Nkɔnhyɛnyi Tseasefo ma Nda a Odzi Ekyir no

Elder Allen D. Haynie ne Kasaa

Ɔkã Eduosuon no ho

Egya a ɔwɔ Sor asan mu eyi kwan a wɔfa do da nokwar edzi kyerɛ Ne mba a odua nkɔnhyɛnyi do.

Ber a meyɛ aberantsɛba no, nna modɔ Memenda osiandɛ nna adze biara a meyɛ no dɛm da no tse dɛ enyigyedzi akwantu. Naaso dza mebɛyɛ biara no, midzi kan yɛ dza ohia kɛse koraa—morohwɛ cartoon wɔ tɛlɛbihyɛn do. Memenda anapa bi dɛm no, ber a nna migyina tɛlɛbihyɛn no ho rohwehwɛ channel ahorow mu no, muhun dɛ cartoon a m’enyi da kwan dɛ wobeyi no wɔdze Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne wiadze mfɛndzanan ehyiadzi dawurbɔ ahyɛ ananmu. Ber a morohwɛ tɛlɛbihyɛn no na mowerɛ ahow dɛ woennyi cartoon no, muhun papa bi a ne tsinhwi fitaa a ɔhyɛ atar abɔ ‘tie’ tsena egua fɛɛfɛw bi mu.

Nna biribi yɛ soronko wɔ noho, ntsi mibisaa mo nuabanyin panyin dɛ, “Woana nye no?”

Ɔkãa dɛ, “President David O. McKay nye no; ɔyɛ nkɔnhyɛnyi.”

Mekaa dɛ minyaa atsenka bi na kwan bi do no muhun dɛ ɔyɛ nkɔnhyɛnyi. Nkyii, ɔnam dɛ meyɛ banyimba a modɔ cartoon dodow ntsi, mesesaa channel no. Mbom mo werɛ mmfir atsenka a minyaa no wɔ dɛm mber kumaa no, nyikyerɛ ber a m’enyi nnda mu no da. Nkɔnhyɛnyi dze, ɔyɛ a ɔgye mber kumaa bi na edze ehu no.¹

Enam nyikyerɛ do ruhu dɛ nkɔnhyɛnyi tseasefo wɔ asaase yi do no sesa biribiara.² Ogya wo ma innya pɛ wɔ ekyingye ho dɛ sɛ nkɔnhyɛnyi rekasa dɛ nkɔnhyɛnyi anaa sɛ ɔfata dɛ esa mu pow nkɔnhyɛnyi n’afotu a.³ Nyimdzee a woeyi akyerɛ a ɔtse dɛm no to nsa frɛ ankorankor dɛ wɔmfa hɔn were ntwer nkɔnhyɛnyi tseasefo n’afotu, mpo sɛ hɛn ntseasee nndzi mu wɔ ho a.⁴ Ne nyina ekyir no, Ɔsor Egya dɔfo a Odzi mu asan mu eyi nhwɛdo kwan a Ɔfa do da nokwar edzi kyerɛ Ne mba a odua nkɔnhyɛnyi do, obi a ɔannhwehwɛ ɔfrɛ krɔnkrɔn a ɔtse dɛm da na onnhia hɛn mboa ana oehu noara n’esintɔ.⁵ Nkɔnhyɛnyi yɛ obi a Nyankopɔn nankasa esiesie, afrɛ, atsentsen, ekenyan, akã n’enyim, atsew no ho, na Ɔama no tsĩpia.⁶ Ɔno ntsi na sɛ yedzi nkɔnhyɛnyi n’afotu do a yɛrennkegyina mbusu mu da wɔ sunsum afã mu no.

Sɛ yɛpɛ anaa yɛmmpɛ o, wɔsaan mu yii hɛn nyina wɔ kwan bi do wɔ asetsena a ɔwɔ hɔ ansaana wɔrobɔ wiadze dɛ wɔbɔwo hɛn wɔ nda a odzi ekyir yi mu. Nokwar ebien na ɔkã nda a odzi ekyir no ho. Nokwar a odzi kan nye dɛ wɔbɛkyekyer Christ N’Asɔr bio wɔ asaase no do. Nokwar a otsĩa ebien nye dɛ ndzɛmba mu bɛyɛ dzen papaapa. Kyerɛwsɛm no kyerɛ dɛ nda a odzi ekyir no “wɔbɛma ɔsor-bo abɛsɛɛ asaase do ndɔbaa,”⁷ ɔyardɔm,⁸ “akõkoekõ nye ɔkõ ho nsɛm, na asaase no do nyina bɛyɛ begyabegya, … na emumuyɛ bɔdɔɔ sõ.”⁹

