Buber A Onndzi Mu No
Ewuradze ayɛ krado gyina dɛ Ɔbɛgye hɛn ahobrɛadze afɔr horow na Ɔnam N’adom do ama woeedzi mu. Christ kã ho no, buber biara nnyi hɔ a onndzi mu.
Ber a nna meyɛ banyimba no, mepɛɛ dɛ musũa wimu nsesae tsitsir a osisi fi ber kor kesi kor do wɔ afe no mu wɔ Montana anee anaafo, bea a minyinii wɔ no. Nna hyɛber a mepɛ no papa yɛ Ɔbɛsɛ—bu ber. Hɛn ebusua enyi daa kwan na yɛbɔɔ mpaa dɛ yebobu hɛn bosoom bosoom ho edwuma dzen ekuadze bebereebe dze ayɛ akatua. M’awofo dwendween wimu no ho, mbowa no hɔn apɔwmudzen na nduadzewa ho, na ndzɛmba pii so a wonnyi do tum kɛse ho.
Ber a mirinyin no, mubohun no yie dɛ ɔyɛ ehiasɛm. Nna hɛn asetsena gyina dza yebobu do. M’egya kyerɛkyerɛ me mfir a yɛdze twa ewifua no ho adzeyɛ. Nna mohwɛ ber a ɔdze efir no kesi kwã no mu, otwa eburofua kakra na afei ɔhwɛ efir no n’ekyir dze hwɛ no pefee dɛ ewifua dodow na okoguu adzekorabea no mu na wɔammfora ntsɛw no enngu. Ɔkɔr do dzii dwuma yi mber beberee, a ɔsesa efir ne nhyehyɛe no aber biara. Mutuu mbirika wɔ ne nkyɛn na menye no hwehwɛ ntsɛw no mu na mehyɛ daa yɛ dɛ mbrɛ nna miniym dza mereyɛ.
N’enyi agye efir ne nhyehyɛɛ ho ekyir no, muhun ewifua aba wɔ ntsɛw a ogu famu no mu na medze maa no a nna menntse ase dɛ ɔbɛba no dɛm. Mowerɛ nnkefir dza m’egya kãe kyerɛɛ me no da: “Oye ara na ɔno nye dza oye koraa a efir no botum ayɛ.’’ Ne nkyerɛkyerɛmu no ammee me yie no, modwendwen buber yi n’esintɔ ho.
Mber tsĩabaa ekyir no, ber a wimu sesae yɛɛ nwin ewimbir no, mohwɛɛ ndɔkɔdɔkɔ asorɔtow mpempem a woetu fi hɔn akwantu tsentsen dze ba anafo na wosianee kwã no do dzidzii. Wodzii ewifua ne nkaase no fi hɛn buber a onndzi mu no mu. Nyankopɔn ama woedzi mu. Na aba kor mpo annyɛ gyan.
Ɔtaa yɛ nsɔhwɛ wɔ hɛn wiadze mu na mpo Asɔr no no kusum mu dɛ yɛhaw hɛn ho wɔ emudziyɛ ho. Social media, enyidadodze a nsa nnkotum akã, na ɔtaa dɛ hɛnara hɛnho enyimtsĩabu ma yɛnngye hɛnho nndzi—dɛ yɛnnsɛ hwee na yɛnnkɛyɛ so da. Binom mpo nntse Agyenkwa no ɔfrɛ no ase dɛ “dɛm ntsi hom ndzi mu.’’1
Hom nkaa dɛ emudziyɛ nnye ridzi mu wɔ Christ mu nnyɛ adze kor.2 Emudziyɛ gye gyinapɛn a ɔnnkɛyɛ yie, a yɛdze ma hɛnho na ɔdze hɛn tõtõ binom ho. Iyi dze afɔbu na atseetsee ba na obotum ama yɛapɛ dɛ yɛbɔtwe hɛnho na yɛayɛ ankonam.
