“E Prinsipionan di Mi Evangeliol”
Un principio di evangelio ta un guía doktrinal pa ehersé un albedrío moral rekto.
Den e konferensia general di E Iglesia di JesuKCristu di e Santunan di Delaster Dianan na òktober 1849, Elder John Taylor di e Quorum di Diesdos Apòstelnan a wòrdu yamá pa habri e nashon di Fransia pa e prediká e evangelio di JesuCristu. Su servisio tabata inkluí editá e promeé kòrant ofisial di Iglesia den e pais ei. Elder Taylor a prepará i publiká un artikulo na 1815 komo kontesta ribaa e preguntanan frekuente ku el a wòrdu puntrá tokante di Iglesia. I kasi na final di e relato ei, Elder Taylor a relatá e siguiente episodio:
“Algun aña pasá, na Nauvoo, un kabayero segun mi a tende, un miembro di e Legislatura, a puntra José Smith kon tabata ku e por a goberná asina tantu hende, i preservá un orden di tal manera; remarkando na e mesun momentu ku tabata imposibel pa nan hasi esaki na otro lugánan. Sr. Smith a remarká ku tabata fásil pa hasi esaki. ‘Kon?’ e kabayero a respondé; ‘pa nos e ta masha difísil.’ Sr. Smith a respondé, ‘Mi ta siña nan prinsipionan korekto, i nan ta goberná nan mes.’”1
Ta mi orashon ku e Spiritu Santu lo instruí i edifiká nos miéntras mi ta enfatisá e ròl importante di prinsipionan den e evangelio restourá di JesuCristu.
Prinsipionan
Señor a revelá na e Profeta José Smith ku “e eldernan, presbiteronan i maestronan di e iglesia lo siña e prinsipionan di mi evangelio, kual ta den e Beibel i e Buki di Mormon, den kual tin e plenitut di e evangelio.”2 El a deklará ku e Santunan di Delaster Dianan mester “wòrdu instruí den teoria, prinsipio, den doktrina, den e lei di e evangelio, den tur kos ku ta pertenesé na e reino di Dios, ku ta importante pa bo komprondé.”3
Deklará di manera korto, un principio di evangelio ta un guía doktrinal pa ehersé un albedrío moral rekto. Prinsipionan derivá for di bèrdatnan di evangelio mas amplio i proveé direkshon i estandartenan miéntras nos ta sigui pa dilanti den e kaminda di kombenio.
Por ehèmpel, e promé tres Artikulonan di Fé ta identifiká aspektonan fundamental di e doktrina di e evangelio di JesuCristu restourá: e naturalesa di e Deidat den e promé artikulo di fé, e efektonan di e Kaida di Adam i Eva den e segundo artikulo di fé, i e bendishonnan hasí posibel pa medio di e Ekspiashon di JesuCristu den e terser artikulo di fé.4 I e di kuater artikulo di fé ta establesé e promé prinsipionan—e guianan di ehersé fe den JesuCristu i arepentí— e promé ordenansa di saserdosio ku ta permiti e Ekspiashon di JesuCristu di ta efikas den nos bida.5
E Palabra di Sabiduria ta un otro ehèmpel di un prinsipio komo un guia. Por fabor nota e versikulonan di introdukshon den sekshon 89 di e Dokctrina i Kombenionan.
“Duná komo un prinsipio ku promesa, adaptá na e kapasidat di e débil i e mas débil di tur e santunan, ku ta òf por wòrdu yamá santunan.
“Ata aki, di bèrdat, asina Señor ta bisa na nos: Komo konsekuensia di e maldatnan i diseñonan kual ta i lo eksistí den e kurasonnan di hòmbernan ku ta konspirá den e delaster dianan, mi a atvertí boso, i avisá boso, dor di duna boso e palabra di sabiduria pa medio di revelashon.”6
E instrukshon inspirá ku ta sigui e introdukshon ta proveé guianan duradero pa tantu bienestar físiko i spiritual i ta testifiká di bendishonnan kontingente spesífiko na nos lealtat na e prinsipio.
Siñando, komprondiendo, i bibando prinsipionan di evangelio ta fortalesé nos fé den e Salbador, profundisá nos devoshon na Dje, i invitá un multitut di bendishon i don spiritual den nos bida. Prinsipionan di rektitut tambe por yuda nos wak mas ayá di nos preferensianan personal i deseonan egoséntriko pa medio di proveé e perspektiva bunita di bèrdat eterno miéntras nos ta nabegá diferente sirkumstansia, desafio, desishonnan, i eksperiensianan di mortalidat.
