![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fb6%2F1f%2Fb61f0bd0e8748bd881f1cba6a5665f8e0c5929b7%2Fb61f0bd0e8748bd881f1cba6a5665f8e0c5929b7.jpeg/full/!250,/0/default)
Nimanb’ilaq li ki’ilok re Jehova
K’a’jo’ naq osob’tesinb’ilo chixnawb’al li naqanaw sa’ xk’ab’a’ laj Jose Smith, li profeet re xraqik li hoonal sa’ li ruchich’och’ li wanko wi’ anajwan.
Ex raarookil was wiitz’in, nasaho’ inch’ool chi wank sa’ eeyanq chiru li eq’la anajwan. Li Qaawa’ chi osob’tesinq we.
Xsa’ li wu moko juntaq’eet ta chik jo’ sa’ lin saajilal. Xinwulak rik’in laj b’anonel, ut xinye re, “Moko tinruuq ta chirilb’al li tz’iib’leb’.”
A’an kixye we, “Yal xcheeko’ xsa’ laa wu. Moko chaab’ilo’k ta chik re.”
Jo’kan naq tinb’aanu li jo’ taaruuq chiwu.
Nawaj xwotzb’al eerik’in wiib’ oxib’ li na’leb’ wan sa’ lin k’a’uxl. Wilom li profeet aj Jose Smith sa’ lin k’a’uxl chiruheb’ li po xnume’. Ninchunla ut nawil chixjunil lix chaq’al ru k’anjel xb’aanu toj reetal naq xwulak jo’ li profeet re li kutan a’in, lix kʼojlajik lix tzʼaqalil ru li kutan.
Nink’oxla jo’ k’ihal li qab’antioxihom jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan naq laj Jose Smith, jun saaj al li kiwan rajom chixnawb’al k’a’ru tixb’aanu re xk’ulb’al xkuyb’al lix maak, kixkawob’resi xch’ool chi xik sa’ jun li k’iche’ nach’ wan wi’ li rochoch, aran Palmyra, Nueva York, b’ar wi’ kixwiq’ib’ rib’ chi tijok—ut jo’ kixye a’an—toja’ xb’een wa sa’ lix yu’am kixyal tijok chi kaw xyaab’ xkux (chi’ilmanq Jose Smith—Resilal 1:14).
Sa’ li hoonal a’an, naq laj Jose wiq’wo sa’ li loq’laj k’iche’, li choxa xtehe’. Wiib’ chi winq, naxq’ax xlemtz’unkil li saq’e re li wa’leb’, ke’xk’ut rib’ chiru. Jun reheb’ kixye: “[At Jose,] a’an a’in li Walal Raaro inb’aan. Chawab’i a’an!” (Jose Smith—Resilal 1:17). Jo’ a’in naq kitikla lix k’ojob’ankil wi’chik lix tz’aqalil lix evangelio li Jesukristo.
Xb’aan naq li Jesus, li qaKolonel ut aj Tojol qix, kiraatina laj Jose ut kixk’e chi tiklaak xraqik li hoonal sa’ li ruchich’och’ li wanko wi’ anajwan laa’o naqab’icha li b’ich, “Nimanb’ilaq li ki’ilok re Jehovah!” (“Nimanb’ilaq li ki’ilok re Jehovah,” Eb’ li B’ich, 16). Laa’o naqab’antioxi re li Qaawa’ xb’aan laj Jose Smith ut lix kawil xch’ool kiwan re xik sa’ li k’iche’ sa’ 1820 li nach’ wan wi’ li rochoch aran Palmyra, Nueva York.
Yookin chixk’oxlankil chixjunil lix chaq’al ru k’anjel naqanaw ru anajwan ut chixjunil li qanawom wan anajwan. Ex raarookil was wiitz’in, lix nawom inch’ool choq’ eere sa’ li eq’la anajwan a’an naq k’a’jo’ naq osob’tesinb’ilo chixnawb’al chixjunil li naqanaw sa’ xk’ab’a’ laj Jose Smith, li profeet re xraqik li hoonal sa’ li ruchich’och’ li wanko wi’ anajwan.
Naqataw ru li rajom li qayu’am ut naqataw ru aniho laa’o.
Naqanaw ani li Dios; naqanaw ani li Kolonel, sa’ xk’ab’a’ naq wan laj Jose, li kixik chi tijok sa’ li k’iche’ sa’ lix saajilal, xb’aan xsik’b’al xkuyb’al lix maak.
Nink’oxla naq a’an jun lix chaq’al ru nawom naru chixnawb’al junaq sa’ lix yu’am—naq li qaChoxahil Yuwa’ ut li Qaawa’ Jesukristo ke’xk’ut wi’chik rib’ sa’ li kutan a’in ut naq laj Jose kiwaklesiik re xk’ojob’ankil wi’chik lix tz’aqalil lix evangelio li Jesukristo.
Wan qik’in lix Hu laj Mormon. K’a’jo’ xch’ina-usal ut xchaq’al ru maatan lix Hu laj Mormon choq’ qe jo’ komon re li Iglees. A’an jun chik aj yehol esil ut naxch’olob’ naq li Jesus a’an li Kristo. Wan qik’in sa’ xk’ab’a’ naq laj Jose kiwan xk’ulub’ chixsik’b’al li perpookil ch’iich’, chi b’eresinb’il xb’aan li choxa re xjaltesinkil ru rik’in xmaatan ut xwankilal li Dios ut xq’axtesi choq’ re li ruchich’och’.
