![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fad%2F0d%2Fad0d2e68a4d6a82ff66bb69bceb91bb06337e644%2Fad0d2e68a4d6a82ff66bb69bceb91bb06337e644.jpeg/full/!250,/0/default)
Xwotzb’al qanawom chirix li Jesukristo rik’in aatin ut b’aanuhom
Sa’ xyalb’al qaq’e chixk’amb’al qib’ rik’in lix evangelio li Jesukristo, li qawanjik a’anaq jun aj yehol nawom chirix laj Tojol qix.
Naq nakub’e qaha’, jun reheb’ li yeechi’ihom naqab’aanu a’an naq naqak’ul sa’ qab’een lix k’ab’a’ li Jesukristo. Li wajom anajwan a’an xjultikankil naq naru naqak’ut chiru li Dios naq naqak’ul sa’ qab’een lix k’ab’a’ li Ralal naq naqawotz qanawom rik’in aatin ut b’aanuhom, rajlal naq nokoru, naq li Jesus a’an li Kristo.
Naq kixk’aak’aleheb’ ut kixtzoleb’ li kristiaan arin America chirix lix waklijik chi yo’yo, li Jesukristo kixye:
“Ma inkʼaʼ xeʼrilebʼ ru li loqʼlaj hu, li nekeʼyehok re naq tento teekʼul saʼ eebʼeen lix kʼabʼaʼ li Kristo, aʼan inkʼabʼaʼ laaʼin? Xbʼaan naq rikʼin li kʼabʼaʼej aʼin texbʼoqeʼq saʼ rosoʼjik li kutan;
“Ut ani nakʼuluk re lin kʼabʼaʼ saʼ xbʼeen, ut nakuyuk toj saʼ rosoʼjik, aʼan ajwiʼ taakoleʼq saʼ rosoʼjik li kutan.”1
Li Awa’b’ej Russell M. Nelson xk’ut chiqu naq “naqak’ul sa’ qab’een lix k’ab’a’ li Kolonel naraj naxye naq taqak’ut ut taqach’olob’ xyaalal chiruheb’ li jalaneb’ chik—rik’in qab’aanuhom ut qaatin—naq li Jesus a’an li Kristo.”2
Jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, osob’tesinb’ilo xb’aan naq laa’o laj yehol nawom chirix li Qaawa’ ut lix k’ab’a’ yalaq b’ar wanqo.3 Sa’ xyalb’al qaq’e chixk’amb’al qib’ rik’in lix evangelio li Jesukristo, li qawanjik a’anaq jun aj yehol nawom chirix laj Tojol qix ut lix k’ab’a’. A’ut, naqach’olob’ xyaalal li Kristo rik’in qaatin naq naqawotz li naqapaab’, li naqeek’a, malaj naqanaw chirix li Jesukristo rik’ineb’ li qas qiitz’in.
Naq rik’in tuulanil naqawotz lix nawom qach’ool chirix li Qaawa’ rik’in qaatin ut qab’aanuhom, li Santil Musiq’ej naxch’olob’ xyaalal4 chiruheb’ li wankeb’ rajom, li teetokeb’ li raam ut xk’a’uxl re xnawb’al naq li Jesus a’an tz’aqal li Kristo.5
Nawaj xwotzb’al wiib’ li eetalil chirixeb’ li komon sa’ li Iglees li ke’xk’ul sa’ xb’eeneb’ lix k’ab’a’ li Jesukristo naq neke’aatinak ut neke’xwotz xnawomeb’ chirix li Qaawa’ sa’ li Iglees.
