Erenya Ankorankor Asomdwee
Mobɔ mpaa dɛ hom benya asomdwee, aboa binom pii ma woenya na wɔdze ama binom so.
Mo nuanom na nkyerɛbaa adɔfo, wɔayɛ hɛn adom ma yɛatse nkenyan nkyerɛkyerɛ na ndwom dɛɛdɛw no akã hɛn akoma wɔ wiadze mfɛndzanan ehyiadzi mbuei nhyiamu yi ase. Yɛda hom ase dɛ hom dze homho ahyɛ mu na hom gyedzi.
Ndɛ mebɛkã dza mesuã wɔ irinya ankorankor asomdwee ho anwanwadze, wɔ gyinabew biara a yɛwɔ mu ho asɛm. Agyenkwa no nyim dɛ Ɔsor Egya ne mba nyina hwehwɛ asomdwee, na Ɔakã dɛ obotum dze ama hɛn. Hom kaa Jesus Christ n’asɛm a wɔakyerɛw no wɔ John nwoma no mu: “Asomdwee na medze gya hom, mara m’asomdwee na medze mema hom: nnyε dε mbrε wiadze mã, na mema hom. Mma hom akoma nntutu, eso mma ɔmmbɔ hu.”1
Hɔn a wɔtsee dɛ Ɔrekã dɛm nsɛm no hɔn gyinabew na ɔkyerɛ asomdwee no na mbrɛ Obesi dze bɛma no asekyerɛ a Ɔwɔ wɔ ho. Hom ntsie Christ no somdwuma n’ewiei dza ɔwɔ John nwoma mu. Nna abɔnsam no tum dzendzen rohom No do na ɔnnkɛkyɛr na ɔaba N’esuafo do.
Agyenkwa ne nsɛm nye yi:
“Sɛ hom dɔ me a, hom ndzi me mbrasɛm do.
“Na mibebisa Egya no, na ɔama hom Okyigyinafo fofor, ma ɔnye hom aabɛtsena daa;
“Nokwar Sunsum no a: ɔno na wiadze nntum nngye no; osiandɛ onnhu no, na eso onnyim no: na homdze, hom nyim no; osiandɛ ɔtse hom nkyɛn, na ɔbɛtsena hom mu.
Mirinngya hom ngyanka, mebɛba hom nkyɛn.
“Aka karabaabi na wiadze nnhu me bio, na homdze, hom hu me; osiandɛ metse ase yi, hom so bɛtsena ase.
“Da no hom bohu dɛ mowɔ m’Egya no mu no hom wɔ no mu, na mo so mowɔ hom mu.
“Nyia ɔwɔ me mbransɛm na odzi do no, ɔno nye nyia ɔdɔ me, na nyia ɔdɔ me no, m’Egya bɔdɔ no, na mo so mobɔdɔ no, ma mibeyi moho makyerɛ no.
Judas (nnyɛ Iscariot bi a) see no dɛ, Ewuradze, ebɛn na aba, na iribeyi woho akyerɛ na nnyɛ wiadze a?
“Jesus buae see no dɛ, Sɛ obi dɔ me a, obesie m’asɛm na m’Egya bɔdɔ no, na yɛbɛba ne nkyɛn, na yɛbɛyɛ hɛn tsenabew wɔ ne nkyɛn.
“Nyia a ɔnndɔ me no. Onnnsie me nsɛm: na asɛm a hom tse yi, ɔnnyɛ medze, na ɔyɛ Egya no a ɔsomaa me no dze.
“Ndzɛmba yinom na makã akyerɛ hom, ber a metse hom nkyɛn yi.
“Na Okyigyinafo no a ɔyɛ Sunsum Krɔnkrɔn no a Egya no bɔsoma no wɔ me dzin mu no, ɔno na ɔbɛkyerɛkyerɛ hom ndzɛmba nyina: ɔbɛkaakaa hom dza makã akyerɛ hom nyina.
“Asomdwee na medze gya hom; mara m’asomdwee na medze mema hom, nnyɛ dɛ mbrɛ wiadze ma, medze mema hom. Mma hom akoma nntutu, eso mma ɔmmbɔ hu.”2
Annyɛ yie koraa no mesũa nokwar enum wɔ Agyenkwa no dɛm nkyerɛkyerɛ no mu.
Odzi kan, asomdwee yɛ akyɛdze a wɔdze ma yeenya gyedzi dze esie Ne mbrasɛm ekyir no. Hɔn a wɔyɛ Ewuradze N’Asɔr ahyɛmu mba no, setsie nye dza yɛabɔ ho anohoba dada dɛ yɛbɛyɛ.