Ber a meyɛ abofra no, nna dɛm nda a odzi ekyir no ho nkɔnhyɛ ma me akomatu na ogyaa me ma nna mobɔ mpaa dɛ Mbae a Otsĩa Ebien no remmba wɔ m’aber mu—memfa nkã ho dɛ besi ndɛ ɔyɛ dɛ ɔayɛ hɔ so. Mbom sesei mobɔ mpaa ma n’ebirabɔdze no, mpo dɛ ɔhaw ho nkɔnhyɛ no bɛba mu,¹⁰ osiandɛ sɛ Christ san ba bedzi hen a, N’abɔdze nyina “[bɛ]tsena dwudwoodwo.”¹¹

Tsebew a ɔwɔ wiadze yi mu sesei ama binom abɔ hu. Dɛ Nyankopɔn n’ahyɛmu mba no, yennhia dɛ yetsiw ndzɛmba a mfaso nnyi ho do dze hu mbrɛ yebesi edua ɔhaw mber yi mu. Onnhia dɛ yesuro.¹² Nkyerɛkyerɛ na fapem a ɔsɛ dɛ yedzi do dze tsena ase sunsum mu na yɛdze tsim honam mu no wɔ nkɔnhyɛnyi tseasefo ne nsɛm mu.¹³ Ɔno ntsi na President M. Russell Ballard kãa dɛ “ɔnnyɛ adze ketseketse … dɛ yɛwɔ Nyankopɔn no nkɔnhyɛnyi wɔ hɛn mu.”¹⁴

President Russell. M. Nelson agye dase dɛ “Nyankopɔn ne nhyehyɛɛ a Ɔakyekyer ato hɔ dada a odua nkɔnhyɛfo do kyerɛkyerɛ ne mba no ma hɛn ahotodo dɛ Obehyira nkɔnhyɛnyi biara na Obehyira hɔn a wɔyɛ setsie ma nkɔnhyɛfo afotu.”¹⁵ Ntsi adze tsitsir no nye dɛ yɛbɛka nkɔnhyɛnyi tseasefo no do.¹⁶ Nuambanyin na nkyerɛbaa, nkɔnhyɛfo nkyerɛkyerɛ nntse dɛ nkaano aserewsɛm mbuukuu na ahɛn apapa a hɔn bo a wɔsom no kɔ sor mber rugu mu no. Ɔno ntsi na ɔnnsɛ dɛ yɛhwehwɛ dze nkɔnhyɛfo a woetwa mu kɔ hɔn nsɛm dze bɔ nkɔnhyɛfo atseasefo hɔn nkyerɛkyerɛ gu.¹⁷

Modɔ mbɛbusɛm a Jesus Christ dze kyerɛkyerɛɛ asɛmpa fapem horow. Mepɛ dɛ anapa yi, menye hom kyɛ abrabɔ mu abɛbusɛm saso bi.

Da bi, mokɔr edzidzibea a ɔwɔ Asɔr N’Asoɛe dɛ mirikedzi ewiaber edziban. Megyee edziban no, mehɛɛn bea a wɔtsena ase dzidzi no na muhun President a Odzi Kan na n’apamfo kuwmba baasa no nyina dɛ wɔko pon bi ho a, egua kor da hɔ. Gyedzi a minnyi wɔ moho mu maa memanee ntsɛmara fii dɛm pon no ho, na nkyii metsee hɛn nkɔnhyɛnyi, President Russell M. Nelson ne ndze, a ɔrekã dɛ, “Allen, egua kor da hɔ wɔ ha pɛɛ. Bra na enye hɛn ntsena ase.” Ntsi meyɛɛ.

Aka kakra ma mewie edzidzi no, ɔyɛɛ me nwanwa dɛ metsee dede bi, na memaa me tsir do no, muhun dɛ President Nelson na ɔdze no nsu plastic bɔdambɔ no esi tsentsen amoa no afam ho na ɔdze ne tsir no asan ebua do.

President Dallin H. Oaks bisaa asɛmbisa a nna mepɛ dɛ mibisa no, “President Nelson, dɛn ntsi na emoaa wo nsu plastic bɔdambɔ no famee?”

Obuaa dɛ, “ɔma ɔyɛ mberɛw ma hɔn a wɔdan nwura ndzɛmba dze yɛ adze fofor no dɛ wɔbɛyɛ ho edwuma osiandɛ ɔnngye kwan pii wɔ ndanee adze no mu.”

