Erosom
Hom mma yɛmboa na yɛnhwɛ dɛ mbrɛ hɛn Agyenkwa bɛyɛ, tsitsir ara ma hɔn a ɔnam ɔdɔ na som dwumadzi do wɔayɛ hɛn adom ma yɛsom hɔn.
Nuambanyin na nkyerɛbaa adɔfo, anyɛnkofo, mema hom akwaaba dze ba wiadze mfɛndzanan ehyiadzi yi ase!
Ɔbɛsɛ a ɔabasen wiadze mfɛndzanan ehyiadzi ekyir no, emi na Akyerɛbaa Gong nantsew nantsew Ehyiadzi Asoɛe hɔ kyiakyiae na yetsie hom asɛmpa suahu horow.
Hɛn asɔrmba fi Mexico see dɛ, “Hoy es el tiempo de Mexico.’’ (Mber asõ dɛ Mexico yɛ prɔmprɔm)
Yesũae dɛ Gilly na Mary yɛ anyɛnkofo a wofi England. Mber a Mary bɛkaa Asɔr no ho no, bea a nna ɔtse no fii ne nsa. Ayamuyie mu ara Gilly too nsa frɛ Mary dɛ ɔnye no mbɛtsena. Gilly, dze gyedzi kɛse kãa dɛ, “menngyee kyim da dɛ Ewuradze ka moho.’’ Ehyiadzi ber no, Gilly so nye akyerɛbaa asɛmpasomafo a ɔmaa no nkyerɛkyerɛ mfe 47 a abasen kɔ no nyaa enyigye nkabɔmu.
Nna ɔyɛ mber a odzi kan a Jeff na ne yer, Melissa, rokɔ wiadze mfɛndzanan ehyiadzi. Nna Jeff awea wɔ baseball agordzi ho (nna ɔno na ɔkyekye) na sesei ɔyɛ physician anesthesiologist. Ɔkãe kyerɛɛ me dɛ, “Ɔyɛ me ahobow dɛ mereyɛ ndzɛmba a ohia a ɔbɛma woenuma me osiandɛ metse nkã dɛ ɔno nye nokwar na kwan papa a wɔdze bɔ bra.’’
Ahyɛse no, nna Melissa apa Jeff no ɔsom nuabanyin kyɛw dɛ, “Jeff mmpɛ asɛmpasomafo wɔ hɛn fie.’’ Ɔsom nuabanyin no kãa dɛ, “Mebenya kwan fofor.’’ Sesei ɔno na Jeff yɛ anyɛnkofo mapã. Jeff n’enuma ase no, mihyiaa Nda a odzi ekyir Ahotseweefo mboanofo bi a Jeff, Melissa na hɔn babaa, Charlotte, pɛ hɔn asɛm.
Dɛ yɛyɛ Jesus Christ akadofo yi, yɛhwehwɛ som nkaafo dɛ mbrɛ Ɔno bɛyɛ osiandɛ abrabɔ rotweɔn asesa.
Mber a Peggy kãa kyerɛɛ me dɛ no kun, John, hɔn mfe 31 awar ekyir no, worubonuma no no, mibisaa dza ɔasesa.
Peggy kãa dɛ, “Nna emi na John rosuã Ahyɛmu fofor Bra Bɛka Mo do, na John bisaa fa asɔr no ne nkyerɛkyerɛ ho.’’
Peggy kãa dɛ, “Ma yɛntõ nsa mfrɛ asɛmpasomafo no.”
John kãa dɛ, “Asɛmpasomafo no nnkɛba—gyedɛ me nyɛnko no botum aba.’’ Bɔbor mfe 10, John ne som nuabanyin no abɛyɛ ne nyɛnko nokwarfo. (Modwendwen ho dɛ, Na sɛ John no som nuabanyin gyae dɛ ɔreba wɔ afe kor, ebien, anaa akron ekyir a?)
