Ewuradze Jesus Christ Kyerɛkyerɛ Hɛn dɛ Yɛnsom
Yɛdze hɛn Agyenkwa no mboa no, yebotum adɔ No nguan a wɔsom bo na yɛasom hɔn dɛ mbrɛ Ɔbɛyɛ no.
Ewuradze Jesus Christ see dɛ:
“Emi nye oguanhwɛfo pa no: oguanhwɛfo pa no dze no nkwa to hɔ ma nguan no. …
“Dɛ mbrɛ Egya no nyim me na minyim Egya no: na medze mo nkwa moto hɔ ma nguan no.”1
Kyerɛwsɛm yi ne Greek kasa dze no, kasafua a ogyina hɔ ma pa ɔkyerɛ “fɛɛfɛw, kɛse” so. Ntsi ndɛ mepɛ dɛ mekasa fa Oguanhwɛfo Pa, Oguanhwɛfo Fɛɛfɛw, Oguanhwɛfo Kɛse no, mpo Jesus Christ ho.
Ahyɛmu Fofor no mu no, wɔfrɛ No “[nguan]hwɛfo kɛse,”2 Oguanhwɛfo panyin,”3 na “[hɛn] akra hɔn Guanhwɛfo nye Hwɛdofo.”4
Ahyɛmu Dadaw no mu no, Isaiah kyerɛwee dɛ “Ɔbɛnyɛn no nguankuw dɛ oguanhwɛfo.”5
Mormon Nwoma no mu no, wɔfrɛ No “oguanhwɛfo pa”6 na “guanhwɛfo kɛse nokwafo.”7
Nkyerɛkyerɛ na Ahyɛmudzi mu no, Ɔpaa mu kã dɛ, “Dɛm ntsi, Mowɔ hom finmfin, na Emi nye oguanhwɛfo pa.”8
Hɛn mber yi mu, President Russell M. Nelson akã dɛ: “Oguanhwɛfo Pa no dze dɔ hwɛ no nguan a wɔwɔ no nguambuw no mu nyinara, na yɛyɛ No nguanhwɛfo nkuma anokwafo. Hɛn ndzinoa nye dɛ yɛdze No dɔ na hɛn ara so hɛn dɔ ma anyɛnkofo na mfɛfo—yɛrema edziban, yɛrohwɛ hɔn na yɛretsetse hɔn—dɛ ma nkyɛ Agyenkwa no bɛyɛ no.”9
Ndaansa yi ara, President Nelson akã dɛ: “Ewuradze No nokwar Asɔr a ɔtsease no ne nsɛnkyerɛdze daa bɛyɛ nhyehyɛɛ a wɔagye enyim akyɛrɛ a otsim mbɔdzembɔ do dɛ wɔbɔsom Nyankopɔn ne mba ankorankor na hɔn ebusua ebusua mu. Osiandɛ ɔyɛ N’Asɔr, na hɛn yɛyɛ N’asomfo ntsi yɛbɔsom ɔbaako no, dɛ mbrɛ Ɔyɛe no. Yɛbɔsom wɔ Ne dzin mu, a yɛdze No tum na tumdzi, na N’ayamuyie dɔ.”10
Ber a Phariseefo na akyerɛwfo hwinhwnii tsiaa Ewuradze, “dɛ, Oyi ɔgye ndzebɔnyɛfo, na ɔnye hɔn dzidzi”11 no, mbuae a ɔdze mae nye nsɛm dɛɛdɛw ebiasa bi a ndɛ yenyim hɔn dɛ oguan a ɔayew ho abɛbusɛm, sika a ayew ho abɛbusɛm, nna ɔba dzesɛɛfo abɛbusɛm.
Oye dɛ yɛbɛhyɛ no nsew dɛ ber a Luke, Asɛmpa kyerɛwfo no, rubue nsɛm ebiasa yi enyi no, ɔdze kasafua bɛ wɔ ankonam mu hyɛɛ ase, nnyɛ ɔdodow.12 Ɔyɛ dɛ nna Ewuradze dze nsɛm ebiasa rekyerɛ adzesuadze soronko kor ase—nsɛm a nkanee horow wɔ mu: nguan 100, sika 10, na mbabanyin 2.
