Dios Stima Su Yunan
Lo mi ke kompartí tres manera spesífiko ku nos Tata Selestial ta manifestá Su amor pa nos, Su yunan.
Rumannan, Mi ta regosihá ku boso den e evangelio di JesuCristu. Mi ta trese ku mi [e] amor di e miembronan fuerte na Filipina i ta bisa, na nan nòmber, Mabuhay!
Riba e mainta di Pasku [di Resurekshon] aki, mi ta testifiká di e Cristu bibu, ku El a lanta for di morto i ku Su amor pa nos i pa nos Tata den Shelu ta puru i eterno. Awe, mi ta deseá pa enfoká riba e amor di Tata den Shelu i JesuCristu pa tur, kual ta wòrdu manifestá dor di e Ekspiashon di JesuCristu. “Pasó Dios a stima mundu asina tantu, ku El a duna Su Yu Unigénito” (Juan 3:160.
Ora ku un angel a puntra e profeta Nefi tokante su konosementu di Dios, Nefi a respondé simpelmrnte, “IMi sa ku e stima Su yunan” (wak 1 Nefi 11:16–17).
Un versíkulo di e Buki di Mormon: Otro Tèstamènt di JesuCristu ta deskribí na un manera poderoso e amor perfekto di e Salbador: “I e mundu, pa motibu di su inikidat, lo huzg’É manera e no ta nada; … nan ta sut’É; … nan ta gòlpi’É; … nan ta skupiÉ, i E ta sufri, pa motibu di Su amoroso bondat i Su sufrimentu largu pa e yunan di hende” (1 Nefi 19:9). E Salbador Su amor universal ta e forsa ku ta motivá tur loke E ta hasi. Nos sa ku ta e mesun amor nos Tata den Shelu tin pa nos, pasó e Salbador humildemente a siña ku E ku e Tata “ta unu” (wak Juan 10:30; 17:20–23).
Kon nos por respondé i mustra nos gratitut pa Nan amor universal? E Salbador a siña nos ku e simpel invitashon aki ku ta enserá tur kos: “Si bo stima mi, warda mi mandamentunan” (Juan 14:15).
Presidente Dallin H. Oaks a siña, “Dios su amor universal i perfekto ta wòrdu mustrá den tur e bendishonnan di Su plan di evangelio, inkluyendo e echo ku Su bendishonnan mas selektá ta reservá pa esnan ku obedesé Su leinan.”1
Lo mi ke kompartí tres manera spesífiko ku nos Tata Selestial ta manifestá Su amor pa nos, Su yunan.
Promé, Relashonnan ku Dios i Famia ta Manifestá Su Amor.
Nos relashonnan di mas balioso ta ku e Tata i e Yu i ku nos propio famia, pasó nos lasonan ku nan ta eterno. E gran plan di felisidat ta un manifestashon maravioso di Dios Su amor pa nos. Ku wowonan fihá riba Dios Su plan, nos boluntariamente ta skohe pa koba saka tera i piedranan den nos ku ta sostené deseonan egoista i remplasá nan ku fundeshinan ku ta konstruí relashonnan eterno. Den sierto sentido, esaki por wòrdu yama “ekskavashon spiritual.” Den ehekushon di nos ekskavashon spiritual, nos mester buska Dios promé i yama E (wak Yeremias 29:12–13).
Busk’É i yam’É lo kuminsá e proseso i proveé espasio pa konstruí i fortalesé nos relashonnan eterno. E ta amplia nos bista spiritual i ta yuda nos enfoká riba kambia loke nos por kontrolá na lugá di [riba] e miedunan for di nos kòntròl. Studiando e bida i ministerio di nos Salbador, JesuCristu, lo pèrmití nos wak e otro preokupashonnan aki ku un perspektiva eterno.
Distraishonnan por stroba nos tin biaha pa eksperensiá Dios Su amor den nos relashonnan i aktividatnan familiar. Un mama, ku tabata sinti ku aparatonan tabata poderá di su relashonnan familiar, a bin ku un solushon. Na mesa di komedor i na otro momentunan familiar, e ta djis grita, “pone telefon un banda; laga nos tuma tempu pa wak otro den kara.” El a bisa ku esaki ta e norma nobo pa nan famia i ku e ta fortalesé nan relashon komo famia ora ku nan tin tempu pa wak otro di bèrdat den kara. Awor nan ta disfrutá diskushonnan di kalidat di Ven, síguueme huntu komo famia.
Di dos, E ta Manifestá Su Amor pa Su Yunan dor di Yama Profetanan.
Nos mundu aktual ta inundá den un “guera di palabra i tumulto di opinionnan” (Jose Smith—Historia 1:10). Pablo ta kordá nos ku “tin … asina tantu tipo di idioma (bos) den mundu” (1 Korintionan 14:10). Kua di tur e bosnan aki ta resaltá klaramente i signifikativo riba e guera aki? Ta e bos di Dios Su profetanan, videntenan i reveladónan.
Mi ta kòrda klaramente, ku despues di a hasi un operashon den 2018 i ora mi a bai traha bek, mi tabata den e garashi di parker na e ofisina prinsipal di Iglesia. Diripiente, mi a tende e bos di Presidente Russell M. Nelson yamando, “Taniela, Taniela.” Mi a kore bai serka dje, i el a puntra kon ta bayendo ku mi.
Mi a bisa, “Mi ta rekuperando hopi bon, Presidente Nelson.”
El a duna mi un konseho i un brasa. Di bèrdat mi a sinti e ministerio personal di un profeta na e “un [persona]”.
