Ana Meenya Bɔnfakyɛ Ampara a?
Bɔnfakyɛ korakoraa a odzi mu ho anohoba no wɔabɔ ama obiara—a ɔnam Jesus Christ No Werdambɔ a ɔmmbɔadze no do.
Mfe pii a abasen kɔ no, emi na Akyerɛbaa Nattress tuii kɛtsena Idaho, a yebuei edwumadzi fofor. Nna midzi mber pii wɔ ɔfese. Ndaase mu ara, nna bea a yɛtse na edwuma mu kwan nnwar. Dapɛn biara no, Shawna na hɛn mbasiamba baasa—hɔn nyina nndzi mmbor mfe esia—ba ɔfese ma yedzi ewiaber edziban bɔmu.
Da kor bi a nna ɔtse dɛm a nna ebusua no edzi ewiaber edziban ewie no, muhun dɛ hɛn mfe enum babasiaba, Michelle, egya mankasa asɛm bi a, ɔakyerɛw no wɔ asɛnsin krataa bi do na ɔdze hyɛɛ mo ɔfese tɛlefoon no ho.
Ne tsĩabaa nye dɛ, “Papa, kaa dɛ ibɔdɔ me. Ɔdɔ mu ara, Michelle.’’ Nna iyi yɛ nkaabɔdze a tum wɔ mu ma egya kumaba wɔ ndzɛmba a ohia dodow ho.
Nuambanyin na nkyerɛbaa, megye dase dɛ hɛn Ɔsor Egya kaa hɛn aber nyina na Ɔdɔ hɛn emudzi mu ara. M’asɛmbisa nye iyi: Ana yɛkaa No a? Na yɛdɔ No a?
Mfe pii abasen no, mosoom dɛ apaamu Asɔr baanodzinyi. Nna hɛn young men no mu kor, Danny, yɛ soronko wɔ kwan biara mu. Nna ɔyɛ setsie, ɔyɛ ayamuyie, ɔyɛ papa, na ɔwɔ akoma pa. Mbom, owiei nsɔwdo skuul no, ɔhyɛɛ ase dze no ho kɔbɔɔ mbofra bɔn kuw ho. Ɔhyɛɛ ase noom ndur bɔn, tsitsir ara methamphetamine, na ndur bɔn no noomee bɛyɛɛ ne tsir ho edwuma dze no kɔr ɔsɛe mu. Annkyɛr no, ne nyimpasu sesaa koraa. Nna ɔyɛ dzen dɛ ibotum ehu no. Nna nsesa tsitsir kor dodow wɔ n’enyiwa mu—nna kan a ɔwɔ n’enyiwa mu no ayɛ wusiwusi. Mber pii no mekɛseraa no, naaso oennkesi hwee. Nna ɔmmfa no ho.
Nna ɔyɛ dzen dɛ ibohu aberɛntsɛba soronko dɛ oruhu amandze na ɔrobɔ bra a nna ɔmmfata no! Nna ndzɛmba pa dodow wɔ hɔ a obotum ayɛ.
Afei da kor bi, n’awanwadze hyɛɛ ase.
Ɔkɔɔr sacrament nhyiamu a nna no nuabanyin kumabaa gyee ne dasee ansaana ɔrokɔ asɛmpakã. Nhyiamu ber no, Danny tsee biribi nkã a mber tsentsen no ɔnntsee bi nkã. Ɔtsee Ewuradze no dɔ nkã. N’ekyir no onyaa enyidado.
Kaansa nna ɔwɔ pɛ dɛ ɔsesa no, nna ɔyɛ dzen ma Danny. No ndurbɔn no nomee na afɔbu a ɔkã ho no bɔboor dza nkyɛ obotum asoa do.
Da kor ewiaber bi, ber a nna medze efir rutwitwi hɛn fie enyim efuw do no, Danny bae a ɔanntõ nkra. Nna oruhu amandze dodow. Muduum efir no, na yɛbɔɔ mu tsenaa nwin mu wɔ abrandaa n’enyim hɔ. Hɔ no na ɔhyɛɛ ase dɛ ɔrekã n’akoma mu nsɛm. Nokwar ara nna ɔpɛ dɛ ɔsan n’ekyir ba. Naaso, obefi ndurbɔn no nomee na abrabɔ bɔn ho no yɛ dzen ma no papaapa. Dza ɔkã ho no, enyitõ na afɔbu hyɛɛ no mã dodoodow dɛ ɔahwe ase dɛm. Obisaa dɛ, “Ana mubotum enya bɔnfakyɛ a? Kwan a wɔdze san ekyir wɔ hɔ ampara a?
Ɔkãa n’akoma mu ɔhaw yinom wiei no, yɛbɔɔ mu kenkaan Alma tsir 36 :
“Nyew, mekaa mo bɔn na m’emumuyɛ nyina. …
“Nyew, … Nyankopɔn n’enyim nkɔree ho adwendwen sunsuaan me kra mu pasapasa’’ (nyiyimu 13–14).
