Jesus Christ nye Awofo hɔn Ahoɔdzen

Elder Dieter F. Uchtdorf ne Kasae

Ɔkã Asomafo Duebien no hɔn Quorum no ho

Boa wo mbofra ma wɔnkyekyer gyedzi wɔ Jesus Christ mu, wɔndɔ N’asɛmpa na N’Asɔr; na wɔnyɛ ahoboa ma tsenenee nsanmuyi wɔ hɔn abrabɔ nyina mu.

Dakor bi, nna egya bi rifi fie akɔ bishop na n’apamfo ewimbir nhyiamu. Ne mfe-anan babaa begyinaa n’enyim a ɔhyɛ n’atar a wɔdze da na okitsa Book of Mormon Stories.

Obisaa dɛ, “Dɛn ntsi na ɔwɔ dɛ ekɔ nhyiamu?”

Obuaa dɛ, “Osiandɛ meyɛ ɔpamfo wɔ bishopric mu.”

“Na eyɛ m’egya!” ne babaa no ammpen.

Obuu nkotodwe wɔ baaba no enyim. Ɔkãa dɛ, “Ɔdɔ, minyim dɛ epɛ dɛ mekenkan kyerɛ wo ama ɔaaboa wo ma aada, naaso anafua yi ɔsɛ dɛ moboa bishop.”

Ne babaa no bua dɛ, “Ana bishop no onnyi egya a ɔbɔboa no ma ɔaada a?”

Yɛdze ndaase a onnyiewiei ma hɛn asɔrmba dodow a wɔsom enyiberdo wɔ Jesus Christ N’Asɔr mu daa daa. Hom afɔrbɔ yɛ krɔnkrɔn ampaara.

Naaso dɛ mbrɛ ɔyɛ dɛ ma basiaba yi enya ho ntseasee no, biribi so wɔ hɔ a ɔyɛ krɔnkrɔn dɛmara—biribi a wonnkenya ho nhyɛananmu—ɔfa ɔwofo a ɔretsetse ba ho. Ɔkyerɛ ɔsor nhwɛdo no.¹ Hɛn Egya a ɔwɔ Sor, hɛn Ɔwofo Krɔnkrɔn, N’enyi gye ampaara ber a Ne mba hɔn asaase do awofo kyerɛkyerɛ na wɔtsetse hɔn.²

Awofo, yɛda hom ase wɔ dza hom reyɛ nyina dze rohwɛ hom mba. Na mba, yɛda hom ase wɔ dza hom reyɛ nyina dze rohwɛ hom awofo, osiandɛ dɛ mbrɛ ɔwofo biara nyim no, yɛtaa sũa adze ara yie fi hɛn mbofra hɔ a ɔfa gyedzi, enyidado, na ayamuyie ho tse dɛ ma wosũa fi hɛn hɔ no!³

Awofo wɔ Asodzi Krɔnkrɔn

Ana hom adwen ho pɛn dɛ ɔyɛ esian kɛse ma hɛn Egya a ɔwɔ Sor ber biara a ɔsoma ba kor ma ɔba asaase do? Woyinom yɛ No sunsum mu mbabanyin na mbabaa. Nkrabea a ɔmmbɔadze na wɔwɔ. Wɔahyehyɛ ato hɔn hɔ dɛ wɔbɛyɛ papayɛ, adom, na nokwar enyimnyam abɔdze. Naaso wɔba asaase do a wonnyim hɔnho do hwɛ, a wonntum nnyɛ biribiara gyedɛ wosũ dze hwehwɛ mboa. Nkataenyim efura hɔn mber a wodzii wɔ Nyame enyim ho nkaa, na hɔn nyimpa ban na onyia wobotum abɛyɛ ho nyimdzee. Wonya abrabɔ, ɔdɔ, Nyame, na Ne nhyehyɛɛ ho nyimdzee wɔ dza wohu wɔ nkorɔfo a woetwa hɔnho ehyia hɔ—nkankara hɔn awofo, a, nokwar ara hɔn so wɔda ho rinya ndzɛmba ho ntseasee ma hɔnho.

Nyame ama awofo “dwuma krɔnkrɔn dɛ wɔtsetse hɔn mba wɔ ɔdɔ na tseneneeyɛ mu, wɔma hɔn honandua na sunsum mu ehiadze, wɔkyerɛkyerɛ hɔn ma … wodzi Nyankopɔn Ne mbrasɛm do.”⁴

Ɔno dɔɔ sõ ara yie ma awofo mapã mpo nnkɛda anafua.