Otsia ebien, Sunsum Krɔnkrɔn no bɛba na ɔnye hɛn abɛtsena. Ewuradze se dɛ sɛ yɛkɔ do dzi nokwar a Sunsum Krɔnkrɔn no bɛtsena hɛn mu. Dɛm no nye sacrament mpaabɔ anohoba no dɛ Sunsum No bɛyɛ hɛn nyɛnko na yɛbɛtse N’awerɛkyekye wɔ hɛn akoma na hɛn adwen mu.
Otsĩa ebiasa, Agyenkwa no bɔ anohoba dɛ sɛ yesie hɛn ahyɛmudzi, yɛbɛtse ɔdɔ a Egya na Ɔba no wɔ ma Hɔnho na ma hɛn no nkã. Yebotum atse wɔ hɛn ɔnnkyebo abrabɔ yi mu dɛ Wɔbɛn hɛn, tse dɛ mbrɛ yɛbɛtse sɛ wohyira hɛn ma yɛnye Hɔn kɛtsena afebɔɔ no.
Otsĩa anan, yerisie Ewuradze ne mbrasɛm hwehwɛ dza ɔkyɛn setsie. Ɔsɛ dɛ yɛdze hɛn akoma nyina, hɛn ahoɔdzen, adwen, na hɛn kra nyina dɔ Nyankopɔn.3
Hɔn a wɔnndɔ No no nnsie Ne mbrasɛm. Ntsi worinnya asomdwee akyɛdze no wɔ abrabɔ yi mu na wiadze a ɔreba no mu.
Otsĩa enum, ɔyɛ pefee dɛ Ewuradze dɔ hɛn ara ma Otuaa hɛn bɔn ho kaw ama yeetum, edua gyedzi mu wɔ No mu na hɛn nnuho do, edua No Werdambɔ no nsunsuando do—enya asomdwee akyɛdze a “ɔtra ntseasee nyina,”4 wɔ abrabɔ yi mu na yɛnye No onnyiewiei mu.
Hom mu binom, bia dodow, nnya asomdwee no a Ewuradze bɔɔ ho anohoba no ho atsenka. Bia hom abɔ mpaa ahwehwɛ ankorankor asomdwee na sunsum mu awerɛkyekye. Naaso bia hom bɛtse dɛ ɔsorsor ayɛ komm wɔ hom asomdwee ntotɔserɛ ho.
Wo kra ne tamfo wɔ hɔ a ɔmmpɛ dɛ ɔwo na hɔn a edɔ hɔn no nya asomdwee. Ɔno onnkenya bi. Odzi dwuma dze kwetsir wo dɛ ibɛpɛ mpo dɛ ibohwehwɛ asomdwee a Agyenkwa na hɛn Ɔsor Egya pɛ dɛ enya.
Satan no mbɔdzembɔ dɛ obodua ɔtan na wentwiwentwi aba bɔ hɛnho nyina aprɔw no yɛ dɛ mbrɛ ɔreyɛ kɛse. Yehu no ho adanse a ɔrokɔ do wɔ amanaman na kuropɔn mu, wɔ sɔn mu, Internet do, na wɔ wiadze nyina mu.
Naaso enyidado pa ho siantsir wɔ hɔ, ɔno nye Christ Ne Kan a wɔdze ma abɔdomaba biara a wɔawoo no fofor. Nyimpa nyina akyɛdze yi dze dza oye ho tsiboa, pɛ dɛ ebɔdɔ na wɔadɔ wo ba. Nyame ne ba biara wɔ pɛrpɛrdzi na nokwar tsiboa awoosu a ɔdze ba ɔnnkyebo abrabɔ yi mu.
Hɛn enyidado pa wɔ ankorankor asomdwee ma dɛm mbofra yinom gyina hɔn a wɔhwɛ hɔn no do. Sɛ hɔn a wɔtsetse hɔn na wɔsom hɔn no ayɛ edwuma dze enya asomdwee akyɛdze efi Agyenkwa no hɔ a, wɔdze hɔnankasa hɔn fasusu na mbɔdzembɔ, bɛhyɛ abofra ne gyedzi nkuran ma ɔafata asomdwee akyɛdze kɛse no.
Iyi nye anohoba a kyerɛwsɛm no bɔ, “Tsetse abofra wɔ ɔkwan a ɔwɔ dɛ ɔfa do no do: na sɛ onyin mpo a, ɔnnkɛdan efi ho.’’6 Obehia dɛ nyia ɔyɛ no ndwuma dɛ ɔhwɛ abofra no do na ɔtsetse no no bɛfata asomdwee akyɛdze no.