Mbom nkanee a odzi akõtsen wɔ nsɛm yinom mu kor biara mu nye nkanee kor. Na adzesuadze a yebotum afa wɔ dɛm nkanee no mu nye dɛ bia eyɛ guanhwɛfo kuma ma elderfo na hɔn a wɔrebɛyɛ elderfo nkorkor 100 wɔ wo elderfo quorum mu anaa eyɛ fotufo ma young women 10 anaa kyerɛkyerɛnyi ma Primary mbofra 2, naaso daa daa esom hɔn, ehwɛ hɔn na edɔ hɔn nkorkor, ankorankor ara. Ennkã dabiara da dɛ, “Oguan kwasia bɛn nye yi” anaa dɛ “Ne nyina ekyir no, mennhyɛda ara nnhia dɛm sika no” anaa dɛ “Banyimba tuatsewfo bɛn nye yi.” Sɛ emi na ɔwo wɔ “Christ no dɔ mapã a,”13 nhɛn, tse dɛ banyin no a ɔwɔ oguan a ɔayew asɛm no mu no, “[be]gyaa eduokron akron no … na [yɛ]aka dza ayew no do, kodu [… kodu … kodu dɛ ye]bohu no.”14 Anaa tse dɛ ɔbaa no a ɔwɔ sika a ayew asɛm no mu no, “[bɔ]sɔ kandzea, na [yɛ]apra dan mu, na [yɛa]hwehwɛ yie, [… kodu … kodu dɛ [ye] ] bohu.”15 Sɛ yɛwɔ “Christ no dɔ mapã” wɔ hɛn nkyɛn a, yebedzi egya no a ɔwɔ ɔba dzesɛɛfo asɛm mu ne fasusu do, ɔno a nna babanyin no “ɔda ho wɔ ekyirkyir no, hun no, na ne yamu hyehyee no, na otuu mbirika kɛbaar no kɔn, na ofeew n’ano.”16
Ana yɛtse ahoɔhar hia a ɔwɔ banyin no a ɔyew guan kortsee no n’akoma mu nka a? Anaa ahoɔhar hia a ɔwɔ ɔbaa no a ɔyew sika kortsee no n’akoma mu? Anaa ɔdɔ mbordo na ayamuhyehye a ɔwɔ ɔba dzesɛɛfo n’egya n’akoma mu?
Emi na me yer, Maria Isabel, somee wɔ Central America finimfin afamu, nna yɛda Guatemala Kuropɔn. Hɔ no, minyaa kwan hyiaa Julia, Asɔrba nokwafo bi. Metsee nkenyan dɛ mimbisa no n’ebusua ase. Ne maame wui wɔ kokoram ho wɔ afe 2011. Nna ne papa ayɛ baanodzinyi nokwafo wɔ ne stake mu, a ɔasom dɛ bishop na ɔpamfo ma ne stake president mfe pii. Nna ɔyɛ oguanhwɛfo kuma mapã ma Ewuradze. Julia kãa no mbɔdzembɔ ara yie dɛ ɔbɛsera na ɔasom binom ho asɛm kyerɛɛ me. Nna n’enyi gye ampaara dɛ ɔnyɛn na ɔhwɛ Ewuradze no nguan a wɔsom bo. Ɔwar fofor na ɔkɔr do bɔɔ hyew wɔ Asɔr no mu.
Mfe kakraabi bi ekyir, ogyae awar, na nna ɔwɔ dɛ ɔno nko kɔ asɔr bio. Nna ɔtse nka dɛ ɔatɔ mu na ɔsan so tse nka dɛ binom kasa tsia no ɔnam n’awargyae no ntsi. Ogyae dɛ ɔrokɔ asɔr ber a sunsum bɔn hyɛɛ n’akoma mu mã.
