Tsim wɔ Christ do
Ewuradze Jesus Christ nye hɛn ɔhaw horow ne nyiano, naaso otwar dɛ yɛma hɛn enyiwa do na yepegya hɛn adzehwɛ do dze ehu No.
Nna ɔyɛ m’egya kã kyerɛ me dɛ, “Mma ntsim dzendzen wɔ wo haw do ara ma nnkotum ehu ne nyiano.’’
Megye dase dɛ Jesus Christ nye hɛn nyiano mpo ma hɛn ɔhaw a ɔyɛ dzen dodoodow no. Tsitsir ara, Oedzi ɔhaw anan do konyim a hɛn mu biara hyia na dɛ hɛn mu kor biara nnkotum nankasa enya nyiano:
-
Ɔhaw a odzi kan nye honandua mu owu. Yebotum atweɔntweɔn anaa yeebu enyi egu do, naaso hɛnara yennkotum edzi do konyim. Naaso, Jesus Christ, dzii owu do konyim maa hɛn, na no nsunsuando no, dakor hɛn nyina bɔsoɛr efi owu mu.1
-
Atseetsee, nkõdzen suahu horow, ayawdzi, yaw, na wiadze yi ne nsisi kã ɔhaw a otsĩa ebien no ho. Jesus Christ dzii iyi nyina do konyim. Hɔn a wɔper dɛ wɔbɛka No do no, da kor bi “Ɔbɛpepa nyinsuwa nyina’’ na Ɔatsentsen ndzɛmba bio.2 Seseiara dze, Obotum ahyɛ hɛn dzen ma yɛdze awerɛhyɛmu, dzenhyɛ, na asomdwee edua hɛn nsɔhwɛ mu.3
-
Ɔhaw a otsĩa ebiasa nye sunsum mu owu a ofi bɔn. Jesus Christ dzii ɔhaw yi do konyim ber a ɔfaa “hɛn asomdwee ho ntsẽa’’ too No ho do.4 Osian No werdam afɔrbɔ ntsi, yebotum enya fahodzi efi hɛn bɔn no nsunsuando ho sɛ yɛwɔ gyedzi wɔ Agyenkwa no mu, nokwar ara yenu hɛnho, yɛgye ahyɛmudzi a Egya no nam ayɛdze etsitsir ahorow mu tse dɛ enuma, na yɛsɔw dze kɔ ewiei do dze ma hɛn no a.5
-
Ɔhaw a otsĩa anan nye hɛn ahoɔmberɛw awoosu a, osiw hɛn kwan. Jesus Christ wɔ anoyi ma ɔhaw yi so. Ɔmpepa hɛn mfom ara ma yendzi bem bio. Obotum ayɛ “nsakyer kɛse wɔ … hɛn akoma mu, a yeennyi pɛ biara bio dɛ yɛbɛyɛ bɔn, na mbom dɛ yɛbɛyɛ papa aber nyina.”6 Christ n’adom no botum ama yeedzi mu na dakor bi yɛabɛyɛ tse dɛ Ɔno.7
Awerɛhow mu ara, ɔtaa dɛ yɛdze hɛn adwen to hɛnara hɛn ɔhaw horow do dodoodow ma yenntum nntsim wɔ nyiano, hɛn Agyenkwa Jesus Christ do. Yesi dɛn bokwetsir dɛm mfomdo no? Megye dzi dɛ ne nyiano no gyina ahyɛmudzi horow a wɔserɛ hɛn dɛ yɛnye Ɔno na hɛn Egya a ɔwɔ Sor ndzi no do.
Yerudua Ahyɛmudzi horow do Etsim Jesus Christ do
Hɛn ahyɛmudzi horow no boa hɛn ma yɛkyɛn hɛn aso, hɛn adwendwen, na hɛn ndzeyɛe dze tsim Jesus Christ do. Sɛ “yesuo ahyɛmudzi horow a [yeedzi] mu a, ɔnnkɛyɛ dzen ama hɛn dɛ yebotum ehu “wiadze ndzɛmba’’ a ɔwɔ dɛ “yɛdze to nkyɛn’’ na yɛdze enyim pisi ahwehwɛ “ndzɛmba a ofir [wiadze]’’ bea pa.8
Dɛm na Ammon no nkorɔfo a wɔwɔ Mormon Nwoma mu no yɛe. Ber a wosũaa Jesus Christ ho asɛm na wɔhyɛɛ ase dze hɔn abrabɔ retsim No do no, wohun dɛ ɔwɔ dɛ wosie hɔn ɔkõ ho akõdze na wɔyɛɛ nokwafo emudzi mu ara na “wɔyɛɛ dansewa maa Nyankopɔn.’’9
Yerisie ahyɛmudzi gya hɛn ma yɛhwehwɛ adze biara a ɔma Sunsum ne nhyɛdo no ba na ɔpow adze biara a ɔpan no fi hɔ ekyir kwan—“osiandɛ yenyim dɛ sɛ yebotum afata dɛ Sunsum Krɔnkrɔn no nye hɛn bɛtsena a, yebotum so afata dɛ yɛbɛtsena Ɔsor Egya na Ne Ba, Jesus Christ hɔn enyim.’’10 Iyi n’asekyerɛ bɛyɛ dɛ yɛsesa hɛn kãsae, na yɛkã nsɛm apapa. Obotum akyerɛ dɛ yɛdze suban afofor a ɔhyɛ yɛnye Ewuradze nkitahodzi dzen dze hyɛ sunsum mu suban bɔn ananmu, tse dɛ dabaa mpaabɔ na kyerɛwsɛm adzesũa, ankorankor na yɛnye hɛn ebusua.
