Jesus Christ Yɛ Mboa
Yebotum nye Agyenkwa no abɔ mu aboa dze honam mu nye sunsum mu mboa ama hɔn a wohia—na wɔ kwan no mu no yeenya hɛn ankasa hɛn mboa.
Gyedzi wɔ Jesus Christ mu na enyidado wɔ dza wɔatse afa N’anwanwadze ho no, nyimpa bi a ɔyar mbubui n’ahwɛfo dze no brɛɛ Jesus. Wɔhyehyɛɛ kwan fofor dze no kɔr hɔ—a wotuu dan no etsifi na wosian nyimpa no a ɔda ne mpa do no sii bea a nna Jesus reyɛ nkyerɛkyerɛ no. Na Jesus “hun hɔn gyedzi no, ɔkãa [kyerɛɛ nyia ɔyar mbubui no dɛ], wɔdze wo bɔn akyɛ wo.”1 Na afei, “Soɛr, fa wo mpa na kɔ wo fie.”2 Na ntsɛmara nyimpa a mbubui akã no no soɛree na ɔfaa ne mpa sii mu kɔr fie, a nna “[ɔre]hyɛ Nyankopɔn enyimnyam.”3
Ebɛnadze bio na yenyim fa anyɛnkofo a wɔhwɛɛ nyimpa a mbubui aka no no ho? Yenyim dɛ Agyenkwa no hun hɔn gyedzi. Na woehu na woetsie Agyenkwa no na wɔyɛ adasefo wɔ N’anwanwadze ho no, ɔyɛɛ hɔn “ahobow” na “wɔhyɛɛ Nyankopɔn enyimnyam.”4
Jesus Christ ama ayarsa a enyi da do no—honandua mu mboa fi yaw na koannkɔ yarba na mbubui nsunsuando. Dza ohia so, Agyenkwa no maa sunsum mu mboa so ber ɔsan nyimpa no noho fii no bɔn mu.
Na anyɛnkofo no—wɔ hɔn mbɔdzembɔ mu dɛ wɔbɔhwɛ bi a ɔwɔ hia mu no, hun ahotɔ ne farba no, wohun Jesus Christ.
Megye dase dɛ Jesus Christ yɛ mboa. Ɔnam Jesus Christ No Werdambɔ no do, yebotum enya ahotɔ efi bɔn ho adzesoa na nsunsuando mu na yeenya mboa wɔ hɛn mberɛwyɛ mu.
Na osiandɛ yɛdɔ Nyankopɔn ntsi na yɛayɛ ahyɛmu dɛ yɛbɔsom no ntsi, yebotum nye Agyenkwa no abɔ mu aboa dze honam mu nye sunsum mu mboa ama hɔn a wohia—na wɔ kwan no mu no yeenya hɛn ankasa hɛn mboa wɔ Jesus Christ mu.5
Hɛn nkɔnhyɛnyi dɔfo, President Russell M. Nelson, too nsa frɛɛ hɛn dɛ yendzi wiadze do konyim na yenya ahomgye.6 Ɔkyerɛɛ mu dɛ “ahomgye mapã” nye “ahotɔ na asomdwee.” President Nelson kãa dɛ, “Osiandɛ Agyenkwa no, Oduaa No Werdambɔ a ɔmmbɔadze da do, poon hɛn mu kor biara fii hɛn mberɛwyɛ, mfom, na bɔn ho ntsi, na osiandɛ Ɔtsee yaw, ɔhaw, na adzesoa biara a yeenya da no ntsi, nkyii sɛ inu woho ampaara na ehwehwɛ No mboa a, ibotum asoɛr atra wiadze huhuuhu yi.”7 Ɔno nye mboa a Jesus Christ dze ma hɛn no!
Hɛn mu kor biara so adzesoa. Obotum ayɛ kɛntsɛn a osi wo tsir do anaa bɔtɔ a ɔbɔ nsa anaa ndzɛmba a wɔdze tam akyekyer na ɔda w’abatsir do. Mbom wɔ hɛn adwen mu no, yɛnfrɛ no bɔtɔ a wɔdze to ekyir.
Esusudze mu ara, dɛm bɔtɔ a wɔdze to ekyir no nye bea a yɛkora adzesoa a ɔwɔ wiadze a ɔahwe ase asetsena mu. Hɛn adzesoa tse dɛ abo a ogu bɔtɔ a wɔdze to ekyir mu. Yɛwɔ mu ahorow ebiasa:
-
Abo a wɔwɔ mu ɔnam hɛnara hɛn ndzebɔn ntsi.
-
Abo a wɔwɔ mu ɔnam binom hɔn adwenpɔw a omuo, mfom, na ɔtan ntsi.
-
Nna abo a yɛso a ɔnam dɛ yɛtse asehwe tsenabew mu. Abo yinom bi nye yarba, ɔyaw, koannkɔ yarba, awerɛhow, ankonamyɛ, na atoyɛnkyɛm ho nsunsuando.
