Obispunan—Wardadónan di Señor Su Rebaño

Pa Èlder Quentin L. Cook

Di e Quorum di e Diesdos Apòstelnan

E obispu tin un ròl ekstremadamente importante den sirbi komo un wardadó pa guia e generashon na JesuCristu.

Mi rumannan stimá di saserdosio, un di e refrannan di mas memorabel di un himno ku ta hopi gustá ta puntra, “E hubentut di Sion lo faya?”¹ Mi deklarashon di kurason i rotundo den kontesta na e pregunta aki ta “No!”

Pa ta sigur ku e kontesta aki ta bèrdat ainda, mi ta testifiká awe ku sostené e generashon nobo den tempu di desafionan i tentashonnan inusual ta un responsabilidat esensial duná dor di Tata Selestial na mayornan i obispadonan ² Laga mi ilustrá e importansia di un obispado ku un eksperensia personal.

Tempu mi tabata un diákono, mi famia a muda pa un kas nobo den un diferente bario. Mi tabata kuminsando skol sekundario, pues tambe mi a bai un skol nobo. Tabatin un grupo maravioso di hombres jóvenes den e quorum di diákononan. Mayoria di nan mayornan tabata miembronan aktivo. Mi mama tabata kompletamente aktivo; mi tata tabata eksepshonal den tur manera pero e no tabata un miembro aktivo.

E di dos konsehero den e obispado,³ Hermano Dean Eyre, tabata un lider deboto. Tempu mi tabata adaptando ainda na mi bario nobo, un aktividat di tata i yu hòmber a wòrdu anunsiá na Bear Lake—komo 40 mia (65 km) leu. Mi no a pensa ku lo mi asistí sin mi tata. Pero Hermano Eyre a duna un invitashon spesial pa mi bai ku n’e. El a papia masha bon i ku rèspèt di mi tata i a enfatisá e importansia di mi oportunidat pa ta huntu ku otro miembronan di e quorum di diákononan. Pues mi a disidí pa bai ku Hermano Eyre, i mi tabatin un eksperensia maravioso.

Hermano Eyre tabata un ehèmpel maravioso di amor manera Cristu den kumplimentu di e responsabilidat di obispado pa sostené mayornan den kuida i nutri e hubentut. El a duna mi un kuminsamentu ekselente den e bario nobo aki i tabata un mèntor pa mi.

Algun luna promé ku mi a sali pa un mishon na 1960, Hermano Eyre a fayesé di kanser na edat di 39 aña. El a laga atras un kasá i sinku yu, tur mas yòn ku 16 aña. Su yunan hòmber, Richard i Chris Eyre, a sigurá mi ku den ousensia di nan tata, e obispado lo sostené i kuida nan i nan rumannan mas yòn ku amor manera di Cristu, pa kual mi ta gradesido.

Mayornan semper lo tin responsabilidat prinsipal pa nan famia ⁴ Presidensia di quorumnan tambe ta duna sosten i guia esensial na miembronan di quorum dor di yuda nan den elevá nan debernan i poder di e Saserdosio Aaróniko pa ta sentral den nan bida.⁵

Awe mi propósito ta pa enfoká riba obispunan i nan konseheronan, ku apropiadamente por wòrdu yamá “wardadónan di Señor su rebaño” —ku énfasis di ta wardadónan di e generashon kresiente.⁶ Ta interesante ku e Apòstel Pedro a referí na JesuCristu komo “e Wardadó i Obispu di boso alma.”⁷

E obispu tin sinku responsabilidat prinsipal den presidí riba un bario:

E ta e sumo saserdote ku ta presidí den e bario.⁸
E ta presidente di e Saserdosio Aaróniko.⁹
E ta un hues komun.¹⁰
E ta koordiná e obra di salbashon i eksaltashon, inkluso kuido pa esnan den nesesidat.¹¹
I e ta supervisá registronan, finansa, i e uso di edifisio di reunion. ¹²

Den su ròl komo sumo saserdote ku ta presidí, e obispu ta e “lider spiritual” di e bario.¹³ E ta un “disípulo fiel di JesuCristu.”¹⁴

Ademas, “e obispu ta koordiná e obra di salbashon i eksaltashon den e bario.”¹⁵ E obispu mester asigná e responsabilidatnan diario pa kompartí evagelio, fortalesé miembronan nobo i ku a regresá, ministrashon, i obra di tèmpel i historia familiar na e quorum di eldernan i presidensianan di Sosiedat di Sokoro¹⁶. E obispu ta koordiná e obra aki den konseho di bario i konseho di bario pa hubentut.

