Diyin God bił Ałha’diit’aah bee Hadziil, Haa’áhályą́, dóó Hool’áágóó Iiná Ayóó’át’éí bee bich’i’ Hasht’e’ádadiilnééh
Diyin bił ałha’diit’aah ádeil’į́įgo dóó dadíníílzingo, dóó díí iiná biyi’ t’ah biláhádi iłhózhǫ́ bee nihik’ihojídlį́į doo dóó hool’áágóó iiná ayóó’ánoolnin doo.
Shik’is, ayóó baa hózhǫ́ adahwiisáádéé’ ałk’is danidlį́įgo ałhííkai! Sáanii danidlį́įgo Diyin God bił ałha’diit’aah ádeil’į́įgo dóó dadíníílzingo, nihe’oodlą’ bee ahaadajiniiba’ éí bee dííshjį́į́di ach’į’ ndahwii’ná bee danihidziil dóó Jesus Christ Nináádoodááłgo bich’į’ hasht’e’ádadiilnééh. Dóó éí ałha’diit’aah dadíníílzingo éí binahjį’ Yisdá’íiníiłii bich’į’ bił ndahiikááh.
Tó bee dabidoolzį́į́hígíí Diyin yił ałha’da’deest’ą́ éí áda’iilaa yę́ędą́ą́’ doo-yaa-deiyoonééhda Jesus Christ bizhi’ ak’ídeidiit’ą́, áłahjį’ Yéédaalniih doo, Bibee haz’áanii yik’ehdahółį́į doo, dóó Yíká anídaalwo’go ahodoolzhish. Díí ádeil’į́įgo, NihiZhe’é Yá’ąąshdę́ę́’ nihaa néídidoo’ááł ni’iilzíhígíí dóó Diyin Iisiz’íinii nihił hólǫ́ǫ dooleełgo nihich’į’ ayííł’a’. Díí ak’ihojídlí bee atiingóó dahdidiidááł, yéigo náás yiidááł dóó nihidziilgo nihiłahodoolzhish, ákót’áo Diyin God dóó BiYe’ yá’ąąshdi bił kééhoniit’į́į dooleeł. T’áá háíshį́į́ tó bee dabi’doolzį́į́hígíí bá bik’eh ádahoolyaa éí baa dahidiist’ą́ ’ ayóó át’éego Diyin deidósingo yił ałha’dadeest’ą́ yę́ędą́ą́.
Diyin God bighan góne’ t’áh alááh bidziilgo yił ałha’dadeest’ą́go ádeihadadoodzíí’go bá bik’eh ádahoolyaa da’oodlą́ągo. T’áá aníí ádadii’níigo Diyin God bibeehaz’áanii bik’eh dahonilį́į doogo bee hadasiidzíí’, Jesus Christ bina’nitin bik’eh dahinii’náa doo, nihits’íís dadiiníílzin dooleeł, dóó Diyin Bóhólníihii nihee oołkił baadadidíít’aał dóó bá áda’iil’į́į dooleeł. Bidiníná, díí iiná biyi’ Diyin God nihik’ihojídlį́į yee hadoodzíí’ dóó baa hoolzhiizhgo Bił yah anídiidááł.1 Ákót’áo hoolzhishgo, nihéélya doodaii’ beenihi’diszį́į́’, t’áá aníínii dóó ni’iilzííh nihił t’áá ííshjání dooleeł adziilii bee, dóó yá’át’ééhjí dóó bąąhígi’ át’éii, éí hahóó’á ałnį́į́ dóó nichxǫǫii’ yaańdahidilghááshgo nihaa’ áłahnilí. Dooládó’ bidziilgo ’na’ilyáada!
T’óó áłtsé Diyin bighangóó díyáago hasht’e’ádíshnééhgo, shimá dóó Relief Society sáanii éé’ choideesh’įįłígíí bit’ah désh’į́į́’go shíká’ííjéé’, ts’ídá nizhónígo bee hadideeshníłígíí ałdó’. Akondi hasht’ehodi’nééh t’áá íiyisíí bóhólnį́hígíí éé’ bíí’adoodaał t’áh bítséédi. She’oodlą́ daats’í bíighahgo bee nashidííkid, Diyin God bił ałha’dit’aah shibishop yee nashineezt’ą́ą́’. Hazhó’í yee nashineezt’ą́’ígíí biniinaa hazhó’í baa ntséskeesgo dóó Diyin bił ałha’diit’aah ádeeshłííłgo bich’į’ hasht’e’ádiishyaa.
