“Hom Ntsena Mo mu, na Mo so Mentsena Hom mu; Dɛm ntsi Enye me Nnantsew”

Elder David A. Bednar ne Kasaa

Ɔkã Asomafo Duebien no hɔn Quorum no ho

Agyenkwa N’anohoba dɛ Ɔbɛtsena hɛn mu no yɛ nokwar na ɔwɔ hɔ ma N’Asɔr a wɔdze asan ananmu aba n’ahyɛmu-siefo asɔrba biara.

Tsetse nkɔnhyɛnyi Enoch, a wɔakã no ho asɛm wɔ Ahyɛmu Dadaw, Nkyerɛkyerɛ na Ahyɛmudzi, na Bota a Ɔsom Bo Mapã mu no,¹ dzi akotsen wɔ Zion kuropɔn ne nkyerekyeree mu.

Kyerɛwsɛm mu nsɛm a ɔfa Enoch ne frɛ dɛ ɔnkɔsom no kyerɛ dɛ “ɔtsee ndze fi sor, se dɛ: Enoch, mebabanyin, hyɛ nkɔm kyerɛ nkorɔfo yi, na se hɔn dɛ—Hom nnu homho, … osiandɛ hɔn akoma ayɛ dzen, na hɔn aso esisiw, na hɔn enyiwa nntum nnhu ekyir.”²

“Na ber a Enoch tsee dɛm nsɛm yinom no, ɔbɔɔ no mu adze wɔ asaase no do … na ɔkasaa wɔ Ewuradze enyim, see dɛ: Ɔyɛ no dɛn na medzi bem wɔ w’enyim yi, na meyɛ abrantsɛ, na mo nkorɔfo nyinara kyir me; na me kasaa yɛ nyaa; ana meyɛ w’akowaa?”³

Meserɛ hom nhyɛ no nsew dɛ Enoch ne frɛ ber no dɛ ɔnkɔsom no, ohun nankasa n’esintɔ na mbrɛwyɛ horow. Na ɔyɛ me dɛ hɛn nyina wɔ hɛn Asɔr som ber bi mu no, yeenya atsenka tse dɛ Enoch. Naaso megye dzi dɛ Ewuradze no mbuae ma Enoch no ntotɔserɛ asɛmbisa no yɛ afotu a ɔfa hɛn mu kor biara ho ndɛ.

“Na Ewuradze see Enoch dɛ: Kɔ na kɛyɛ dza mahyɛ wo no: na obiara nnkotum epira wo. Bue w’ano, na wɔbɛhyɛ no mã, na mebɛyɛ wo kasamaafo. …

“Hwɛ mo Sunsum wɔ wo do, dɛm ntsi wo nsɛm nyinara mebɛgye ato mu, na mbepɔw nyinara boguan efi w’enyim, na esutsen bɛdan efi hɔn kwan do; na ebɛtsena mo mu, na mo so matsena wo mu; dɛm ntsi enye me nnantsew.”⁴

Ewiei no Enoch bɛyɛɛ nkɔnhyɛnyi okunyin na edwindadze wɔ Nyankopɔn nsamu dze yɛɛ edwuma kɛse, naaso ɔannhyɛ no somdwuma ase wɔ dɛm kwan no do! Mbom, mber rugu mu no, wɔtraa no mbɔdzembɔ mu ber a osũaa dɛ ɔbɛtsena Nyame Ne Ba no mu na ɔnye No anantsew no.

Mobɔ mpaa enyiberdo dze agye Sunsum Krɔnkrɔn no mboa ber a yɛbɔmu susu afotu a Ewuradze dze maa Enoch na mbrɛ n’asekyerɛ bɛyɛ ama emi na ɔwo ndɛ.

Ebɛtsena Mo mu

Jesus Christ tserɛw nsato no ma hɛn mu kor biara dɛ yɛbɛtsena No mu.⁵ Mbom yesi dɛn sũa na yɛba bɛtsena No mu ampaara.

