Enyigye Ndze!
Temple ne nsii no ayɛ nkɔnhyɛfo nyina ofitsi Nkɔnhyɛnyi Joseph Smith do hɔn ehiadze a ɔkrɔn koraa no mu kor.
“Seseiara, ebɛn asɛm na yɛatse efi asɛmpa a hɛn nsa akã yi mu? Enyigye ndze! Ehumbɔbɔr ndze a ofi sor; nye nokwar ndze a ofi asaase mu;… enyigye ndze dze ma atseasefo nye ewufo; enyigyesɛm a ɔyɛ dɛw kɛse.”1
Nuambanyin na nkyerɛmba, ɔyɛ dzen dɛ ibɛtse nsɛm yi efi Nkɔhyɛnyi Joseph Smith hɔ na amonmu ara nnkɛyerɛw w’ano kɛse!
Joseph n’osebɔ a odzii no da dɛwdzi ne emuyɛ na ne fɛw a yehu no wɔ Nyankopɔn hɛn Ɔsor Egya ne enyigye nhyehyɛɛ kɛse mu no edzi, osiandɛ Ɔama hɛn awerɛhyɛmu dɛ, “Adasa tse ase, ama woeenya enyigye.’’2
Hɛn nyina yɛdze enyigye tsẽaa mu3 wɔ hɛn abrabɔ ansaana yɛreba asaase do ber a yɛtsee Nyankopɔn n’enyigye nhyehyɛɛ no, na yɛkɔ do dze enyigye tsẽa mu wɔ ha ber a yɛbɔ bra dɛ mbrɛ Ne nhyehyɛɛ tse. Na nna ebɛn asɛm pɔkyee nye enyigye dawurbɔ yi fi Nkɔnhyɛnyi no hɔ? Ebɛnadze na okenyaan nkãtse a ɔdɔ bun mu na okenyan akoma yinom?
Nna Nkɔnhyɛnyi Joseph rekyerɛkyerɛ enuma ma ewufo ho asɛm. Na nokwar iyi yɛ enyimnyam nyikyerɛ a wɔdze dɛwdzi kɛse gyee. Asɔrmba dzii kan sũa dɛ wobotum enuma hɔn ama hɔn adɔfo a woewuwu no, wodzii ehurusi. Wilford Woodruff kãa dɛ, “Mber a metsee no, me kra [dzii] dɛw kɛse!’’4
Nnyɛ enuma ma hɛn adɔfo a woewuwu no nko nye nokwar a Ewuradze yii kyerɛe na Ɔdze saan ananmu bae. Nna akyɛdze anaa endowment horow pii wɔ hɔ a Nyankopɔn reper dɛ ɔdze bogu Ne mbambanyin na mbabaa hɔn do.
Asɔfodzi tumdzi, ahyɛmudzi na ayɛdze horow, awar a obotum ayɛ afebɔɔ, mba nsɔwano ka hɔn awofo ho wɔ Nyankopɔn n’ebusua mu, na ewiei no yɛresan akɔ fie wɔ Nyankopɔn hɛn Ɔsor Egya na Ne Ba, Jesus Christ hɔn enyim ho nhyira ka akyɛdze horow yinom bi so ho. Ɔnam Jesus Christ No Werdambɔ do na nhyira yinom nyina ba mu.
Osiandɛ Nyankopɔn hun dɛ iyinom yɛ nhyira a ɔkrɔn na ɔyɛ krɔnkrɔn koraa wɔ Ne nhyira mu no ntsi,5 Ɔkyerɛkyerɛɛ dɛ wonsisi adan krɔnkrɔn wɔ mbea a Obotum dze akyɛdze a wɔsom bo yinom egu Ne mba do.6 Adan yinom bɛyɛ Ne fie wɔ asaase do. Adan yinom bɛyɛ temple bea a dza wɔsɔw ano anaa wɔkyeyeree no wɔ asaase do wɔ Ne dzin mu, wɔnam N’asɛm do, na wɔdze No tumdzi no wɔbɛkyekyer no wɔ ɔsorsor.7
Dɛ ndɛ da yi Asɔrmba no, ɔbɛyɛ mberɛw ama hɛn mu binom dɛ yebobu onnyiewiei enyimnyam nokwar yinom biarabiara. Ɔabɛyɛ hɛn awosu a otsĩa ebien ama hɛn. Ɔtɔfabia ɔyɛ mfaso sɛ yehun wɔ hɔn a mbrɛ ɔyɛ hɔn mber a odzi kan a worusũa ho asɛm si hu hɔ no. Iyi bɛdaa edzi maa me wɔ suahu bi a ɔnnkyɛree mu.