Beeníłką́ą́go, baa ahééh nisingo dóó shił hodeezyééIgo atah í’iishłaa. Diyin God bił ałha’dinisht’ánígíí doo t’áá át’é bik’idiit’ą́ą́ da ndi, Diyin God bił ałha’dinisht’ánígíí éí shił baahózin dóó bik’eh áhooshłaago ak’ihojídlí bee shá bik’eh ahoolyaaígíí t’įįhdígo bik’idiit’ą́. Dóó áłtsé í’iishłaa yę́ędą́ą́’, t’áá ahą́ą́h Diyin God bił ałha’dinisht’ánée díínísingo éí Yisdá’iinííłii be’adziil bénéílnih, éí nihich’į ndahwii’náago bee danihidziil, éí ch’į́į́dii nihaanídóot’įįłígíí bits’ą́ą́’ yee nihaa áhályą́, dóó hooláágóó iiná yich’į’ hasht’ehnihilééh.
Nihe’iiná bee é’ííl’ínígíí t’óó baa dlohasin dóó ajéí-neigizjį’, t’óó baa’ih dóó ayóí ánoolninjį’. T’áá ałtso ííl’ínígíí binahjį’ Diyin NihiZhe’é bee ayóí ó’ó’ní’ní’ bik’idiit’įįh dóó nihe’iina łahgo ádadiilnííłgo bííníghah Yisdá’íiníiłii bee ajooba’ bee. Diyin bił ałha’diitaah bik’eh dahoniil’įįgo Yisdá’íiníiłii be’adziil yee niłt’ólí ánánihiil’įįh nihi iiná bits’ą́ą́dóó ídahwiił’aahgo—azhą́ doo hazhó’í ak’i’diit’ííhda doodaii’ t’áá íiyisíí ádąąhdahwiit’aah ndi. Náá’iisnii’ii éí hadahgóyaa’í iitłishgo nihichą́ą́h nidilniih éí Bich’į ninéídááhgo.
Łahíísh tsé kooh bidáá’dóó nikédinibiní ch’ídaaz’áó sínízįįh łeh dóó t’ą́ą́’jigo yaa hwiiz’ą́ bidáá’dóó sínízįįh łeh? Tsé bąąh nidaji’na’go, azhą́ t’áá íiyisíí tł’óół dits’idii bee ho’dóót’ą’ ndi dóó bee yisdá’jidoogáłígíí hólǫ́ǫ ndi, tsé kooh bidáá’dóó jizį́įgo hajéí-háádínílwo’ łeh. Tsé kooh bidáá’dóó hadazhdil’is dóó niłch’ih bii’ dahnijilch’ąąłgo tł’óół dits’idígíí éí ts’ídá bidziilgo bidiiti’ígíí ba’jólíi doo. Háíshį́į́ tł’óół yoot’a’ígíí ba’jólį́į doo hó éí yaa joolch’ął doo. Dóó azhą́ tł’óół hodadiiti’ígíí bee ni’nikizhdidoolch’ął, t’áá íiyisíí háká’análwo’ígíí ba’jólį́į doo háálá éí doo t’óó hodidoochił da.
Ayóó bénáshniih ch’íkę́ę́h bił tsé bąąh nda’ajina’go bił nitseskai. Shi áłtsé adaashch’ąąl. T’ą́ą́jigo yiishááłgo tsé bikáá’dóó hadááyá, t’óó hadahdítłizh. T’ááshǫǫ, tł’óół yisdǫh dóó tsxiłgo-adahyishtłishyę́ę dahníshítłizh. Niléígóyaa tsé dahdeeshzhah ałníígi’ dahnaashch’ąął, dóó háíshį́į́ doodaii’ ha’át’éeshį́į́ adayishgohgo nishiníłtłahígíí bá sodeeszin áko doo tsé bikáá’jį’ nideesgoh da.