Kasafua tsena kyerɛ ewɔ fakor anaa egyina yie na etsim a nnhihim. Elder Jeffrey R. Holland kyerɛkyerɛɛ dɛ “eretsena” dɛ nyɛe no kyerɛ dɛ ‘“[ibɛ]tsena—mbom [ibɛ]tsena afebɔɔ.’ Ɔno nye asɛmpa amandzɛɛbɔ ne frɛ ma … obiara … wɔ wiadze mu. Bra, mbom bra betsim. Fa pisi na tsimii bra. Bra a erennsan ekyir bio, ma ɔwoara ntsi na ebusuasantsen a otwar dɛ wodzi w’ekyir ntsi.”⁶ Dɛm ntsi, yɛtsena Christ mu ber a yesi pi na yegyina pintsii wɔ hɛn som ma Agyenkwa no na No botae krɔnkrɔn, wɔ mber pa na bɔn nyina mu.⁷

Yɛhyɛ ase tsena Ewuradze mu ber a yɛdze hɛn pɛ dzi dwuma dze fa No kɔndua no to hɛnho do⁸ yedua asɛmpa a wɔdze asan ananmu aba n’ahyɛmudzi na ayɛdze do. Ahyɛmu nkitahodzi a yɛnye hɛn Ɔsor Egya na Ne Ba tseasefo a Ɔasoɛr efi owu mu no nye hɛn nhumu, enyidado, asomdwee na enyigye a otsim; n’abɔso fibea⁹ ɔno do na ɔsɛ dɛ yɛtow hɛn abrabɔ.

Yɛtsena no Mu ber yɛkɔ do per dɛ yɛbɛhyɛ hɛn ankorankor ahyɛmu nkitahodzi a yɛnye Egya na Ɔba no wɔ no dzen. Mfatoho, yɛrobɔ mpaa nokwar mu ama Onnyiewiei Egya no wɔ No Dɔba ne dzin mu no, ma hɛn ahyɛmu nkitahodzi a yɛnye Hɔn wɔ no mu dɔ na ɔhyɛ dzen.

Yɛtsena No mu ber a nokwar mu ara yɛmee wɔ Christ ne nsɛm mu. Agyenkwa ne nkyerɛkyerɛ no twe hɛn dɛ, ahyɛmu mba no, bɛn No¹⁰ na ɔbɛkã ndzɛmba nyina a ɔsɛ dɛ [yɛ]yɛ akyerɛ hɛn.¹¹

Yɛtsena No mu ber a yɛyɛ ahosiesie enyiberdo dɛ yɛdze hɛnho bɛhyɛ sacrament ayɛdze no mu, yɛabobɔ do na yɛadwendwen hɛn ahyɛmudzi anohoba no , na yeenu hɛnho nokwar mu. Yeridzi sacrament no nokwar mu no yɛ dase kyerɛ Nyankopɔn dɛ yɛpɛ dɛ yɛdze Jesus Christ ne dzin to hɛn do na yɛbɔ mbɔdzen dɛ “yɛbɛkaa no aber nyina”¹² mber tsiabaa a ohia dɛ yɛdze hɛnho hyɛ ayɛdze krɔnkrɔn no mu no ekyir no.

Na yɛtsena No mu ber a yɛsom Nyankopɔn dɛ mbrɛ yɛsom Ne mba na yɛsom hɛn nuanom na nkyerɛbaa no.¹³

Agyenkwa no kãa dɛ, “Sɛ hom sie me mbransɛm a, hom bɛtsena mo dɔ mu, dɛ mbrɛ mo so mesie m’Egya ne mbransɛm na metsena no dɔ mu.”¹⁴

Makyerɛ mu tsiabaa akwan pii mu a Agyenkwa no botum atsena emi na ɔwo hɛn mu. Na afei moto nsa frɛ hɛn mu kor biara dɛ yɛyɛ N’esuafo no dɛ yembisa, yɛnhwehwɛ, na yɛmfa Sunsum Krɔnkrɔn no tum no nsũa mma hɛnho akwan ahorow binom so a oye a yebotum ama Christ ayɛ hɛn abrabɔ ne fapem wɔ dza yɛyɛ nyina mu.

