Wiadze Mfɛndzanan Ehyiadzi
Aber Nyina Nyiano no nye Jesus Christ
Ebɔbira 2023 wiadze mfɛndzanan ehyiadzi
6:20

Aber Nyina Nyiano no nye Jesus Christ

President Russell M. Nelson ne Kasaa

Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no ne President

Asɛmbisa anaa asɛnhia biara hom wɔ no, aber nyina mbuae no wobohu no wɔ Jesus Christ ne nkyerɛkyerɛ mu.

Mo nuanom na nkyerɛbaa adɔfo, wɔanyɛn hɛn sunsum mu ara nda ebien yi mu. Adwontokuw ndwom no ayɛ dɛw dodow. Hɔn a wɔakasa ayɛ edwindadze ama Ewuradze. Mobɔ mpaa dɛ hom bɔhwehwɛ Sunsum Krɔnkrɔn ma ɔaboa hom wɔ hom adzesũa mu, ber a hom dwendwen nokwar no a wɔakyerɛkyerɛ efi asɛnkãdaka yi do no. Nokwar, wɔdze fi sor somaa baa.

Dasɛndɛ yɛ Easter Kwesida. Ɔno nye Jesus Christ akadofo hɔn nyamesom afahyɛ tsitsir no. Ɔnam Easter ntsi na yedzi Borɔnya. Dapɛn yi Come, Follow Me adzesũa no bekenyan wo ma esũa Agyenkwa no ne Jerusalem nhɛnee konyimdzi mu, Osiesiee temple no mu, N’amandzehu wɔ Gethsemane Ture no mu, Ne Mbeamuduabɔ, No Wusoɛr, na ekyir No mpuei wɔ N’akadofo do.1

Hom kɔn ndɔ nyiyimu krɔnkrɔn yinom yie na hom nhwehwɛ kwan biara hom botum ada hɛn Ɔsor Egya ase dɛ Ɔasoma No Dɔba a Ɔwoo no Kortoo no ama hɛn.2 Osian Jesus Christ ntsi, yebotum enu hɛnho na wɔdze hɛn bɔn akyɛ hɛn. Osian Ɔno ntsi, hɛn mu kor biara benya wusoɛr.

Moto nsa frɛ hom dɛ hom nsũa Agyenkwa no No mpuei wɔ Nephifo a wɔwɔ America Asaasetɔw no do ho asɛm, dɛ mbrɛ wɔakyerɛw no wɔ 3 Nephi no bio. Ɔka mber kakra ara ansaana dɛm mpuei no, wɔtsee Ne ndze wɔ nkorɔfo no mu, a ntotɔserɛ nsɛm yi kã ho:

“Ana hom rennsan mmba me nkyɛn, na hom nnu homho wɔ hom bɔn ho ma wɔasakyer hom ama maasa hom yarba?

“… Hwɛ, m’ehumbɔbɔr abasa no atsen wɔ hom do, na obiara a ɔbɛba no, ɔno na mebɛgye no.”3

Enuanom na nkyerɛbaa adɔfo, Jesus Christ tsen nsato kor noara ma hom ndɛ. Mototɔ serɛ hom dɛ hom mbra No hɔ ama Oeetum aasa hom yarba! Ɔbɛsa hom yarba efi bɔn ho sɛ hom nu homho a. Ɔbɛsa hom yarba efi awerɛhowdzi na suro ho. Ɔbɛsa hom yarba efi wiadze yi epira kur ho.

Asɛmbisa anaa asɛnhia biara hom wɔ no, aber nyina mbuae no wobohu no wɔ Jesus Christ ne nkyerɛkyerɛ mu. Sũa No Werdambɔ, No dɔ, N’ehumbɔbɔr, Ne nkyerɛkyerɛ, na N’ayarsa, na mpontu asɛmpa nsan-ananmu ho nsɛm mbordo. “Dan kɔ No hɔ! Ka No do!

Jesus Christ nye siantsir a yesisi temple horow. Kor biara yɛ Ne fie krɔnkrɔn. Iridzi ahyɛmu na eregye ayɛdze a ohia tsitsir wɔ temple mu no, na erohwehwɛ so atwe abɛn No yie wɔ hɔ no, behyira w’abrabɔ wɔ akwan a som biara nnkotum ayɛ. Ɔnam siantsir yi ntsi, yɛreyɛ dza ɔwɔ hɛn tum mu biara dɛ yɛbɛma temple nhyira etum abɛn hɛn asɔrmba a wɔwɔ wiadze nyina mu yie. Ndɛ , ɔyɛ me enyisɔ dɛ mobɔ hɛn nhyehyɛɛ dɛ yebesi temple fofor kor wɔ mbea yinom a odzi do yi ho dawur:

  • Retalhuleu, Guatemala

  • Iquitos, Peru

  • Teresina, Brazil

  • Natal, Brazil

  • Tuguegarao City, Philippines

  • Iloilo, Philippines

  • Jakarta, Indonesia

  • Hamburg, Germany

  • Lethbridge, Alberta, Canada

  • San Jose, California

  • Bakersfield, California

  • Springfield, Missouri

  • Charlotte, North Carolina

  • Winchester, Virginia

  • Harrisburg, Pennsylvania

Mo nuanom na nkyerɛbaa adɔfo, megye dase dɛ Jesus Christ na Ɔkyerɛ N’Asɔr no ndwuma kwan. Megye dase dɛ yɛreka No do nye kwan kor pɛr a ogya kɔ enyigye a otsim mu. Minyim dɛ No tum resian N’ahyɛmu-siefo do, hɔn a “wɔdze ndzeyɛtsenenee na enyimnyam nye Nyankopɔn no tum kɛse ayɛ akontar.”4 Megye ho dase, a medze mo dɔ na nhyira ma hom mu kor biara, wɔ Jesus Christ ne dzin mu, amen.