Pannakagun-od iti Bileg ti Dios babaen kadagiti Katulagan
Bayat ti pannagnayo iti dana ti katulagan, manipud iti panagbuniag agingga iti templo ken iti unos ti biag, ikarik kadakayo ti bileg a mangsupring iti gagangay a nailubongan nga ayus.
Itay napalabas a Nobiembre, naaddaannak iti gundaway a nangidaton iti Templo ti Belém Brazil. Maysa a rag-o ti makikadua kadagiti naikonsagrar a miembro ti Simbaan iti makin-amianan a Brazil. Iti dayta a panawen, naammuak a ti Belém ti ruangan iti rehion a karaman ti kabibilgan a karayan iti lubong, ti Karayan Amazon.
Iti laksid ti pigsa ti karayan, mamindua iti makatawen, adda kasla di gagangay a mapaspasamak. No kasta met laeng ti pannakaitunos ti init, bulan, ken daga, agayus ti nabileg a dalluyon nga agpangato iti karayan, maisupiat iti gagangay nga ayus ti danum. Dagiti dalluyon nga 6 metro ti kangatona1 nga agdalluyon agingga ti 50 kilometro2 ket naidokumento. Daytoy a penomenon, nga ammo ti sapasap a tidal bore, makuna iti lokal a pororoca, wenno “napigsa a ngariet,” gapu iti napigsa a timekna. Siuumisu a makunatayo nga uray ti nabileg nga Amazon ket agpaituray iti nailangitan a bileg.
Kas iti Amazon, addaantayo iti gagangay nga ayus iti biagtayo; ayotayo nga aramiden ti gagangay. Kas iti Amazon, iti tulong ti langit maaramidtayo dagiti kalsa di gagangay a banag. Ngamin, saan a gagangay kadatayo ti agpakumbaba, wenno natudio nga ipasakup ti pagayatantayo iti Dios. Ngem babaen laeng ti panangaramidtayo iti kasta a mabalbaliwantayo, agsubli a makidenna iti Dios, ken maragpattayo ti agnanayon a gasattayo.
Saan a kas iti Amazon, mapilitayo no agtulnogtayo iti nailangitan a bileg wenno “makikuyog iti ayus.”3 Mabalin a narigat ti mangsabat iti ayus. Ngem no agtulnogtayo “iti allukoy ti Espiritu Santo” ken iwaksitayo dagiti managimbubukod nga ayo ti nailubongan a lalaki wenno babai,4 maawattayo ti mangbalbaliw a bileg ti Mangisalakan iti biagtayo, ti bileg nga agaramid iti narigat a bambanag.
Insuro ni Presidente Russell M. Nelson no kasano nga aramiden daytoy. Inkarina, “Tunggal tao nga agaramid iti katulagan iti baptismal fonts ken templo—ken tungpalenna ida—ket ad-adda a makagun-od iti bileg ni Jesucristo … [a mangitag-ay] kadatayo ditoy natnag a lubong.”5. Iti sabali a pannao, magun-odtayo ti bileg ti Dios, ngem no laeng makikonektatayo Kenkuana babaen iti sagrado a katulagan.
Sakbay a naparsua ti daga, impasdek ti Dios dagiti katulagan a kas mekanismo a pakaikaykaysaantayo, nga annakna, iti bagitayo Kenkuana. Maibatay iti agnanayon, di agbaliw a linteg, inlawlawagna dagiti di mapagnunumuan a kasasaad a pakabalbaliwan, pakaisalakanan, ken pakaitan-okantayo. Ditoy a biag, aramidentayo dagitoy a katulagan babaen ti pannakipaset iti ordinansa ti priesthood ken panangikari nga aramidentayo ti paaramid ti Dios, ket kas subad, ikariannatayo ti Dios iti bendision.6
Ti katulagan ket kari a nasken nga isaganaan, nalawag a maawatan, ken naan-anay a dayawentayo.7 Ti pannakitulag iti Dios naiduma ngem ti gagangay a panagkari. Umuna, kasapulan ti turay ti priesthood. Maikadua, ti nakapuy a kari awanan iti pigsa a mangikonekta kadatayo Kenkuana a mangkedked iti gagangay nga ayus. Makitulagtayo laeng no panggeptayo nga ikumit ti bagitayo iti panangipatungpal iti daytoy.8 Agbalintayo a natulagan nga annak ti Dios ken agtawid iti pagarianna, nangruna no ikarigatantayo a pagbalinen ti katulagan a kangrunaan a paset ti biagtayo.