Ehèmpelnan Kontemporanio di Siña Prinsipionan Korekto
E deklarashon di e Profeta José Smith tokante siña prinsipionan korekto ta kisas un di su enseñanan mas sitá. I nos ta haña ehèmpelnan poderoso di e patronchi inspirá di instrukshonnan den e pronunsiashon di Señor Su sierbonan outorisá awendia.
E Prinsipio di No-Distraishon
Presidente Dallin H. Oaks a papia den konferensia general na 1998 tokante e debernan di e poseédonan di Saserdosio Aaróniko relatá na prepará i atministrá e santa sena. E la deskribí e prinsipio di no-distrakshon i a indiká ku e poseédonan di e Saserdosio Aaróniko lo no ke nunka nada den su apariensia òf komportashon ku lo distraí kualke miembro di Iglesia for di su adorashon i renobashon di kombenio. Presidente Oaks tambe a enfatisá e prinsipionan relashoná di òrdu, limpiesa, reverensia i dignidat.
Interesante ta ku Presidente Oaks no a proveé na e hóbennan un lista largu di kosnan ku nan tin ku hasi of no hasi. Mas bien, el a splika e prinsipio ku e ekspektativa ku e hóbennan i nan mayornan i maestronan por i lo usa nan propio huisio i inspirashon pa sigui e guia.
El a splika: “Lo mi no sugerí reglanan detayá, ya ku e sirkumstansianan den e diferente barionan i ramanan den nos Iglesia mundial ta asina diferente ku un regla spesífiko ta parse rekerí serks unu por ta inapropiá den un otro. Mas bien, lo mi sugerí un prinsipio basá riba e doktrinanan. Si tur komprondé e prinsipio i aktua den harmonia ku n’e, lo tin tiki nesesidat pa reglanan. Si reglanan òf konsulta ta nesesario den kasonan individual, lidernan lokal por proveé esaki, konsistente ku e doktrinanan i prinsipionan relatá.”7
E Prinsipionan di e Sabat komo un Señal
Den e konferensia general di aprel 2015, Presidente Russell M. Nelson a siña nos ku “e Sabat ta un delisia.”8 E la splika kon e personalmente a bin na kompronde e prinsio básiko tokante honra e dia di Sabat:
“Kon nos ta santifiká e dia di Sabat? Den mi añanan mas yòn, mi a studia e obra di otronan ku a kompilá listanan di kos pa hasi i no hasi riba Sabat. Ta hopi despues mi a siña for di skrituranan ku mi komportashon i mi aktitut riba e Sabat tabata un señal entre ami i mi Tata Selestial. Ku e komprondementu ei, no tabata nesesario pa un lista di si ku no. Ora mi tabatin ku tuma un desishon sea ku un aktividat tabata apropiá of no pa e Sabat, mi tabata puntra mi mes, ‘Kua señal mi ke duna Dios?’ E pregunta aki a hasi mi desishonnan tokante e Sabat bon kla.”9
Presidente Nelson su pregunta simpel pero poderoso ta enfatisá e prinsipio ku ta korta dor di tur insertidumbre tokante kiko ta nifika i kiko nos tin ku hasi pa honra e Sabat. Su pregunta ta resumí un guia i norma ku por bendishoná nos tur den diferente sirkumstansia.
E Prinsipio di Ta Dispuesto na Laga Dios Prevalesé
Seis luna pasá den konferensia general, Presidente Nelson a deskribí su húbilo personal miéntras e tabata wòrdu guiá na un perspektiva nobo tokante e nifikashon di e palabra Israel. E la konta nos ku su alma tabata konmové ora el a siña ku e “mesun nòmber di Israel ta referi na un persona ku ta dispuesto na laga Dios prevalesé den su bida.”10 Presidente Nelson despues a identifiká un kantidat di implikashonnan importante ku ta deriva for di e perspektiva aki.
Su mensahe tokante ta dispuesto na laga Dios prevalesé ta un ehèmpel remarkabel di siña prinsipionan korekto pa nos por goberná nos mes. I manera el a hasi den su mensahe tokante hasi e Sabat un delisia, Presidente Nelson a hasi preguntanan basá riba prinsipio ku ta sirbi komo guia i norma pa kada un di nos.
“Bo ta dispuesto pa laga Dios prevalesé den bo bida? Bo ta dispuesto pa laga Dios ta e influensia di mas importante den bo bida.?”
