Ber a Ɔsɛ a Edze Bɛgye Wo Patriarch Nhyira
Sɛ egye wo nhyira no a, ibohu na atse mbrɛ Ɔsor Egya na Jesus Christ si dɔ wo ne nkã na mbrɛ Wotsim wo do dɛ ankorankor.
Ndeda me nyɛnko dɔfo Elder Randall K. Bennet kãa patriarch nhyira ho asɛm. Nna ɔyɛ asɛmpa mapã na okenyaan hɛn nyina. Mo nuambanyin na nkyerɛbaa adɔfo, hom bɛma me kwan ma mo so menkã patriarch nhyira ho asɛm a? Patriarchfo, dɛ hɔn a wobebisa dɛ wɔbɛgye patriarch nhyira no bɔdɔɔ sõ no, mobɔ mpaa dɛ Ewuradze nhyira hom ber a hom kɔ do hyɛ hom ɔfrɛ mã.
Sɛ mokɔ stake ehyiadzi horow a, daa mekɛsera stake patriarch no na ne yer. Patriarchfo yɛ botoo, setsie, na wɔyɛ baanodzifo anwanwafo a Nyankopɔn afrɛ hɔn. Wɔkã sunsum mu sũahu anwanwasɛm pii kyerɛ me. Mibisa hɔn nyimpa a wɔama hɔn patriarch nhyira no hɔn mu kuma koraa na nyia oenyin ara yie no hɔn mfe a woedzi. Seseiara, kuma koraa no nna oedzi mfe 11, na panyin koraa no oedzi mfe 93.
Megyee me patriarch nhyira dɛ Asɔrba fofor, a medzi mfe 19, mfe ebien ekyir a wonumaa me. Nna me patriarch no enyin yie ankasa. Ɔdɔɔm Asɔr no wɔ afe 1916 mu na nna ɔyɛ Asɔr no n’abɔasefo no mu baako wɔ Japan. Ɔyɛ enyidzi kɛse maa me dɛ megyee me patriarch nhyira fii dɛm Ewuradze no sũanyi soronko yi hɔ. Nna ne Japan kasaa no yɛ me dzen kakra dɛ mebɛtse ase, mbom nna tum wɔ mu.
Patriarchfo a mehyia hɔn no kã kyerɛ me dɛ nkorɔfo pii gye hɔn patriarch nhyira mber no ara ansaana wɔakɔsom dɛ asɛmpasomafo. Mo young men, young women, awofo, na bishopfo adɔfo, patriarch nhyira nnyi hɔ nkõ ma hɔn a wɔreyɛ ahosiesie akɔsom asɛmpasomafo dwuma. Asɔrmba a woenuma hɔn a wɔfata botum agye hɔn patriarch nhyira ber biara a mber no ye ma hɔn.1
Asɔrmba mpanyimfo adɔfo, hom mu binom innyae nngyee hom patriarch nhyira. Hom nkaa dɛ, mfe ne kɛse dodow biara nnda ho.
Nna m’asew basia yɛ Asɔrba a ɔbɔ hyew papaapa, a ɔsomee dɛ Relief Society kyerɛkyerɛnyi kɛpem dɛ owui a nna oenya mfe 91. Mo werɛ howee ber a muhun dɛ ɔanngye patriarch nhyira. Oduaduaa haw pii mu wɔ n’abrabɔ mu, na osiandɛ onnyi obi a okitsa asɔfodzi wɔ ne fie ntsi, ɔanngye asɔfodzi nhyira pii. Nkyɛ patriarch nhyira no bɛma no awerɛkyekyer ber a ohia no kɛse.
Mpanyin, sɛ hom nngyee patriarch nhiyra no a, mma hom nnhaw! Ɔson obiara no sunsum mu mber. Sɛ edzi mfe 35 anaa 85 na ewɔ pɛ a, enye wo bishop nkã eregye wo nhyira no ho asɛm.
Asɔrmba afoforfo, ana hom atse patriarch nhyira no ho asɛm? Ber a modɔɔm Asɔr no nna minnyim kwan no ho asɛm dɛ mebɛgye dɛm nhyira no ho, naaso me bishop dɔfo kãa patriarch nhyira ho asɛm kyerɛɛ me na ɔhyɛɛ me nkuran dɛ mensiesie moho nkɛgye medze wɔ m’enuma ekyir. Asɔrmba afoforfo adɔfo, hom so hom botum agye patriarch nhyira. Ewuradze bɔboa hom ma hom ayɛ ahoboa ama dɛm kwan krɔnkrɔn yi.
Hom ma yɛnhwɛ patriarch nhyira ne siantsir ebien:
-
Patriarch nhyira no kitsa ankorankor afotu fi Ewuradze hɔ ma wo.2
-
Patriarch nhyira da w’ebusua a ifi mu wɔ Israel fifo mu no edzi.
Wo patriarch nhyira yɛ asɛm fi wo Ɔsor Egya hɔ na anohoba horow na nkenyan afotu ka ho ara ma wo a ɔbɛma wo akwankyerɛ wɔ w’abrabɔ mu nyinara. Patriarch nhyira no rennkyerɛ w’abrabɔ no kwan nyina anaa onnkeyi wo nsɛmbisa nyina ano. Sɛ ɔammbɔ abrabɔ ne fã bi a ohia do wɔ mu a, ɔno nnkyerɛ dɛ nnkenya dɛm kwan no. Dɛm ara so, ɔnnkyerɛ dɛ adze biara a ɔwɔ wo nhyira no mu no bɛba mu wɔ dɛm abrabɔ yi mu. Patriarch nhyira no yɛ onnyiewiei, na sɛ ebɔ bra tseneenee a, anohoba horow a wɔannhyɛ mã wɔ ɔbra yi mu no bɛba mu wɔ dza ɔreba no mu.3
Sɛ wo nsa kã ebusuakuw a ifi mu no a, ebɛba ebohu dɛ eka Israel fifo ho na eyɛ Abraham n’asenyi.4 Ama aatse iyi ne mfaso ase no, tsim wɔ anohoba a Ewuradze dze bɔɔ Israel fifo a odua Abraham do no do.