Xb’een eetalil: Naq li wixaqil, xElaine, ut laa’in koowulak chaq aran España chiru li chihab’ 2022, xootz’aqon sa’eb’ li ch’utam re domingo sa’ jun li ch’ina ch’uut re li Iglees aran. Naq yookin chaq chi chunlaak toj chi uub’ej ut li wixaqil sa’ xyanqeb’ li komon, xink’e reetal naq wan chixk’atq jun li ixq ak cheek. Naq kiraqe’ li ch’utam re li loq’laj wa’ak, kinb’eek toj b’ar wi wan li xElaine ut kinpatz’ re naq tixye we ani lix ak’ amiiw. Kixb’aanu ut kixye naq li ixq a’an, moko komon ta sa’ li Iglees, maare naxk’am wiib’ chihab’ rula’aninkil li Iglees. Naq kiwab’i a’an, kinpatz’ re li ixq a’an li naxxuwa ru li Dios k’a’ru xb’aanunk re naq taaraj tz’aqonk sa’ li Iglees chiru li wiib’ chihab’ a’an. Li ixq kisumen rik’in rahom, “nawulak chiwu chalk arin xb’aan naq neke’aatinak chirix li Jesukristo sa’ lee ch’utam.”
Chi yaal tz’aqal, eb’ li komon re li Iglees aran España ke’aatinak chirix, ke’xk’ut, ut ke’xch’olob’ xyaalal li Kristo sa’eb’ li ch’utam.
Xkab’ eetalil: Chirix naq kink’anjelak aran Brasil, kinb’oqe’ chi k’anjelak sa’ lix oficiin li Iglees. Naq kooq’axon aran Lago Salado chiru li po julio re li chihab’ a’in, nokotz’aqon sa’ li ak’ ut ch’ina-usil teep. Jun reheb’ li ch’utam a’in a’an li kuyuk sa’ ut xwotzb’al li qanawom. Chirix li tz’aqonk sa’ li loq’laj wa’ak, eb’ li komon ke’xaqli jun chirix li jun ut ke’xwotz xnawomeb’ chirix li Kolonel. Li ch’uut ki’aatinak chirix li Jesukristo, ut kooru tz’aqal chireek’ankil li Musiq’ej. Kookawresiik ut li qapaab’aal kikawu. Wi li qamiiw li yookeb’ chixsik’b’al li yaal, xe’wan raj sa’ li ch’utam a’an, xe’ru raj xnawb’al naq a’in lix Iglees li Jesukristo.
Jwal osob’tesinb’ilo sa’ rilb’al naq li qach’utam a’an jun hoonal re naq taqach’olob’ xyaalal li Kristo ut taqak’ut chiru li Dios naq nasaho’ sa’ qach’ool chixk’ulb’al sa’ qab’een lix k’ab’a’ li Ralal.
A’ut anajwan, nawaj xyeeb’al jun li eetalil b’ar wi’ naqak’ul sa’ qab’een lix k’ab’a’ li Jesukristo naq naqak’e xnawom qach’ool chirix a’an rik’in qab’aanuhom.
Chiru li po agosto, xwochb’eeni li Elder Jonathan S. Schmitt re xk’ulb’aleb’ li ula’ sa’ li santil ochoch re Feather River California, aran Yuba City. Aran xinru chixk’utb’al xsa’ li santil ochoch chiruheb’ li ula’. Sa’ jun reheb’ li ch’uut wan jun li komon re li Iglees, laj Virgil Atkinson, ut wuqub’ li ramiiw re jalan chik li ch’utleb’aal. Sa’ xraqb’al li ula’anink, sa’ li na’jej re tz’ape’k sa’ junajil sa’ li santil ochoch, li Hermano Atkinson jwal xnumta xsahil xch’ool naq kixk’ut xrahom choq’ reheb’ li ramiiw li xe’ru chi’ok sa’ li santil ochoch chiru li kutan a’an. Sa’ li hoonal ajwi’ a’an chirix naq xwotz lix sahil xch’ool, jun ixq re li ch’uut xxaqli ut xye, “Jwal xwulak chiqu at Virgil. Maajun wu xmin qu rik’in lix paab’aal. A’b’an a’an ink’a’ ajwi’ naxutanaak chirix lix paab’aal. A’an naxyu’ami li naxpaab’.”