President Russell M. Nelson kãa dɛ “nyimpa kor biara a odzi ahyɛmu wɔ enuma nsubura mu na wɔ temple mu no—na osie no—nya Jesus Christ no tum ho kwan ntowdo. …
“Irisie ahyɛmudzi a enye Nyame dzi n’akatua nye ɔsorsor tum—tum a ɔhyɛ hɛn dzen ma yetum gyina hɛn haw, nsɔhwɛ, na akomayaw ano yie.”11
Yɛreyɛ hɛn ahyɛmu fofor wɔ sacrament ber Kwesida biara no yɛ kwan kɛse dɛ yɛs] hɛnho hwɛ12 na yɛsan dze hɛn abrabɔ tsim Jesus Christ do. Yeridzi sacrment no, yɛpaa mu kã dɛ “yɛbɛkaa no aber nyina.’’13 Kasafua aber nyina yɛ soronko dodow. Ɔtserɛw Agyenkwa ne nhyɛdo mu wɔ hɛn abrabɔ ne beebiara. Yɛnnkaa No wɔ asɔr nko anaa wɔ hɛn anapa mpaabɔ ber nko mu anaa sɛ yɛwɔ esian na yehia biribi mu nko.
Nyew, ɔtɔfabi a hɛn adwen fi do. Hɛn werɛfir. Yenntsim. Naaso yɛreyɛ hɛn ahyɛmu fofor no kyerɛ dɛ yɛpɛ dɛ yɛkaa Agyenkwa no aber nyina, na yɛbɔbɔ mbɔdzen ayɛ so dapɛn no nyina, na dɛ yɛbɛsan ayɛ enyimpi na yɛasan etsim wɔ No do bio wɔ sacrament pon no ho dapɛn a odzi do no.
Yeritsim Jesus Christ do wɔ Hɛn Efiefi
Ɔyɛ pefee dɛ, otwar dɛ yeritsim wɔ Jesus Christ do no tra Kwesida, wɔ asɔr dwumadzi. Mber a President Nelson dze Bra, Bɛka Mo Do too gua wɔ 2018 mu no, ɔkãa dɛ “Mber asõ ma fie-Nhyiamu.’’14 Ɔkãa dɛ ɔwɔ dɛ “yɛsesa [hɛn] fie ma ɔyɛ gyedzi guandɔbea’’ na “asɛmpa adzesũa asoe.’’ Na ɔbɔɔ hɛn anohoba nwanwa anan sɛ yɛyɛ a,15
Anohoba a odzi kan “Hom Ahomgyeda nokwar ara bɛyɛ enyigyedze.’’ Ɔbɛyɛ da a yɛtwe bɛn hɛn Agyenkwa no yie. Dɛ mbrɛ akataasia bi a ofi Peru kãe no, “Ewuradze ne da nye da menya nyiano dodowara fi Ewuradze hɔ.’’
Anohoba a otsĩa ebien “Hom mba enyi bɛgye dɛ wobosũa Agyenkwa ne nkyerɛkyerɛ na wɔdze abɔ bra.” Siantsir yi ntsi, “yɛkã Christ ho asɛm, yedzi dɛw wɔ Christ mu, yɛbɔ Christ ho asɛmpa no dawur, … ama hɛn mba eehu fibea kor a ɔsɛ dɛ wɔkɔ kɔhwehwɛ hɔn bɔnfakyɛ.”16
Yɛyɛ iyi ama dabi, sɛ hɛn babanyin kɔ kɛyɛ edwuma, anaa okotu mpasar wɔ mbepɔw do, anaa ɔkɔ haban mu koku mboa, dɛ mbrɛ Enos yɛe no a, ɔakaa dza yɛkyerɛɛkyerɛ no wɔ Christ ho no na idze asɛmpa no robɔ bra ne dɛwdzi ho asɛm. Na woana nyim? Ebia iyi bɛyɛ da a afei ɔbɛtse sunsum mu kɔm no yie a ɔdan no ba Jesus Christ hɔ ama oetum aatse Ewuradze ne ndze a ɔrese no dɛ, “Wɔdze wo bɔn akyɛ wo, na wobehyira wo.’’17
Anohoba a otsĩa ebiasa: “Ɔsɛɛfo ne nhyɛdo wɔ w’abrabɔ na wɔ wo fie no do bohuan.” Dɛn ntsi a? Osiandɛ mber dodow a yetsim wɔ Jesus Christ do no, mber dodow a bɔn nnyɛ akɔndɔ a.18 Sɛ Agyenkwa ne kan no hyɛ hɛn efiefie mã a, nna kwan biara nnkɛda hɔ ama ɔsɛɛfo no sum no.