Us ta li waatin choq’ eere sa’ li eq’la a’in moko ch’a’aj ta xtawb’al ru, a’an cham ut nujenaq rik’in rahom choq’ re li profeet aj Jose Smith ut choq’ reheb’ chixjunileb’ li was wiitz’in, li ke’wan xch’ool chixxaqab’ankil sa’ xsaajilal laj Jose.
Nawan raj xjultikankil woxloq’ chirix lix na’. Junelik nink’oxla lix chaq’alil ru naq laj Jose kisutq’i sa’ ochoch chirix li na’leb’ li kixk’ul sa’ li loq’laj k’iche’ ut kixwotz re lix na’, xLucy Mack Smith, ut a’an kixpaab’.
Ninb’antioxin chirix lix yuwa’, eb’ li ras riitz’in, ut lix komon chik lix junkab’al li ke’tenq’ank re sa’ lix nimal ru teneb’ahom li kixk’e li Qaawa’ sa’ xb’een re wank jo’ profeet re xk’ojob’ankil wi’chik lix evangelio Ii Jesukristo sa’ xb’een li ruchich’och’.
Jo’kan ut, lix nawom inch’ool chiru li eq’la anajwan a’an naq li Jesukristo a’an laj Kolol re ut laj Tojol rix li ruchich’och’. Ninnaw ajwi’ naq li qaChoxahil Yuwa’ ut li Qaawa’ Jesukristo ke’xk’ut rib’ chiru laj Jose, ke’raatina ut ke’xkawresi re wulak jo’ li profeet.
Nasach inch’ool ut nink’oxla naq naab’al ajwi’ eere laa’ex nasach eech’ool chirilb’al naq osob’tesinb’ilo chixnawb’al li naqanaw chirix li qajom sa’ li yu’am a’in, k’a’ut naq wanko arin, ut k’a’ raj ru yooko chixb’aanunkil ut chixq’axb’al ru sa’ li qayu’am wulaj wulaj. Yooko chixyalb’al qaq’e sa’ xkawresinkil qib’, wulaj wulaj, chi chaab’ilo’k chi ka’ch’inq ka’ch’inq, chi tuulano’k, re naq kawresinb’ilaqo sa’ li kutan a’an, li taachalq chi yaal, naq tooruuq chi ok sa’ lix nimajwal wankilal li qaChoxahil Yuwa’ ut li Qaawa’ Jesukristo.
Choq’ we laa’in, a’an ak yoo chi nach’ok. Ok we xmaataninkil 95 chihab’. Eb’ lin kok’al neke’xye we naq wan hoonal neke’xk’e reetal naq wan chi us inchihab’, a’b’an maak’a’ naxye. Yookin chixyalb’al inq’e chixb’aanunkil li chaab’ilal sa’ lin yu’am.
A’b’anan chiru 50 chihab’, ex was wiitz’in, xwan lin hoonal chixb’eeninkil li ruchich’och, jo’ Jolmil aj B’eresinel sa’ li Iglees. A’an jun nimla osob’tesink choq’ we. Nink’oxla naq wanjenaqin sa’ chixjunil li ruchich’och’. Xwan lin hoonal chixch’utub’ankil wib’ eerik’in jo’ komon re li Iglees sa’ chixjunil li ruchich’och’.
K’a’jo’ naq nekexinra. K’ajo’ xchaq’al ru rilb’al xnaq’ lee ru, wank sa’ eeyanq, ut reek’ankil lee rahom chirix li Qaawa’ ut chirix lix k’ojlajik wi’chik lix evangelio li Jesukristo.
A’an taxaq Li qaChoxahil Yuwa’ li taak’aak’alenq qe ut taa’osob’tesinq re li nimla ch’utub’aj-ib a’in. Ut chiwanq taxaq lix musiq’ li Qaawa’ sa’ li qaam, ut li qarahom chirix lix evangelio li Jesukristo—ut chirix li qaraarookil Kolonel, li Qaawa’ Jesukristo—taak’iiq taxaq naq nokok’anjelak chiru ut naqayal qaq’e chixyu’aminkil lix taqlahom ut naq naqayal qaq’e chi wulak jo’ a’an sa’ xk’ab’a’ naq wanko sa’ li jolomil ch’utub’aj-ib’ a’in. Yalaq ta b’ar nekextawliman sa’ li ruchich’och’, li Dios chi’osob’tesinq eere. A’an taxaq lix musiq’ li Qaawa’ wanq qik’in. Chiqeek’a sa’ komonil lix wankil li choxa naq nokoloq’onin sa’ li nimla ch’utub’aj-ib’ a’in.
Ninkanab’ lix nawom inch’ool eerik’in naq li Jesus a’an li Kristo. A’an aj Kolol qe ut aj Tojol qix. A’an tz’aqal li qachaab’il amiiw. Sa’ lix loq’laj k’ab’a’ li Jesukristo, amen.