Mfe da no, ansaana wɔrebɛsan etu Tokyo Japan Temple ahyɛ Nyame nsa bio no, ahɔho pii a wɔnnka asɔr no ho na wɔkɔɔr nserahwɛ wɔ dɛm temple no. Nserahwɛ kor bi a ɔtse dɛm no nna baanodzinyi badwombanyi bi a ofi nyamesom bi mu ka ho. Yɛkyerɛkyerɛɛ hɛn ahɔho no Ɔsor Egya n’enyigye ho nhyehyɛɛ, Jesus Christ No ɔpon asɛdze wɔ dɛm nhyehyɛɛ no mu, na nkyerɛkyerɛ no dɛ wobotum anam nsɔwano ayɛdze do aka ebusua abɔ mu afebɔɔ ho nsɛm.
Nserahwɛ baa ewiei no, motoo nsa frɛ hɛn nyɛnko no dɛ ɔnkã ne nkãtse a onyae. Ɔrekã wɔreka ebusua ebusua abɔmu—ma wɔabasen, ndɛ, na ndaamba ho asɛm no—barimba papa yi bisae nokwar mu dɛ, “Ana w’asɔrmba nokwar mu ara tse mbrɛ nkyerɛkyerɛ yi no mu si dɔ ase?’’ Ɔdze kaa ho dɛ, “Iyi botum ayɛ nkyerɛkyerɛ kor nko a obotum aka wiadze a wɔakyekyɛ mu dodow no abɔmu.’’
Ebɛn adzehwɛ a tum wɔ mu nye yi! Nnyɛ temple dan no fɛw na ne nwanwae ara na okenyaan barimba yi, mbom ahobow nkyerɛkyerɛ a no mu dɔ dɛ wɔka ebusua ebusua bɔmu na wɔsɔw ano kã Ɔsor Egya na Jesus Christ ho afebɔɔ a.8
Onnyi dɛ ɔyɛ hɛn ahobow, afei, sɛ obi mpo a ɔnnka hɛn asɔr no ho hu dza osi wɔ temple ne fɛɛfɛw a. Dza obotum ayɛ ebubudze anaa ntɔyɛɛ ma hɛn no ɔtɔfabia hɔn a wɔtse anaa wonya ho nkãtse wɔ hɔn mber a odzi kan ankasa na wohu no wɔ ne fɛw na n’enyimnyam mu.
Ɔwɔ mu dɛ tsetseber no nna temple wɔ hɔ, na Jesus Christ n’asɛmpa ne Nsanananmu no, temple ne nsii ayɛ nkɔnhyɛfo nyina ofitsi Nkɔnhyɛnyi Joseph Smith do hɔn ehiadze a ɔkrɔn koraa no mu kor ama hɔn. Na ɔyɛ mberɛw dɛ ibɛtse ne siantsir no ase.
Mber a Nkɔnhyɛnyi Joseph rekyerɛkyerɛ ewufo enuma ho asɛm no, ɔdaa nokwar kɛse bi so edzi kyerɛe. Ɔkyerɛɛkyerɛ dɛ: “Hom mma minsi no pi nkã nkyerɛ hom dɛ, dɛm fapem yinom na ɔwɔ hɔ a ɔfa ewufo na atseasefo ho a ɔnnsɛ dɛ yebu hɛn enyi gu do, dza ɔfa hɛn nkwagye ho. Osiandɛ hɔn nkwagye hia na oye ma hɛn nkwagye so, … sɛ wokwetsir hɛn a wonndzi mu—anaadɛ hɛn so yekwetsir hɛn ewufo a yennkedzi mu.”9
Dɛ mbrɛ yetum hu no temple ho hia na edwuma a wɔyɛ ma atseasefo na ewufo ebien no da edzi pefee papa.
Ɔsɛɛfo no nnda. Ayɛdze na ahyɛmu horow a wɔyɛ no temple mu no yɛ ekyiwadze ma ɔsɛɛfo no, na ɔyɛ adzebiara a ɔbɔbɔ mbɔdzen a obotum ayɛ dze esiw edwuma no kwan. Dɛn ntsi a? Osiandɛ onyim tum a ofi edwuma krɔnkrɔn yi no mu ba. Sɛ wotu temple fofor kor biara hyɛ Nyame nsa a, Jesus Christ ne ɔgye tum no tserɛw kɔ wiadze nyina mu dze sɛe ɔsɛɛfo no mbɔdzembɔ no na sɛ yɛba No hɔ a ɔpon hɛn. Sɛ temple na ahyɛmudzi esiefo dɔr a, ɔsɛɛfo no yɛ mberɛw koraa.