John tsiei. Ɔpraa n’akoma mu kenkaan Mormon Nwoma no. Mber a asɛmpasomafo no serɛ John dɛ wonuma no no, ɔkãa dɛ nyew. Peggy kãa dɛ, “Ahobow kɛsenara kãa me na mehyɛɛ ase dɛ murusu.’’
John kãa dɛ, “Me sesae ber a motwee bɛn Ewuradze yie.’’ Ekyir no, wɔsɔɔw Peggy na John ano wɔ temple krɔnkrɔn mu. Mumu a abasen no, nna John wui a oedzi mfe 92. Peggy se dɛ, “Nna John yɛ nyimpa papa aber nyina, mbom ɔbɛyɛɛ soronko wɔ kwan fɛɛfɛw bi mu ber wonumaa no ekyir no.’’
Emi na Akyerɛbaa Gong nam video do wɔ COVID wiadze nsan yarba ber do hyiaa Meb na Jenny. (Yɛnam video do wɔ COVID ber mu no hyiaa awarfo na ankorankor anwanwafo, a mpaabɔ mu ara hɔn stake presidentfo daa kor biara edzi kyerɛɛ hɛn.)
Meb na Jenny kãa no ahobrɛadze mu dɛ ɔhaw a ɔwɔ hɔn abrabɔ mu no maa wɔdwendwen ho sɛ hɔn temple awar no botum egyina a, na sɛ ɔbɛyɛ so a, obesi dɛn bɛyɛ. Wɔgyee dzii dɛ Jesus Christ no Werdambɔ na hɔn ahyɛmu enyimpisi botum aboa hɔn.
M’enyigye yɛɛ kɛse mber a Meb na Jenny nyaa temple nkɔree nkrataa na wɔbɔmu sanee kɔɔr Ewuradze ne fie. Ekyir no nnkyɛ Meb ruwu. Ebɛn nhyira na ɔyɛ dɛ Meb na Jenny nye Ewuradze na hɔnho asan ahyɛmu nkitahodzi ananmu, na wɔtse hɔn a wɔwɔ hɔn ho hɔn ɔsom ɔdɔ nkã.
Beebiara mokɔ no, enyisɔ mu ara musũa fi hɔn a wɔsom na wɔyɛ dɛ mbrɛ hɛn Agyenkwa bɛyɛ no.
Peru hɔ no, emi na akyerɛbaa Gong hyiaa Salvador na no nuanom.1 Salvador na no nuanom yɛ ngyanka. Nna ɔyɛ Salvador n’awoda. Asɔr baanodzifo na asɔrmba a nokwar mu ara wɔsom ebusua yi kenyan me. “Nyamesom a ho tsew na ho nnyi fĩ … nye dɛ, ebɔhwɛ ngyanka nye ekunafo,”2 “boa hɔn a wɔyɛ mberɛw no, ma nsa a ɔsen sɛn famu no do, … nkotodwe a wɔagow no mu nyɛ dzen.’’3
Hong Kong hɔ no, elderfo quorum president bi ɔdwe mu ara kyɛɛ mbrɛ hɔn quorum sii wɔwdo yɛɛ 100 nkyɛmu ɔha ɔsom ho kokoamu mpɛnsampɛnsamu. Ɔkãa dɛ, “Mpaabɔ mu ara yɛhyehyɛ adamfofa ama obiara etum ahwɛ obi na ɔahwɛ ɔno so.’’ “Daa daa yebisa hɔn a wɔsom hɔn no hɔnho asɛm fi anyɛnkofo kor biara hɔ. Yɛnnsensan ndakaba mu, yɛsom asomfo no a wɔhwɛ hɛn nkorɔfo no.’’