Ɔyɛ yaw, hɛn nyina yɛatse yaw no ber a mbofra a awofo a woekyan hɔn atsetse hɔn, ɔtɔ fa bi ɔwofo kor nko, na dɛm mbofra no ekyir no wɔsan mu, gyedzi na asomdwee abrabɔ ekyir no, fa awerɛhow anamɔn kwan.
Sɛ dza ɔyɛ yaw no mpo ba a, m’enyidado pa twer akyɛdze kor so a ofi Ewuradze hɔ do. Ɔno nye yi: dɛ Ɔtsetse esiesiefo pii wɔ N’esuafo wɔgye hɔn dzi mu. Woenya asomdwee na Nyame no dɔ ho atsenka. Wɔwɔ Sunsum Krɔnkrɔn no wɔ hɔn akoma mu, na Ewuradze botum ama hɔn kwankyerɛ ma wɔakɔ nguan no wɔrotɔ gon no hɔ.
Mehu no m’abrabɔ mu na wiadze nyina mu. Hom so hom ehu dɛmara. Ɔtɔfabi a, ber a worigya wo ma akɛgye obi no, ɔbɛyɛ dɛ osii ara.
Ber bi, obi a mihyiaa no akwantu mu, asɛmbisa yi ara, “Ana ibɛkã w’ebusua ho asɛm kakra akyerɛ me a?” Nkɔmbɔdzi no gyaa me ma mibisaa no dɛ ɔmfa ne babaa panyin a, ɔkãa dɛ oridzi aper no, no mfonyin nkyerɛ me. Papayɛ a ɔkyerɛ wɔ n’enyim no tɔɔ mo do. Menyaa nkenyan dɛ mibisa sɛ obotum dze ne email address ama me a. Dɛm aber no na babaa no ayew, na ɔrodwendwen dɛ sɛ Nyame wɔ asɛm bi ma no a. Nna Ɔwɔ bi. Ɔno nye yi: Ewuradze dɔ wo. Ɔadɔ wo aber biara. Ewuradze pɛ dɛ isan ba. Wo nhyira horow a wɔdze bɔɔ wo anohoba daho wɔ hɔ.
Asɔrmba a wɔwɔ Asɔr no mu nyina atse Ewuradze n’ankorankor asomdwee akyɛdze ho nkã. Ɔrehyɛ obiara nkuran dɛ wɔmboa nkaafo ma wonya kwan mbra no Hɔ na hɔnankasa mbɛfata dɛm asomdwee kor noara. Hɔn so, wɔbɛsan mu enyi dɛ wɔbɔhwehwɛ nkenyan ehu mbrɛ wobesi dze dɛm akyɛdze no bɛma binom so.
Ebusuasantsen a wɔreba no bɛnyɛn ebusuasantsen a odzi do no. No mbɔho no nsunsuando bɛyɛ anwanwadze. Ɔbɛtserɛw na mber rugu mu no woenyin, na Ewuradze ahenman a ɔwɔ asaase do no bɛyɛ ahosie na krado atsẽa mu hosanna dze ekyia No. Asomdwee bɛba asaase no do.
Megye me dasee nokwar mu ara dɛ Agyenkwa no tse ase na Odzi Asɔr yi kan. Matse No dɔ wɔ m’abrabɔ mu na No dɔ na dɛ Ɔdwen Ɔsor Egya ne mba nyina hɔn ho. Agyenkwa no Ne nsato dɛ yɛmbra No hɔ no yɛ asomdwee mmae.
President Russell M. Nelson yɛ nkɔnhyɛnyi tseasefo no ma asaase no nyina mu. Ɔakã dɛ, “Misi no tadua ma hom dɛ, mbrɛ wiadze ne gyinabew na hom gyinabew bɛyɛ biara no, hom botum dze enyidado pa na enyigye ehyia ndaamba kwan.”6
Mekyerɛ mo dɔ ma hom. Hom gyedzi kɛse na ɔdɔ no retsen dur nkorɔfo do na ɔrema kwan ma Ewuradze resesa akoma na ama hom enya pɛ dɛ hom dze asomdwee no a ɔtra nkyeasee nyina no ho akyɛdze ma binom so.
Mobɔ mpaa dɛ hom benya asomdwee, aboa binom pii ma woenya na wɔdze ama binom so. Ewuradze ba bio a mfe apem asomdwee nwanwa bɛba. Megye ho dase enyigye mu na wɔ Jesus Christ ne dzin mu, amen.