Asɔr n’ahyɛase no, nna ɔhaw binom dɛ ber bɛn na wɔbɔbɔ temple fofor dawur, osiandɛ nna wɔkã dɛ, “Yɛnnhyɛase nnsi temple no nna hɛl adɔmba no ahyɛase rowosow.’’ Mbom akokodur mu ara Brigham Young yii ano dɛ, “mepɛ dɛ metse dɛ wɔrowosow bio.’’10
Ɔnnkyebo abrabɔ yi mu no, yennkoguan efi ɔkõ ho da, naaso yebenya tum dze edzi ɔtamfo no do konyim. Dɛm tum na ahoɔdzen no fi Jesus Christ hɔ sɛ yɛyɛ na yesie temple ahyɛmudzi horow a.
President Russell M. Nelson akyerɛɛkyerɛ dɛ: “Mber no reba hɔn a wɔyɛ asokyew ma Ewuradze no wɔbɛpaa hɔn efi hɔn a wɔnnyɛ no ho. Hɛn bambɔ a odzi mu nye dɛ yɛbɔkɔdo afata dɛ wɔbɛgye hɛn wɔ Ne fie krɔnkrɔn mu.’’11
Nhyira binom a Nyankopɔn dze edua No nkɔnhyɛnyi do dze abɔ hɛn anohoba bi nyi:
Ana ihia anwanwadze? Hɛn nkɔnhyɛnyi akã dɛ: “Mobɔ wo anohoba dɛ Ewuradze dze anwanwadze a Onyim dɛ ihia ber a ebɔ afɔr dɛ ibɔsom na asɔr wɔ Ne temple mu no bɛba.’’12
Ana ihia Agyenkwa Jesus Christ n’ayarsa na ahoɔdzen tum no? President Nelson ma hɛn awerɛhyɛmu dɛ: “biribiara a wɔkyerɛ wɔ temple mu … tow hɛn ntseasee wɔ Jesus Christ mu. … Sɛ yesie hɛn ahyɛmu no a, Ɔdze N’ ayarsa, ahoɔdzen tum no kyɛ hɛn. Na o, mbrɛ yehia No tum wɔ nda ɔreba no mu a.”13
Mberɛkɔnson Kwesida a odzi kan ber a konyimdzi mu ara Jesus Christ kɛhɛɛn Jerusalem no, N’esuafo dɔmtutuw “[dzii] ehurusi na wɔdze ndze kɛse [yii] Nyankopɔn ayɛw … see dɛ, “Nhyira nye Ɔhen a ɔnam Ewuradze dzin mu reba.’’14
Mbrɛ osii fata dɛm 1836 Mberɛnkɔnson Kwesida no, a nna worutu Kirtland Temple no ahyɛ Nyame nsa a. Dɛm mber no nna Jesus Christ n’esuafo ridzi ehurusi dɛmara. Dɛm tu hyɛ Nyame nsa mpaabɔ mu no, Nkɔnhyɛnyi Joseph Smith paa mu kãa ayeyi nsɛm yinom dɛ:
“O Ewuradze Nyankopɔn Tumfo, tsie hɛn … na bua hɛn fi sor, … bea a etse w’ahengua do, wɔ enyimnyam, enyidzi, tum, ahentum, [na] ahoɔdzen mu. …
“… Na fa wo Sunsum no tum no boa hɛn, ama yeetum dze hɛn ndze afora seraphfo a wɔhyerɛn a woetwa w’ahengua ho no hɔn ndze mu, dze eyi wo ayɛw, atow Hosanna ama Nyame na Eguambaa no!
Na ma … w’ahotseweefo yinom mfa enyigye ntseatsea mu kɛse.’’15
Nuambanyin na nkyerɛbaa, ndɛ Mberɛnkɔnson Kwesida yi, hom mma hɛn so yɛntse nkã dɛ yebeyi hɛn Nyankopɔn krɔnkrɔn no ayɛw na yeedzi ehurusi wɔ Ne papayɛ ma hɛn no mu. “Ebɛn asɛm na yɛatse efi asɛmpa a hɛn nsa akã yi mu? Nokwar ara, “enyigye ndze!’’16
Megye dase dɛ hom bɛtse dɛwdzi yi nkã mber dodow a hom hɛn Ewuradze ne fie krɔnkrɔn no. Megye dase dɛ hom benya dɛwdzi a Ɔno wɔ dze ma hom, wɔ Jesus Christ ne dzin mu,amen.