Hom Nyim Siantsir A Emi a Meyɛ Christianyi Megye Christ Dzi?

Elder Ahmad S. Corbitt ne Kasaa

Ɔkã Eduosuon no ho

Nna ɔwɔ dɛ Jesus Christ hu amandze, Owu, na Ɔsoɛr bio dze pon adasamba nyina fi honandua mu owu mu na Ɔdze onnyiewiei nkwa a yɛnye Nyankopɔn bedzi ma.

Mfe pii abasen kɔ, ewimbir bi a mapon edwuma no, mokɔfoow bɔɔs a metaa fow kɔ fie no, fi New York City kɔ New Jersey. Ɔbaa a metsena ne nkyɛn no hun dza nna merekyerɛw wɔ me kɔmputa do na obisaa dɛ, “Egye Christ dzi?’’ Mekãa dɛ, “Nyew, megye dzi!’’ Ber a nna yɛrekasa no, musũae dɛ ɔnkyɛree na otui fii ne Asian ɔman fɛɛfɛw mu bɛtsena apaamu hɔ dɛ ɔrebɛyɛ edwuma wɔ New York ne abaefo Internet do mfir ndwuma a wosi ho akansi.

Mibisaa no ara dɛ, “Inyim siantsir a emi a meyɛ Christianyi megye Jesus Christ dzi? Ɔno so buae na ɔserɛɛ dɛ menkã nkyerɛ no. Naaso ber a merebɛkasa no, minyaa mber a ɔnntaa nnsi bi a adwendwen pii hyɛ w’adwen mu mã no. Nna iyi nye mber a odzi kan a mebɛkyerɛkyerɛ Christiansom ne “siantsir’’ mu akyerɛ obi a onnyim ho hwee na onyim adze ankasa. Nna munnkotum akã ara dɛ, “Meka Jesus Christ do osiandɛ ɔdze Ne pɛ hun amandze na Owui maa mo bɔn.’’ Ɔbɛyɛ no nwanwa dɛ, “Ana nna ɔwɔ dɛ Jesus wu a? Sɛ yɛserɛ Nyankopɔn dɛ ɔmfa hɛn bɔn nkyɛ hɛn ara na ɔnntsew hɛnho a ana nkyɛ Onnkotum ayɛ a?

Nkyɛ ibesi dɛn botum ama mbuae wɔ mber tsĩabaa mu? Nkyɛ ibesi dɛn botum akyerɛkyerɛ iyi mu akyerɛ wo nyɛnko bi? Mbofra na mbabun: ekyir no hom botum ebisa hom awofo anaa banodzifo, “Siantsir na ɔwɔ dɛ Jesus bowu?’’ Na nuambanyin na nkyerɛbaa, mowɔ bɔnkã: ma nna modwen dɛ minyim Asɔr nkyerɛkyerɛ, abakɔsɛm, nhyehyɛɛ, na dza ɔkeka ho no, asɛmbisa tsitsir yi ne nyiano wɔ hɛn gyedzi ho no ammba mberɛw mu. Dɛm da no mobɔɔ adwenpɔw dɛ mebetsim yie wɔ dza ohia dodoodow ma onnyiewiei nkwa do.

Oye, mekãe kyerɛɛ me nyɛnko fofor¹ no dɛ yɛwɔ sunsum kã nyimpadua ho na Nyankopɔn nye hɛn Sunsum n’Egya.² Mekãa kyerɛɛ no dɛ nna yɛnye hɛn Ɔsor Egya tse ansaana hɛn awoe ba ɔnnkyebo wiadze yi mu.³ Osiandɛ Ɔdɔ no na Ne mba nyina ntsi, Ɔyɛɛ nhyehyɛɛ ma hɛn dɛ yebenya nyimpadua wɔ N’enyimnyam nyimpadua saso mu,⁴ yɛmbɛkã ebusua bi ho,⁵ na yɛnsan nkɔ N’enyim ɔdɔ mu ara a yɛnye hɛn ebusua ebusua nkedzi onnyiewiei nkwa enyigye mu,⁶ tse dɛ ma Ɔnye Ne dze yɛ no.⁷ Mbom, mekãa dɛ, yebehyia akwansiwdze akɛse ebien a ohia wɔ wiadze a ɔahwe ase yi mu:⁸ (1) honandua mu owu—hɛn nyimpadua bɛpaa noho efi hɛn sunsum ho. Nyew, nna onyim dɛ hɛn nyina yebowu. Na (2) sunsum mu owu—osian hɛn bɔn, mfomdo, na mberɛwyɛ dɛ yɛnnkyebo ntsi yɛbɛpaa hɛnho efi Nyankopɔn ho na yɛnye Ne ntamu atwe efi No krɔnkrɔn enyim.⁹ Nna onyim iyi so.

