Wo Patriarch Nhyira—Nkenyan Akwankyerɛ fi Ɔsor Egya hɔ

Elder Randall K. Bennett ne Kasaa

Ɔkã Eduosuon no ho

Me patriarch nhyira boaa me ma metsee me nokwar onnyiewiei su ase—me nyimpa ban na nyia mubotum abɛyɛ.

Awofo awanwafo a wɔdɔɔ hɔn mba na nokwar mu ara wɔkyerɛkyerɛɛ hɔn mba asɛmpa no na wɔtsetsee me. Awerɛhow mu ara, m’awofo adɔfo dzii aper wɔ hɔn awar mu mfe pii. Nna meyɛ Primary abofra ber wɔkãa kyerɛɛ me dɛ annyɛ a wobegyae awar da bi na obehia dɛ menye mo nuanom san mu yi ɔwofo kor a yɛnye no bɛtsena. No nsunsuando no, mfe pii no minyaa ahoper tsitsir; mbom, akyɛdze bi fi me Ɔsor Egya hɔ boae sesaa adzebiara maa me koraa—me patriarch nhyira.

Midzii mfe 11 no, mokɔɔr do hawee wɔ m’awofo hɔn nkitahodzi ho no, me patriarch nhyira kehiaa me papaapa. Minyim dɛ Ɔsor Egya nyim me papaapa na onyim me gyinabew horow etsitsir no.’’ Na minyim so dɛ mebenya akwankyerɛ efi No hɔ. Midzii mfe 12 ekyir ntsɛmara no, minyaa me patriarch nhyira. Ɔno yɛ bɔbor mfe ɔha ne fã a ɔabasen kɔ, naaso mekaa dɛm suahu krɔnkrɔn no ne nsɛm pefee.

Ndaase mu ara, yɛwɔ nkenyan akwankyerɛ fa patriarch nhyira ho wɔ Asɔr no ne General Handbook mu:

“Asɔrba nokwafo biara, a oenuma no na ɔfata no wɔ ho kwan dɛ ɔgye patriarch nhyira a ɔma nkenyan akwankyerɛ fi Ɔsor Egya hɔ.’’

Asɔrba “n’adwen mu wɔdɛ obue yie ama ɔaatse nhyira no su krɔnkrɔn na ne tsitsiryɛ ase’’ na “ɔatse asɛmpa ne fapem nkyerɛkyerɛ no ase.’’

“Oye dɛ asɔrba no n’enyi befir yie a abrabɔ mu adwenpɔwbɔ a ohia pii da ho wɔ no kan. … Onnyi dɛ asɔfodzi baanodzifo kyerɛ mfe a oye ma asɔrba dɛ ɔbɛgye patriarch nhyira. …

“Patriarch nhyira kor biara yɛ krɔnkrɔn, wɔmmfa nnto gua, na ɔyɛ ankorankor dze. …

“Nyimpa a ɔgye patriarch nhyira no wɔdɛ ne nsɛm no som no bo, ɔdwendwen ho, na ɔbɔ bra a ɔfata dɛ obenya anohoba nhyira no wɔ abrabɔ yi mu na wɔ mfesantsen mu.’’¹

Hɛn dɔfo President Russell M. Nelson esido akyerɛkyerɛɛ patriarch nhyira no ho hia ho asɛm,² dɛ ɔma ɔbaako biara a ɔgye no, “ebusua santsen ho asɛm dze kɔ Abraham, Isaac, na Jacob do’’³ na dɛ nhyira kor biara “yɛ ankorankor kyerɛwsɛm ma wo.’’⁴

Nna me patriarch nhyira yɛ adze tsitsir a ohia ma me mber a nna mosuar no wɔ siantsir pii ho. Odzi kan, ɔnam Sunsum Krɔnkrɔn no tum do, me patriarch nhyira boaa me ma metsee mo nokwar onnyiewiei su ase—me nyimpa ban na nyia mubotum abɛyɛ. Ɔboaa me ma muhun, dɛ mbrɛ Prsident Nelson akyerɛkyerɛ no, dɛ meyɛ Nyankopɔn “ne babanyin’’ “ahyɛmu [ba]’’ na “Jesus Christ no osuanyi.’’⁵ Muhun dɛ me Ɔsor Egya na m’Agyenkwa nyim me na wɔdɔ me na dɛ Wɔkã m’abrabɔ ho ankasa. Iyi boaa me ma menyaa pɛ dze twee bɛn Hɔn yie na me gyedzi na m’awerɛhyɛmu wɔ Hɔn mu no nyinii.