Julia kãa kasa pa faa dɛm oguanhwɛfo kuma nwanwanyi yi ho, a nna ɔyɛ banyin a ɔyɛ edwumadzen, ɔyɛ dɔ, na ɔwɔ ayamuhyehye. Mekaa pefee dɛ metsee ahoɔhar hia ho nka ber a nna ɔrekã no ho asɛm no. Nna mepɛ dɛ meyɛ biribi dze ma banyin no, banyin a ɔayɛ pii ama nkorɔfo pii wɔ dɛm mfe dodow ne nyinara mu.
Ɔdze ne foon ‘number’ maa me na mehyɛɛ ase frɛɛ no, a nna mowɔ enyidado dɛ mibehyia no enyim na enyim. Adapɛn pii na foon do ɔfrɛɛ pii ara ekyir a oennkesi hwee no, dakor bi dze ɔfaa mo foon ɔfrɛ no.
Mekãa kyerɛɛ no dɛ mihyiaa ne babaa Julia, na dɛ mbrɛ oesi asom, na ɔadɔ Ewuradze no nguan a wɔ som bo mfe pii no yɛ me ahobow. Nna n’enyi nnda asɛm a ɔtse dɛm kwan. Mekãa kyerɛɛ no dɛ mepɛ dɛ menye no hyia enyiwa tua enyiwa, enyim na enyim. Obisaa mo botae ntsi a mepɛ dɛ mihyia no. Mubaa dɛ, “Mepɛ papaapa dɛ muhu akataasia nwanwafo a ɔtse dɛm n’egya.” Na simabaa kakra nna ɔayɛ dzinn wɔ foon no do—simabaa kakra a nna ɔyɛ me dɛ mfesantsen. Obisaa dɛ, “Dabɛn na wɔ hen?”
Da a mihyiaa no no, motoo nsa frɛɛ no dɛ ɔnye me nkyɛ no sũahu binom wɔ nsera na ɔsom a ɔdze maa Ewuradze no nguan a wɔsom bo no. Ber a ɔrekyɛ nsɛm a ɔkã akoma binom no, muhun dɛ ne ndze mu asesa na dɛm sunsum no a ɔtsee no mpɛn pii dɛ oguanhwɛfo kuma no sanee bae. Afei nna enyinsuwa ahyɛ n’enyiwa mu mã. Nna minyim dɛ mber pa ma me no ara nye no, naaso muhun dɛ nna minnyim dza menkã. Mobɔɔ mpaa wɔ m’adwen mu, “Egya, boa me.”
Mpofirmu ara, metsee dɛ merekã dɛ, “Nuabanyin Florian, dɛ meyɛ Ewuradze no somfo no, meserɛ bɔnfankyɛ dɛ nna yennyi hɔ amma wo. Meserɛ, fa kyɛ hɛn. Ma hɛn kwan bio ma yɛnkyerɛ wo dɛ yɛdɔ wo. Dɛ yehia wo. Dɛ woho hia hɛn.”
Kwesida a odzi do no ɔsanee bae. Ɔnye no bishop dzii nkɔmbɔ tsentseentsen na ɔkɔr do bɔɔ hyew. Abosoom kakraabi ekyir no owui—naaso nna ɔasan aba. Nna ɔasan aba. Megye dase dɛ yɛdze hɛn Agyenkwa no mboa no, yebotum adɔ No nguan a wɔsom bo na yɛasom hɔn dɛ mbrɛ Ɔbɛyɛ no. Ntsi, wɔ Guatemala Kuropɔn no mu hɔ no Ewuradze Jesus Christ dze oguan a ɔsom bo kor so sanee baa No nguambuw mu. Na Ɔkyerɛɛ me adzesũadze a mowerɛ nnkotum efir da. Wɔ Guanhwɛfo Pa, Guanhwɛfo Fɛɛfɛw, Guanhwɛfo Kɛse no, mpo Ewuradze Jesus Christ, ne dzin mu, amen.