Mekãe kyerɛɛ no dɛ iyi yɛ pɛpɛrdzi ho mbra no nsunsuando. Onnyiewiei mbra yi gyedɛ wotua onnyiewiei asotwe ho kaw ma hɛn bɔn kor biara anaa Nyankopɔn ne mbra anaa nokwar biara a yebu do no, ɔno yennkotum asan akɛtsena N’enyim krɔnkrɔn no dabiarada.¹⁰ Ɔnnkɛyɛ pɛpɛrdzi, na Nyankopɔn “nnkotum apow pɛpɛrdzi.’’¹¹ Ɔtsee iyi ase na ofuaa no bɔkɔɔ dɛ Nyankopɔn san so yɛ ehumbɔbɔr, ɔdɔ na ɔyɛ No enyigye dɛ ɔdze hɛn onnyiewiei nkwa bɔbɔ adze.¹² Mekãe kyerɛɛ me nyɛnko no dɛ yɛbɛsan so enya ɔsɛɛfo daadaafo tumfo—bɔn na ator farbaa—dɛ otsĩa hɛn.¹³ Dɛm ntsi, obi a ɔwɔ ɔmmbɔadze nyamesu tum dɛ obedzi etsĩafodze na akwansiwdze a ɔtsetse dɛm nyina do konyim behia dɛ ɔbɛgye hɛn.¹⁴

Nkyii menye no kyɛɛ nsɛmpa dɛɛdɛw no— “nsɛmpa kɛse a ɔyɛ dɛw’’ … a ɔyɛ ɔman no nyina dze’’¹⁵—dɛ “Na mbrɛ Nyankopɔn dɔɔ wiadze nye yi, dɛ ,ɔdze ne Ba a ɔwoo no kor mae, ama obiara a ɔgye no dzi no ɔannhera, na oenya onnyiewiei nkwa.’’¹⁶ Megyee dase kyerɛɛ me nyɛnko no, na midzi dase kyerɛ hom, dɛ Jesus Christ nye hɛn Agyenkwa na nna ɔwɔ dɛ Ohu amandze, owu, na ɔsoɛr bio—No ɔmmbɔadze Werdam—Ɔdze apon adasamba nyina efi honandua mu owu mu¹⁷ na Ɔdze onnyiewiei nkwa a yɛnye Nyankopɔn na hɛn ebusua ebusua¹⁸ bɛma hɔn nyina a wɔbɛka No do. Mormon Nwoma no paa mu kã dɛ, “Na dɛm na Nyankopɔn … dzii owu do konyim; ɔama Ɔba no tum ma ɔayɛ ntamugyinafo ama adasamba … ; na [ehumbɔbɔr na ] ayamuhyehye ahyɛ n’abadaa no mã … ; ber a oebubu owu no mpokyerɛ mu na ɔafa hɔn mbrato ato no do, na ɔapon hɔn, na ɔayɛ pɛrpɛr n’ahyɛdze ama no.’’¹⁹

Anamɔn no a Nyankopɔn yii kyerɛe na otwar dɛ yɛfa do dze kã Jesus do na yenya onnyiewiei nkwa no wɔfrɛ no Christ ne nkyerɛkyerɛ. “Gyedzi wɔ Jesus Christ na No Werdambɔ no mu, nnuhu, enuma [kɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu], yɛgye Sunsum Krɔnkrɔn n’akyɛdze, na yɛsɔw kɔ ewiei ka ho.’’²⁰ Menye me nyɛnko no kyɛɛ anamɔn horow yinom, mbom akwan bi nye yi a ɔnnkyɛree no nkɔnhyɛfo nye asomafo akyerɛkyerɛ mbrɛ Christ ne nkyerɛkyerɛ no besi botum aboa Nyankopɔn ne mba nyina.

President Russell M. Nelson kyerɛkyerɛɛ dɛ: “Tum wɔ Christ ne nkyerɛkyerɛ a ho tsew no mu. Ɔsesã abrabɔ no ma obiara a ɔtse ase na ɔhwehwɛ dze dzi dwuma wɔ n’abrabɔ mu.”²¹

Elder Dieter F. Uchtdorf kyerɛkyerɛɛ dɛ, “Ma Mbabun Enya Ahoɔdzen no [akwankyerɛ] dze akokodur paa mu kã … Christ ne nkyerɛkyerɛ [na] ɔtõ nsa frɛ hom [mbabun] dɛ wɔnyɛ nsanmuyi ahorow a ogyina [no] do.’’²²

Elder Dale G. Renlund kyerɛkyerɛɛ dɛ, “Yɛtõ nsa frɛ asɛmpasomafo dɛ wɔnyɛ dza wɔse hɔn a wɔkyerɛkyerɛ hɔn no dɛ wɔnyɛ no: … wɔmfa Christ ne nkyerɛkyerɛ no ndzi dwuma wɔ hɔn abrabɔ mu [na] wɔnhɛn ahyɛmu anamɔn kwan no do na wɔnka do.’’²³