Presidente Nelson a biaha pa hopi nashon di mundu. Den mi mente, e no ta solamente ministrando na míles [di hende], pero e ta ministrando na míles di “iun [persona]”. Dor di hasi esei, e ta kompartí e amor ku Dios tin pa tur Su yunan.
Resientemente, e palabranan di Presidente Nelson tabata un fuente di fortalesa i inspirashon pa e hendenan na Filipinas. Meskos ku tur otro pais na mundu, durante 2020 Filipinas a wòrdu afektá seriamente dor di e pandemia COVID-19, tambe pa un erupshon volkániko, teremotonan, tífonnan fuerte, i inundashonnan devastadó.
Pero manera un pilar di lus briando dor di nubianan skur di miedu, soledat, i desesperashon e palabranan di e profeta a yega. Nan tabata inkluí e yamada pa ayuno i orashon mundial i konseho pa sigui bai dilanti apesar di e pandemia. El a invitá nos pa hasi nos kasnan santuario personal di fe. El a hasi un yamada na e Santunan di e Delaster Dianan rònt mundu pa respetá tur e yunan di Dios i pa laga Dios prevalesé den nos bida.2
Mes konmovedor tabata Presidente Nelson su video di testimonio resien tokante e poder di gratitut i su orashon final, ku a resoná den hinter Filipina.3 Na e provinsia di Leyte, e video a wòrdu pasá durante un evento interreligioso, i el a wòrdu menshoná tambe komo parti di un pastor su predikashi. E Filipeñonan, huntu ku hinter mundu, ta asina bendishoná di sinti Dios Su amor dor di epalabranan di Su profeta skohí.
Tres, Kastigu Por Ta un Manifestashon di Dios Su Amor pa Su Yunan.
Tin biaha Dios ta manifestá Su amor dor di kastigá nos. E ta un manera pa kòrda nos ku E ta stima nos i ku E sa ken nos ta. Su bendishonnan primintí di pas ta optenibel pa tur esnan ku ta kana e kaminda di kombenio ku balentia i ta dispuesto pa risibí korekshon.
Ora ku nos rekonosé e kastigu i ta dispuesto na risibié, e ta bira un operashon spiritual. Ken gusta operashon, den tur esei? Pero pa esnan ku mester di dje i ta dispuesto pa risibié, e por salba nan bida. Señor ta kastigá esun ku E ta stima. E skrituranan ta bisa nos (wak Hebreonan 12:5–11; Helaman 12:3; Doktrina i Kombenionan 1:27; 95:1). E kastigu ei, òf operashon spiritual, lo trese [e] kambio nesesario den nos bida. Rumannan, nos lo realisá ku e ta refiná i purifiká nos benanan interno.
José Smith, e profeta di e restourashon, a wòrdu kastigá. Despues ku José a pèrdè e 116 páginanan di e manuskrito di e Buki di Mormon, Señor a korigié i alabes mustra amor dor di bisa: “Bo no mester tabata tin mas miedu di hende ku di Dios. … Bo mester tabata fiel. … Ata’ki, abo ta José, bo a wòrdu skohe. … Kòrda, Dios ta miserikordioso; p’esei, arepentí” (Doktrina i Kombenionan 3:7–10).
Na 2016, sirbiendo un mishon na Little Rock, Arkansas, mi a puntra ruman Cava pa hiba un pakete pa mi ruman muhé mas grandi, kende tabata biba na un isla na Fiji. Su reakshon no tabata unu ku mi a antisipá. “Presidente Wakolo,” el a suspirá, “bo ruman a muri i a wòrdu dera 10 dia pasa.” Mi a sinti outo kompashon i asta un poko rabia pasó mi famia no a ni sikiera wòri pa laga mi sa.
E dia siguiente, miéntras mi kasa tabata dunando e misioneronan lès, e pensamentu aki a penetrá mi alma: “Taniela, tur e eksperenshanan aki ta pa bo mes bon i desaroyo. Bo a bin ta siña i kompartí bo testimonio tokante e Ekspiashon di JesuCristu; awor biba konforme esaki.” Mi a wòrdu kordá ku “felis ta e hòmber ku Dios koregí; p’esei [nos no mester] despresiá … e kastigu di e Todopoderoso” (Job 5:17). E tabata un operashon spiritual pa mi, i e resultado tabata inmediato.
Nèt ora mi tabata pensa riba e eksperensia, mi a wòrdu yama pa duna mi pensamentu final di e diskushon. Entre otro kosnan, mi a kompartí e lèsnan ku mi a kaba di siña: unu, mi a kaba di wòrdu kastigá dor di e Spiritu Santu, i mi a gust’é pasó mi tabata e úniko ku a skuch’é; dos, Dor di e Salbador Su sakrifisio i reskate, Lo mi no referí mas na mi retonan komo pruebanan i tribulashonnan pero komo mi eksperensianan di enseñansa; i tres, dor di Su bida perfekto i sin piká lo mi no referí mas na mi defektonan i falta di abilidatnan komo debilidatnan pero mas bien komo mi oportunidatnan pa desaroyá. E eksperensia aki a yuda mi sa ku Dios ta kastigá nos pasó E ta stima nos.
Mi ta konkluí. Nos Tata Eterno ku Su Yu, JesuCristu, a mustra nan amor dor di hasi posibel pa nos por haña relashonnan eterno ku Nan i nos miembronan di famia, dor di yama profetanan moderno pa siña i ministrá na nos, i dor di kastigá nos pa yuda nos siña i krese. “Danki na Dios pa e don inkomparabel di Su Yu divbino,,”4 nos Señor resusitá, asta e Cristu bibu. Den e nòmber di JesuCristu, amèn.