Medze dɛwdzi kã dɛ hɛn ɔnnkyebɔ asetsena mu adzesoa, a ɔyɛ dɛ abo a wogu hɛn bɔtɔ a wɔdze to ekyir mu no, nnhia dɛ ɔyɛ dur.
Jesus Christ botum ama hɛn adzesoa mu ayɛ har.
Jesus Christ botum eyi hɛn adzesoa efi hɔ.
Jesus Christ ma hɛn kwan a yɛbɛfa do enya mboa efi bɔn no dur ase.
Jesus Christ yɛ hɛn mboa.
Ɔsee dɛ:
“Hom nyina hom mbra mo hɔ, hom a hom reyɛ edwuma berɛ na wɔasoa hom dza ɔyɛ dur, na mebɛma hom ahomgye [a ɔyɛ mboa na asomdwee].
“Hom mfa mo kɔndua no nto hom do, na hom nsũa me; osiandɛ modwe na mebrɛ moho adze wɔ akoma mu: na hom benya ahomgye ama hom akra.
“Na mo kɔndua yɛ mberɛw, na m’adzesoa yɛ har.”8
Dɛ kɔndua no yɛ mberɛw na adzesoa no yɛ har no kyerɛ dɛ yɛnye Agyenkwa no kɛhyɛ kɔndua no mu, dɛ yɛnye No kyɛ hɛn adzesoa, dɛ yɛma no kwan ma ɔma hɛn adzesoa do. Ɔno kyerɛ dɛ yɛnye Nyankopɔn rehɛn ahyɛmu nkitahodzi mu na yerisie dɛm ahyɛmudzi no, a, dɛ mbrɛ President Nelson akyerɛ mu no, “ɔma biribiara a ɔfa abrabɔ yi ho yɛ mberɛw ara yie.” Ɔkãa dɛ, “Enye Agyenkwa no ato kɔndua no kyerɛ dɛ ewɔ kwan wɔ N’ahoɔdzen na ɔpon tum no ho.”9
Ntsi ebɛnadze ntsi na hɛn nsa yɛ dzen wɔ hɛn abo horow ho? Dɛn ntsi na bɔɔlbɔnyi a ɔabrɛ nnkefi agodzibea no do ber a ɔgyefo bi wɔ hɔ a ɔayɛ krado dɛ obowie agor no ama no? Dɛn ntsi na mibetsim do kyinkyinɛnn dɛ monko begyina me bea ber a Ɔgyefo no gyina a ɔayɛ krado dɛ ɔnye me begyina?
President Nelson akyerɛkyerɛ dɛ, “Jesus Christ … Oebue N’abasa mu gyina hɔ, a Ɔdze enyidado na pɛ dɛ Ɔbɛsã hɛn yarba, dze hɛn bɔn akyɛ hɛn, ahohor hɛnho, ahyɛ hɛn dzen, na Ɔatsew hɛnho.”10
Ebɛnadze ntsi na yetsim do kyinkyinɛnn dɛ hɛn nko bɔsoa hɛn abo?
Iyi yɛ ankorankor asɛmbisa ma hom mu kor biara adwendwen ho.
Emi no, ɔyɛ tsetse ahantanyɛ su bɔn. Mekã dɛ, “Iyi dze mesuo mu.” “Ɔhaw biara nnyi hɔ; mubotum mayɛ.” Ɔyɛ daadaafo kɛse no a ɔpɛ dɛ medze sie Nyankopɔn, medan moho fi Ne nkyɛn, dɛ monko merekɛyɛ.
Nuambanyin na nkyerɛbaa, monko monnkotum ayɛ, na onnhia dɛ monko meyɛ, na monko merennyɛ. Meresan mu afa dɛ mubodua ahyɛmudzi a menye Nyame ayɛ do, dze moho akyekyer m’Agyenkwa no, “Mutum adze nyina yɛ wɔ Christ a ɔhyɛ me dzen no mu.”11
Ahyɛmudzi esiefo no wɔdze Agyenkwa no mboa hyira hɔn.
Susu dɛm mfatoho yi a ɔwɔ Mormon Nwoma no mu ho: Wɔtseetsee Alma no nkorɔfo a wɔdze “edwuma soaa hɔn, na … edwuma ahwɛdofo hwɛɛ hɔn.”12 Wokyir hɔn dɛ wɔbɛma hɔn ndze do abɔ mpaa no, “[wo]huee hɔn akoma maa [Nyankopɔn]; na ɔnodze onyim hɔn akoma mu adwendwen.”13
Na “Ewuradze ne ndze baa hɔn nkyɛn wɔ hɔn amandzehu mu see dɛ: Hom mma hom etsir do na hom nya awerɛkyekyer, na minyim ahyɛmu a hom edzi akyerɛ me; na menye mo nkorɔfo bedzi ahyɛmu na meeyi hɔn efi nkowaasom mu.