El a kontinuá:
“Konsiderá kon tal disponibilidat por bendishoná bo. Si bo no ta kasá i ta buskando un kompañero eterno, bo deseo pa ta ‘di Israel’ lo yuda bo disidí ken pa sali ku ne i kon.
“Si bo ta kasá ku un kompañero ku a kibra su kombenionan, bo disponibilidat pa laga Dios triunfá den bo bida lo pèrmití bo kombenionan ku Dios keda intakto. E Salbador lo sana bo kurason kibrá. E shelunan lo habri ora bo ta buska pa sa kon pa sigui dilanti. Bo no mester dwalu rònt òf duda.
“Si bo tin preguntanan sinsero tokante e evangelio òf e Iglesia, ora bo skohe pa laga Dios triunfá den bo bida lo bo haña i komprondé bèrdatnan apsoluto, i eterno ku lo guia bo bida i lo yuda bo keda firme riba e kaminda di kombenio.
“Ora bo ta enfrentá tentashon—asta si e tentashon ta bini ora bo ta kabá òf ta sinti so òf komprondé robes—imaginá e kurashi ku bo por reuní ora bo skohe pa laga Dios triunfá den bo bida i segun bo ta roga na Dje pa duna bo forsa.
“Ora bo deseo di mas grandi ta pa laga Dios triunfá, pa ta parti di Israel, asina tantu desishon lo bira mas fásil. Asina tantu problema ta stòp di ta problema! Bo sa mihó kon pa komplasé bo mes. Bo sa kiko pa wak i lesa, unda pa pasa bo tempu, i ku ken pa asosiá ku ne. Bo sa kiko bo ke logra. Bo konosé e tipo di persona ku bo ke bira realmente.”11
Nota kuantu desishonnan krusial i eksperiensianan di bida por wòrdu influensiá dor di e prinsipio di ta dispuesto na laga Dios prevalesé: frei i kasa, preguntanan i inkietut di evangelio, tentashon, kuido personal, kiko ta wak i lesa, unda pa pasa tempu, ku ken pa asosiá i hopi mas kos. Presidente Nelson su pregunta inspirá ta enfatisá un prinsipio simpel ku ta proveé direkshon den kada aspekto di nos bida i ta permití nos pa goberná nos mes.
Un Timón Hopi Chikitu
Ora José Smith tabata enkarselá den Prisòn di Liberty, el a skibi kartanan di instrukshon pa miembronan i lidernan di Iglesia pa rekordá nan ku “un barku hopi grandi ta benefisia hopi dor di un timón hopi chikitu den tempu di un tormenta, dor di manten‘é den e posishon di e bientu i olanan.”12
Un “timón” ta un wil òf bara horizontal i e ekipo asosiá pa maneha un barku òf boto. I “ta posishoná su mes den e direkshon di e bientu i olanan”ta nifika bira e barku di tal manera pa e mantené e balansa i nos boltu durante e tormenta.
Prinsipionan di evangelio ta pa ami i abo loke e timón ta pa un barku. Prinsipionan korekto ta laga nos haña nos kaminda i para firme, fuerte i sin move p’asina nos no pèrdè nos balansa i kai den e tormentanan di skuridat i konfushon.
Nos a wòrdu bendishoná abundantemente den e konferensia general aki pa siña tokante prinsipionan eterno for di Señor su siervonan outorisá. Awor, nos responsabilidatnan individual ta pa goberná nos mes di akuerdo ku e bèrdatnan di kua nan a testifiká.13
Testimonio
Presidente Ezra Taft Benson a siña nos, “Pa e siguiente seis lunanan, bo edishon di konferensia di e [Liahona] mester para banda di e skrituranan kanóniko i mester wòrdu referí na dje frekuentemente.”14
Ku tur e energia di mi alma, mi ta invitá boso pa siña, biba, i stima e prinsipionan di rektitut. Solamente bèrdatnan di e evangelio por permití nos pa “hasi tur kos ku ta den nos poder ku alegria” pa sigui pa dilanti den e kaminda di konvenio i pa “mira e salbashon di Dios, i pa Su brasanan wòrdu revelá.”15
Mi sa ku e doktrina di prinsipionan di evangelio di JesuCristu ta e úniko fuente di direkshon pa nos bida i di goso duradero den mortalidat i eternidat. I ku testimonio gososo ku nos Salbador bibiente ta e fuente for di kual tur e bèrdatnan aki ta flui. Asina mi ta testifiká den e nòmber sagrado di Señor JesuCristu, amèn.