Kaa Dza Ohia Papaapa
Dza ohia papaapa nye hɛn nkitahodzi a yɛnye Ɔsor Egya na No Dɔba, hɛn ebusua ebusua, na hɛn fipamfo wɔ, na yɛrema Ewuradze no Sunsum ama hɛn kwankyerɛ.
Ber a dapɛn ewiei yi yɛkaa Agyenkwa Ne Jerusalem nhɛnmu konyimdzi mu na annkyɛr No werdam afɔrbɔ no, mekaa N’enyidado na awerɛkyekye nsɛm: “Emi nye wunyan no, nye nkwa no: nyia ɔgye me dzi no, owu mpo a, ɔbɛtsena ase.”1
Modɔ No. Megye No dzi. Megye dase dɛ Ɔno nye Wusoɛr na Nkwa no.
Dasegye yi ama me awerɛkyekye na ɔahyɛ me dzen mfe anan na fã yi a me yer Barbara, fii mu no. Mafe no.
Mataa adwendwen hɛn onnyiewiei awar na hɛn abrabɔ a yɛbɔɔ mu tsenae no ho.
Medzi kan akyɛ mbrɛ misii hyiaa Barbara ahyɛse no na mbrɛ dɛm sũahu no kyerɛɛ me ma medze “erokɔ do hwehwɛ” su a meesũa no wɔ m’asɛmpakã no dzi dwuma. Yedzii kan hyiae ekyir no, nna ɔwɔ dɔ mokɔ do hwehwɛ no, osiandɛ nna noho yɛ fɛw, ɔayɛ atsenka, na ɔwɔ dwumadzi pii yɛ. M’enyi gyee noho ahyɛase noara osiandɛ nna ɔpɛ nyimpa. Ne papayɛ yɛɛ me ahomka. Menyaa atsenka dɛ emi na ɔno yɛyɛ adze kor. Nna m’adwen mu no, ɔnnyɛ dzen.
Emi na Barbara puei, na hɛn nkitahodzi hyɛɛ ase dɛ orutuw, naaso nna ɔyɛ n’adwen mu konsee wɔ emi na ɔno awar ho.
Emi minyim no nko nnwie yie, nna ɔsɛ dɛ Barbara so hu ma noho. Nna minyim dɛ sɛ yɛhwer mber kyen kɔm na yɛbɔ mpaa wɔ asɛm no ho a, Barbara botum enya pisi a ofi sor.
Yedzii dapɛn ewiei kor a yɛmmpue ama yeetum akyen kɔm na yɛabɔ mpaa ankorankor dze ehu ama hɛnho. Adom mu ara, onyaa pisi kor noara a minyae no. Nkaa no, dɛ mbrɛ wɔse no, nnyɛ ɔkã kyerɛ.
Ber a Barbara fii mu no, hɛn mba krukyii adzesuadze pii a Barbara pɛɛ dɛ wɔkaa no wɔ ne nda ɔbo-tsir no do. Adzesuadze no mu kor nye “dza ohia kɛse nye dza ɔkyɛr papaapa.”
Ndɛ mifi m’akoma mu mekyɛ atsenka na adwendwen wɔ dza ohia papaapa no.
Odzi Kan, nkitahodzi a yɛnye hɛn Ɔsor Egya na Ne Ba, Ewuradze Jesus Christ wɔ no, nye dza ohia tsitsir. Nkitahodzi yi hia papaapa sesei na afebɔɔ mu.
Otsĩa Ebien, ebusua nkitahodzi kã ndzɛmba a ohia papaapa no ho.
Mo somdwuma mu no, makɛsera ankorankor na ebusua ebusua dodow a ɔdomakoma esian ahwe hɔn. Pii fii hɔn efiefi, ɔkɔm dze hɔn, na nna wosuro. Wohia ayarhwɛ, edziban, na dabew.
Wohiaa hɔn ebusua ebusua so.
Muhu binom dɛ bia worinnya ebusua a ɔbɛn hɔn ne nhyira, ntsi medze ebusuafo, anyɛnkofo, na ward ebusua ebusua kã ho dɛ “ebusua.” Nkitahodzi yinom hia ma nkã-tse na honandua mu apɔwmutse.