Nyɛnko dɔfo bi a ɔbɔdɔm Asɔr no dɛ young adult no kãa dɛ: “Mber a patriarch no dze ne nsa guu me tsir do na ɔbɔɔ me dzin no, biribiara sesae, … nnyɛ wɔ hɔara mbom wɔ m’abrabɔ nyina mu. Ntsɛmara metsee dɛ—ɔnam tum a ɔdze kãsae mu do—wonyim me yie dze kɔ bun mu. Nsɛm a ɔkãe no hɛnhɛɛn me nyimpadua ne beebiara. Minyim dɛ Ɔsor Egya nyim me, papaapa.’’

Minyim me nyimpa ban no boaa me ankasa ma metsee ase na mepɛɛ dɛ muhu dza Nyankopɔn rohwehwɛ efi mohɔ.⁶

Iyi gyaa me ma musũa ahyɛmu horow a meyɛe na anohoba nhyira a ɔwɔ Nyankopɔn n’ahyɛmu a ɔnye Abraham dzii no. Ɔmaa me onnyiewiei nhumu a okenyaan me ma me siee m’ahyɛmuhorow no emu mu yie.

Musũaa me patriarch nhyira no ntaataado na dɛ ɔbabun no, ɔtaa dɛ daa daa, a ɔboaa me ma metsee Sunsum Krɔnkrɔn n’awerɛkyekyer, akwankyerɛ nhyɛdo no nkã, a ɔboaa me ma m’ahoper no do tsewee ber a midzii Ne nkenyan no do. Iyi maa mepɛɛ dɛ medze ahokekã bɛma kan, nokwar, na Sunsum Krɔnkrɔn ne nyinii; dɛ musũa me kyerɛwsɛm na mobɔ mpaa daa daa; na mobɔ mbɔdzen dze enyimia sũa na midzi Nyankopɔn no nkɔnhyɛfo na asomafo hɔn nkyerɛkyerɛ no do. Me patriarch nhyira boaa me so ma menyaa pɛ dɛ mebɛyɛ botoo yie ama me Ɔsor Egya ne pɛ, na dɛm ntsimii no boaa me ma menyaa dɛwdzi kɛse, a mankasa me gyinabew horow no ammfa ho.⁸

Menyaa sunsum mu ahoɔdzen aber biara a musũaa me patriarch nhyira. Ewiei no ber a m’awofo gyae awar no, me patriarch nhyira, dɛ mbrɛ President Thomas S. Monson kyerɛkyerɛɛ no, abɛyɛ “mankasa m’egyapadze a ɔsom bo na onnyi bo,’’ mpo “mankasa me Liahona’’ ama me.⁹

Afei, meserɛ hom ntse me ase. Nna minndzi mu. Meyɛɛ mfomdo beberee. M’onnyiewiei ɔhokanyi besi iyi pi dɛ meda ho yɛ. Mbom me patriarch nhyira boaa me na ɔkɔ do boa me ma menya pɛ dɛ mebɛyɛ yie na maayɛ nyimpa pa.¹⁰ Metaa musũaa me patriarch nhyira no maa mepɛ dɛ mebedzi nsɔhwɛ do konyim no nyinii. Ɔboaa me ma menyaa pɛ na akokodur a mubonu moho, na nnuhu kɔɔr do bɛyɛ enyigye kwan.

Nna ohia ma me dɛ megye me patriarch nhyira ber a nna musuar na ber a nna me dasee da ho rinyin. Na meda m’awofo na bishop ase daa dɛ wɔtsee ase dɛ mepɛ kyerɛɛ dɛ nna mayɛ krado.

Mber a midzii mfe 12 no, nna wiadze nnyɛ basabasa na ndanenyi dɛ ndɛ wiadze no. President Nelson akã ndɛ ho asɛm dɛ “ber a ɔyɛ dzen koraa mu wɔ wiadze abakɔsɛm mu,’’ a wiadze yi a “bɔn ahyɛ mã’’ na ‘’pɛsɛnankomanya.’’¹¹ Enyigyesɛm nye dɛ hɛn ndɛ mbabun hɔn adwen mu ebue koraa koraa kyɛn mber a nna medzi 12, na hɔn so wɔwɔ gyinaesi a hia tsitsiitsir yɛ ber a wosuar! Wɔsan so hia dɛ wohu nyia a wɔyɛ ankasa na Nyankopɔn dɔ hɔn na n’enyi wɔ hɔn do yie!