E obispu tin un ròl ekstremadamente importante den sirbi komo un wardadó pa guia e generashon nobo, inkluso e adultonan soltero, na JesuCristu.¹⁷ Presidente Russell M. Nelson a enfatisá e ròl sumamente importante di e obispu i su konseheronan. El a siña ku nan “promé i responsabilidat prinsipal ta e kuido pa e hombres jóvenes i mujeres jóvenes di [nan] bario.”¹⁸ E obispado ta sostené mayornan den kuida i nutri yunan i hubentut den e bario. E obispu i presidente di Mujeres Jóvenes di bario ta konsulta huntu. Nan ta hasi esfuerso pa yuda e hubentut biba e normanan den For the Strength of Youth, kualifiká pa risibí ordenansanan, i hasi i warda kombenionan sagrado.

Bo por puntra, “Dikon e obispo ta mandá pa pasa asina tantu tempu ku e hubentut?” Señor a organisá Su Iglesia pa kumpli ku prioridatnan krusial. Konsekuentemente, e organisashon di Su Iglesia tin un struktura den kual e obispu tin un responsabilidat dòbel. E tin responsabilidat dotrinal pa e bario kompleto, pero e tin tambe responsabilidat doktrinal spesífiko pa e quorum di saserdotenan. ¹⁹

E hombres jóvenes ku ta presbítero i e mujeres jóvenes di e mesun edat ta na un etapa masha importante den nan bida i desaroyo. Durante un periodo di tempu kòrtiku, nan ta tuma desishonnan ku tin implikashonnan signifikante pa henter nan bida. Nan ta determiná sea ku nan ke kualifiká pa tèmpel, sirbi un mishon,²⁰ hasi esfuerso pa kasa den un tèmpel, i prepará pa nan trabou di nan bida. E desishonnan aki, un bia hasí, tin implikashonnan spiritual i práktiko profundo pa e sobrá di nan bida. Obispunan, por fabor sa ku boso pasa un tempu relativamente kòrtiku ku un presbítero hóben òf un muher hóben òf un adulto soltero pa yuda nan komprondé e poder disponibel na nan pa medio di e Ekspiashon di JesuCristu. Lo bo por proveé un vishon ku lo tin un influensia profundo riba henter nan bida.

Un di e mihó ehèmpelnan ku mi a mira di un obispu ku a yuda proveé e tipo di vishon aki pa su hubentut tabata Obispu Moa Mahe. El a wòrdu yamá pa ta e promé obispu di Bario tongano di San Francisco.²¹ E tabata un imigrante di Vava‘u, Tonga. Su bario tabata situá serka di aeropuerto di San Francisco, California, kaminda e tabata traha.²²

E bario tabatin un gran kantidat di hubentut, mayoria di famianan ku resientemente a imigrá pa Merka. Obispu Mahe no solamente a siña nan den palabra i ehèmpel kon di ta disípulonan rekto di JesuCristu, pero tambe el a yuda duna nan un vishon kiko nan por bira i a yuda prepará nan pa tèmpel, mishonnan, edukashon, i trabou. El a sirbi pa kasi ocho aña, i su soñonan i deseonan , pa e hubentut a bira realidat.

Kasi 90 porshento di e hombres jóvenes den quorum di e Saserdosio Aaróniko a sirbi mishon. 15 hombres i mujeres jovenes tabata e promé miembro di nan famia ku a bai universidat.²³ El a reuní ku e kabes di skol di e skol sekundario lokal (no di nos iglesia), i nan a forma un amistat i a kolaborá riba kon pa yuda kada persona yòn pa logra metanan balioso i vense problemanan. E kabes di skol a bisa mi ku Obispu Mahe a yud’é den traha huntu ku imigrantenan di tur religion ku tabata luchando. E hóbennan tabata sa ku e obispu tabata stima nan.

Ta tristu, ku Obispu Mahe a fayesé miéntras ainda e tabata sirbi komo obispu. Nunka lo mi lubidá su entiero emoshonal i inspiradó. Tabatin un multitut enorme. E koro tabata konsistí di mas di 35 miembronan yòn fiel ku a sirbi mishon òf ku tabata bayendo universidat i ku tabata hóben durante su servisio komo obispu. Un diskursante a ekspresá e sentimentu intenso di apresio pa e hubentut i adultonan yòn den su bario. El a duna homenahe na Obispu Mahe pa e vishon ku el a duna nan den prepará pa bida i servisio hustu. Pero mas importante, Obispu Mahe a yuda nan edifiká fé den Señor JesuCristu komo e fundeshi di nan bida.

Awor, obispunan, unda ku boso ta sirbi, den boso entrevistanan i otro interakshonnan, boso por proveé e tipo di vishon aki i edifiká fé den JesuCristu. Boso por ekstendé invitashonnan poderoso pa kambia komportashon, prepará nan pa bida, i inspirá nan pa keda riba e kaminda di kombenio.