M’asɛm a medze ma awofo nyina nye iyi:

Ewuradze dɔ hom.

Ɔnye hom wɔ hɔ.

Ogyina hom nkyɛn.

Ɔno nye hom ahoɔdzen wɔ hom mbofra kwankyerɛ ma wɔayɛ nsanmuyi tsenenee mu.

Hom ngye ndzinoa na asodzi yi nto mu akokodur mu na enyigye mu. Mma hom mmfa ɔsorsor nhyira fibea yi nnhyɛ obiara nsa. Asɛmpa mu su pa na fapem nhyehyɛɛ mu no, hom nye nkorɔfo a hom bɛma hom ba kwankyerɛ wɔ ne daa daa abrabɔ adwenpɔwbɔ ho nsɛm ho. Boa wo mbofra ma wɔnkyekyer gyedzi wɔ Jesus Christ mu, wɔndɔ N’asɛmpa na N’Asɔr; na wɔnyɛ ahoboa ma tsenenee nsanmuyi wɔ hɔn abrabɔ nyina mu. Nokwar, ɔno nye Nyame ne nhyehyɛɛ ma awofo.

Satan bɔkõ etsia wo, adan w’enyi, abɔ mbɔdzen egura w’abaw.

Naaso ba biara enya Christ ne Kan dɛ nhyɛdo akɔntsen a ofi sor. Na Agyenkwa no bɔboa wo, ama wo kwankyerɛ, na Ɔahyɛ wo nkuran. Hwehwɛ No mboa. Bisa Ewuradze!

Tse dɛ ma Jesus Christ yɛ mbabun hɔn ahoɔdzen no, dɛmara na Jesus Christ yɛ awofo hɔn ahoɔdzen.

Ɔtserɛw Ɔdɔ mu

Ɔtɔfabi a yɛbɔdwen dɛ ana obiara nnyi hɔ a ɔfata sen hɛn dɛ ɔbɛma hɛn mba kwankyerɛ na wɔakyerɛkyerɛ hɔn. Mbom ɔmmfa ho atsenka biara a inya dɛ emmfata no, ɔwo na ewɔ biribi soronko a ɔsɛ: wo dɔ ma wo ba.

Ɔwofo no dɔ ma ne ba nye tum a ɔyɛ ndam kɛse no mu kor wɔ wiadze nyina mu. Ɔyɛ asaase yi do ndzɛmba kumaa mu kor a obotum ayɛ onnyiewiei ampaara.

Afei, bia ibenya atsenka dɛ wo nkitahodzi a enye wo ba wɔ no nndzi mu nnwiei. Ha na Agyenkwa no tum no ba mu. Ɔsa ayarfo no yarba, Obotum asa nkitahodzi ho yarba. Ɔbɔɔ paanoo na nam ho pii, Obotum abɔ ɔdɔ na dɛwdzi a ɔwɔ wo fie ho pii.

Wo dɔ ma wo mbofra dze ehuoo pa a wɔdze kyerɛkyerɛ nokwar na wɔdze kyekyer gyedzi bɔbɔ adze. Ma wo fie nyɛ mpaabɔ, adzesũa, na gyedzi fie, enyigyedze sũahu fie; bea a obiara ka ho; Nyame fie.⁵ Na “fa akoma mu ahoɔdzen nyina bɔ mpaa mma Egya no, ama ɔdze [No] dɔ yi aahyɛ [wo] mã, dza ɔdze gu hɔn a wɔyɛ ne Ba Jesus Christ n’akadofo do no.”⁶

Ɔtserɛw Mbɔdzembɔ Nketsenketse mu

Ahoɔdzen kor so a ewɔ, dɛ ɔwofo no, nye daa daa nhyɛdo a ɔkɔ do. Mfɛfo, akyerɛkyerɛfo, na hɔn a wɔayɛ atsenkã ba na wɔkɔ. Naaso ɔwo na ibenya daa nhyɛdo wɔ w’abofra n’abrabɔ do ne kɛse.