Na Mo so wɔ Wo mu

Agyenkwa no n’anohoba ma N’akãdofo yɛ ahorow ebien: sɛ yɛbɛtsena No mu a, Ɔbɛtsena hɛn mu. Naaso ana ɔbɛyɛ yie dɛ Christ bɛtsena ɔwo na emi mu—ankorankor na hɛnankasa a? Asɛmbisa yi ne nyiano yɛ nyew a ɔgyegye ara yie!

Mormon Nwoma mu no yɛkenkaan Alma a ɔrekyerɛkyerɛ na ɔregye dase kyerɛ abrɛfo no a hɔn ahohiahia ahyɛ hɔn ma woenya ahobrɛadze no. Ne nkyerɛkyerɛ mu no, ɔdze asɛm no totoo aba a ɔsɛ dɛ wodua na wɔkora do, na ɔkyerɛɛ dɛ “asɛm no” tse dɛ Jesus Christ n’abrabɔ, somdwuma, na werdam afɔrbɔ no.

Alma kãa dɛ, “Hom nhyɛ ase ngye Nyankopɔn ne Ba no ndzi, ama ɔaaba abɔpon no nkorɔfo, na ɔbɛba ebohu amandze na oewu dze noho abɔ werdam etua hɔn bɔn; na dɛ ɔbɔsoɛr bio efi owu mu a ɔbɛma owusoɛr aba, ama adasa nyina aaba ebegyina n’enyim, ma oebu hɔn atsɛn dɛ mbrɛ hɔn ndwuma tse wɔ atsɛmbu da a odz i ewiei no mu.”¹⁵

Alma akyerɛ “asɛm no” mu dɛm yi, meserɛ hom nsusu nkenyan ntoado a nkyii ɔda no edzi.

“Na afei … mepɛ dɛ hom dua asɛm yi wɔ hom akoma mu, na sɛ ɔhyɛ ase dɛ ɔreyeyer a hom mfa hom gyedzi nkora do yie. Na hwɛ, ɔbɛyɛ dua, na oenyin wɔ hom mu dze akɔ daapem nkwa mu. Na Nyankopɔn ndua ne Ba no do mma hom adzesoa nyɛ har. Na sɛ hom pɛ nkotsee dze a hom botum mpo ayɛ iyi nyinara.”¹⁶

Aba no a ɔsɛ dɛ yɛper dua no wɔ hɛn akoma mu nye asɛm no—Jesus Christ n’abrabɔ, ɔsomdwuma, na ne nkyerɛkyerɛ mpo. Na dɛ gyedzi kora asɛm no do no, obotum abɛyɛ dua a onyin wɔ hɛn mu dze akɔ daapem nkwa mu.¹⁷

Ebɛnadze nye Lehi n’enyido-adzehu no n’asɛnkyerɛdze? Yebotum esusu dɛ dua no gyina hɔ ma Jesus Christ.¹⁸

Mo nuanom na nkyerɛbaa adɔfo, ana Asɛm no wɔ hɛn mu a? Ana Agyenkwa n’asɛmpa no mu nokwar no wɔakyerɛw no wɔ hɛn honam akoma pon do a?¹⁹ Ana yɛreba na nkakrankakra rebɛyɛ dɛ Ɔno? Ana Christ no dua no refir wɔ hɛn mu a? Ana yɛrobɔ mbɔdzen abɛyɛ “[abɔdze] fofor”²⁰ wɔ No mu?²¹

Bia anwanwadze a yebotum abɛyɛ yi na okenyaan Alma ma obisaa dɛ: “Ana Nyankopɔn awo hom wɔ sunsum mu? Ana no su da edzi wɔ hom enyim? Ana hom enya dɛm nsakyer kɛse yi wɔ hom akoma mu?”²²

Ewuradze n’ahyɛdze a Ɔdze maa Enoch no, ɔsɛ dɛ yɛkaa no aber nyina, “Ebɛtsena mo mu, na mo so mantsena wo mu²³ Na megye dase dɛ Agyenkwa n’anohoba dɛ Ɔbɛtsena hɛn mu no yɛ nokwar na ɔwɔ hɔ N’Asɔr a wɔdze asan ananmu aba n’ahyɛmu-siefo asɔrba biara.

Dɛm ntsi Enye me nnantsew.