Chiru xnumikeb’, li chihab’, lix yu’am li Hermano Atkinson jo’ komon xwan jo’ jun kawil eetalil choq’ reheb’ li ramiiw. Lix b’aanuhom a’an naxk’ut naq xk’ul sa’ xb’een lix k’ab’a’ li Kristo.
Re xraqb’al, nawaj xwotzb’al li na’leb’ xintzol naq naqak’ul sa’ qab’een lix k’ab’a’ li Kristo ut naq naqach’olob’ xyaalal a’an naq naqoksi lix k’ab’a’ li Iglees chi tz’aqal.
Li Awa’b’ej Nelson, lix yo’yookil profeet li Dios, sa’ li raatin kixye sa’ li jolomil ch’utub’aj-ib’ re 2018 li naxk’ab’a’in “Tz’aqal xk’ab’a’ li Iglees,” kixye: A’an a’in … jun li tuqub’ank. A’an a’in … lix taqlahom li Qaawa’. Laj Jose Smith ink’a’ kixk’e xk’ab’a’ li Iglees; chi moko laj Mormon. A’an b’an li Kolonel li kixye, “Xb’aan naq jo’ka’in taayeemanq re lin iglees sa’ roso’jikeb’ li kutan, a’anaq ajwi’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan” [Tzol’leb’ ut Sumwank 115:4].”6
Chiqajunilo xoo’el sa’ li jolomil ch’utub’aj-ib’ sa’ li kutan a’an chi wan tz’aqal qach’ool chixpaab’ankil li profeet ut chiroksinkil lix k’utb’esinb’il k’ab’a’ li Iglees chi tz’aqal re ru. Xwil wib’ laa’in ut re naq tinwoksi lix k’ab’a’ li Iglees chi tz’aqal re ru. Sa’ xtiklajik xink’oxla rajlal re naq ink’a’ tinye jo’ ninye junxil. Chirix naab’al sut xb’aanunkil, xweek’a’ naq moko ch’a’aj ta chik choq’ we roksinkil chi tz’aqal re ru lix k’utb’esinb’il k’ab’a’ li Iglees. Ninnaw naq naab’al sut, xinye sa’ junpaat lix k’ab’a’ li Iglees. Na’ok b’ayaq ink’a’uxl naq eb’ li kristiaan ink’a’ te’raj rab’inkil chixjunil xk’ab’a’ li Iglees ut te’xk’oxla naq nim xyeeb’al.
A’b’anan, moqon xink’e reetal naq sa’ xyeeb’al chi tz’aqal lix k’ab’a’ li Iglees rik’in wajom, yookin chixwotzb’al innawom chirix li Kolonel naq ninye lix k’ab’a’ sa’ xyeeb’al lix k’ab’a’ lix Iglees. Jo’kan ajwi’ xink’e reetal naq rik’in roksinkil lix k’ab’a’ li Iglees chi tz’aqal re ru rik’ineb’ jalan chik li kristiaan, rajlal chik nanaq sa’ inch’ool li Jesukristo ut naweek’a lix tenq’ sa’ lin yu’am.
Sa’ xtaaqenkil li profeet, chiqajunilo naru naqach’olob’ xyaalal li Jesukristo sa’ roksinkil lix k’ab’a’ chi tz’aqal li Iglees, ut chi jo’kan xk’ulb’al lix k’ab’a’ li Qaawa’ sa’ qab’een.
Chiru li hilob’aal kutan a’in, ninch’olob’ xyaalal chi sa lin ch’ool naq li Awa’b’ej Nelson a’an lix yo’yookil profeet li Dios ut naq Lix Iglees li Jesukristo Reheb’ laj Santil Paab’anel sa’ Roso’jikeb’ li Kutan a’an lix Iglees li Kristo li k’ojob’anb’il wi’chik. Ninch’olob’ xyaalal li Ralal li Dios ut lix choxahilal. A’an li Xb’een Yo’lajenaq ut li Kʼajolbʼej Junaj Chiribʼil chiru li Dios, laj Kolol qe ut laj Tojol qix, laj Emmanuel.7 Sa’ xk’ab’a’ li Jesukristo, amen.