“Na mebɛma adzesoadze a wɔdze egu hom abatsir do no ayɛ har a hom renntse mpo dɛ ɔda hom ekyir.”14
Na hɔn adzesoadze no “yɛɛ har,” na “Ewuradze hyɛɛ hɔn dzen ama woeetum asoa hɔn adzesoadze no na wɔammberɛ, na enyigye mu na abotar na wɔdze gyaa hɔnho mu maa Ewuradze ne pɛ.”15
Dɛm ahyɛmu esiefo no nyaa mboa wɔ awerɛkyekye kwan do, abotar pii na enyigye mu, adzesoadze a no mu gowee ntsi ɔyɛɛ har, na ewiei no ɔgye mu.16
Afei yɛnsan nkɔ hɛn bɔtɔ a wɔdze to ekyir no ho esusudze do.
Ɔnam Jesus Christ No Werdambɔ no do, nnuhu nye dza ɔma hɛn ahotɔ fi bɔn abo no dur ase. Na ɔnam dɛm akyɛdze soronko yi do, Nyankopɔn n’ehumbɔbɔr ma hɛn mboa fi atsɛmbu a nkyɛ yennkotum edzi do ase.17
Jesus Christ No Werdambɔ no so ma hɛn kwan ma yetum nya ahoɔdzen a yɛdze bɔn kyɛ, a ɔboa hɛn ma yɛsoɛɛ adzesoa a yɛso ɔnam binom a wɔannye hɛn enndzi no yie ntsi.18
Ntsi Agyenkwa no yɛ dɛn ma hɛn mboa fi adzesoadze a ɔwɔ yɛtse wiadze a ɔahwe ase a yɛwɔ ɔnnkyebo honam a ɔtse awerɛhow na yaw?
Ɔtaa dɛ, Odua hɛn do ma dɛm mboa no! Dɛ yɛyɛ N’Asɔrmba ahyɛmudzifo no, yɛhyɛ bɔ dɛ “[yɛ]nye hɔn a hɔn werɛ ahow dzi hɔn yaw” na “[yɛa]kyekye hɔn a wohia awerɛkyekyer no hɔn werɛ.”19 Osiandɛ “[yɛ]aba Nyame no nguanbuw mu” na “wɔafrɛ [hɛn] no nkorɔfo,” “[yɛ]wɔ pɛ dɛ [yɛ]bɔsoasoa kor biara n’adzesoadze ama ɔayɛ har.”20
Hɛn ahyɛmudzi nhyira nye dɛ yɛnye Jesus Christ bɔbɔ mu dze honandua mu nye sunsum mu mboa, abrɛ Nyankopɔn ne mba nyina Yɛyɛ kwan a Odua do ma mboa.21
Ntsi, tse dɛ nyimpa a ɔyar mbubui n’anyɛnkofo no, “[yɛ]boa hɔn a wɔyɛ mberɛw no, ma nsa a ɔsensɛn famu no do wɔ sor, na [yɛ]ma nkotodwe a wɔagow no mu yɛ dzen.”22 “[Yɛ]soasoa dza ɔyɛ durdur [ma hɛnho] nkorkor, na dɛm no [y]edzi Christ mbra do.”23 Ber a yɛyɛ no, yɛba bohu No, bɛyɛ dɛ Ɔno, na yenya N’ahotɔ.24
Ebɛnadze nye mboa?
Ɔyɛ iriyi biribi efi hɔ anaa erema biribi a ɔyɛ yaw, atseetsee, anaa adzesoa no mu ayɛ mberɛw, anaa erema ahoɔdzen a wɔdze sɔw iyinom. Ɔkyerɛ obi a ɔbɛhyɛ bi n’ananmu. Ɔyɛ mbra mu mfom ho nsiesiei.25 Dɛm Anglo-French kasafua no fi Tsetse French kasafua relever, anaa dɛ “ma do,” nna fi Latin kasafua relevare mu, anaa “ma do bio.”26
Nuambanyin na nkyerɛbaa, Jesus Christ yɛ mboa. Megye dase dɛ Ɔsoɛr bio ndaansa no na, Ɔahyɛ Werdambɔ a ɔyɛ ɔdɔ na ɔmmbɔadze da mã no, Ogyina a Ɔatserɛw n’abasa mu a, Ɔrema hɛn kwan dɛ yɛnsoɛr bio, inya nkwagye, na yenya nkwagye ntowdo mbɛyɛ dɛ Ɔno. Mboa a Ɔdze ma hɛn no yɛ afebɔɔ.
Tse dɛ mbaa no a ɔsor bɔfo bɛseraa hɔn Easter anapa a odzi kan no, mepɛ dɛ “[mi]fir edzi ntsɛm” na medze “dɛw kɛse” bɛkã asɛm no dɛ Ɔasoɛr.27 Hɛn Agyenkwa, Jesus Christ ne dzin mu, amen.