Wo mbɔdzembɔ bɛyɛ dɛ adze ketseaba sɛ edze toto ndze dedeede a wo mba tse no wiadze mu ho a. Ɔtɔfabi ibenya atsenka bi dɛ erennyɛ dodow biara. Naaso kaa dɛ “ɔnam akwan nketsenketse do nna Ewuradze [tum dze] ndzɛmba akɛse dua ba.”⁷ Fie ewimbir nhyiamu kor, asɛmpa ho nkɔmbɔdzi kor, anaa fasusu pa kor no, bia onnkotum asesa w’abofra n’abrabɔ ber noara mu, tse dɛ ma nsu tɔw kor nnkotum ama eduadzewa efir ntsɛmara. Mbom erokɔ do reyɛ ndzɛmba nketsenketse, daa daa, no ma wo mbofra yɛ prɔmprɔm kyɛn dakor bi nsuyirii⁸

Ɔno nye Agyenkwa no kwan. Ɔdze ndze tseabaa kasa kyerɛ ɔwo na wo ba, nnyɛ ndze a ɔbobɔmu.⁹ Nnyɛ “adze kɛse bi do” na Ɔsaa Naaman yarba, mbom ɔnam nhohoree ara a ɔkɔr do yɛɛ do.¹⁰ Israel fifo nyaa nkokohwerɛw dzii mee wɔ sar no do, mbom dza ɔgyee hɔn nkwa nye manna—hɔn daa daa edziban anwanwadze ketseabaa no.¹¹

Enuanom na nkyerɛbaa, fie na oye koraa dɛ wɔyɛ daa daa edziban na wɔkyekyɛ. Gyedzi na dasegye nya abamba wɔ daa akwan mu, nkakrankakra, wɔ mber nketsenketse a ɔda famu mu, wɔ daa daa abrabɔ mu.¹²

Ber biara yɛ adzekyerɛ ber. Kasafua na ndzeyɛɛ biara botum ayɛ nsanmuyi ho kwankyerɛ.¹³

Bia innkohu wo mbɔdzembɔ no nsunsuando hɔnara. Naaso, mma hom mmpa abaw. “Ɔsɛ dɛ ndzɛmba nyinara ba mu wɔ hɔn aber do,” Ewuradze akã. “Dɛm ntsi, mma hom mmberɛ wɔ papayɛ ho, osiandɛ hom rotow dwumadzi kɛse bi ne fapem.”¹⁴ Ebɛn edwuma na ɔbɔsõ asen eroboa Nyame ne mba a wosom bo esũa hɔn nyimpa ban ho asɛm na atow hɔn gyedzi wɔ Jesus Christ, N’asɛmpa, na N’Asɔr mu? Jesus Christ behyira wo na Ɔakrɔn wo mbɔdzembɔ a ekɔ do yɛ no.

Ɔma Nyikyerɛ

Kwan kor so a ɔyɛ ndam a Ewuradze dze ma awofo abamba nye Odua ankorankor nyikyerɛ akyɛdze do. Nyankopɔn ayɛ krado dɛ Obohue No Sunsun dze ama awofo kwankyerɛ.

Ber a ebɔ mpaa na inya Sunsum mu atsenka no, Ɔbɔbɔ wo esian horow a woesuma ho kɔkɔ.¹⁵ Obeyi wo mbofra hɔn akyɛdze horow, hɔn ahoɔdzen, na hɔn akadadwen a wommbue ano nnkãa nnkyerɛ wo no.¹⁶ Nyame bɔboa wo ma ehu wo mbofra dɛ mbrɛ Osi hu hɔn—atra dza opue enyiwa do dze ahwɛ hɔn akoma mu.¹⁷

Edze Nyame no mboa no, ibotum esũa ehu wo mbofra wɔ kwan tsen na ɔsor kwan do. Moto nsa frɛ wo dɛ gye kwankyerɛ a Nyame dze ma w’ebusua a odua ankorankor nyikyerɛ do ma no to mu. Hwehwɛ N’akwankyerɛ wɔ wo mpaabɔ mu.¹⁸

Nsakyer Kɛse bi

Bia mboa a ho hia kɛse a Jesus Christ dze ma awofo nye akoma “nsakyer kɛse” no.¹⁹ Ɔyɛ anwanwadze a hɛn mu kor biara hia.

