar selestial.
Kualke kos ku bo mester laga atras pa sigui e kaminda pa bo kas selestial, algun dia e lo parse ku no tabata ningun sakrifisio.
Nos tin e ehèmpèl perfekto di JesuCristu pa sigui, i e biahe pa nos hogar eterno lo ta posibèl solamente dor di Su enseñansanan, Su bida, i Su sakrifisio ekspiatorio—inkluyendo Su glorioso Resurekshon.
Mi ta invitá boso pa eksperimentá e goso di kòrda ku nos ta yunan di Dios i ku El a stima e mundu asina tantu ku El a manda Su Únigenito6 pa mustra nos e kaminda. Mi ta invitá boso pa kòrda di ta fiel, pa bira boso bida na e Salbador i konstruí boso fundeshi riba Dje. Kòrda di ta den orashon den bo biahe i sirbi otronan durante e kaminda.
Mi rumannan stimá, riba e dadumingu di Pasku [di Resurekshon]i aki, mi ta duna mi testimonio ku JesuCristu ta e Redentor i e Salbador di e mundu. E ta Esun kende por hiba nos na e mesa di un bida felis i guia nos den nos biahe. Laga nos kòrda i siguiÉ na kas. Den e nòmber di JesuCristu, amèn.