Anohoba a otsĩa anan: “Nsakyer wɔ w’ebusua mu bɛyɛ nwanwa na ɔbɔkɔdo.’’ Dɛn ntsi a? Osiandɛ nsesa a Jesus Christ dze ba no yɛ “nsakyeree kɛse.’’19 Ɔsakyer hɛn awosu ankasa; yɛbɛyɛ “abɔdze fofor.’’20 Nkakrankakra yɛbɛyɛ tse dɛ Agyenkwa no yie, a No dɔ mapã ma Nyankopɔn ne mba nyina hyɛ hɛn mã.
Woananom na wɔnnkɛpɛ dɛ anohoba yinom bɛhyɛ hɔn abrabɔ na hɔn ebusua ebusua mu mã? Ebɛnadze na ohia dɛ yɛbɛyɛ dze enya? Nyiano no nye dɛ ɔbɛsesa hɛn efiefie ma wɔayɛ gyedzi guandɔbea na asɛmpa adzesũa asoe. Na ntsi yesi dɛn yɛ no dɛm? Ber a yeritsim Ɔsor Egya na Jesus Christ do, a yɛreyɛ hɔn hɛn ebusua abrabɔ no kotowdo-bo, nhyɛdo a ohia dodoodow wɔ hɛn fie.
Mubotum esusu dɛ hom dze Christ ne nsɛm, a yehu no wɔ kyerɛwsɛm mu no dze bɛhyɛ ase aka hom dabaa abrabɔ ho? Nhyehyɛɛ biara nnyi hɔ a wɔakyerɛw ama kyerɛwsɛm nsũae a odzi mu. Obotum ayɛ sima 5 anaa 10 da biara—anaa sɛ ibotum a ɔabordo. Obotum ayɛ tsir kor anaa nyiyimu kakra da kor. Ebusua ebusua binom pɛ anapa adzesũa ansaana wɔakɔ skuul anaa edwuma. Binom so pɛ anafua akenkan ansaana wɔakɛda. Awarfo nkumabaa bi akã akyerɛ me dɛ wɔyɛ ankorankor adzesũa ber a wɔrokɔ edwuma na nkyii wodua text do nye hɔnho kyɛ nhumu no, ntsi no wɔdze hɔn nsɛm na mpɛnsapɛnsamu no ko efir do.
Bra, Bɛka Mo Do ma dwumadzi horow ho adwenkyerɛ na mboa pii a wobotum aboa ankorankor na ebusua ebusua ma woesũa asɛmpa fapem no efi kyerɛwsɛm no mu. Bible na Mormon Nwoma no video ahorow no so botum ayɛ edwindze a wɔsom bo ma w’ebusua no enya kyerɛwsɛm no kwan yie. Ɔtaa dɛ nkaadze nsɛm a ɔwɔ kyerɛwsɛm mu no kenyan mbabun na mbofra. Nsɛm yinom, na asɛmpa fapem a wɔkyerɛkyerɛ, nye mbofra no bɛtsena dɛ nyɛnko pa, sɛ wohia ɔsom, ndzepa, setsie, abotar, penkyɛr, ankorankor nyikyerɛ, ayamuyie, ahobrɛadze, na gyedzi wɔ Jesus Christ mu ho mfatoho papa a. Mber resen no, hom nwɔwdo wɔ wɔremee wɔ Nyame n’asɛm mu no bɔboa ma hom mba enyin abɛnbɛn Agyenkwa no yie. Wɔbɛba ebohu No yie akyɛn nkaano no.
Ewuradze Jesus Christ tse ase ndɛ. Obotum ahɛn, abɛhyɛ hɛn daadaa abrabɔ mu. Ɔno nye hɛn ɔhaw horow ne nyiano, naaso otwar dɛ yɛma hɛn enyiwa do na yepegya hɛn adzehwɛ dze ehu No. Ɔakã dɛ, “Hom nhwɛ me wɔ hom adwendwen biribiara mu; mma hom nngye kyim, mma hom nnsuro.’’21 Sɛ yetsim wɔ Ɔno na hɛn Egya a ɔwɔ Sor do, yɛnye Hɔn dzi ahyɛmu, na yɛ ma Wɔyɛ nhyɛdo a ohia dodoodow wɔ hɛn fie na ebusua mu a, yɛbɛyɛ nkorɔfo a President Nelson hun hɔn no: “Nkorɔfo a wobotum, wɔayɛ krado, na wɔfata dɛ wobehyia Ewuradze sɛ Ɔsan ba bio a, nkorɔfo a wɔasan mu eyi Jesus Christ dada akyɛn wiadze a ɔahwe ase yi, nkorɔfo a wodzi ehurusi dɛ wɔdze hɔn pɛ bɔbɔ Jesus Christ ne mbra krɔnkrɔn, na ɔkrɔn ho bra.’’22 Jesus Christ ne dzin mu, amen.