Mber tsiabaa mu no, susu dɛm gyinabew yi ho: Ewɔ asɔrdan mu, iritsie asɛnkã a ɔfa ebusua ebusua ho. Nyia ɔrekasa no kã fie a odzi mu na mpo ebusua odzi mu koraa ho asɛm. Okun na ɔyer no nnham da. Mbofra no gyaa hɔn kyerɛwsɛm akenkan ara nna ber aso dɛ wɔyɛ skuul adzesũadze. Na ndwom “Hom Ndodɔ Homho Nkorkor”²⁰ robɔ gyegye wɔ hɔ. Ansaana nyia ɔrekasa no bodu bea a obiara dze enyigye bosuo mu ma woesiesie eguaree no, nna ahyɛ ase dada rodwen dɛ, “M’ebusua ayɛ gyan.”

Enuanom na nkyerɛbaa adɔfo, hom nto hom bo! Obiara a ɔwɔ mboanofo no mu no rodwen adze kor noara ho. Nokwar, ɔhaw awofo nyina dɛ wɔrennyɛ awofo pa ara yie.

Adom mu ara, mboa a ofi sor wɔ hɔ ma awofo: Ɔno nye Jesus Christ. Ɔno nye Akoma mu nsakyer kɛse ne farbaa.

Ber a ibue w’akoma mu ma Agyenkwa no na Ne nkyerɛkyerɛ no, Ɔbɛkyerɛ wo wo mberɛwyɛ. Sɛ edze ahobrɛadze akoma twer Jesus Christ a, Ɔbɛma ndzɛmba a ɔyɛ mberɛw no ahyɛ dzen.²¹ Ɔyɛ Nyankopɔn a ɔyɛ anwanwadze.

Ana ɔno kyerɛ dɛ ɔwo na w’ebusua bedzi mu pɛpɛɛpɛ? Oho. Mbom ebɛyɛ yie kakra. Ɔnam Agyenkwa no n’adom do, nkakrankakra no, ibotu mpon yie wɔ su pa horow a awofo hia: ɔdɔ ma Nyame na Ne mba, abotar, etuhoakyɛ, gyedzi wɔ Christ mu, na akokodur a wɔdze yɛ nsanmuyi pa.

Jesus Christ dua N’Asɔr mu ma Abamba

Hɛn mbɔdzembɔ dɛ yɛbɛkyekyer gyedzi wɔ Jesus Christ mu no, fie nye ne fapem na otsim ankorankor do. Na Asɔr ma no abamba. Kyerɛwsɛm krɔnkrɔn na nkɔnhyɛfo hɔn nsɛm a ɔdze ma ekyir no, Agyenkwa no N’Asɔr ma mboa ho ndzɛmba pii ma awofo na mbofra ayɛ tsenenee nsanmuyi:

• For the Strength of Youth: A Guide for Making Choices mma wo dza ɔsɛ dɛ wɔyɛ na wɔnnyɛ a wɔakyerɛw no nkorkor. Ɔkyerɛkyerɛ onnyiewiei nokwar a ɔboa ma eyɛ nsanmuyi a otsim Jesus Christ n’abrabɔ na nkyerɛkyerɛ do. Enye wo mbofra nkenkan. Ma wɔnkã ho nsɛm. Boa hɔn ma onnyiewiei nokwar krɔnkrɔn yi mma hɔn nsanmuyi horow ho kwankyerɛ.²²

• FSY ehyiadzi yɛ mboa ho adze nwanwa. Mowɔ enyidado dɛ babun biara bɔkɔ. Moto nsa frɛ young single adultfo dɛ wɔnkã ehyiadzi yinom ho dɛ akwankyerɛfo na apamfo. Moto nsa frɛ awofo dɛ wontoa sunsum mu ahoɔhar pa no a hɔn mbabun dze fi FSY ehyiadzi no ba fie no do.

• Mbofra na mbabun a wɔwɔ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu no wɔ akyerɛkyerɛfo, apamfo, na akwankyerɛfo. Ɔtaa dɛ ber a ohia kɛse mu na wɔhɛn basirba n’abrabɔ mu dze kyekyer gyedzi na wɔma dasegye abamba. Hom mu binom yɛ single adultfo. Hom mu binom innyaa homankasa hom mba dabiarada. Hom som enyigye mu ara ma Nyame ne mba no yɛ adze krɔnkrɔn wɔ Nyame enyiwa mu.²³

Mma Mmpa Abaw wɔ Anwanwadze no mu

M’anyɛnkofo adɔfo, mo nuanom na nkyerɛbaa adɔfo erekyekyer gyedzi wɔ abofra mu no tse dɛ eroboa nhyerɛn ma oefir. Innkotum atwe no dua no ma ɔayɛ tsentsen. Inkotum apaa nhyiren aba no mu ma ɔahan ntsɛm. Na innkotum egyaa nhyiren no do hwɛ na enyi ada dɛ ɔnoara benyin anaa ɔabɛyɛ prɔmprɔm.