Kinshasa, Democratic Republic of the Congo hɔ no, President Bokolo kyɛɛ mbrɛ ɔno na n’ebusua sii bɛkaa Asɔr no ho wɔ France. Da kor bi, ber a nna ɔrekenkan ne patriarch nhyirasɛm no, Sunsum no kenyaan Nuabanyin Bokolo dɛ ɔnye n’ebusua nnsan nkɔ DR Congo. Nna Nuabanyin Bokolo nyim dɛ sɛ wɔsan kɔ a wobehyia nsɔhwɛ pii. Na hɔn Asɔr, Jesus Christ n’Asɔr a ɔwɔ hɔ ma Nda a Odzi Ekyir Ahotseweefo, no nnyae mbaa Kinshasa.
Naaso, wɔ gyedzi mu, dɛ mbrɛ nkaafo pii ayɛ no, Bokolofo no dzii Ewuradze no Sunsum ekyir. Kinshasa hɔ no, wɔsoom na wohyiraa hɔn a wɔwɔ hɔnho no, wodzii nsɔhwɛ do konyim, na wonyaa sunsum mu na honandua mu nhyira. Ndɛ, wodzi ehurusi dɛ woenya Ewuradze ne fie wɔ hɔn man mu.4
Ankorankor fasusu na ɔsoom nsakyereenyi. Ber a nna ɔyɛ aberantsɛba no, ɔkãa dɛ ɔsɛɛ ne mber nyina kwa wɔ mpoano. Ɔkãa dɛ, da kor bi, “Muhun basiaba fɛɛfɛw bi a ɔhyɛ eguar atar a nna ɔnnyɛ basabasa.’’ Ahobow mu no, ɔkɔree kebisa siantsir a basiaba fɛɛfɛw a ɔtse dɛ ɔno bɛhyɛ eguar atar a ɔnnyɛ basabasa dɛm. Nna ɔyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no asɔrba na ɔdze anoyerɛw bisaa dɛ, “Ebɛpɛ dɛ ebɛba asɔr Kwesida a.’’ Ɔsee dɛ, nyew.
Mfe pii a ɔabasen no, mber a nna yɛbɔmu ridzi dwuma no, Elder L. Tom Perry kyɛɛ mbrɛ nna ɔno na ne nyɛnko sii soom akyerɛbaa bi a nna ɔno nko tse wɔ Boston sɔn basabasa bi mu dabaa ho asɛm. Mber a Elder Perry na ne nyɛnko dur hɔ no, akyerɛbaa no ahwɛyie mu ara kyerɛɛ dɛ, “Hom mfa hom temple nkɔree nkrataa no ndua abow n’ase.’’ Ohun temple nkɔree nkrataa no pɛ na oyiyii nkrɔkrɔw na obue abow no.5 Nokwar, merennkã dɛ ɔsom anyɛnkofo hia temple nkɔree nkrataa. Mbom mepɛ dɛm nsusui no dɛ, dɛ hɔn a wodzi hɔn ahyɛmu nyi som no, efiefie buebue na akoma bue.
Elder Perry sanee so maa afotu a ɔyɛ edwuma. Ɔkãa dɛ, “Ma anyɛnkofo dwumadzi dodow a oye, a mpaabɔ mu ara ɔasan mu eyiyi, mbeambea a ɔbobɔ ho a oye ama akwantu mber ho ayɛ mfaso yie.’’ Otuu fo dɛ, “Enye hɔn a wohia nserɛ dodow nhyɛ ase. Kɔdo nye hɔn a annyɛ a hɔn enyi bɛgye na ɔagye nserɛ no do yie ntoatoado.” Ɔdze wiei dɛ, “Nokwar nwɔwdo dze anwanwadze ba.”