Morodwen dɛm mbuae no ho no, mesanee tsee dɛm dede noara bio. Mohwɛɛ me nyimfa no, nna President Oaks so amoa no nsu plastic bɔdambɔ no afam dɛ ma President Nelson yɛɛ no. Metsee dɛm dede noara wɔ me bankum, nna President Henry B. Eyring romoa no nsu plastic bɔdambɔ no afam, mbom nna ɔdze no nsu bɔdambɔ no ato ne nkyɛnfãmu, ntsi nna ɔgye mbɔdzembɔ pii sen dɛ edze besi tsentsen. President Nelson hunii no ɔkyerɛɛ no ayamuyie mu ara mbrɛ ɔdze bɔdambɔ no si tsentsen a ɔbɛyɛ mberɛw ama no dɛ ɔbɔmoa afam.

Dɛm mber no, mebɛn President Oaks bisaa no bɔkɔɔ ara dɛ, “Ana mbra fofor a ɔwɔ edzidzibea ha nye dɛ emoa wo nsu plastic bɔdambɔ fam ho anaa?”

President Oaks yerɛw n’ano buaa dɛ, “Allen, ohia dɛ idzi nkɔnhyɛnyi n’ekyir.”

Megye dzi dɛ nna President Nelson remma nkyerɛkyerɛ fofor bi fa ndzɛmba a wɔdan no yɛ adze fofor ho wɔ edzidzibea hɔ dɛm da no. Mbom yebotum esũa efi President Oaks na President Eyring hɔn mbuae ntsɛmyɛ¹⁸ a wɔdze dzii President Nelson ne fasusu do, nna President Nelson n’enyidahɔ dɛ ɔbɔboa akyerɛkyerɛ hɔn wɔ kwan papa do.¹⁹

Mfe bi a abasen, Elder Neal A. Maxwell kyɛɛ adzesũadze na afotu binom a nkɔnhyɛ kwan do no ɔda ndɛ hɛn nda ho pɛpɛɛpɛ:

“Abosoom na mfe a ɔreba mu no, nsɛm a orisisi behia dɛ asɔrba biara si gyinae sɛ ɔbɛka President a Odzi Kan na n’Apamfo hɔn do anaa ɔnnkɛyɛ. Ɔbɛyɛ dzen yie ama Asɔrmba dɛ wobegyina adwen ebien ntamu. …

“… Hom mma yentsintsim nto hɔ ama nsanmuyi no ayɛ pefee, ber a yɛrema binom kwan ma wɔayɛ dza wɔpɛ wɔ nkɔnhyɛnyi n’afotu ho. …

“Jesus see dɛ sɛ adɔmba dua fefɛw a, ‘ɔhyewber abɛn.’ … Ntsi wɔabɔ hɛn kɔkɔ dɛ ɔhyewber aba no, mma yennhwinhwin wɔ hyew no ho!”²⁰

Ebusuasantsen a wɔreba no rinyin wɔ mber a adɔmba dua ahataw pii wɔ mu na ɔhyew pii wɔ mu. Iyi dze asodzi a ɔyɛ dur ara to ebusuasantsen a woenyin dada no hɔn do, nkanka ɔba no dɛ woridzi nkɔnhyɛnyi n’afotu do. Sɛ awofo kwetsir nkɔnhyɛnyi tseasefo n’afotu a, nnyɛ nhyira nko na wɔyew mbom dza oyɛ hu mpo kɛse no, wɔrekyerɛ hɔn mba dɛ dza nkɔnhyɛnyi bɛkã no nnhia anaa wobotum asan nkɔnhyɛ afotu mu eyi dza wobedzi do tse dɛ mbrɛ wɔsa edziban mu yi dza wobedzi wɔ aponto kɛse ase a wɔnndwen sunsum mu kɔm nsunsuando a ɔdze ba no ho.