Dza ibotum na otwar dɛ eyɛ ma ebusuasantsen a wɔreba no nye ebɛma asaase frɔmfrɔm a ɔsor nsu pem fa do. Iyiyi efuw na biribiara a obesiw ɔsor ewia n’enyim. Ehyehyɛ tsebea a oye ara yie a ɔbɛma woenyin. Abotar mu ara ema kwan ma ebusuasantsen a wɔreba no yɛ nkenyan nsanmuyi, na ma Nyame nyɛ N’anwanwa dwuma. Nsunsuando no bɛyɛ fɛɛfɛw na ahobow na enyigyedze akyɛn biribiara a wankasa botum ayɛ.

Ɔsor Egya ne nhyehyɛɛ mu no, ebusua ebusua nkitahodzi wɔdɛ ɔyɛ onnyiewiei. Iyi nye siantsir a, eyɛ ɔwofo yi, onnyi dɛ epa abaw dabiarada, sɛ dza wɔabɛsen dadaw no nnyɛ wo enyisɔ mpo a.

Yɛnye Jesus Christ, Owura Ayarsafo na Agyenkwa no, ahyɛse fofor botum awɔ hɔ aber biara; Ɔma enyidado aber biara.

Jesus Christ nye ebusua ebusua hɔn ahoɔdzen.

Jesus Christ nye mbabun hɔn ahoɔdzen.

Jesus Christ nye awofo hɔn ahoɔdzen.

Eyi na megye ho dase wɔ Jesus Christ ne dzin mu, amen.

Nsɛnsin

1. “Dza ɔhyɛ ɔwofo biara mu nye ɔpɛ dɛ ɔbɛkyerɛkyerɛ ne mbofra suban pa. Iyi kã Ɔsor Egya Ne nhyehyɛɛ anwanwadze no ho. Ɔpɛ dɛ Ne mba ba asaase yi do, na wodzi onnyiewiei ebusua ebusua nhwɛdo a ɔwɔ sor no do. Ebusua ebusua yɛ ɔsorsor onnyiewiei fapem tɔw, na dɛm ntsi Ɔpɛ dɛ ɔyɛ asaase so do fapem tɔw. Asaase do ebusua ebusua nndzi mu koraa dze, naaso wɔma Nyame ne mba kwan a ɔkrɔn ma wɔma hɔn akwaaba ba wiadze, a wɔdze asaase do ɔdɔ nko a ɔbɛn dza yenyaa ho atsenka wɔ ɔsor no—awofo hɔn dɔ no, gye hɔn. Ebusua ebusua nye kwan mapã a wotum akora su pa na nokwar fapem a obotum egya hɛn akɔ Nyame enyim do na wɔdze akyerɛkyerɛ no do” (Henry B. Eyring, “Gathering the Family of God,” Liahona, Esusow Aketseaba 2017, 20).

2. Nokwar, yenyim dɛ nnyɛ ber biara na wɔbɛyɛ Nyame ne pɛ “wɔ asaase do, dɛ mbrɛ wɔyɛ no sor” (Matthew 6:10 Honanduamu baatanyɛ nnye dza Nyame ahyehyɛ dɛ ɔsɛ dɛ ɔyɛ no nnsɛ koraa. Ampaara Ohu no dɛm. Obosũ ara yie wɔ awerɛhow na akomayaw a ɔwɔ ebusua nkitahodzi mu. Naaso Ɔmmpaa abaw wɔ ebusua ho. Na Ɔnnkɛpa abaw so, osiandɛ Nyankopɔn wɔ enyimnyam nhyehyɛɛ ma Ne mba hɔn onnyiewiei nkrabea. Na nhyehyɛɛ ne fapem nye ebusua no.

3. Hwɛ Matthew 18:1–5; Mosiah 3:19.

4. “Ebusua No: Dawurbɔ a wɔdze ma Wiadze,” ChurchofJesusChrist.org; hwɛ Nkyerɛkyerɛ na Ahyɛmudzi 68:25–28 so.