Hodíína’go, shił bééhoozin bił tsé béésh bił ada’asgizígíí doo nitłdzil da lá, dóó tsé bidáá’dóó hadááyáago, háíshį́į́ tł’óół bee dahnaashch’ąąłgo yótahígíí tséde’ abííłgo’ dóó tsé dáá’jį’ bideezdzį́į́z. Haashį́į́ yít’áo, tsé yikát’ah adooltáál. Áájį’ yee yíłdził, hajoobá’ígo, tł’óół yąąh doolnihgo, ni’ shiníł’chą́ą́l. Azhą́ doo hwiish’į́į da ndi, ts’ídá t’áá át’é bidziil yee yisdáshííłch’ąąlgo éí baa ákonisin. Tsé naa’á biyaadi ła’ shik’is hasht’e’ádóólzin lá, tł’óółígíí shaadiidéélgo shił didoodiłgo. Hadah yishgohgo, bee dahshiistł’ónígíí yiisiłgo ni’ shiníł ch’ą́ą́l.
Jesus Christ nihitł’óól nihidiiti’ígíí yót’ą’ dóó ts’ídá t’áá ákǫ́ǫ́ át’éego nihił naalnish, Be’adziil t’áá bííghahígíí bada’ííníídlí dóó baa hoolzhiizhgo Binahjį’ yisdádiidááł. President M. Russell Ballard na’neezt’ą́ą́’yą́ągi’ át’áo: “Diyin God dóó biYe’ yinidlą́ągo, Diyin Bóhólníihii Jesus Christ, éí éí … tł’óół nihidiiti’ígíí yót’ą’ éí nihe’iina’ bee niłdzil doo yá’áshóonii dóó atí’ál’į́ baa nda’aldeehgo. … Nihe’oodlą́ … éí Jesus Christ t’áá íiyisíí bídéíti’, be’iina’ dóó bits’íís yee nihá niná’ídláhígíí, dóó bisodizin nihá ninéínídlá.”2
Éí ii’sizį́ diyinii bee niildzil áko tsé ach’į’nahwii’ná bikáájį’ doo atídadii’nííł da háálá Jesus Christ deiniidlą́ dóó bił ałhada’deit’ą́. Éí nihíká análwo’go, yisdánihidoołtééł. T’áá hoolzhizhgo nihíká’análwo’, Yisdá’iinííłii doo t’áá nihíne’ Bidááhjį’ nidiitłish da. Azhą́ nihaa nidahóókaad dóó yínííł bii’ yiikah ndi, t’áá k’ad nihíká’adoolwoł dóó nihá ha’ólníi doo. Bi’adziil yee nihíká’analwo’ atidahoonííłdéé’ bee háádahiikááh nihinaadéé’ nda’iisíhígíí biniinaa. Ákóndi, tł’óół nihidiit’i’ígíí hazhó’í ádąąh nidadiidlééł dóó daashzhazhígo yéigo beda’astł’ǫ́ǫ dooleeł. Yisdá’iinííłii t’áá bí tł’óół nihá yót’ą’ dooleełgo bíídííkił, Bił ałhada’diit’ánígíí binahjį’ dzill bee biłnį́įdlí.3
Haish yit’áó nihótą’ígíí niłdzilgo ádadiilnííł? Nihijéí bee hojooba’ ádii’níígo sodidiilzįįł, Diyin Bizaad baa ntsííkees dóó bóhodiil’ááł, ádaańda’iikąąhgo dóó dahodíníílzingo bááh dóó tó choideidiil’įįł, bee haz’áanii yéigo bik’eh dahoniil’įį doo, dóó Diyin yá yáłti’ii bina’nitin bikéé’ ádeit’į́į doo. Áádóó t’áá ákwííjį́ bineilnishígíí “t’áá hódahgo dóó dadílzinígo”4 ádaat’áo ádeil’į́į doo, Yisdá’iinííłii hózhǫ́ bééhodiilzįįł dóó, t’áá ákohgo, nahdéé’ biká’anídeilwo’go bił Bich’į’ ndahiikááh doo.