Elder Richard L. Evans kãa no mber bi dɛ: “Awofo binom mfom mu ara dwen dɛ wobotum agow hɔnho kakra wɔ su na setsie afã mu … dɛ wobotum egyaagyaa fapem horow no mu kakra a onnkenya nsunsuando wɔ hɔn ebusua do anaa hɔn ebusua ne daakye ho. Mbom, sɛ ɔwofo fi kwan no do kakra ara a, mba no botum ayɛ dza ɔtra ɔwofo no ne fasusu no do koraa.”²¹

Dɛ ebusuasantsen a yekitsa asodzi krɔnkrɔn dɛ yebsiesie ebusuasantsen a wɔreba ama hɔn asodzi a wɔahyɛ ho nkɔm wɔ nda a odzi ekyir mu no,²² asodzi a otwar dɛ wɔhyɛ no mã wɔ mber a ɔsɛɛfo no ne nhyɛdo yɛ kɛse koraa mu no,²³ ɔnnsɛ dɛ yɛyɛ adwensɛɛ ne farba wɔ hia a ohia dɛ yedzi nkɔnhyɛnyi n’afotu do. Ɔyɛ afotu noara na ɔbɛma ebusuasantsen a wɔreba no ehu “ɔtamfo no wɔ ekyirekyir; na nkyɛ [wɔayɛ] krado” egyina ɔtamfo no kõ ano.²⁴ Hɛn mmanee nketsenketse, dza yebu hɛn enyi gu do kakra, anaa afɔbu nketsenketse a yɛdze tsia nkɔnhyɛnyi n’afotu begya hɛn esian mu ara esi ahyɛmu kwan no n’ano ara; na mbom sɛ ɔsɛɛfo no dzɛw kɛse wɔ ebusuasantsen a wɔreba no hɔn abrabɔ mu a, dɛm ndzeyɛɛ no botum egya hɔn ma woefi kwan no do koraa. Nsunsuando a ɔtse dɛm no yɛ ebusuasantsen kaw a ɔsõ dodow.²⁵

Hom mu binom benya atsenka dɛ hom atɔ sin wɔ hom mbɔdzembɔ mu dɛ wobedzi President Russell M. Nelson n’afotu do. Sɛ dɛm na ɔtse a, nna nu woho; na hyɛ ase bio dzi Nyame no Nkɔnhyɛnyi a Ɔasan mu eyi no no n’afotu do. Fa mbofradze cartoon a ɔdan enyi no si nkyɛn na fa wo werɛ twer nyia Ewuradze asera no ngo no. Dzi dɛw osiandɛ bio “nkɔnhyɛnyi wɔ Israel.”²⁷

Sɛ innyim mpo a, megye dase dɛ yebotum egyina nda a odzi ekyir ne hyew no ano na yɛayɛ yie mpo wɔ mu. Yɛyɛ nda a odzi ekyir Ahotseweefo, na dɛm nda yinom yɛ soronko. Nna ɔyɛ hɛn ahokekã dɛ yɛbɛba asaase do wɔ dɛm mber yi mu, a yɛwɔ ahotodo dɛ wonnkegyaa hɛn ma yeefintsiw sɛ ɔsɛɛfo no dze no sum a ogu do reyɛ kebii nye adwensɛɛ a ɔrodɔɔ sõ no hyia hɛn a,²⁷ na mbom yɛbɛfa afotu na akwankyerɛ efi nyia ɔwɔ tumdzi dɛ ɔkã kyerɛ hɛn nye wiadze nyina dɛ, “Mbrɛ Ewuradze Nyankopɔn se nye yi.”²⁸ Wɔ nkɔnhyɛnyi a Nyankopɔn maa no do, Israel Krɔnkrɔnyi no,²⁹ Jesus Christ mpo ne dzin mu, amen.

Nsɛnsin

1. Ɔnnkyɛree President Russell M. Nelson too nsa frɛ Brigham Young University esũafo no dɛ wonya ankorankor nyikyerɛ sũahu noara bi: “Bisa wo Sor Egya sɛ yɛyɛ Ewuradze n’asomafo na nkɔnhyɛfo ampaara. Bisa sɛ yenya nyikyerɛ wɔ asɛm yi na nsɛm binom so ho a” (“The Love and Laws of God” [Brigham Young University mpaabɔsom, Fankwa 17, 2019], speeches.byu.edu). Hwɛ Neil L. Andersen, “The Prophet of God,” Liahona, Esusow Aketseaba 2018, 26–27: “Yɛyɛ Nda a Odzi Ekyir Ahotseweefo no yɛwɔ ndzinoa dɛ yenya ankorankor dasegye dɛ President Nelson ne frɛ no fi Nyankopɔn hɔ.” Alma ne nsakyer asɛm a osii ɔnam dɛ otsie nkɔnhyɛnyi Abinadi no ma yehu no bio dɛ nyikyerɛ fa nkɔnhyɛnyi ho wɔ hɔ ma hɛn nyinara (hwɛ Mosiah 13:5; 17:2).