Nyiyimu ekyir no, Danny kãa dɛ, “Dɛm na metse no pɛpɛɛpɛ!’’
Yɛkɔɔr do:
“Ber a mo bɔn pii ho adwendwen rehaw me no, hwɛ, mekae so dɛ metsee dɛ m’egya rehyɛ nkɔm kyerɛ dɔm no fa obi a wɔfrɛ no Jesus Christ, a ɔyɛ Nyankopɔn ne Ba, a ɔreba abɔbɔ werdam dze etua wiadze bɔn no. …
“Na ao, ebɛn dɛw nye yi, na ebɛn kan nwanwa na muhunii yi’’ (nyiyimu 17, 20).
Ber a yɛrekenkan nsɛm yinom no no, nyinsuwa hyɛɛ ase dɛ orugu. Alma ne dɛwdzi nye dɛwdzi no a nna ɔrohwehwɛ!
Yɛpɛnsampɛsamu dɛ nna Alma n’emumuyɛ no yɛ soronko. Mbom, prɛko pɛr a onuu noho no, ɔannhwɛ n’ekyir bio da. Ɔbɛyɛɛ Jesus Christ no suanyi nokwafo. Ɔbɛyɛɛ nkɔnhyɛnyi! Danny n’enyiwa buei. Ɔkãa dɛ “Nkɔnhyɛnyi?’’
Mubuaa tsĩabaa dɛ, “Nyew, nkɔhyɛnyi. Nhyɛ biara nnyi wo do!’’
Yɛpɛnsampɛnsamu dɛ ber a no bɔn ennkodu Alma ne dze no, wɔabɔ bɔnfakyɛ korakoraa a odzi mu ho anohoba ama obiara—a ɔnam Jesus Christ No Werdambɔ a ɔmmbɔadze no do.
Afei Danny tsee ase. Ohun dza ohia dɛ ɔyɛ: ohia dɛ ɔhyɛ n’akwantu ase ber a onya awerɛhyɛmu wɔ Ewuradze mu na ɔdze nankasa ne bɔn kyɛ no ho!
Nna Danny n’akoma nsakyeree kɛse no yɛ anwanwadze. Mber rokɔ no, n’enyim sesae, na n’enyiwa mu hyerɛnee no sanee bae. Ɔfataa temple nkɔree! Ɔasan aba koraa!
Abosoom pii ekyir no, mibisaa Danny sɛ ɔbɛpɛ dɛ ɔdze nkrataa kɔ dɛ ɔbɔsom etuhoakyɛ-asɛmpakã dwuma. Nna no mbuae no yɛ ahobow na nwanwa.
Ɔkãa dɛ, “Modɔ pɛ dɛ mosom asɛmpakã dwuma, naaso inyim bea a nkyɛ mowɔ na ndzɛmba a m’ayɛ! Modween dɛ memmfata.’’
Mubuae dɛ, “Ebia ɔnoara na aka no. Mbom, biribiara so nnyi hɛn mmfi mu dɛ yɛbɛyɛ ebisadze no. Sɛ ɔamma wo kwan a, annyɛ koraa no ibohu dɛ ikyerɛɛ nokwar pɛ bi dɛ ebɔsom Ewuradze.’’ N’enyiwa gyee. Adwenkyerɛɛ yi yɛɛ no ahomka. Ɔno dze nna ɔwɔ enyidado kakra ara, naaso nna ɔpɛ dɛ ɔyɛ.
Adapɛn kakra ekyir no, na n’ahobow mu no, anwanwadze bi so sii. Danny nyaa ɔfrɛ dɛ ɔnkɔsom etuhoakyɛ asɛmpakã dwuma.
Abosoom kakra ekyir no a Danny koduur asɛmpakã mbewdo no, menyaa tɛlɛfoon ɔfrɛ. Ne president kãa no tsĩabaa mu dɛ, “Ebɛnadze ntsi na aberantsɛ yi tse dɛm? Ɔno nye asɛmpasomafo nwanwanyi dodow a meehu da!” Hom ehu, President yi enya ndɛ da yi Alma Kakraba.
Mfe ebien ekyir no, Dannyi dze enyidze sanee baa fie, a ɔdze n’akoma, n’ahom, n’adwen, na n’ahoɔdzen nyina soom Ewuradze.
Ɔbɔɔ n’asɛmpasomafo amandzɛɛ wɔ sacrament nhyiamu ekyir no, mesanee kɔr fie, a metsee kɔkɔɔkɔ wɔ abotsen abow no do. Nna Danny na ogyina hɔ a nyinsuwa ahyɛ n’enyiwa mu mã. Ɔkãa dɛ, “Ana yebotum akasa sima kor a?” Yepuei kɔr abrandaa n’atwerba kor noara do.