Dza ɔka anohoba noho nye:
-
“N’asefo bɔdɔr (hwɛ Genesis 17:5–6; Abraham 2:9; 3:14).
-
“N’aba, anaa n’asefo, benya asɛmpa no na woekitsa asɔfodzi no (hwɛ Abraham 2;9).
-
“Ɔnam n’asefo hɔn somdwuma do, ‘asaase do ebusua ebusua nyinara [wobe]hyira hɔn, wɔdze Asɛmpa no ne nhyira mpo, dza ɔyɛ nkwagye ne nhyira no, onnyiewiei nkwa mpo’ (Abraham 2:11).”5
Dɛ yɛyɛ Asɔrmba yi, yɛyɛ ahyɛmu mba.6 Yenya Abraham ahyɛmudzi no ne nhyira ber a yɛyɛ setsie ma mbra no na Asɛmpa n’ayɛdze horow no.
Ahosiesie a eyɛ ma wo patriarch nhyira no bɔboa ato wo gyedzi wɔ Ɔsor Egya na Jesus Christ hɔn mu. Na sɛ egye wo patriarch nhyira no na ekenkan na edwendwen ho a, itum tsim wɔ Hɔn do yie mpɛn pii.
President Thomas S. Monson kyerɛkyerɛɛ mu dɛ, “Ewuradze kor noara a ɔdze Liahona maa Lehi no ndɛ da yi so ma emi na ɔwo akyɛdze a ɔsom bo yi na ama ɔaama hɛn bra akwankyerɛ, ɔaada dza ɔbɛhaw hɛn ahobambɔ edzi, na ɔaabɔ kwan no, mpo bambɔ kwan—nnyɛ dza wɔdze kɔ anohoba asaase bi do, mbom dze kɔ hɛn ɔsor fie.”7
Me bishopfo, awofo, elderfo hɔn quorum na Relief Society presidentfo, ward aɛmpasomafo baanodzifo, mbanyin na nkyerɛbaa asomfo, meserɛ hom mfa nkuranhyɛ mma young men na young women, asɔrmba mpanyimfo, na asɔrmba afoforfo a wonnyae nngyee hɔn patriarch nhyira no dɛ wɔnhwehwɛ Ewuradze n’akwankyerɛ nye mboa mfa nsiesie hɔnho nkɛgye.
Metaa dze mpaabɔ kenkan me patriarch nhyira; daa ɔma me nkuranhyɛ. Muhu dza Ewuradze rohwehwɛ efi mo hɔ, na ɔaboa me ma meenu moho na maayɛ ahobrɛadze. Sɛ mekenkan na modwendwen ho a, minya pɛ dɛ mobɔbɔ bra a ɔfata a medze bɛgye anohoba nhyira a ɔwɔ mu no.
Dɛ ma kyerɛwsɛm a yɛakenkan no mpɛn pii ma hɛn ntseasee fofor ekyir no, dɛm ara so hɛn patriarch nhyira no bɛma hɛn ntseasee fofor wɔ mber fofor mu. Medze no ma me ntseasee fofor sesei kyɛn mber a nna medzi mfe 30 na ber a nna medzi mfe 50. Nnyɛ dɛ nsɛm no sesã, mbom yehu nsɛm no wɔ kwan fofor do.
President Dallin H. Oaks kãa dɛ patriarch nhyira “wɔnam Sunsum Krɔnkrɔn ne nkenyan do ma na ɔsɛ dɛ yɛkenkan na yɛkyerɛkyerɛ mu wɔ dɛm Sunsum noara ne nhyɛdo ase. Patriarch nhyira n’asekyerɛ na ne hia no wɔbɛkyerɛkyerɛ no nkakrankakra wɔ mber mu a ɔnam Sunsum noara a okenyanee no no tum do.8
Nuambanyin na nkyerɛbaa, megye dase dɛ Ɔsor Egya na No Dɔba a Ɔwoo no Kortoo, Ewuradze Jesus Christ tse ase. Wɔdɔ hɛn. Patriarch nhyira yɛ akyɛdze krɔnkrɔn a ofi Hɔn hɔ. Sɛ egye wo nhyira no a, ibohu na atse mbrɛ Wosi dɔ wo nka na mbrɛ Wotsim wɔ wo do dɛ ankorankor.
Mormon Nwoma no yɛ Jesus Christ ahyɛmu kor so. Na ɔyɛ me enyisɔ dɛ nkɔnhyɛnyi tseasefo, President Russell M. Nelson dzi me kan.
M’enyi sɔ hɛn Agyenkwa, Jesus Christ. Dɛm Easter Kwesida yi mebetsim wɔ Ɔno na No Wusoɛr no do na masom No na maada ase wɔ N’afɔrbɔ no ho. Minyim dɛ Ɔberɛe kɔr bun mu osiandɛ Ɔdɔ hɛn mapã. Minyim dɛ Ɔsoɛree osian No dɔ a Ɔwɔ ma hɛn no ntsi. Ɔwɔ hɔ ampara. Megye ho dase wɔ Jesus Christ Ne dzin mu, amen.