Éí “t’ah hodahgo dóó diłzingo” ha’át’ííshą’ nahálin? Diyin God bina’nitin k’ehgo ahił íínah ádeel’í’ t’áá ́ałtsojį́ éí nabínítaah. T’áá íiyisíí biká’anídeijah bich’į’ anídahazti’ígíí, éí yee ayóí’ó’óni’ yaa ádahooniizįįh. Diyin bisodizin bee nidaniitin t’áá háíshį́į́ hazyéél dóó adziilii deinízinígíí dóó “ch’ééh haideinitáhígíí.”5 Ííná bidáádiníbał t’áá ałch’ishdę́ę́ hool’áágóó bik’éé yił kénáádahat’į́į́ dooleełgo bá bindeelnish. Dóó Diyin Bóhólníihii yił ałhada’deest’ánígíí, President Russell M. Nelson ádííniidyę́ęgi’ át’áo, “T’áá ła’í nízinígo diyin bighan biyi’ áda’iil’ínígíí éé’ dadílzinígíí bii’ nisiit’į́ éí diyin bidziilii át’é, [éí] … yéénihiiłnííh … t’áá ákwííjį́ diyin bił ałha’diit’aah atiingóó t’áá hódahgo dóó t’áá yéigo diyingo bikáá’ yiidááł.”6 Díí ádeil’ínígíí doo éí łaahída náánihidiiłnááh da ndi ts’ídá t’áá ákwííjį’ bee nihił hózhǫ́—dóó hool’áágóó íł hózhǫ́ át’é.
Ts’ídá t’áá ha’átį́į da éí doo alááh bóhólnííh da hool’áágóó iináánii biká íít’į́įgo éí Diyin God bił áłhada’diit’ánígíí t’éiyá. Diyin bighan góne’ bił ałhada’diit’ánígíí bidziilgo, ayóí’ádeiyíníínii nihits’ą́ą́’ anídahaaskai’ígíí bił náádahinii’náa doogo nihił béédahózin. Éí ha’áłchíní doodaii’ hashchíínii doodaii’ hach’ooní hats’ą́ą́ dahnídiidzahígíí laanaa nízin bijéí yee Diyin bił ałha’diit’ánígíí bee t’ááłá’í niidlį́. Diyin God bił ałha’diit’ánígíí doo jidísingo doodaii’ doo hoł nilį́įgo, éí hool’áágóó bił t’ááłá’í ídlinę́ę́ t’óó baahasti’ ázhdoolííł. K’ad adaaná’iidííkąął, hasht’e’ninádíídááł, dóó bináádíníítaał.
T’óó kónígháníjį’ bąąhagi át’éi jiniizį́į́’go iłhózhónii bii’ ha’ooch’idgi’ ádoonííł hool’áágóó ił hózhóonii ak’ihojidlį́ bidiníná dooleeł. Nihinááhai’ígíí doo bóhólnííhda, díí t’áá áníinii át’é: hool’áágóó holhózhǫ́ dooleełgo Jesus Christ bina’nitin bik’eh jinaadoo dóó bił ałhada’diit’áa jidósindooleeł éí t’áá íiyisíí bóhólnííh. Nihi Diyin yá yáłti’í, President Nelson, yee yiizį́’ “t’áá íiyisíí bee ééhózin dóó hool’áágóó bee nihił hózhǫ́ dooleełígíí éí Jesus Christ bina’nitin ninályáhígíí beesh ni’á yiiníítą’ doo, t’áá át’é bił ałha’diit’ánígíí dóó bee ó’ool’įįł bóltą’go. Ákódeit’ǫ́ǫ́, t’áadoo át’éhígóó tó náádadiidááh bikáá’góó da’ííniil’eeł háálá Diyin God bibe’adziil nihá hólǫ́.”7
T’óó áhonii’yóí tó náádiidááh bii’ yiikah. Ach’į’nahwii’ná ndanihiiłhan dóó łahda nihinék’éshto’ nídaalááhgo doo hoot’į́į da łeh ach’į’nahwii’ná bii’, háájigo shį́į́ nihe’iina’ tsin naa’eeł deiyínííl’eeł. Tó bąąhjį’ ndiikahgo nihidziil doo bídáághah da. Béénílniih háí nilį́—Diyin God be’awéé’ ayóí’áyóó’níinii—ha’át’íísh biniyé nahasdzáán bikáá’ honílǫ́, dóó ni bíká’ánít’ínígíí Diyin God bił honílǫ́ǫ doo dóó ayóí’ádeiníiní’nígíí hazho’í ííní’į́įgo ná ádeidoolííł dóó yínááłgóó nił ííshjání ádeił’į́į doo. Nahałtin bił níyolgo biyi’, adiltł’i’go bits’ádi’nídíín éí bee hoot’į́ yinááłgóó. Jesus adiinííid, “Shí adinídíín nishłí chahałheeł biyi’déé’ shits’ádi’nídíín.”8 Bee adínídíín bich’į’ díníít’į́įgo bee hasih dóó Diyin bił ałha’diit’ą́ t’ah da’ílį́įgo dadílzin.