Ɔsomafo Paul tuu agyedzifo a wɔgyee Ewuradze no dɛ: “hom nnantsew no mu dɛmara.”²⁴

Yɛrenantsew Agyenkwa no mu na yɛnye no renantsew no da osuanyiyɛ su ebien bi a ohia tsitsir edzi: (1) irisie Nyankopɔn ne mbrasɛm, na (2) erekaa ahyɛmudzi krɔnkrɔn a yɛnye Egya na Ɔba no nya ho nkitahodzi na iridzi no nyi.

John paa mu kãa dɛ:

“Na sɛ yedzi n’ahyɛdze do a, iyiara na yɛdze hu dɛ yenyim no.

“Nyia a ɔkã dɛ, Minyim no, na onndzi n’ahyɛdze do no, ɔyɛ ɔtor, na nokwar no nnyi no mu.

“Na obiara a odzi n’asɛm do, ɔno mu ampaara na Nyankopɔn dɔ dzi mu. Iyi na yɛdze hu dɛ yɛwɔ no mu.

“Nyia ɔkã dɛ ɔtse no mu no, ɔsɛ no dɛ ɔnantsew dɛ mbrɛ ɔno so nantsewee.”²⁵

Jesus to nsa frɛ hɛn mu kor biara dɛ, “Bra bɛka mo do”²⁶ na “enye me nnantsew.”²⁷

Megye dase dɛ ber a yɛdze gyedzi per kɔ kan no na yɛnantsew ɔdwe mu wɔ Ewuradze no Sunsum mu no,²⁶ wɔdze ahoɔdzen, bambɔ na kwankyerɛ hyira hɛn.

Dasegye na Anohoba

Alma kã ntotɔserɛ a ɔkɔ akra atseasefo nyina hɔ ɔdɔ mu ara a ofi Ewuradze:

“Hwɛ, ɔato ne nsa refrɛ adasa nyinara, na ɔatserɛw ehumbɔbɔr abasa no mu wɔ hɔn do, na ɔse: Hom nnu homho, na mebɛgye hom.

“… Hom mbra me nkyɛn na hom mbedzi nkwadua no n’eduaba; nyew, hom mbedzi nkwa paanoo na hom anom nkwa nsu no kwa.”²⁹

Mitsĩ mu kã dɛ Agyenkwa no ntotɔserɛ no wɔ hɔ ma obiara biara. Ɔpɛ dɛ Ɔdze N’adom na ehumbɔbɔr hyira nyimpa kor biara a sesei ɔtse ase, nyia ɔatsena ase pɛn, na hɔn a mbrɛana wɔbɛba abɛtsena asaase yi do.

Asɔrmba binom gye nkyerɛkyerɛ fapem, na dasegye horow a wɔtaa paa mu kã fi Ehyiadzi Asoɛe asɛnkãdaka na wɔ sɔn mboanofo mu wiadze nyina mu to mu dɛ ɔyɛ nokwar—naaso bia wɔdze per dɛ wɔbɛgye onnyiewiei nokwar yinom edzi dɛ ɔfa hɔnankasa hɔn abrabɔ na gyinabew ho. Wɔgye dzi ampaara na wɔsom yie, naaso hɔn ahyɛmu nkitahodzi a wɔnye Egya na No Ɔba pomfo no nnyaa mmbɛyɛɛ nkenyan nsakyer ampaara wɔ hɔn abrabɔ mu.

Mobɔ anohoba dɛ ɔnam Sunsum Krɔnkrɔn no tum do, hom botum ehu na woenya asɛmpa nokwar horow a maabɔ mbɔdzen akyerɛkyerɛ mu yinom dɛ ɔyɛ homdze—ma hom ankorankor na ankasa.

Megye dase enyigye mu ara dɛ Jesus Christ yɛ hɛn Agyenkwa na Pomfo. Sɛ yɛtse No mu a, Ɔbɛtse hɛn mu.³⁰ Na ber a yɛnantsew wɔ No mu na yɛnye no nantsew no Obehyira hɛn ma yɛasow abafua pii. Megye ho dase wɔ Ewuradze Jesus Christ ne dzin krɔnkrɔn no mu, amen.