Ɔkãa dɛ, “President, egye dzi dɛ wɔdze mo bɔn akyɛ me ampara a?’’
Afei m’enyinsuwa bɛkãa ne dze ho. M’enyim hɔ ara na Jesus Christ n’osuanyi nokwafo a dza ɔwɔ nyina ɔdze mae dze kyerɛkyerɛe na ɔgyee Agyenkwa no ho dase gyinae. Nna ɔno nye Agyenkwa No Werdambɔ N’ayarsa na ahoɔdzen tum fasusu.
Mekaã dɛ, “Danny! Ahwɛ ahwehwɛ mu a?. Ehu w’enyiwa a? Kan ahyɛ mu mã, na Ewuradze no Sunsum ahyerɛn woho. Nokwar enya bɔnfakyɛ! Eyɛ nwanwa! Afei dza ohia nye dɛ ekɔ do bɔ wo bra. Mma nnsan nnhwɛ w’ekyir! Fa gyedzi kɔ ayɛdze a ɔtoa do no do na hwɛ kan.’’
Danny n’anwanwadze kɔ do ndɛ. Ɔwaree wɔ temple na ɔsanee kɔr skuul, a onyaa abɔdzin ntowdo. Ɔkɔ do dze enyidzi na enyimnyam som Ewuradze wɔ no ɔfrɛ horow mu. Ma ohia dodow no, ɔabɛyɛ kun nwanwanyi na egya nokwafo. Ɔyɛ Jesus Christ ‘n’osuanyi nokwafo.
President Russell M. Nelson kyerɛkyer{ɛ dɛ, “Sɛ [Agyenkwa] No Werdambɔ a ɔmmbɔadze nnyi hɔ a, nkyɛ adasamba nyina bɛyew a wɔnnkɛsan agye hɛn.’’1 Nna Danny nnyewee, na hɛn so yɛnnyewee mma Ewuradze. Ogyina abow n’ano dɛ Obepegya hɛn, Ɔbɛhyɛ hɛn dzen, na Ɔdze hɛn bɔn akyɛ hɛn. Ɔkaa aber nyina dɛ Ɔbɔdɔ hɛn!
Wɔakyerɛw Agyenkwa no dɔ nwanwa a ɔkyerɛ ma Nyankopɔn ne mba wɔ Mormon Nwoma no mu: “Ber a Jesus kãa dɛm wiei no, ɔdze n’enyiwa kɔr aprɔw bio wɔ nyimpadodow no do, na ohun dɛ nyinsuwa eguraa hɔn, na wɔhwɛɛ no hann tse dɛ ma wɔrohwehwɛ akã akyerɛ no ma oetsintsim wɔ hɔn nkyɛn kakra’’ (3 Nephi 17:5).
Nna Agyenkwa no edzi da mu no nyina dada a ɔsom nkorɔfo no. Mbom, nna Ɔwɔ beberee yɛ—nna Ɔwɔ dɛ ɔkɛsera No nguan bi so; nna Ɔwɔ dɛ ɔkɔ N’Egya hɔ.
Ahyɛdze yinom nyina ekyir no, Ohun dɛ nkorɔfo no pɛɛ dɛ Ɔwɔ hɔn nkyɛn kakra. Nkyii, Agyenkwa n’akoma a ayamuhyehye ahyɛ mu mã no, anwanwadze kɛsenara mu kor wɔ wiadze n’abakɔsɛm mu sii.
Ɔtsenaa hɔ.
Ohyiraa hɔn.
Ɔsoom hɔn mbofra nkorkor.
Ɔbɔɔ mpaa maa hɔn; Ɔnye hɔn suii.
Na Ɔsaa hɔn yarba. (Hwɛ 3 Nephi 17)
N’anohoba yɛ onnyieiwei: Ɔbɛsa hɛn yarba.
Hɔn a wɔaman efi ahyɛmu anamɔn kwan do no, meserɛ wonhu dɛ aber nyina enyidado wɔ hɔ, aber nyina ayarsa wɔ hɔ, na aber nyina kwan wɔ hɔ a ebɛsan dze aba.
N’onnyiewiei asɛm nye enyidado seradze ma hɔn nyina a wɔtse ɔhaw wiadze mu. Agyenkwa no kãa dɛ, “Emi nye ɔkwan no, nye nokwar no, nye nkwa no” (John 14:6).
Nuambanyin na nkyerɛbaa, hom mma yɛnkaa dɛ yɛbɔhwehwɛ No, yɛbɔdɔ No, na yɛbɛkaa No aber nyina.
Megye dase dɛ Nyankopɔn tse ase na Ɔdɔ hɛn. Mokɔ do gye dase dɛ Jesus Christ nye wiadze n’Agyenkwa na Pomfo. Ɔno nye ɔyarsafo tumfo. Minyim dɛ mo Pomfo tse ase! Jesus Christ ne dzin mu, amen.