5. Hwɛ “Learning at Home Is Founded on Relationships,” Teaching in the Savior’s Way: For All Who Teach in the Home and in the Church (2022), 30–31; hwɛ Nkyerɛkyerɛ na Ahyɛmudzi 109:8 so.

6. Moroni 7:48.

7. 1 Nephi 16:29; hwɛ Alma 37:6–7 so.

8. Hwɛ “Learning at Home Consists of Small, Simple, Consistent Efforts,” Teaching in the Savior’s Way 31. President David O. McKay kyerɛkyerɛɛ dɛ: “Mma hom mma yɛnndwen dɛ osiandɛ ndzɛmba binom … yɛ ketseaba na osuar koraa ntsi, hɔn ho nnhia. Ewiei koraa no, ndzɛmba nketsenketse na ɔhyɛ abrabɔ mã. Hɛn nkwa, hɛn nyimpa mu, honandua mu, gyina akoma a ɔtow nkorkor do. Ma akoma kakraba no nngyaa tow, nna wiadze yi mu abrabɔ no aba ewiei. Ewia kɛse no yɛ tum a ɔyɛ ndam wɔ wiadze mu, mbom yenya ne nhyira fi [ne] hyerɛn mu osiandɛ ɔtow ba hɛn do nhyerɛnee nketseaba mu a, ne nyina bɔ mu dze ewia ne kan hyɛ wiadze nyina mã. Nworaba nketsenketse hɔn nhyerɛn ketseaba mu na ɔma anafua sum mu gyegye ahomka mu ara; na dɛm ntsi Christianyi nokwafo n’abrabɔ no yɛ Christ-saso ndzeyɛɛ a wɔyɛ no dɔnhwer yi mu, sema yi mu—wɔ fie” (Teachings of Presidents of the Church: David O. McKay [2003], 219).

9. Hwɛ Helaman 5:30.

10. Hwɛ 2 Ahemfo 5:9–14.

11. Hwɛ Exodus 16.

12. Hwɛ “Preparing Your Children for a Lifetime on God’s Covenant Path,” Come, Follow Me—For Individuals and Families: New Testament 2023, abɔekyir (internet do nko).

13. Hwɛ “Learning at Home Can Be Planned but Also Spontaneous,” Teaching in the Savior’s Way, 31; 1 Peter 3:15.

14. Nkyerɛkyer na Ahyɛmudzi 64:32–33.

15. Hwɛ Matthew 2:13.

16. Hwɛ Alma 40:1; 41:1; 42:1.

17. Hwɛ 1 Samuel 16:7.

18. Hwɛ 1 Nephi 15:8.

19. Alma 5:13.

20. “Love One Another,” Hymns, nkanee 308.

21. Hwɛ Ether 12:27.

22. “Mbofra afamu no, asodzi a wɔdze ma suban pa ho kwankyerɛ no da awofo do. Wonyim ma ba kor biara tse, ne ntseasee na ne nyansaa. Awofo hwer hɔn mber nyina dze hwehwɛ dɛ wɔnye hɔn mba mu kor biara bɛkyekyer na woenya nkitahodzi pa. Gyinabew a ɔkrɔn na wɔwɔ mu dɛ wɔbɛyɛ abrabɔ mu adwenpɔwbɔ a ɔfa hɔn mba hɔn yieyɛ na asetsena pa ho” (James E. Faust, “The Weightier Matters of the Law: Judgment, Mercy, and Faith,” Ensign, Ɔberɛfɛw 1997, 54).

23. Mboa ho ndzɛmba ebien a ɔsɛ fata dɛ yɛkã ho asɛm nye: Afe yi Internet do Come, Follow Me ɔfã bi a wɔato no dzin “Preparing Your Children for a Lifetime on God’s Covenant Path.” Osusu adwenkyerɛ a ɔda famu, a fie nye ne fapem a wɔdze bɔboa mbofra ma wɔayɛ enuma na ahyɛmudzi na ayɛdze horow nkaa no ho ahoboa. Na Teaching in the Savior’s Way a wɔasakyer no fofor no wɔ ɔfã bi a wɔfrɛ no “Home and Family” [“Fie na Ebusua”] a ɔkyerɛ mbrɛ wobesi dze Christ-su adzekyerɛ ne fapem bedzi dwuma wɔ fie (hwɛ nkrataafa 30–31).