Yeridzi mu wɔ Christ mu yɛ biribi soronko. Ɔyɛ kwan—a ɔdɔ mu ara Sunsum Krɔnkrɔn no kyerɛ—dɛ erebɛyɛ tse dɛ Agyenkwa no yie. Ɔsor Egya yamuyiefo a Onyim adze nyinara na Ɔkyerɛ gyinapɛn horow no na wɔakyerɛkyerɛ mu pefee wɔ ahyɛmudzi horow a wɔserɛ hɛn ma yɛgye to mu na yɛdze bɔ bra no. Ɔgye hɛn afɔbu na esintɔ adzesodze, a daa ɔma yehu hɛn nyimpa ban a yɛyɛ wɔ Nyankopɔn n’enyim. Ber a kwan yi pegya hɛn na opia hɛn ma yɛyɛ yie no, wɔdze hɛnankasa hɛn nokwardzi ma Nyankopɔn susu hɛn a yɛda no edzi wɔ hɛn mbɔdzembɔ mu dɛ yɛdze gyedzi bɛka no do mu. Sɛ yɛgye Agyenkwa no ɔfrɛ do dɛ yɛmbra No hɔ a, ɔnnkyɛr na yeehu dɛ hɛn papayɛ no yie ara na Agyenkwa dɔfo n’adom no bɛyɛ nkaa no wɔ akwan bi mu a yennkotum esusu.
Yebotum ehu fapem yi ber a Agyenkwa no maa nyimpa mpem enum edziban no no nsunsuando.
“Na afei, Jesus maa n’enyi do, na ohun dɛ nyimpadodow kɛse reba ne nkyɛn no, ɔsee Philip dɛ, Hen na yɛbɔkɔtɔ paanoo, ma yinom edzi? …
“Philip buaa no dɛ, Paanoo denare ahaenu nnkɔsõ hɔn, dɛ hɔn nyina benya nkakrankakra.
“Na n’esuafo mu baako, Andrew, a ɔyɛ Simon Peter no nua no, see no dɛ,
“Abanyimba bi wɔ ha a ɔwɔ atoko-paanoo enum, na esunam nkakraba ebien: na iyidze yɛ ebɛn ma nyimpa pii yi?’’3
Ana adwen ho da, mbrɛ Agyenkwa no sii hun abanyimba yi, ɔno a ɔwɔ abofra ne gyedzi a ɔdze dza ohu dɛ osuar koraa koraa a wɔdze bedzi dwuma a ohia a ɔda hɔn enyim no mae?
“Na Jesus faa paanoo no, na ɔdaa ase no, ɔkyɛe maa hɔn a wɔtsetse hɔ no; ɔnye esunam no so dɛmara dze maa dodow a wɔpɛ.
“Na wɔmee no, ɔsee n’esuafo dɛ, Hom mboaboa mporoporoba a ɔaka no ano, na biribiara annyɛ gyan.’’4
Agyenkwa no maa ahobrɛdze afɔr no dzii mu.
Suahu yi ekyir no, wɔannkyɛr pii na Jesus maa N’esuafo no dze hɛmba dzii no kan. Annkyɛr na wohun dɛ wɔwɔ po begyabegya do dasu mu no. Hu kãa hɔn ber a wohun dɛ saman bi renantsew nsu no do reba hɔn nkyɛn.
“Na ntsɛmara [Jesus] nye hɔn kasae, na ɔsee hɔn dɛ, Hom nhyɛ dzen; mara a; mma hom nnsuro.
“Na Peter buaa no see dɛ, Ewuradze, sɛ woara a, hyɛ me ma membra wo nkyɛn wɔ nsu no do.
“Na ɔsee dɛ, Bra. Na Peter fii hɛn no mu sianee, na ɔnantseew nsu no do dɛ ɔrokɔ Jesus nkyɛn.
“Na ohun mframa no, osuroi; na ɔhyɛɛ ase rodɔ no, ɔkaa mu dɛ, Ewuradze, gye me.