Ti termino a dana iti katulagan tumukoy iti agsasaruno a katulagan a babaen dayta umaytayo ken Cristo ket makikonekta Kenkuana. Babaen daytoy a begkes ti katulagan, magun-odtayo ti agnanayon a bilegna. Mangrugi ti dana iti pammati ken Jesucristo ken panagbabawi a sarunuen ti panagbuniag ken panangawat iti Espiritu Santo.9 Impakita ni Jesucristo no kasano ti sumrek iti dana idi nabuniagan.10 Segun iti salaysay ti Ebanghelio ti Baro a Tulag iti Marcos ken Lucas, direkta a nagsao ti Nailangitan nga Ama ken Jesus iti panagbuniagna, a kunkunana, “Sika ti ay-ayatek nga Anakko; maragsakanak unay kenka.” No magnatayo iti dana ti katulagan babaen ti panagbuniag, mapanunotko ti Nailangitan nga Ama a mangisasao iti kasta met laeng kadatayo: “Sika ti patpatgek nga anakko a pakaragsakak. Agtultuloykayo.”11
Iti panagbuniag ken no makiranudtayo iti sakramento,12 paneknekantayo a natuloktayo nga awaten iti bagitayo ti nagan ni Jesucristo.13 Iti daytoy a konteksto, panunotentayo ti bilin iti Daan a Tulag a, “Dimo aramaten ti nagan ti Apo a Diosmo iti barengbareng.”14 Iti agdama a panawen, kasla panangiparit daytoy iti awan panagraem a panangusar iti nagan ti Apo. Ti bilin iramanna dayta, ngem naun-uneg pay ti bilin daytoy. Naipatarus ti balikas a Hebreo nga “aramaten” kaipapananna ti “itag-ay” wenno “ibaklay” kas iti aramidentayo iti wagayway a mangilasin iti bagi iti indibidual wenno grupo.15 Ti naipatarus a balikas a “barengbareng” kaipapananna ti “ubbaw” wenno “makaallilaw.”16 Ti bilin a dimo aramaten ti nagan ti Apo iti barengbareng mabalin ngarud a kaipapananna ti, “Dimo ipabigbig ti bagim kas disipulo ni Jesucristo malaksid no panggepmo ti mangibagi a nasayaat Kenkuana.”
Agbalintayo a disipulona ken ibagitayo Isuna a nasayaat no igagara ken in-inut nga awatentayo iti bagitayo ti nagan ni Jesucristo babaen kadagiti katulagan. Dagiti katulagantayo ti mangted kadatayo iti bileg nga agtalinaed iti dana ti katulagan gapu ta agbaliw ti relasiontayo ken Jesucristo ken iti Nailangitan nga Amatayo. Naikonektatayo Kadakuada babaen ti naitulag a begkes.
Ti dana ti katulagan iturongnatayo kadagiti ordinansa ti templo, kas iti endowment ti templo.17 Ti endowment ti sagut ti Dios a sagrado a katulagan a naan-anay a maikonektanatayo Kenkuana. Iti endowment, umuna a makitulagtayo nga ikagumaan a tungpalen dagiti bilin ti Dios; maikadua, agbabawi nga addaan nasneban a puso ken nagbabawi nga espiritu; maikatlo, tapno agbiag iti ebanghelio ni Jesucristo. Aramidentayo daytoy babaen ti panangipakat iti pammati Kenkuana, pannakitulag iti Dios bayat ti panangawattayo kadagiti ordinansa ti pannakaisalakan ken pannakaitan-ok, panagtungpal kadagita a katulagan iti unos ti biagtayo, ken panangikagumaan nga agbiag iti dua a naindaklan a bilin nga ayaten ti Dios ken kaarruba. Maikapat, makitulagtayo a mangtungpal iti linteg ti kinadalus ken, maikalima, nga idatontayo ti bagitayo ken amin a bendisionannatayo ti Apo a mangbangon iti Simbaanna.18
Babaen ti panagaramid ken panagtungpal kadagiti katulagan iti templo, ad-adu ti masursurotayo maipapan kadagiti panggep ti Apo ken umawat iti pakabuklan ti Espiritu Santo.19 Umawattayo iti direksion para iti biagtayo. Dumur-astayo iti kinadisipulotayo tapno ditayo agtalinaed nga agnanayon nga awan ammona nga annak.20 Ketdi, agbiagtayo iti agnanayon a panirigan ken ad-adda a matignaytayo nga agserbi iti Dios ken iti dadduma. Umawattayo iti napadur-as a kabaelan a mangipatungpal iti panggeptayo iti mortalidad. Masaluadantayo iti dakes,21 ket magun-odtayo ti dakdakkel a bileg a mangsaranget iti sulisog ken agbabawi no agbasoltayo.22 No agbidduttayo, ti lagip iti katulagantayo iti Dios tulongannatayo nga agsubli iti dana. Iti pannakikonekta iti bileg ti Dios, agbalintayo a bukodtayo a pororoca, makabael a mangsarked iti ayus ti lubong, iti unos ti biagtayo ken agingga iti kinaagnanayon. Kamaudiananna, agbaliw dagiti pagtungpalantayo gapu ta agturong ti dana ti pannakaitan-ok ken agnanayon a biag.23
Ti panagtungpal iti katulagan a naaramid iti puente ti pagbuniagan ken templo ket mangpapigsa kadatayo a mangsaranget kadagiti pannubok ken sakit iti mortalidad.24 Ti doktrina a mainaig kadagitoy a katulagan ket mangpalag-an iti dalantayo ken mangipaay iti namnama, liwliwa, ken talna.