Ademas, boso por yuda algun hóben ku ta den konflikto ku mayornan tokante kosnan ku ta relativamente sin importansia.²⁴ Den un tempu ora hende yòn ta parse di tin masha konflikto ku nan mayornan, e persona ku ta presidí riba nan quorum i na ken nan respondé pa kosnan eklesiástiko[di iglesia] ta tambe e persona na ken nan mayornan ta bai pa rekomendashon di tèmpel. Esaki ta pone e obispu den un posishon úniko pa konsehá e hóben i nan mayornan ora kontenshon a krea un divishon. Obispunan por yuda tur dos mira kosnan ku un perspektiva eterno i solushoná asuntunan di mas òf ménos importansia. Nos ta rekomendá pa obispunan no wòrdu asigná ku ministrashon na famianan pa asina nan por enfoká nan tempu i energia ministrando e hubentut i nan famia den tipo di kasonan aki ²⁵

Mi ta konosé un obispu ku tabata kapas pa solushoná kontenshon ekstremo entre un yu hòmber i su mayornan, tresiendo harmonia na e hogar i mehorá kompromiso na e evangelio. E obispu a yuda e mayornan komprondé ku hasi esfuerso pa por ta un disípulo di JesuCristu tabata mas importante ku eksaktamente kon i ki ora kumpli ku tareanan familiar.

Pa por pasa mas tempu ku e hubentut, unda ku nan ta, inkluso na eventonan na skol òf aktividatnan, obispunan a haña e konseho pa delegá reunionnan i apropiá i tempu di konseho ku adultonan. Miéntras obispunan por konsehá riba asuntunan serio i urgente, nos ta rekomendá pa delegá asesoramentu kontinuo ku asuntunan króniko i ménos urgente ku no ta impliká huisio tokante dignidat pa wòrdu asigná na un miembro di quorum di èldernan òf Sosiedat di Sokoro— usualmente presidensianan òf é hermanos i hermanas ministrante. E Spiritu lo guia e lidernan²⁷ pa selekshoná e miembronan korekto pa atendé ku e asesoramentu aki. Esnan ku risibí e asignashon delegá aki pa duna konseho tin derecho riba revelashon. Nan, klaro, mester mantené semper konfidensialidat estrikto.

Lidernan ku konsiderashon semper a hasi sakrifisio pa e generashon kresiente. Aki ta kaminda e miembronan di obispado ta pasa mayoria di nan tempu di servisio den Iglesia.

I awor mi ta deseá pa bisa algun kos direktamente na e hubentut i despues na nos obispunan.

Hopi di boso hende yòn presioso kisas no tin un komprondementu kla di ken boso ta i ken boso por bira. Pronto boso lo tin ku tuma e desishonnan di mas importante den boso bida. Por fabor konsultá ku boso dos mayornan i boso obispu tokante eskohonan importante ku ta boso dilanti. Pèrmití e obispu pa ta boso amigu i konsehero.

Nos ta konsiente ku boso tin pruebanan i tentashonnan ta bini na boso for di tur direkshon. Nos tur mester di arepentí diariamente, manera Presidente Nelson a siña nos. Por fabor papia ku boso obispu tokante kualke asuntu den kual un hues komun por yuda boso pa haña boso bida na òrdu huntu ku Señor den preparashon pa e gran obra ku E tin pa boso den último dispensashon aki.²⁷ Manera Presidente Nelson a invitá boso, por fabor kualifiká boso mes pa ta parti di Señor su batayon di hubentut!²⁸

Awor un palabra na boso kerido obispunan na nòmber di e liderazgo i miembresia di Iglesia. Nos ta ekspresá nos gratitut profundo na boso. Ku tur e adaptashonnan ku a wòrdu pidí na boso pa hasi den e añanan resiente, kerido obispunan, por fabor sa kuantu nos ta stima i apresiá boso. Boso kontribushon na e reino ta mas ayá di loke por deskribí. Iglesia tin 30,900 obispu i presidentenan di rama sirbiendo rònt mundu. ²⁹ Nos ta honra kada un di boso.

Algun palabra i e yamamentunan sagrado ku nan ta deskribí ta yená ku nifikashon kasi spiritual i transendente. E yamamentu di obisputa definitivamente den e nivel superior di tal palabranan. Pa sirbi Señor den e kapasidat aki ta remarkabel den asina tantu manera. E yamamentu, sostenementu, i apartá un obispu ta un eksperensia pa no lubidá nunka mas. Pa mi, e ta klasifiká ku un kantidat chikí di eventonan sublime den e skala amplio i profundidat di sentimentunan ku e ta yama. E ta pas konfortablemente den herarkia di eventonan manera matrimonio i paternidat ku no por wòrdu deskribí ku poko palabra. ³⁰

Obispunan, nos ta sostené boso! Obispunan, nos ta stima boso! Boso ta berdaderamente Señor su wardadónan di Su rebaño. E Salbador lo no bandoná boso den e yamamentunan sagrado aki. Di esaki mi ta testifiká, den e wikènt di Pasku aki, den e nòmber di JesuCristu, amèn.