2. “Yɛwɔ nkɔnhyɛnyi anaa yennyi hwee; na yɛwɔ nkɔnhyɛnyi yi a, yɛwɔ adze nyina” (Gordon B. Hinckley, “We Thank Thee, O God, for a Prophet,” Ensign, Sanda, 1974, 122).

3. “Wɔhyɛɛ ase dɛ wɔregye kyim wɔ nkɔnhyɛ sunsum nye nyikyerɛ sunsum ho; na Nyankopɔn n’atsɛmbu no bɛba hɔn do” (Helaman 4:23; san so hwɛ Nkyerɛkyerɛ na Ahyɛmudzi 11:25). “Yɛtow na yɛatow no daa, ‘O Nyame, yɛda Wo ase wɔ Nkɔnhyɛnyi a ɔkyerɛ kwan wɔ nda a odzi ewiei yi mu.’ Pii wɔ hɔ a wɔpɛ dɛ wɔdze nsɛm no bi kã ho dɛ: ‘Gyedɛ ɔkyerɛ kwan a ɔnye hɛn adwendwen na apɛdze hun bɔkɔ do’” (Teachings of Presidents of the Church: Heber J. Grant [2002], 80).

4. “Ɔtɔfabi a yebenya afotu bi a yɛnntse ase anaa ɔyɛ dɛ ɔmmfa hɛn ho, mpo yɛabɔ mpaa na yɛadwendwen ho yie ekyir no. Mma nntow dɛm afotu no nkyen, mbom suo mu dzen. Sɛ obi a egye no dzi ma wo dza ɔyɛ dɛ anhwea ara na ɔbɔ wo anohoba dɛ sika kɔkɔɔ wɔ mu a, nyansa mu ara ibosuo mu wɔ wo nsamu mber kakra, awosow no bɔkɔɔ. Ber biara a mayɛ dɛm wɔ nkɔnhyɛnyi n’afotu ho no, mber egu mu kakra no sika mboaboano no hyɛ ase puepue na m’enyi asɔ” (Henry B. Eyring, “Finding Safety in Counsel,” Ensign, Esusow Aketseaba 1997, 26; san so hwɛ 3 Nephi 1:13; Nkyerɛkyerɛ na Ahyɛmudzi 1: 14).

5. Hwɛ 2 Nephi 4:17–18. “Mma hom mmbu mo fɔ osian m’esintɔ anaa m’egya, osian n’esintɔ ntsi, … mbom hom mfa ndaase mma Nyankopɔn dɛ ɔada hɛn esintɔ edzi akyerɛ hom, ama hom eesũa na hom aabɛyɛ enyansafo akyɛn hɛn” (Mormon 9:31).

6. Hwɛ Nkyerɛkyerɛ na Ahyɛmudzi 3:6–8; hwɛ Nkyerɛkyerɛ na Ahyɛmudzi 93:47 so.

7. Nkyerɛkyerɛ na Ahyɛmudzi 29:16.

8. Hwɛ Nkyerɛkyerɛ na Ahyɛmudzi 84:97; san so hwɛ Nkyerɛkyerɛ na Ahyɛmudzi 87:6.

9. Nkyerɛkyerɛ na Ahyɛmudzi 45:26, 27.

10. Hwɛ Nkyerɛkyerɛ na Ahyɛmudzi 1:38.

11. Hosea 2:18. “Na medze tum nye enyimnyam kɛse bɛda moho edzi efi sor, na menye sor dɔm-tutuw a wɔwɔ hɔ nyina, na yɛnye nyimpa abɛtsena asaase do wɔ tsenenee mu mfe apem, na emumuyɛfo nnkotum egyina ano” (Nkyerɛkyerɛ na Ahyɛmudzi 29:11).

12. Hwɛ 1 Nephi 22:16–17; hwɛ Nkyerɛkyerɛ na Ahyɛmudzi 59:23 so.

13. “Na hwɛ, wɔapow nkɔnhyɛfo no hɔn nsɛm. Dɛm ntsi sɛ m’egya tsenaa asaase no do ber a wɔhyɛɛ no dɛ onguan mfi asaase no do ekyir no a, hwɛ, nkyɛ ɔno so bɛhera” (1 Nephi 3:18; hwɛ 2 Nephi 26:3; Nkyerɛkyerɛ na Ahyɛmudzi 90:5 so).