Inawat da apongko a Lena Sofia ken Matts Leander Renlund ti bileg ti Dios babaen ti katulaganda iti panagbuniag idi kimmappengda iti Simbaan idi 1912 idiay Finland. Naragsakanda a nagbalin a paset ti umuna a sanga ti Simbaan idiay Finland.
Natay ni Leander iti tuberculosis lima a tawen kalpasanna idi masikog ni Lena iti maikasangapulo nga anakda. Naipasngay dayta nga ubing, ni tatangko, dua a bulan kalpasan ti ipapatay ni Leander. Idi agangay intabon ni Lena saan laeng ti asawana no di ket pito iti sangapulo nga annakna. Kas napanglaw a balo, narigatan. Iti 20 a tawen, saan a nakainana a nasayaat iti rabii. Bayat ti aldaw, naggaed a mangipaay iti taraon para iti pamiliana. iti rabii agaywan kadagiti agngangabiten a miembro ti pamilia. Narigat a panunoten no kasano a nadaeranna.
Nagibtur ni Lena gapu ta ammona a matagikuana ti pimmusay nga asawana ken annakna iti kinaagnanayon. Ti doktrina dagiti bendision iti templo, agraman ti bendision dagiti agnanayon a pamilia, nangyeg kenkuana iti talna gapu ta nagtalek iti bileg a mangilantip. Iti mortalidad, dina inawat ti endowmentna wenno nailantip ken Leander, ngem nagtalinaed ni Leander a napateg nga impluensia iti biagna ken paset ti dakkel a namnamana iti masakbayan.
Idi 1938, nangisumite ni Lena kadagiti rekord tapno maannong dagiti ordinansa ti templo para kadagiti pimmusay a miembro ti pamiliana, sumagmamano kadagiti kasapaan a naisumitie manipud Finland. Kalpasan ti ipapatayna, dagiti ordinansa ti templo ket inannong ti dadduma para kenkuana, ni Leander, ken dagiti pimmusay nga annakna. Babaen ti proxy, na-endow isuna, napaglantip da Lena ken Leander, ken nailantip kadakuada dagiti pimmusay nga annakda ken ni tatangko. Kas ti dadduma, ni Lena “natay iti pammati, a dina inawat dagiti kari, ngem nakitana ida iti adayo, … [ket] nauyot kadagitoy, ket inawatna ida.”25
Nagbiag ni Lena a kasla naaramidnan dagitoy a katulagan iti biagna. Ammona a dagiti katulaganna iti panagbuniag ken sakramento ti mangikonekta kenkuana iti Mangisalakan. “Binay-anna a ti nasam-it a tarigagay iti nasantuan a lugar [ti Mannubbot] ti mangyeg namnama iti naliday a pusona.”26 Imbilang ni Lena a maysa kadagiti naindaklan nga asi ti Dios a naammuanna maipapan iti agnanayon a pamilia sakbay a napasaranna dagiti trahedia iti biagna. Babaen ti katulagan inawatna ti bileg ti Dios nga agibtur ken pangparmek iti makaupay nga impluensia dagiti pannubok ken rigatna.
Bayat ti pannagnayo iti dana ti katulagan, manipud iti panagbuniag agingga iti templo ken iti unos ti biag, ikarik kadakayo ti bileg a mangsupring iti gagangay a nailubongan nga ayus—bileg nga agsursuro, bileg nga agbabawi ken mapasanto, ken bileg a maaddaan iti namnama, liwliwa, ken rag-o bayat ti panangsangoyo kadagiti karit iti biag. Ikarik kadakayo ken ti pamiliayo ti salaknib iti impluensia ti kabusor, nangruna no ti templo ti kangrunaan a pokus iti biagyo.
Nu umaykayo ken Cristo ken maikonekta Kenkuana ken iti Nailangitan nga Amatayo babaen ti katulagan, mapasamak ti kasla saan a gagangay a banag. Mabaliwankayo ken agbalin a perpekto ken Jesucristo.27 Agbalinkayo a natulagan nga anak ti Dios ken agtawid iti pagarianna.28 Maibagak a maisaona ti kasta met laeng kadakayo, “Sika ti dungdunguek nga anakko a pakaragsakak. Mapasangbayka.” Iti nagan ni Jesucristo, amen.