Nnyɛ obiara na wɔbɛpɛ hɔn patriarch nhyira ber a meyɛe. Mbom meserɛ dɛ asɔrmba a wonnyae nngye hɔn patriarch nhyira no mpaabɔ mu ara wɔbɔhwehwɛ ehu ber a wɔbɛyɛ krado. Mobɔ anohoba dɛ sɛ hom siesie homho sunsum mu a, hom suahu, tse dɛ medze. bɛyɛ krɔnkrɔn ama hom. Mesan so serɛ dɛ hɔn a wɔagye hɔn patriarch nhyira dada no bosũa na wɔasom hɔn bo. Me patriarch nhyira no bo a ɔsom me ber a nna musuar no dze akokodur hyiraa me ber a nna m’abaw egura, awerɛkyekyer ber a nna musuro, asomdwee ber a nna metse ahoper, enyidado ber a nna minnyi enyidado, na dɛwdzi ber a nna me kra hia no dodow. Me patriarch nhyira boaa me ma me gyedzi na ɔawerɛhyɛmu wɔ mo Ɔsor Egya na Agyenkwa mu no nyinii—na ɔda ho so yɛ. Ɔmaa mo dɔ so ma Hɔn nyinii—na ɔda ho nyin.¹²

Megye dase dɛ patriarch nhyira ma nkenyan akwankyerɛ fi Ɔsor Egya hɔ. Megye me dase wɔ hɛn Egya a ɔwɔ Sor na Ne Ba—hɛn Agyenkwa, Jesus Christ atseasefo ankasa—a wonyim hɛn, wɔdɔ hɛn, na wɔpɛ dɛ wohyira hɛn ho. Minyim nokwar so dɛ President Russell M. Nelson nye Nyankopɔn no nkɔnhyɛnyi wɔ asaase do ndɛ. Jesus Christ ne dzin mu, amen.

Nsɛnsin

1. General Handbook: Serving in The Church of Jesus Christ of Latter-day Saints, 18.17, 18.17.1, ChurchofJesusChrist.org

2. Hwɛ Russell M. Nelson, “Thanks for the Covenant” (Brigham Young University devotional, Ɔberɛfɛw 22, 1988), speeches.byu.edu; “A More Excellent Hope” (Brigham Young University devotional, Sanda 8, 1995), speeches.byu.edu; “Identity, Priority, and Blessings” (Brigham Young University devotional, Fankwa 10, 2000), speeches.byu.edu; “Roots and Branches,” Liahona, Esusow Aketseaba 2004, 27–29; “Covenants,” Liahona, Ɔberɛfɛw 2011, 86–89; “Youth of the Noble Birthright: What Will You Choose?” (Brigham Young University–Hawaii devotional, Fankwa 6, 2013), broadcasts.ChurchofJesusChrist.org; “The Book of Mormon, the Gathering of Israel, and the Second Coming,” Ensign, Ayɛwoho 2014, 26–31; Liahona, Ayɛwoho 2014, 24–29; “Let God Prevail,” Liahona, Ɔberɛfɛw 2020, 92–95; “The Everlasting Covenant,” Liahona, Ɔbɛsɛ 2022, 1–6.

3. Russell M. Nelson, “Covenants,” 88.

4. Russell M. Nelson, “Thanks for the Covenantspeeches.byu.edu.

5. Russell M. Nelson, “Choices for Eternity,” (worldwide devotional for young adults, Esusow Aketseba 12, 2022), ChurchofJesusChrist.org woetsĩmu aka ho.

6. Hwɛ Russell M. Nelson, “Covenants,” 86–89.

7. Hwɛ Genesis 17:1–10; hwɛ Russell M. Nelson, “Children of the Covenant,” Ensign, Esusow Aketseaba 1995, 32–34 so.

8. Hwɛ Russell M. Nelson, “Joy and Spiritual Survival,” Liahona, Ɔberɛfɛw 2016, 81–84.

9. Thomas S. Monson, “Your Patriarchal Blessing: A Liahona of Light,” Ensign, Ɔberɛfɛw 1986, 65–66.

10. Russell M. Nelson, “We Can Do Better and Be Better,’’ Liahona, Esusow Aketseaba 2019, 67–69.

11. Russell M. Nelson, “Overcome the World and Find Rest,” Liahona, Ɔberɛfɛw 2022, 95–96.

12. IJames E. Faust kenyanee, “Priesthood Blessings,” Ensign, Ɔberɛfɛw 1995, 62–64.