14. M. Russell Ballard, “His Word Ye Shall Receive,” Liahona, Ayɛwoho 2001, 65.

15. Russell M. Nelson, “Ask, Seek, Knock,” Liahona, Ɔberɛfɛw 2009, 82. “Nyimpa biara nnyi hɔ a obenya enyigye kyɛn nyia ɔyɛ setsie ma nkɔnhyɛnyi n’afotu” (The Teachings of Lorenzo Snow, nsanmufo Clyde J. Williams [1996], 86).

16. “Fa w’enyi tsim hɔn a wodzi Asɔr no baano ndɛ, anaa ɔkyena, na hyehyɛ w’abrabɔ dzi hɔn ekyir sen dɛ ibetsim wɔ mbrɛ nna tsetse nkɔnhyɛfo no si tse anaa ma wɔdwenee anaa wɔkãe do” (The Teachings of Harold B. Lee [1996], 525).

17. President Spencer W. Kimball kãa no mber bi dɛ “hɔn a wosiesie nkɔnhyɛfo a woewuwu hɔn nda ho no hyɛ ase ndɛ dɛ wosiw nkɔnhyɛfo atseasefo no abo” (The Teachings of Spencer W. Kimball, ed. Edward L. Kimball [1982], 462). “Nsɛm a ohia dodoodow a yebotum atse, yɛadwendwen ho, na yeedzi ekyir nye dza wodua hɛn nkɔnhyɛnyi tseaseafo do woyi kyerɛ” (Ronald A. Rasband, “The Things of My Soul,” Liahona, Ɔberɛfɛw 2021, 40).

18. “Sɛ yɛtse Ewuradze n’afotu a ɔdze dua Asɔr ne President ne nsɛm mu a, hɛn mbuae wɔdɛ ɔyɛ papa na ntsɛmara” (M. Russell Ballard, “His Word Ye Shall Receive,” Liahona, Ayɛwoho 2001, 65).

19. “Nkɔnhyɛfo na asomafo atseasefo na daa wodzi Jesus Christ N’Asɔr a ɔwɔ hɔ ma Nda a Odzi Ekyir Ahotseweefo ne kan. Honam mu na wotum nya nyimpa mu sintɔ dze, naaso Ewuradze no nkowaa nya nkenyan a ɔboa hɛn ma yekwetsir akwansiwdze a wɔ sunsum mu no ɔyɛ owu asɛm na ɔboa hɛn ma yedua ɔnnkyebo asetsena yi mu dwudwoodwo dze kɔ hɛn ewiei ɔsor fie” (M. Russell Ballard, “God Is at the Helm,” Liahona, Ɔberɛfɛw 2015, 24).

20. Neal A. Maxwell, “A More Determined Discipleship,” Ensign, Kwakwa 1979, 69, 70.

21. Richard L. Evans, “Foundations of a Happy Home,” wɔ Conference Report mu, Ɔbɛsɛ. 1964, 135-36.

22. Hwɛ Nkyerɛkyerɛ na Ahyɛmudzi 123:11; hwɛ Robert D. Hales, “Our Duty to God: The Mission of Parents and Leaders to the Rising Generation,” Liahona, Esusow Aketseaba 2010, 95–98 so.

23. Hwɛ Nkyerɛkyerɛ na Ahyɛmudzi 52:14.

24. Nkyerɛkyerɛ na Ahyɛmudzi 101:54.

25. Hwɛ Mosiah 26:1–4.

26. 2 Ahemfo 5:8.

27. “Hom bɛyɛ aso dze ama ne nsɛm na mbrasɛm nyina a ne nsa bɛkã dze ama hom no, … na sɛ wɔyɛ dɛm ndzɛmba yinom a … Ewuradze Nyankopɔn bɔhwetse sum no tum efi hom enyim, na ɔama sor awosow ama hom yieyɛ, nye ne dzin n’enyimnyam ntsi” (Nkyerɛkyerɛ na Ahyɛmudzi 21:4, 6). Nyimpa biara nnyi hɔ a oedzi nkyerɛkyerɛ do anaa ɔafa afotu efi nyia ogyina dɛ Ewuradze n’ananmusinyi hɔ a ɔakɔ kyew da” (Doctrines of Salvation: Sermons and Writings of Joseph Fielding Smith, nsanmufo Bruce R. McConkie [1998], 243).

28. Ezekiel 3:27. “Na n’asɛm na hom bɛgye, tse dɛ ofi mankasa m’anomu, wɔ abotar nye gyedzi nyina mu” (Nkyerɛkyerɛ na Ahyɛmudzi 21:5).

29. Hwɛ 1 Nephi 22:20–21; hwɛ 3 Nephi 20:23 so.