Christ ne nkyerɛkyerɛ no ma hɔn a woridzi aper anaa wɔtse nkã dɛ wɔnnka Asɔr no ho tum osiandɛ ɔboa hɔn, dɛ mbrɛ Elder D. Todd Christofferson kãe no, ma “wosi no tadua dɛ: Jesus Christ wui maa me [na] ɔdɔ me.’’²⁴

Awofo, sɛ wo ba dze asɛmpa fapem anaa nkɔnhyɛsɛm nkyerɛkyerɛ bi ridzi aper a, meserɛ pow kasa bɔn ne nkãe²⁵ anaa dwumadzi bɔn biara a otsĩa Asɔr no anaa ne baanodzifo. Wiadze nyansa yinom, a mfaso nnyi ho ma wo no botum ayɛ bɔr ama wo ba no nokwardzi a ɔbɛgye ndwow no.²⁶ Oye koraa dɛ ebɔbɔ wo ba a ɔsom bo ho ban anaa ibedzi ama no anaa ibɛkyerɛ koryɛ nsɛnkyerɛdze ama no. Naaso me yer, Jayne, na emi nyim fi hɛnankasa suahu mu dɛ erekyerɛkyerɛ wo ba dɔfo siantsir a hɛn nyina yehia Jesus Christ dzendzenndzen na mbrɛ yebesi dze Ne nkyerɛkyerɛ dɛw no edzi dwuma nye dza ɔbɛhyɛ no dzen na ɔasa no yarba. Hom mma yɛmfa hɔn mbra Jesus hɔ, ɔno a ɔnye Egya no yɛ hɔn nokwar dzimafo. Ɔsomafo John kyerɛkyerɛɛ dɛ, “Obiara … ɔtse Christ nkyerɛkyerɛ mu no … ɔwɔ Egya nye Ɔba no.’’ Nkyii ɔbɔ hɛn kɔkɔ dɛ yɛnyɛ ahwɛyie “Sɛ obi ba hom nkyɛn na ommfua nkyerɛkyerɛ yi a.’’²⁷

Ɔnnkyɛree na emi na Jayne kɛseraa sar no a Moses maa boran abowatsena do kyerɛɛ Israelmba a nna wɔrototɔ bahaw no do. Nna Ewuradze abɔ anohoba dɛ ɔbɛsa hɔn nyina a mbowatsena bɔr akeka hɔn no yarba sɛ wɔbɔhwɛ ara a.²⁸ Ɔrema Christ ne nkyerɛkyerɛ no do wɔ hɛn enyim no, Ewuradze no nkɔnhyɛnyi no reyɛ dɛmara, “dɛ ɔbɛsa amanaman yarba.’’²⁹ Eka anaa bɔr anaa aperdzi no tse biara a yenya no wɔ ɔnnkyebo sar yi mu no, ma hom mma yɛnnyɛ hɔn a, tsetseber do na seseiara no, nkyɛ wobotum enya ayarsa naaso, awerɛhow mu ara, “wɔnnkɔhwɛ … osiandɛ wɔanngye enndzi dɛ obotum asa hɔn yarba.’’³⁰ Mormon Nwoma no si no tadua dɛ: “Hwɛ, … iyi nye kwan no; na kwan fofor biara nnyi hɔ anaa dzin biara nnyi wiase yi mu a wɔnam do bɛgye ɔdasanyi nkwa wɔ Nyankopɔn n’ahenman no mu. Na afei, hwɛ, iyi nye Christ ne nkyerɛkyerɛ.”³¹

Dɛm ewimbir wɔ New Jersey no, merekã siantsir a yehia Jesus Christ na Ne nkyerɛkyerɛ no maa me akyerɛbaa fofor na ɔno so onuabanyin fofor. Yɛtsee asomdwee nkã, a osi Sunsum Krɔnkrɔn ne dasee no pi. Ɔy hɛn ntɔyɛɛ no, meserɛɛ no dɛ ɔmfa bea a yebohu no ho nsɛm mma me na ɔnkɔ do nye asɛmpasomafo ndzi nkɔmbɔ. Ɔyɛɛ no enyigye dɛ ɔbɛyɛ dɛm.

“Dɛm ntsi, mbrɛ osi hia kɛse dɛ yɛdze ndzɛmba yinom kyerɛ hɔn a wɔtse asaase do,’’ Mormon Nwoma no paa mu kã dɛ—hom ndodɔ, hom nkyekyɛ na hom nto nsa mfrɛ³² ber a yɛboa Israel ano wɔ hɛn sɔn ahorow nyina mu na ebusua ebusua mu—“ama woeehu dɛ honandua biara runntum nntsena Nyankopɔn n’enyim gyedɛ ɔnam Messiah Krɔnkrɔn no ndwuma pa, n’ehumbɔbɔr, na n’adom [na nkyerɛkyerɛ] do.’’³³ Jesus Christ ne dzin mu, amen.