Nkitahodzi horow yinom so botum ama ɔdɔ, enyigye, ahomka, na mbɛkã ho atsenkã.
Yɛrenyɛn nkitahodzi yinom a ohia kɛse yi yɛ nsanmuyi. Nsanmuyi dɛ ibɛkã ebusua ho no hia pisi, ɔdɔ, abotar, nkɔmbɔdzi, na bɔnfakyɛ.2 Mber bi bɛba a enye obi nnkɛyɛ adwen, na yebotum yɛayɛ dɛm a ayawdze remmba. Awar anyɛnkoyɛ na awar mu no, yɛnndɔ hɛnho na yenngyae dɔ tse dɛ ma yɛyɛ agordze bi a obi pĩapia hɛn. Yɛsan mu yi dɛ yɛbɔdɔ na yɛama hɛnho abamba. Yɛyɛ dɛmara wɔ ebusua nkitahodzi mu na yɛnye anyɛnkofo a wɔtse dɛ ebusua ma hɛn no.
Ebusua dawurbɔ no kã dɛ “enyigye ho nhyehyɛɛ krɔnkrɔn no tum ma ebusua nkitahodzi kɔ do wɔ owu ekyir. Ayɛdze krɔnkrɔn na ahyɛmudzi a wɔyɛ no wɔ temple krɔnkrɔn mu no, ma ankorankor kwan ma wotum san kɔ Nyankopɔn n’enyim na ɔma ebusua kã bɔ mu afebɔɔ.”3
Adze kor so a ohia papaapa nye iridzi Sunsum ne nkenyan no do wɔ nkitahodzi tsitsir horow mu na wɔ hɛn mbɔdzembɔ dɛ yɛbɔdɔ hɛn anyɛnkofo dɛ hɛnankasa hɛn ho, a hɛn kokoa mu na bagua do somdwuma kã ho. Musũaa adzesuadze yi wɔ m’abrabɔ mu ber a ahyɛse noara morosom dɛ bishop no.
Ewimbir awɔwber nwinwin a esukwankyɛba atɔ no, mirifi me bishop ɔfese no menyaa nkenyan dzendzen dɛ menkɛsera kunafo panyin bi a ɔwɔ ward no mu. Mohwɛɛ me watse do ntsɛmara—nna ɔabɔ anafua 10:00. Modween ho dɛ adze asa dodow a mobɔkɔ nsera a ɔtse dɛm. Na esukwankyɛba so rotɔ. Misii ngyinae dɛ mobɔkɔ akɛsera akyerɛbaa dɔfo yi adzekyee noara kyɛn dɛ mebahaw no anafua sesei. Mekãa me kaar kɔr fie na mekɛdae naaso menntum annda anafua no osiandɛ nna Sunsum no rununu me.
Adzekyee ahanamakye noara, mekãa kaar ntsɛmara kɔr kunafo no ne fie. Ne babaa na ɔgyee do wɔ abow n’ano a ɔdze sũ rese dɛ, “O, bishop, medaase dɛ aba. Me maame twaa mu kɔree no dɔnhwer ebien nye yi”—obubuu me. Mowerɛ nnkefir da m’akoma mu atsenka no. Musũi. Woana na bia ɔfata kyɛn kunafo dɔfo yi dɛ no bishop bosuo ne nsa mu, akyekye no werɛ, na bia ɔama no ne nhyira a odzi ewiei? Menntum ennya dɛm kwan no osiandɛ medze m’adwen bubui hweer nkenyan dzendzen a ofi Sunsum no.4
Nuambanyin na nkyerɛbaa, young men na young women, Primary mbofra, megye dase dɛ iridzi Sunsum ne nkenyan do no nye ndzɛmba mu kor a ohia papaapa wɔ hɛn nkitahodzi nyina mu.
Ewiei no, Mberɛkɔnson Kwesida dapɛn ewiei yi, megye dase dɛ eresakyer aba Ewuradze hɔ, eregye No ho dase, na erosom No so kã ndzɛmba a ohia papaapa no ho.