“Na ntsɛmara Jesus too ne nsa suoo no mu, na ɔsee no dɛ, Ɔwo a wo gyedzi suar, ɔyɛ dɛn ntsi na egyee kyim?”5
Enuanom na nkyerɛbaa, ɔno enntwa nkɔmbɔdzi no do. Megye dzi dɛ mbrɛ Peter nye Agyenkwa no suoo hɔn nsa mu nantsewee san kɔr nsuhɛn no ho a, Peter noho afɔw na ebia ɔdwen dɛ ɔayɛ dza ɔnnsɛ no, ebia Agyenkwa no kãa biribi dɛ iyi; “O, Peter, mma nnsuro na mma nnhaw. Sɛ ibotum ehu woho dɛ mbrɛ Muhu wo no a, w’ekyingye bɛpa na wo gyedzi enyin. Modɔ wo, Peter dɔfo; ifii hɛmba no mu. W’afɔr yɛ enyisɔ, na mpo dɛ ifintsiwee no, mobɔwɔ hɔ daa epegya wo efi bun no mu, na w’afɔr bedzi mu.’’
Elder Dieter F. Uchtdorf kyerɛkyerɛɛ dɛ:
“Megye dzi dɛ Agyenkwa Jesus Christ bɛpɛ dɛ ebɔhwɛ, ibenya ho atsenkã, na ehu dɛ Ɔno nye w’ahoɔdzen. Dɛ edze No mboa no, biribiara nnyi hɔ a obesiw dza ibotum ayɛ. Wo hyɛbea mmbɔ adze. Ɔbɛpɛ dɛ ibohu woho dɛ mbrɛ Ohu wo no. Na ɔson ɔno koraa na ma mbrɛ wiadze hu wo no. …
“Ɔma hɔn a wɔaberɛ no tum; na hɔn a wonya atsenka dɛ wonnyi ahom biara no, Ɔtow hɔn ahoɔdzen mu.”6
Otwar dɛ yɛkaa dɛ ma hɛn afɔr papa na onndzi mu tse biara no, Agyenkwa no botum ama oeedzi mu. Ɔmmfa ho mbrɛ hɛn mbɔdzembɔ yɛ dɛ osuar no, onnyi dɛ yebu Agyenkwa no tum no tootooba da. Ayamuyie asɛm kakra, nokwar ɔsom serɛ tsĩabaa, anaa Primary adzesũadze a wɔkyerɛkyerɛ no ɔdɔ mu ara, a Agyenkwa no mboa kã ho no botum ama awerɛkyekyer, agow akoma, na ɔasesa onnyiewiei abrabɔ. Hɛn mbɔdzembɔ a ɔnnsɛ no mpo botum dze anwanwadze aba, na wɔ no kwan mu no, yebotum dze hɛnho ahyɛ buber a odzi mu mu.
Ɔtaa dɛ wɔdze hɛn tõ tsebew a ɔbɛma yeemia hɛnho mu. Ebia ɔbɛyɛ dɛ yennkotum ayɛ dza ɔase hɛn no. Ebia yɛbɔhwɛ hɔn a yɛnye hɔn som na yeenya nkãtse dɛ yɛnnto hɔn da. Enuanom na nkyerɛbaa, sɛ dɛm na etse a, hwɛ mbanyin na mbaa awanwafo a wɔtsena m’ekyir no a menye hɔn som no.
Metse hom yaw.
Naaso, meesũa, dɛ dɛmara dɛ emudziyɛ nnye iridzi mu wɔ Christ mu nnyɛ adze kor no, edze woho yɛ ntõtõho no nnye ekyirdzi nnyɛ adze kor. Sɛ yɛdze hɛnho tõtõ nkaafo ho a, no nsunsuando botum ayɛ ebien ara. Annhwɛ a yebohu hɛnho dɛ yeye sen nkaafo no na yeebu hɔn atsɛn na yɛakãsa etsĩa hɔn, anaa yebobu hɛnho enyimtsĩa dɛ nkaafo no ye sen hɛn ma yɛabɛyɛ ahoperfo, ahwɛyie mbordo, na yeenya abagura. Yɛdze hɛnho rotõtõ nkaafo ho no nntaa mmfa mfaso mba, ommpegya, na ɔtɔfabi a ɔhyɛ awerɛhow abagura. Nokwar, ntõtõho yinom botum dze sunsum mu ɔsɛɛ aba, a obesiw hɛn kwan ma yennkenya sunsum mu mboa a yehia no. N’ebirabɔdze no, yerusũa hɔn a yedzi hɔn nyi na wɔkyerɛ Christ-su suban no botum ayɛ mfaso na woepegya na obotum aboa hɛn ma yɛabɛyɛ Jesus Christ n’esuafo yie.