Ɔsom a ɔkrɔn na ɔyɛ krɔnkrɔn6 ba sɛ yɛbɔ mpaa hwehwɛ “Christ no dɔ mapã’’7 na yedzi Sunsum n’ekyir a. Ɔsan so ba sɛ elderfo quorum na Relief Society presidencyfo, wɔ bishop n’akwankyerɛ ase no, wɔhwɛ som mbɔdzembɔ do, a wɔrema som anyɛnkofo dwumadzi ka ho. Yɛserɛ hom mma hɛn young men na young women kwan a wohia dɛ wɔbɛka nuambanyin na nkyerɛbaa a wɔawea som ho ma wɔnye hɔn akɔ na wɔatsetse hɔn so. Na yɛserɛ hom mma hɛn ebusuasantsen kumabaa a wɔaba do no nkenyan nuambanyin na nkyerɛbaa anyɛnkofo a wɔsom.
Asɔr ne mbeambea bi no, som aka ekyir. Beberee kã dɛ yɛrosom sen wɔkã dɛ wɔrosom hɔn. Yɛmmpɛ dɛ nkorɔfo hɔnho behia hɛn osiandɛ wɔdze hɔn ama hɛn dɛ yɛnsera hɔn. Mbom ɔtaa dɛ yehia dza ɔkyɛn nokwar nkyia wɔ asado anaa “mubotum aboa wo a?’’ ara wɔ ahɛn gyinabea hɔ. Mbeambea pii no, yebotum aboa, yɛatse binom ase ma hɔn gyinabew tse biara no, na yɛakyekyer nkitahodzi sɛ yɛtaa sera asɔrmba wɔ hɔn efiefie a. Nkenyan ɔfrɛ sesa abrabɔ. Sɛ ɔfrɛ boa hɛn ma yɛyɛ na yesie ahyɛmudzi horow krɔnkrɔn a, yɛtwe bɛn Ewuradze na hɛn ho yie.
Wɔkã dɛ hɔn a wɔtse som ho nokwar sunsum ase no yɛ ma ɔbor nkaano dze no do, ber a hɔn a wɔnntse ase no nnyɛ beberee. Hom mma yɛnyɛ ma ɔmbor do, dɛ mbrɛ hɛn Agyenkwa bɛyɛ. Dɛ mbrɛ hɛn asɔr ndwom se no, ɔyɛ “asɛdze na ɔdɔ ho nhyira.’’8
Ward abaguafo, elderfo quorum na Relief Societyfo, yɛserɛ hom ntsie Guanhwɛfo Pa no na wɔmboa No ma “ɔnhwehwɛ dza ɔyewee no, … dza wɔpaam no no asan aba, … [ɔn]kyekyer dza wobubui no, … na [ɔn]hyɛ dza ɔyaree no dzen.”9 Yebotum agye “abɔfo a yennhu hɔn’’10 ber a yenya kwan wɔ N’ahɔhodan mu ma obiara.11
Nkenyan som hyira ebusua ebusua na ankorankor; ɔsan so hyɛ ward na nkorbata dzen. Dwendwen wo ward anaa wo nkorbata ho dɛ ɔyɛ sunsum mu bea a dza ɔwɔ hɔ biara bɔmu yɛ edwuma. Mormon Nwoma mu ngodua ntõtõhosɛm ho adwendwen no, wenyin ture no Wura na no nkowaa no dze eduaba a ɔsom bo bae na wɔhyɛɛ dua kor biara dzen ber a wɔkyekyeer ndua no nyina hɔn ahoɔdzen na mberɛwyɛ bɔɔ mu.12 Wenyin ture no Wura na no nkowaa no sii do bisaa dɛ, “Ebɛnadze bio na nkyɛ mubotum ayɛ?’’13 Wɔbɔmu no, wɔnam nkenyan, nwɔwdo som do hyira hyira akoma na efiefie, ward na nkorbata horow.14
Erosom—erohwɛ do—ma hɛn wenyin ture yɛ “honandua kor”15—kwaa krɔnkrɔn. Dua kor biara a ɔwɔ hɛn kwaa mu no yɛ ebusua tseasefo dua. Ndwow na nkorbata ka bɔmu. Erosom hyira ebusuasantsen. Sɛ wohia som a, bishopfo enyansafo, elderfo na Relief Society presidencyfo bisa dɛ, “Woananom nye som nuambanyin na nkyerɛbaa no?’’ Ward abaguafo na som mu mpɛnsampɛnsamu mmbisa nsɔhwɛ anaa ɔhaw ho nsɛm nko na wɔsan so dze enyiwa hwɛ hu na wodzi ehurusi wɔ Ewuradze n’adɔyɛ mbɔbɔrhu pii wɔ hɛn abrabɔ mu ber a yɛsom dɛ mbrɛ Ɔno bɛyɛ.