Baa ahééh nisin sáanii ał’ąąh át’éego béédaahaigo bił áłhéédahósísįįd ał’ąąh át’éego kéédahat’į́įgo bił nahaz’ą́ éí Diyin bił ałha’dit’aah deidósin. T’áá ákwííjį’, Diyin Bóhólníihii yich’į’ dadééz’į́į́’ dóó Bá yáłti’í nabidínóot’įįł biká, béésh biyi’déé’ baa daha’niihgo ndaalkidígíí éí doo da. Azhą́ bich’į’ ndahwii’náádóó nahasdzáán bikáá’góó doo yá’áshǫǫgóó ntsáhákees ndabini’aah Diyin bił ałha’ditaah bits’ą́ąjį’, ákondi Diyin bił ałha’dit’aah k’eh atiingóó bidziilgo deiyíkááh. Bizhe’é bich’į’ yee hadoodzi’ę́ę yéédaalniih “[éí] t’áá át’é bee hólónígíí.”9 Dóó díkwíí shį́į́ nihee daahai’ígíí, t’áá la’í nisozį́ sáanii haishį́į́ Diyin God bił ałha’dooht’ą́ bíínóhahígíí Diyin Bóhólníihii bee adinídíín dah yóht’į́į́ł dóó ła’ Bich’į ndahooh’éésh.10 Diyin bił ałha’diit’aah bik’eh honooł’į́įgo, Diyin be’adziilii yee nihik’ihojídlį́į doo dóó nihidziilgo ánihidoolííł áko t’áá háíshį́į́ bił ééhodoozįįłgo bididííł’nááł. President Nelson ádííniidyę́ęgi’ át’áo, nihi éí sáanii náásgóó ádahodoonííł baa hada’iisdzi’ę́ę bidahodoołííł!11
Shik’is ayóí’ánihííníshníinii, ts’ídá alááhdi éí, Diyin bił ałha’diit’aah atiingóó deiyínóhkááh Jesus Christ bich’į’! Nahasdzáán bik’áájį’ adahisiikai Diyin bighan hadaas’á bitahjį’ éí bee nihik’ihojídlí. Diyin bighan góne’ Diyin bił ałha’diit’aah ádeil’į́ dóó bik’eh dahoniil’į́ éí t’áá haishį́į́ Sodizinjí yá hodísingo atah nilínígíí bá. Ániid ndaahkaiígíí, asooyehgo doodaii’ na’nitiní dasoolį́įgo áko índá Diyin bił ałha’dideesht’ááł t’áadoo danohsiní. Hasht’e’ádílnééh t’ah ch’ikę́ę́h nílį́įgo Diyin bighan góne’ bił ałha’diit’aah naa áhályą́ą doo dóó bee nidziil doo t’áá tseebíí ts’áadah nihinááhaigo bííníníghah nininzį́įgo dóó Diyin bighan góne’ ałha’diit’aah dólzin bííníghah nínízingo.12 T’áá íídą́ą́’ Diyin bighandéé’ ak’ihojídlį́ naadiit’ą́, nda’niaahii doodaii’ nda’agizii hool’áágóó t’áá aníínii ádaat’éíi bits’ą́ą́jį’ adanó’ááh lágo. Baa íínílta’ dóó bídahólnííhígíí nabídíłkid t’áá yéigo bik’idi’díít’įįł biniyé Diyin bił ałha’diit’aah dólzin iinilaaígíí baa hasti’. T’áá ahąąh Diyin bighangóó ałnááńdááh dóó Diyin Ii’sizíinii yísíníłts’ą́ą́. Yá’át’ééhgo Diyin Bóhólníihii be’atiingóó nizhónígo yínááłgo nił bééhózin doo. Bee ha’ólnih bee nidziilgo t’áá ánít’ínígíí ánít’į́į dooleeł dóó háída bił dííkah.
Shi’oodlą́ t’áá aníigo shił baahózin Diyin Nihizhe’é bił ałhadiit’aah dóó Yisdá’iinííłii be’adziil nihá hólónígíí ’ bee bik’eh honiil’į́į doo, neiyíníídlį́į́yę́ę bilááhdi ił hózhóonii hózhǫ́ bee nihik’ijídlį́į doo díí iiná biyi’ dóó ayóó át’éego hool’áágóó iiná baa hodoolzhish.13 Jesus Christ bízhi’ binahjį’, amen.