Gyedzi wɔ Jesus Christ mu nye hɛn dasegye ne fapem. Dasegye yɛ onnyiewiei nokwar a odua Sunsum Krɔnkrɔn no mu hɛn ankorankor akoma na akra mu ho dase anaa pisi. Jesus Christ ho dasegye, a ofi Sunsum na ɔhyɛ no dzen no, sesa hɛn abrabɔ—sesa mbrɛ yɛdwen na mbrɛ yesi bɔ bra. Dasegye daan hɛn kɔ Ɔsor Egya na Ne Ba krɔnkrɔn no do.
Alma kyerɛkyerɛɛ dɛ:
“Hwɛ, megye dase kyerɛ hom dɛ minyim dɛ dɛm ndzɛmba yinom a makã ho asɛm yi yɛ nokwar. Na hom si dɛn hu dɛ minyim dɛ ɔyɛ nokwar?
“Hwɛ, mese hom dɛ Nyame no Sunsum Krɔnkrɔn no na ɔdaa no edzi kyerɛɛ me. Hwɛ, makye kɔm na mabɔ mpaa nda pii ama mankasa meehu dɛm ndzɛmba yinom. Na afei mankasa mehu dɛ ɔyɛ nokwar; osiandɛ Ewuradze Nyankopɔn nam no Sunsum Krɔnkrɔn no do ada no edzi akyerɛ me.”5
Erenya dasegye nko nndɔɔ sõ. Ber a hɛn nsakyeree ba Jesus Christ hɔ renyin no, yɛpɛ dɛ yɛgye No ho dase—Ne papayɛ, ɔdɔ, na ayamuyie.
Yɛtaa dɛ dasegye nhyiamu akɔnkye Kwesida no, yɛtse kasasin horow dɛ, “Medaase” na “modɔ” kyɛn yɛbɛtse kasasin “minyim” na “megye dzi.”
Moto nsa frɛ hom dɛ hom ntaa ngye hom dasee wɔ Jesus Christ ho. Gye dase wɔ dza inyim na egye dzi na dza enya ho atsenka, nnyɛ dza ewɔ ndaase wɔ ho ara. Gye wankasa wo sũahu a edze bae bohun na edɔɔ Agyenkwa no, edze Ne nkyerɛkyerɛ robɔ bra, na No ɔpon a ɔma hɛn tum ho dase. Ber a egye wo dasee wɔ dza inyim, egye dzi, na enya ho atsenka, no, Sunsum Krɔnkrɔn no besi nokwar no pi ama hɔn a woritsie wo dasegye no enyiberdo no. Wɔbɛyɛ dɛm osiandɛ wɔahwɛ wo dɛ abɛyɛ Jesus Christ ɔkadofo asomdwee mu. Wobohu eyɛ N’osuanyi n’asekyerɛ. Wobenya atsenka bi a wɔnntsee no pɛn. Dase a ɔyɛ wansawansa fi akoma a ɔasesa mu na Sunsum Krɔnkrɔn no tum botum asoa akɔ binom a woebue hɔn akoma no mu.
Hɔn a wɔtse biribi osian wo dasegye ntsi bia nkyii wobebisa Ewuradze wɔ mpaabɔ mu ma woesi wo dasegye no no nokwar pi. Afei na wobotum ehu ama hɔnho.
Nuambanyin na nkyerɛbaa, Megye dase na meyɛ dasefo ma hom dɛ minyim dɛ Jesus Christ nye wiadze Agyenkwa na Pomfo no. Ɔtse ase. Ɔno nye Nyame Ne Ba a Ɔasoɛr efi owu mu no, na iyi nye N’Asɔr, a No nkɔhyɛnyi na asomafo dzi ne kan no. Mobɔ mpaa dɛ dabi sɛ mudua mu kɔ wiadze a odzi do no a, medze dasegye a ɔredzɛw hyɛnhyɛn akɔ.
Mo somdwuma mu no, mesũa dɛ dza ohia papaapa nye hɛn nkitahodzi a yɛnye Ɔsor Egya na No Dɔba, hɛn ebusua ebusua, na hɛn fipamfo wɔ, na yɛrema Ewuradze no Sunsum ama hɛn kwankyerɛ wɔ dɛm nkitahodzi no mu ama yeetum aagye dase wɔ ndzɛmba a ohia papaapa na ɔkyɛr yie no ho. Jesus Christ ne dzin mu, amen.