Agyenkwa no maa hɛn nhwɛdo dɛ yendzi do dɛ mbrɛ Ɔno sũae dzii Egya n’ekyir no. Ɔkyerɛkyerɛɛ No osuanyi Philip dɛ: “Ana menye hom wɔ hɔ dadaada yi, innyim me, Philip? nyia oehu me no, ehu Egya no; na ɔyɛ dɛn na ese dɛ, Kyerɛ hɛn Egya no?’’7
Na nkyii ɔkyerɛkyerɛɛ dɛ, “Nokwar, nokwar, mese hom dɛ, Nyia ɔgye me dzi no, ndwuma a meyɛ no, no so bɛyɛ.’’8
Ɔmmfa ho mbrɛ hɛn mbɔdzembɔ yɛ dɛ osuar no, sɛ yedzi nokwar a, Agyenkwa no dze hɛn bedzi dwuma dze ayɛ N’edwuma. Sɛ yɛyɛ dza oye papaapa a yebotum ayɛ na yenya awerɛhyɛmu wɔ No mu dɛ dza ɔaka no ɔbɛyɛ a, yebotum abɛkã anwanwadze a otwa hɛnho hyia no ho.
Elder Dale G. Renlund kãa dɛ, “Onnhia dɛ ibedzi mu, naaso yehia wo, osiandɛ obiara a ɔwɔ pɛ no botum ayɛ biribi.’’9
Na President Russell M. Nelson kyerɛkyerɛ hɛn dɛ, “Ewuradze pɛ mbɔdzembɔ.’’10
Ewuradze ayɛ krado gyina dɛ ɔbɛgye hɛn ahobrɛadze afɔr horow na Ɔnam N’adom do ama woeedzi mu. Christ kã ho no, buber biara nnyi hɔ a onndzi mu. Otwar dɛ yenya akokodur gye dzi dɛ N’adom no wɔ hɔ ma hɛn—na Ɔbɔboa hɛn, ɔbɛgye hɛn efi bun mu sɛ yefintsiw a, na hɛn emudzi mbɔdzenbɔ a ɔtɔ sin no ɔama oedzi mu.
Oduafo n’abɛbusɛm mu no, Agyenkwa no kãa aba horow a wɔtsɛwee wɔ asaase pa no ho asɛm. Bi ɔha, bi eduosia, bi eduasa. Ne nyina kã N’emudzi buber no ho.11
Nkɔnhyɛnyi Moroni tõ nsa frɛ obiara dɛ, “Nyew, hom mbra Christ hɔ, na hom ndzi mu wɔ no mu, … na sɛ hom pow dza ɔnnyɛ Nyame su nyina, na hom dze hom ahom, nye hom adwen, nye hom ahoɔdzen nyina dɔ Nyankopɔn a, nna n’adom bɔdɔɔ sõ wɔ hom do, na Ɔnam n’adom no do hom edzi mu wɔ Christ mu.”12
Enuanom na nkyerɛbaa, megye Christ, a ɔwɔ tum dze bɛma hɛn ahobrɛadze afɔr ankasa edzi mu ho dase. Hom mma yɛnyɛ hɛn afamudze a oye, yɛmfa dza yebotum mbra, na, gyedzi kã ho no, yɛmfa hɛn afɔr a onndzi mu ntõ N’anan ho. Ɔno a ɔyɛ buber a odzi mu Owura, Jesus Christ mpo no, ne dzin mu, amen.