Hɛn Agyenkwa nye hɛn fasusu a ɔfata.16 Osiandɛ Ɔyɛ yamuyiefo no ntsi, Obotum ekyin ayɛ yie.17 Ohyira baako no na 99 no. Ɔno nye som a okitsa nyimpa bɔbea. Yɛbɛyɛ tse dɛ Jesus Christ yie ber a yɛyɛ “ma … nketseaba yi no’’ dɛ mbrɛ yɛbɛyɛ ama Ɔno,18 sɛ yɛdɔ hɛn nyɛnko dɛ hɛnankasa hɛnho,19 sɛ “yɛdɔ hɛnho nkorkor; dɛ mbrɛ [ɔ]dɔɔ hɛn,”20 na sɛ “nyia ɔbɛyɛ kɛse wɔ hom mu no, ɔbɛyɛ hom somfo.’’21
Jesus Christ som. Sor abɔfo som.22 Jesus Christ n’akadofo “som hɔnho nkorkor,’’23 “hom nye hɔn a wodzi dɛw dzi dɛw, na hɔn a wosũ sũ,’’24 “wɔhwɛ hɔn do [na] … ndzɛmba a ɔfa tseneneeyɛ ho nko na wɔdze nyɛn [nkorɔfo no],’’25 “wɔkaa … ehiafo na abɔbɔfo, ayarfo nye hɔn a wɔretseetsee,”26 wɔbɛtse Ne dzin nka wɔ hɛn somdwuma nyina mu.27 Sɛ yɛsom dɛ mbrɛ Ɔbɛyɛ a, yehu N’awanwadze, Ne nhyira.28 Yenya “somdwuma a oye kyɛn biribiara.”29
Yebotum abrɛ wɔ honandua mu. Naaso wɔ No som mu no “yɛmmberɛ wɔ papayɛ ho.’’30 Yɛdze enyimia yɛ dza oye koraa, yenntu mbirika ntsɛntsɛm nnsen mbrɛ hɛn ahom botum,31 mbom nya awerɛhyɛmu, dɛ mbrɛ Ɔsomafo Paul kyerɛkyerɛ dɛ, “Nyankopɔn dɔ nyia a ɔtsew n’enyim ma.”32 Osiandɛ Nyankopɔn a “[ɔ]dze aba ma duafo, na ɔma paanoo dɛ edziban no, ɔbɛma hom aba a hom dua no adɔɔ sõ.”33 Yɛrekã no bio a, Nyankopɔn bɛma “hom tsenenee eduaba adɔr.”34 Nyia “odua no bafuu no obu no bafuu.”35
Beebiara a yɛwɔ wɔ Easter ber mu no, hom mma yɛmboa na yɛnhwɛ dɛ mbrɛ hɛn Agyenkwa bɛyɛ, tsitsir ara ma hɔn a ɔnam ɔdɔ na som dwumadzi do wɔayɛ hɛn adom ma yɛsom hɔn. Yɛreyɛ dɛm no, hom mma yɛntwe mbɛn Jesus Christ na hɛnho nkorkor yie, a yɛrebɛyɛ tse dɛ Ɔno yie na Jesus Christ n’akadofo a Ɔpɛ dɛ yɛbɛyɛ. Jesus Christ ne dzin krɔnkrɔn no mu, amen.